Akapeea e Raukai ia Koe te Akavaitata ki te Atua

“E akavaitata atu ki te Atua, e nana e akavaitata mai kia kotou,” i akakite ei a Iakobo 4:8. Te akaari mai anga e mei teaa te maata i to te Atua ko Iehova inangaro i te au tangata kia piri vaitata kiaia, kua oronga mai aia i tana Tamaiti no tatou.

I TE ariu atu anga ki te reira, kua tata te apotetoro ko Ioane e: “Te anoano nei tatou [i te Atua], no te mea koia ana tei anoano mai ia tatou nei.” (1 Ioane 4:19) Inara e raukai ia tatou uaorai i te akavaitata ki te Atua, ka tika tatou kia rave i tetai au takainga. Te aiteite ra te reira ki te au mataara e a ka rauka ia tatou i te akavaitata ki te au taeake tangata, mei tei akatakaia mai i te atikara i mua akenei. Ka akara ana tatou i teia.

Akara Meitaki i te Au Tu Umere o te Atua

E manganui to te Atua au tu umere, etai tei kite meitakiia ko tona aroa, pakari, tika, e te mana. Te akatutu maata ia maira tona pakari e te mana i roto i te ao katoa e pini ua ake e i roto i te ao takapini ia tatou, mei te au tarava maata ki te au atomu iti ua. Kua tata te tata taramo: “Te tuatua nei te au rangi i te kakā o te Atua; e te akakite nei te reva i te angaanga a tona rima.”​—Salamo 19:1; Roma 1:20.

Te akaata katoa ra te au mea angaia i to te Atua tu aroa. Ei akaraanga, te tu i maaniia mai ei tatou, te akaari ra e te inangaro maira te Atua ia tatou kia rekareka i te oraanga. Kua oronga mai aia kia tatou i te tu kia kite i te au kara, kia tamata e kia ongi, kia ariki i te akatangi imene, kia kata ua, kia rekareka i te tu manea, e pera katoa te orongaanga mai kia tatou tetai atu au tu kite e te au tu e manganui kare i anoanoia tikai no te oraanga. Ae, e tu oronga ua tikai to te Atua, takinga meitaki, e te aroa ua​—e au tu kare e ekoko anga te kapiti ra kiaia ei “Atua kakā.”​—1 Timoteo 1:11; Angaanga 20:35.

Te rekareka ngakau parau ra a Iehova e ko te akonoanga i tona tu ngateitei e te turuanga o te reira e tana au mea ora kite kua akanooia ki runga i te aroa. (1 Ioane 4:8) E tika, ko Iehova te Ngateitei Rava i te Ao Katoa e Pini Ua Ake, inara te akono ra aia i te au tangata, koia tikai tona au tavini tiratiratu, mei tetai metua inangaro e akono ra i tana tamariki. (Mataio 5:45) Kare aia e tapupu i tetai apinga ei meitaki rai no ratou. (Roma 8:​38, 39) Mei tei taikuia, kua oronga aia i te oraanga o tana Tamaiti anau tai no tatou. Ae, ko te aroa o te Atua te tumu i vai mai ei tatou e kua rauka te manakonakoanga o te oraanga mutu kore.​—Ioane 3:16.

Kua oronga mai a Iesu i te kite oonu i roto tikai i to te Atua tu peretana no te mea kua aru apa kore aia i tona Metua. (Ioane 14:​9-11) Kare aia i manako ua iaia uaorai, te akono ua anga, e te manako anga. I tetai atianga, kua apainaia atu a Iesu ki tetai tangata taringa turi e kare e rauka i te tuatua taka meitaki. Ka rauka ia koe i te akamanako e kare taua tangata ra i ngoie ua i te au ngai tangata. Ma te umere, kua taki atu a Iesu i teia tangata ki tetai ngai ko raua ua e kua rapakau iaia i reira. (Mareko 7:​32-35) Te ariki ra ainei koe i te au tangata te manako ra i toou au manako ngakau e te akangateitei ra i toou tu ngateitei? Me koia ia, ka rauka i reira ia koe i te akavaitata kia Iehova raua ko Iesu ia koe e apii maata ra no runga ia raua.

Ka Akamanako Ana i to te Atua Au Tu

Ka rauka i etai te au tu meitaki, inara ka tika tatou kia akamanako i te reira tangata e raukai te akavaitata atu kiaia. Te tau ra rai te reira kia Iehova. Te akamaaraaraanga i tona au tu ko te rua ia o te takainga puapinga no te akavaitata anga kiaia. Kua tuatua te Ariki ko Davida, e tangata tei inangaro tikai ia Iehova e “tangata e tau i [to Iehova] ngakau,” e: “Te manako nei au i te tuatau taito ra; te akamaaraara nei au i taau ra au angaanga katoa; te akaeatu ua nei au i te au angaanga a to rima ra.”​—Angaanga 13:22; Salamo 143:5.

Me akara koe i te au mea umere o te mea angaia me kore tatau i te Tuatua a te Atua, te Pipiria,  te akamaaraara ra ainei koe, mei ia Davida rai, i taau e kite ra e te tatau ra? Ka akamanako ana i tetai tamaiti koi rauka mai iaia tetai reta no ko mai i tona metua tane tana e inangaro oonu ra. Eaa tona manako i te reira reta? Kare aia e akara ua i to roto e ka tuku viviki i te reira ki roto i te pia. Mari ra, ka akara meitaki aia i te reira, te rave mai anga mei te reira i te au akataka anga e te tu akatakake anga. Pera katoa, kia puapinga te Tuatua a te Atua kia tatou, mei te tata taramo rai tei imene: “Te maata rava nei toku inangaro i taau ra ture! Ko toku ïa maaraara anga i te au rā katoa nei.”​—Salamo 119:97.

Akono Tamou i te Komunikeiti Anga Meitaki

Ko te komunikeiti anga meitaki te toto ora o tetai ua atu piri anga. Te o maira te tuatuaanga e te akarongoanga​—kare ua ma te manako pera katoa ma te ngakau. E tuatua ana tatou ki Tei Anga na roto i te pure, e komunikeiti anga ngateitei ki te Atua. E reka ana a Iehova i te au pure a te aronga te inangaro ra iaia e te tavini ra iaia e te akatika ra ia Iesu Karaiti e ko Tona komono maata.​—Salamo 65:2; Ioane 14:​6, 14.

I te tuatau i topa, kua tuatua te Atua ki te au tangata na roto i te au mataara tuke tuke, kapiti mai i te au orama, te au moemoea, e na roto i te au angera. Inara, i teia tuatau, te rave nei aia i te reira na roto i tana Tuatua tataia, te Pipiria Tapu. (2 Timoteo 3:16) E manganui te au tu meitaki o te Tuatua tataia. Ka rauka i te akaraia i tetai ua atu taime. Mei tetai reta rai, ka rauka te reira i te akara rekareka uaia. E kare te reira i tarurike ia tei akairoia i roto i te tuatua akakite akaouia. No reira e akamanako i te Pipiria ei au reta akaputuputu maataia mei toou Metua akaperepere i te rangi ra, e na roto i teia au reta e tuku iaia kia tuatua kia koe i te au ra.​—Mataio 4:4.

Ei akatauanga, te akanoo maira te Pipiria i to Iehova manako no runga i te tika e te tarevake. Te akamarama ra te reira i tona akakoroanga no te tangata ravarai e no te enua. E te akaari maira te reira i tana akonoanga i te au tangata tuke tuke e te pa enua, mei te aronga akamori tiratiratu ki te au enemi rikarika ra. Na te rekoti anga i tana akono anga i te au tangata na teia tu, kua peni meitaki tikai a Iehova i tona tu peretana akatakaia. Te akaari maira aia i tona inangaro, rekareka, taitaia, mareka kore, tu riri, tangi aroa, manako anga​—ae, te akapapa anga o tona au manako e te au manako ngakau, e te au tumu no teia​—pouroa na roto i tetai tu ka marama uaia e te au tangata ravarai.​—Salamo 78:​3-7.

I muri ake i taau tatau anga i tetai tuanga o te Tuatua a te Atua, akapeea koe i te puapinga anga mei taau tatau anga? E, i tetai tu, akapeea koe me akavaitata ki te Atua? Te mea mua, e akamanako ana no runga i taau i tatau e tei apii mai no runga i te Atua ei peretana, te tuku anga e kia puta te au tumu manako ki roto i toou ngakau. E oti na roto i te pure e akakite kia Iehova i toou au manako e toou au manako ngakau i roto roa no runga i taau i akamanako e akapeea koe i te tauta anga e kia puapingaia mei te reira. E komunikeiti anga te reira. Ae, me e au manako ke atu toou, ka rauka teia kia kapitiia mai i roto i taau pure.

E Rave Kapipiti i te Au Mea ma te Atua

Te akakite ra te Pipiria no runga i te au tangata tiratiratu taito e kua aaere ratou, me kore ki mua, i te Atua mou. (Genese 6:9; 1 Ariki 8:25) Eaa te aite anga o te reira? Te mea puapinga e kua akono ratou i te au ra taki tai mei te mea ra e tei ko te Atua ia ratou. E tika, e aronga ara ua ratou. Inara, kua inangaro ratou i te au ture e te au kaveinga a te Atua, e kua akono rotai ratou i ta te Atua akakoroanga. Te vaitata ra a Iehova ki taua aronga, e te manako maira aia ia ratou, mei tei akaariia ia  Salamo 32:8: “E apii atu au ia koe, e akakite atu ei kia koe i taau arataa kia aere ra; e ako atu au ia koe; ei runga ia koe toku mata vaoo ei.”

Ka rauka katoa ia koe i te akariro ia Iehova ei oa piri vaitata​—tetai te aaere ra ma ia koe, te manako maira ia koe, e te oronga maira i tetai ako anga mei te metua tane rai. Kua akataka te peroveta ko Isaia ia Iehova e ko “tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra.” (Isaia 48:17) Ia tatou e kite ra i te au puapinga, ka kite tatou i to Iehova vai mai anga “tei [to tatou] rima katau,” mei tera te tu, mei ta Davida i rave.​—Salamo 16:8.

To te Atua Ingoa—Te Tumu Anga o Tona Au Tu

E manganui te au akonoanga e e maata te numero o te au uri anga Pipiria kua poka no te taangaanga anga e te akakite aere i to te Atua uaorai ingoa. (Salamo 83:18) Inara, i roto i te tataanga Epera mua, ko te reira ingoa​—Iehova​—te kiteaia ra vaitata i te 7,000 taime! (Kare i tamou, koi akaatea ei i te ingoa tu-Atua, kua tamou te maata anga o te aronga uri Pipiria i te au ingoa e manganui o te au atua pikikaa taikuia i roto i te tataanga mua, mei ia Baala, Bela, Merodaka, e Satani katoa!)

Te manako ra etai au tangata e ko te akaruke anga i te ingoa o te Atua e mea matauia. Inara ka akamanako ana: E mea ngata ainei me kore ngoie ua kia tatanu i tetai pirianga akamaramaia e te vaitata ma tetai peretana kare e ingoa? Te au taoonga mei te Atua e te Atu (te taiku katoa ia ra ki te au atua pikikaa) penei ka tuatua no runga i to Iehova mana, mana akaaere, me kore turanga, inara na tona uaorai ingoa i akatakake iaia kare e te aiteite ra. (Exodo 3:15; 1 Korinetia 8:​5, 6) Te opu ra te ingoa uaorai o te Atua mou i tona au tu e te au tu peretana. Kua akakite tau tikai tetai tangata Apiipii Akonoanga ko Walter Lowrie e: “Ko tetai tangata kare i kite i te Atua ma tona ingoa kare tikai i kite iaia ei peretana.”

Ka akamanako ana i te akaraanga o Maria, e Katorika ngakau tae te noo ra i Autireria. I te aravei mua anga te Au Kite o Iehova iaia, kua akatika a Maria i te Au Kite kia akaari kiaia i roto i te Pipiria i to te Atua ingoa. Akapeea aia i te ariu atu anga? “I te kite mua anga au i te ingoa o te Atua i roto i te Pipiria, kua aue au. Kua akakeuia au no te kite anga e ka rauka iaku i te kite e te taangaanga i te ingoa uaorai o te Atua.” Kua apii tamou ua atu a Maria i te Pipiria, e no te taime mua i roto i tona oraanga, kua kite aia ia Iehova ei peretana e kua rauka i te patu i tetai pirianga mutu kore ma ia.

Ae, ka rauka ia tatou i te “akavaitata atu ki te Atua,” noatu rai kare e rauka ia tatou i te kite mata atu iaia. Ka “kite” ra tatou i tona tu peretana manea tikai i to tatou au manako e te au ngakau e i reira ka tupu ei to tatou inangaro iaia. Ko taua aroa e “tatua apa kore ua ra ïa.”​—Kolosa 3:14.

 [Au Tutu i te kapi 7]

Akamanakoanga i te au mea angaia e Iehova ko tetai mataara ia no te akavaitata atu kiaia