Au Uianga a te Aronga Tatau

I te marama anga i ta te Pipiria au akauenga no runga i te taangaanga meitaki i te toto, eaa to te Au Kite o Iehova manako no runga i te au ravenga i te pae vairakau no te taangaanga anga i to tetai uaorai toto?

I te mea e ka iki ki runga i taau i manako me kore tetai manako tei tuatuaia mai i te pae vairakau, ka tika te au Kerititiano tataki tai kia tamanako pakari no runga i ta te Pipiria e akakite ra. E tumu manako ia i rotopu ia raua ko Iehova.

Kua akaue a Iehova, ko tei kaiou tatou i to tatou oraanga kiaia, e auraka e kai i te toto. (Genese 9:​3, 4) I roto i te Ture no Iseraela taito, kua kotinga te Atua i te taangaanga anga i te toto no te mea te komono ra te reira i te ora. Kua akaue aia: “Tei te toto oki te ora e oraʼi te au mea katoa ra; i akono ei au i te reira e ko ta kotou ïa e apai ki runga i te atarau, ei tapokiangaara na kotou uaorai.” Akapeea me ka tamate tetai tangata i te animara ei kai? Te tuatua ra te Atua: “Ka akataʼe aia i tona toto ki raro, ka tapoki ei ki te one.” * (Levitiku 17:​11, 13) Kua ripiti ua rai a Iehova i teia akauenga. (Deuteronomi 12:​16, 24; 15:23) Te akakite ra te Soncino Chumash ngati Iuda e: “Auraka te toto e akaputuia inara kua manakoia e kare i tau kia kainga ia na te akataeanga i te reira ki runga i te one.” Kare tetai Iseraela e akaputu me kore e taangaanga i te toto o tetai mea ora, tona ora tei te Atua ia.

Te apainga kia akono i te Ture a Mose kua ope ia i te matenga te Mesia. Inara, te vaira rai to te Atua manako no runga i te tapunui o te toto. Tei akakeuia e te vaerua tapu o te Atua, kua akaue te au apotetoro i te au Kerititiano ‘auraka e kai i te toto.’ Auraka te reira akauenga e kia manako ngoie uaia. Te puapinga ra te reira i te pae akono mei te kore e rave i te ainga tau kore me kore itoro. (Angaanga 15:​28, 29; 21:25) I te riro anga mai te orongaanga e te pamuanga i te toto ei mea matauia i te 20 anere mataiti, kua marama te Au Kite o Iehova e te patoi ra teia rave anga i te Tuatua a te Atua. *

I tetai atianga, ka raurau tetai taote i tetai tangata maki e kia oronga atu i tona uaorai toto no tetai au epetoma i mua ake i te vai anga (preoperative autologous blood donation, me kore PAD) me tupu mai te anoano anga i te reira, ka rauka iaia i te pamu ki roto i te tangata maki i tona uaorai toto akaputuia. Inara, te patoi tika ra te reira koianga, akaputuanga, e te pamuanga toto i tei tuatuaia ia Levitiku e Deuteronomi. Auraka te toto e akaputuia; kia akataeia ra te reira​—kia akaokiia ki te Atua, mei tera te tu. E tika, kare te Ture a Mose e vai ana i teia tuatau. Noatu rai, te akangateitei ra te Au Kite o Iehova  i te au kaveinga ta te Atua i kapiti atu ki roto i te reira, e te aruaru pakari ra ratou ‘auraka e kai i te toto.’ No reira, kare tatou e oronga ana i te toto, kare katoa tatou e akaputu ana no te pamu anga i to tatou toto tei tau kia ‘akataʼeia ki raro.’ Te patoi ra te reira ravenga i te ture a te Atua.

Kare atu tetai au ravenga me kore kimikimi anga te o maira te toto o tetai tangata e patoi ana i te au kaveinga akakiteia e te Atua. Ei akatauanga, e manganui te au Kerititiano kua tuku i etai o to ratou toto kia kiritiia ei kimikimi anga me kore akara meitaki anga, i muri ake i te reira kua titiriia te reira. Tetai atu au ravenga ngata te o maira to tetai uaorai toto penei ka tuatuaia mai.

Ei akaraanga, i tetai au ravenga vai anga, penei ka akauri keia etai toto mei te kopapa i roto i tetai raveanga tei tapaia e ko te hemodilution. Kua kairoia te toto e vaira i roto i te tangata maki. I muri mai, kua akaokiia mai tona toto tei aere na vao ki roto iaia, te akariro anga e kia tau ua tona blood count. Ma te aiteite, te toto te tae ra ki roto i te ngai kinokino penei ka opuia e ka tamaia e raukai te au teera muramura kia akaokiia ki te tangata maki; te tapaia ra teia e ko te cell salvage. I roto i tetai ravenga tuke, ka akatikaia te toto ki tetai matini te rave ra i te au angaanga raveia e te au mero kopapa (ei akaraanga, te pukuatu, te au ate mama, me kore te au mape). I reira kua akaokiia te toto mei te matini ki roto i te tangata maki. I roto i tetai atu au ravenga, kua akauri keia te toto ki tetai (matini centrifuge) akatakake e raukai tetai au tuanga akakinoia me kore kare e meitaki ana i te akaateaia. Me kore te akakoroanga penei koia kia akatakake i etai o te au mea toto e kia tuku i te reira ki tetai atu ngai o te kopapa. Te vai katoa ra etai au kimikimi anga e kua akaateaia tetai tuanga toto e raukai te oronga atu me kore kairo i te reira ma tetai atu au vairakau, i reira kua tukuna akaouia ki roto i tetai tangata maki.

Penei ka tuke te akataka anga, papu rai ka maaniia tetai au ravenga ou, au rapakau anga, e te au kimikimi anga. Kare i te apainga na tatou kia akara meitaki i te au tuke anga e ka iki ei. Kia iki tetai Kerititiano nona uaorai e akapeea tona uaorai toto me akonoia i roto i te ravenga vai anga, kimikimi anga pae vairakau, me kore rapakau anga matauia. I mua ake i te reira, ka tau aia kia uiui ki te taote me kore aronga kite karape i te au tuatua no runga i te ka raveia ki tona toto i te tuatau o te vai anga. I reira ka iki aia kia tau ki tei akatikaia e tona akava ngakau. (Akara i te pia.)

Kia akamanako te au Kerititiano i to ratou akatapu anga ki te Atua e te apainga kia ‘inangaro atu iaia ma to ngakau katoa, e ma to vaerua katoa, e ma to ririnui katoa, e ma to manako katoa.’ (Luka 10:27) Kare mei te maata anga o te ao, te akaperepere maata ra te Au Kite o Iehova i to ratou pirianga meitaki ma te Atua. Te raurau maira Tei Oronga i te Ora i te katoatoa kia irinaki ki roto i te toto akamaringiia o Iesu. Ka tatau tatou: “Nona [ia Iesu Karaiti] i raukaʼi te ora ia tatou i tona toto, i te akakore anga i te ara nei.”​—Ephesia 1:7.

[Au Tataanga Rikiriki i Raro]

[Pia/Au Tutu i te kapi 31]

AU UIANGA KIA UI KOE UAORAI

Me ka akauri keia etai o toku toto i vao ake i toku kopapa e penei ka tamanataia te tere anga no tetai taime, ka akatika ainei toku akava ngakau iaku kia akara i teia toto ei tuanga noku, te umuumu anga auraka te reira e ‘akataʼeia ki raro’?

Ka manamanata ainei toku akava ngakau tereniia e te Pipiria me i te tuatau o te akaraanga me kore ravenga rapakau e kua kiritiia mai etai o toku toto, kua akatanotanoia, e kua akaokiia ki roto (me kore ki runga) i toku kopapa?