Ka Rauka Ainei ia Koe te Akavaitata ki Tetai Atua Kitea Koreia?
Ka Rauka Ainei ia Koe te Akavaitata ki Tetai Atua Kitea Koreia?
‘Akapeea e raukai iaku i te akatupu i tetai pirianga vaitata ma tetai kare e kitea e au?’ ka ui koe. Penei ka akara anga tau te reira ui anga. Inara ka akamanako ana:
MEI teaa te puapinga i te kite anga no te akatupuanga i te au pirianga inangaro e te mutu kore? Kare ainei e te aiteite ra te au tumu kitea koreia, me kare e maata atu, te puapinga? E tikai! No te reira tumu kua akatupu etai au tangata i tetai pirianga vaitata ma tetai na roto i te tata putuputu ki tetai e tetai—te akakite tika ra ta ratou au reta i te au inangaro, te tu reka kore, te au akakoroanga, te au kaveinga, te tu katakata, e tetai atu au tu peretana me kore au anoano.
Te akatutu maira te aronga matapo e kare te kite anga i te mea puapinga tikai no te akatupuanga i tetai pirianga vaitata ma tetai tangata. Ka akamanako ana i te akaraanga o Edward raua ko Gwen, e nga tokorua akaipoipo matapo. * Kua aravei a Edward ia Gwen i tetai apii no te matapo, i reira e tamaine apii katoa aia. Kua reka tikai aia i to Gwen au tu, tona tu tika tikai i te pae tuatua e te akono, e tona tu meitaki ki tana angaanga. Aru mai, kua reka katoa a Gwen ia Edward no te mea, i nana ei, “kua akaari aia i te au tu taku i irinaki ei mea puapinga.” Kua tupu mai te akainangaro anga, e e toru mataiti i muri mai kua akaipoipo raua.
“Me kapipiti korua,” i na Edward ei, “kare te matapo e akatuke tikai i te patuanga i tetai pirianga ma tetai tangata. Penei kare e rauka ia korua te kite atu i tetai e tetai, inara kare te au inangaro i akamatapo ia.” Teianei, e 57 mataiti i topa, te inangaro oonu nei rai raua ia raua. Kua akamarama mai raua e ko te apinga muna ki to raua pirianga meitaki te o maira e a au mea: (1) te kiteanga i te au tu o tetai tangata, (2) te manakoanga e te akavaitata anga ki te reira au tu, (3) akono tamouanga i te komunikeiti anga meitaki, e (4) te rave kapipiti anga i te au mea.
E puapinga tikai teia nga tumu e a ki tetai ua atu pirianga meitaki, me i rotopu i tetai nga oa, au patana akaipoipo me kore, tei maata atu, i rotopu i te au tangata e te Atua. I roto i te atikara ka aru mai, ka kite tatou e akapeea te taangaangaanga i teia au tumu i te tauturu anga ia tatou kia tatanu i tetai pirianga vaitata ma te Atua, noatu rai kare tatou e kite ana iaia. *
[Au Tataanga Rikiriki i Raro]
^ para. 4 Tauiia te au ingoa.
^ para. 6 Tuke mei tetai pirianga i rotopu i te au tangata, kua akanooia tetai pirianga ma te Atua ki runga i te akarongo e te vai ra aia. (Ebera 11:6) No tetai uriurianga meitaki no te patuanga i tetai akarongo ketaketa i te Atua, e akara ine i te Is There a Creator Who Cares About You?, neneiia e te Watchtower Bible and Tract Society of New York, Inc.