Ka Tau Ainei Koe i te Kimi i Tetai Atu Au Akonoanga?

“E AKAPUTUPUTU ana au i te uipaanga Kerititiano e vaitata i te okotai mataiti, e kua rekareka au i te akakitekite atu ki etai ke no runga i te Patireia o te Atua,” i na Miguel ei, koia tetai o te Au Kite o Iehova i Aperika Apatonga i teianei. “E kua akamata au i reira i te akarongo atu ki te au porokaramu akonoanga ki runga i te ratio e te akarakaraanga i te au orometua na runga i te tivi. Kua manako au e ka tauturu taua au porokaramu iaku kia marama meitaki i te au tangata o etai au akonoanga ke. Kua kite au e kare ta ratou au apiianga e rotai ana ma te Pipiria, inara kua inangaro au i te kite.”

I taua enua rai, kua maroiroi a Jorge i te apiianga i etai atu no runga i te akamorianga mou. Inara, i tetai taime, kua akamata katoa aia i te akarongo atu ki te au porokaramu akonoanga na runga i te ratio e te tivi. “Ka tau rai koe kia kite eaa to etai atu manako,” i nana ei. I te ui angaia kiaia no runga i te au manamanata o te akarongo anga ki te au apiianga pikikaa, kua pau mai aia e: “Kare tetai apinga e taparuparu i te akarongo o te tangata tei kite i te tuatua mou Pipiria.” Kua akatupu maira teia au akakitekite anga i tetai uianga puapinga, E manako pakari ainei i te akarongo atu ki te au irinaki anga o etai atura?

Kiteanga i te Akonoanga Kerititiano Mou

I muri ake i te matenga o te au apotetoro, kua taero te akamorianga mou i te tupu marie anga o te au tu e manganui o te au akonoanga Kerititiano tutu ua. I te kiteanga i teia, kua akakite mai a Iesu i tetai mataara akatukeiai te tu Kerititiano pikikaa e te tika tikai. I te mea mua, kua akamatakite mai aia e: “Kia matakite ra i te peroveta pikikaa, ko tei aere mai ia kotou ma te kakau mamoe ra, kareka i roto, e luko taae ïa.” I reira kua kapiti atu aia: “Ka kite kotou ia ratou i to ratou ua.” (Mataio 7:​15-23) Kua rave te au pipi mou a Iesu i tana i apii ra, e ka kite vivikiia  ratou na to ratou au ua meitaki. Mei ta Iesu rai i rave, kua atoro ratou i te tangata kia akakite atu i te Patireia o te Atua mei te Tuatua Tapu ra. I te aruanga i ta Iesu akatauanga, kua takake ratou mei te poritiki o te ao nei e to ratou au pekapeka. Kua ariki ratou i te Pipiria ei Tuatua na te Atua e te akangateitei ra i te reira e ko te tuatua mou. E akakite ana ratou i te ingoa o te Atua. I te mea e te maroiroi ra ratou i te raveanga i te aroa ta te Atua i apii maira, kare ratou i kapiti atu i te au tamaki. Mari ra, kua akataeake ratou.​—Luka 4:43; 10:​1-9; Ioane 13:​34, 35; 17:​16, 17, 26.

Kia tau ki te au Tuatua Tapu, ka tau kia kitea “te tu ke anga i te tangata tuatua-tika e te tangata kino, i te tangata i akamori i te Atua, e i tei kore i akamori iaia.” (Malaki 3:18) Kua taokotaiia te aronga akamori mou i te manako e te raveanga, mei te au Kerititiano mua ra. (Ephesia 4:​4-6) Me kitea e koe taua pupu Kerititiano tika tikai ra, eaa koe ka inangaro ei i te kite no runga i te au irinaki anga o tetai atura?

E Matakite i te Au Orometua Pikikaa

Te akakite maira te Pipiria e i muri ake i te apiianga i te tuatua mou Pipiria, te vaira te kino o te taero anga pae vaerua mei te au apiianga pikikaa. Kua akamatakite te apotetoro ko Paulo e: “E matakite ko te pou aea kotou i te tuatua pakari e te pikikaa puapinga kore a tetai tangata atu, i te tuatua ikuiku a te tangata nei, tei tau i te apiianga mua o teianei ao, kare i ta te Mesia.” (Kolosa 2:8) Mei teaa ra tetai tutu meitaki ta teia tuatua e peni nei! Mei te au puaka taae te inangaroanga i te akapou ia koe, ka riro te au orometua pikikaa ei mea kino.

E tika, kua kite a Paulo i te irinaki anga o tetai atu. I tetai taime kua akamata aia i tana tuatua i te na ko anga: “E te au tangata Atene nei, e maata ua to kotou mātau i te akamori i te demoni, kua kite io nei au. Iaku oki i aaere ua io nei e te tutaka ua anga atu i ta kotou e akamori nei, kite atura au i tetai atarau e te tuatua i tataia ki rungao, Na te Atua Kitea Kore.” (Angaanga 17:​22, 23) Inara, kare a Paulo i angai putuputu ana i tona manako i te au apiianga a te au tangata karape Ereni.

E mea tuke tikai i te apii ia koe uaorai no runga i te au akamataanga e te au irinaki anga o te au akonoanga pikikaa inara e mea tuke tikai i te apii anga putuputu no runga ia ratou. * Kua iki a Iehova i te “tavini akono meitaki e te pakari” kia oronga mai i te apiianga tei akatumuia ki runga i tana Tuatua. (Mataio 4:4; 24:45) Kua tata Paulo e: “Kare e tika ia kotou kia kai i te kaingakai a te Atu ra, e te kaingakai a te au demoni. Te akakoko nei tatou i te Atu kia riri?”​—1 Korinetia 10:​20-22.

Penei e au Kerititiano tika tikai tetai au orometua pikikaa i mua ana, inara kua uri ratou mei te tuatua mou ki te tarevake. (Iuda 4, 11) Kare teia e akapoitirere ia tatou. I muri ake i te tuatuaanga no “te tavini akono meitaki e te pakari” tei komono i te kopapa o te au Kerititiano akatainuia, kua tuatua Iesu no runga i te “tavini kino” te pupu tei koumuumu e, “kare taku pu e tae vave mai,” e kua akamata i te papa i tona au tavini taeake. (Mataio 24:​48, 49) E putuputu ana te taime, kare a teia au tangata e ta ratou au pipi apiianga taka meitaki na ratou uaorai; te inangaro ua ra ratou i te takore i te akarongo o etai atu. Ia ratou, kua tata te apotetoro ko Ioane e: “Kia aere ua mai tetai tangata ia kotou na, e kare teia tana tuatua i apai mai, auraka e akatomo mai iaia ki roto i to kotou au are, auraka e karanga atu iaia e, Kia ora na i te aerenga.”​—2 Ioane 10; 2 Korinetia 11:​3, 4, 13-15.

Ka tau te aronga ngakau tae tei kimi i te tuatua mou kia akamanako meitaki tikai eaa ta ratou e akarongo ra mei te au akonoanga tuke ke. I te tuatau tau, ka akameitaki te Atua i te aronga ngakau tiratiratu tei kimi i te tuatua mou. Te karanga nei te Pipiria no runga i te kite pakari tu-Atua: “Kia kimi pu tikai koe iaia mei te ario ra, e kia makitoro marie koe iaia, mei te apinga uunaia ra: E reira . . . e rauka ia koe te kite i te Atua.” (Maseli 2:​4, 5) I te kite anga i teia kite o te Atua na roto i te Pipiria e te putuputuanga Kerititiano e te kite anga akapeea Iehova i te akameitaki anga i te aronga tei aratakiia e te reira kite, kare te au Kerititiano mou e akarongo ua atu ki te au apiianga akonoanga pikikaa.​—2 Timoteo 3:14.

[Tataanga Rikiriki i Raro]