Patireia o te Atua​—Tutara Anga Ou no te Enua

“Taua basileia ra . . . e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.”​—DANIELA 2:44.

1. Eaa te irinaki anga ka rauka ia tatou i te Pipiria ra?

KO TE Pipiria ta te Atua ra akakiteanga ki te au tangata. Kua tata te apotetoro ko Paulo: “Ka āriki mai ei kotou i te tuatua a te Atua ta kotou i kite ia matou nei, kare kotou i āriki ei tuatua na te tangata, ei tuatua ra na te Atua.” (1 Tesalonia 2:13) Tei te Pipiria ta tatou e umuumu ra kia kite no te Atua: akakite anga no tona tu, tana au akakoroanga, e tana au umuumu anga no tatou. Tei reira te akoanga meitaki katoa no te oraanga ngutuare tangata e te akono anga no te au ra tataki tai. Te akakite maira ia i te au totou tei akatupuia ra i te tuatau kua topa, e tei akatupuia nei i teianei, e te ka akatupuia i te tuatau ki mua. Ae, “te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra. Kia apa kore te tangata o te Atua, ma te tau tikai i te au angaanga memeitaki katoa ra.”​—2 Timoteo 3:​16, 17.

2. Akapeea ta Iesu ra akaketaketa anga i te tumu o te Pipiria ra?

² Te mea puapinga maata katoa i roto i te Pipiria ra ko tona tumu ia: koia te akatika anga i to te Atua ra ngateitei (tona tika kia tutara) na tona Patireia i te rangi ra. Kua akanoo a Iesu i te reira ei tumu maata no tana angaanga orometua. “I reira to Iesu akamata anga i te ako, i te na ko anga e, Ka tataraara: te vaitata mai nei oki te basileia o te ao.” (Mataio 4:17) Kua akakite mai aia eaa te ngai tau no te reira i to tatou ra au oraanga, i te raurauanga: “E na mua ra kotou i te kimi i te basileia o te Atua, e te tuatua-tika nana ra.” (Mataio 6:33) Kua akaari katoa maira aia i te puapinga maata o te reira na te apiianga i tana au pipi kia pure ki te Atua ra: “Kia tae toou basileia. Kia akonoia toou anoano i te enua nei, mei tei te ao katoa na.”​—Mataio 6:10.

 Tutara Anga Ou i te Enua Nei

3. Eaa ra te Patireia o te Atua i puapinga ei kia tatou i teianei?

³ Eaa ra ka riro ei te Patireia o te Atua ei mea puapinga maata ki te au tangata? No te mea kare e roaia ka rave ia tetai angaanga te ka taui takiri i te tutara anga i te enua nei e tuatau ua atu. Te akakite ra te totou ia Daniela 2:44 e: “E i te au rā o taua au ariki ra [te tutara nei i teianei i te enua], e akatupu ei te Atua no te rangi i tetai basileia [tetai kavamani i te rangi], te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra [te au kavamani o te enua nei], e ka vai rai te reira e tuatau ua atu.” Me tutara takiri te Patireia o te Atua i te rangi, kare te au tangata e akatere akaou i te enua nei. Ka riro te tutara tataka ke e te merengoanga kore a te tangata nei ei mea no te tuatau anake kua topa ra ki muri.

4, 5. (a) Eaa ra e ko Iesu okotai tei tau meitaki ei ei Ariki no te Patireia? (e) Eaa te angaanga ta Iesu ka rave i te tuatau vaitata ki mua?

⁴ Te tutara maata i te Patireia i te rangi ra, i raro ake i ta Iehova ra arataki anga, koia tei tau meitaki ra​—ko Iesu Karaiti. I mua ake i tona aerenga mai ki te enua nei, kua noo aia ki te rangi ei “pu rave angaanga,” na te Atua, koia te mea mua o ta te Atua ra au mea katoa i anga maira. (Maseli 8:​22-31, NW) “Ko te tu tikai aia o te Atua akara koreia, ko te Tama mua aia o te au mea ravarai i angaia ra: E nana oki i anga i te apinga tini ravarai nei, ko to te rangi, e to te enua nei.” (Kolosa 1:​15, 16) I te tono angaia mai a Iesu e te Atua ki te enua nei, kua rave aia i to te Atua ra anoano i te au tuatau ravarai. Kua akakoromaki aia i te au timataanga ngata maata e kua mate aia ma te tiratiratu ki tona Metua ra.​—Ioane 4:34; 15:10.

⁵ No tona tiratiratu ki te Atua tae roa ki te mate, kua tutakiia a Iesu. Kua akatuakaouia mai aia e te Atua ki te rangi e kua oronga atu i te tika kia riro e koia te Ariki no te Patireia o te rangi ra. (Angaanga 2:​32-36) Ei Ariki no te Patireia ra, ka riro ia Iesu Karaiti te angaanga tapunui mei te Atua maira kia arataki i te au mea ora vaerua ririnui e manotini ua atura i te takoreanga i te tutara a te tangata mei te enua nei e te tamaanga i to tatou ao katoa i te au ravenga kikino ravarai. (Maseli 2:​21, 22; 2 Tesalonia 1:​6-9; Apokalupo 19:​11-21; 20:​1-3) Ei reira te Patireia o te Atua i te rangi ra i raro ake ia Karaiti ka riro ei ei mana tutaraanga ou, koia anake te kavamani ki runga ake i te enua katoa nei.​—Apokalupo 11:15.

6. Eaa te tu tutara anga ta tatou ka manakonako atu mei te Ariki o te Patireia ra?

⁶ Te akakite ra te Tuatua a te Atua no te Tutara ou o te enua ra: “E kua orongaia maira te mana, e te kakā, e te basileia nona, kia tavini atu te au tangata katoa, te pa enua, e te au reo, kiaia.” (Daniela 7:14) No te mea ka aru a Iesu i to te Atua ra aroa, ka maata te au e te mataora i raro ake i tana tutara anga. (Mataio 5:5; Ioane 3:16; 1 Ioane 4:​7-10) “Kare e mutu te tupu anga o tona ra kavamani, e tona au, . . . kia akatinamou i te reira ma te tuatua tau e ma te tuatua tika.” (Isaia 9:7, Revised Standard Version) Mei teaa ra tetai akameitaki anga e kia rauka tetai Tutara te tutara ra ma te aroa, te tuatua tau e te tuatua tika oki! No reira, kua totou maira 2 Petero 3:13 e: “Te tatari nei ra tatou i te rangi ou [te Patireia o te Atua i te rangi] e te enua ou [tetai taiate ou no te enua nei] tana i tuatua maira, i te vai tika anga o te tuatua-tika ra.”

7. Akapeea te akatupu anga ia Mataio 24:14 i teia tuatau nei?

⁷ E tika tikai ko te Patireia o te Atua te nuti meitaki roa no te aronga katoatoa tei inangaro ra i te mea tika. No reira ra, e ko tetai tuanga no te akairo e te noo nei tatou i teianei i te “tuatau openga” o teianei akatereanga kino, kua totou maira Iesu: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (2 Timoteo 3:​1-5; Mataio 24:14) Te akatupuia ra taua totou ra i teianei, no te mea e vaitata i te ono mirioni Au Kite o Iehova i te 234 enua te akono ra e tere atu i tetai pirioni ora i te mataiti i te tuatua anga ki etai ke atu no te Patireia o te Atua. Te tau ra, i to ratou au ngai akamori anga ko etai 90,000 putuputuanga i te ao katoa nei te karangaia ra e Are Uipaanga Patireia. Ka aere mai te au tangata ki reira, kia apii no te kavamani ou te aere mai nei ki roto.

Au Tutara Taokotaiia Ra

8, 9. (a) Noea mai to Karaiti au oa tutara? (e) Eaa te irinaki anga te ka rauka ia tatou i te tutara anga a te Ariki e tona au oa tutara ra?

⁸ Ka riro ra etai au tutara taokotaiia ma Iesu  Karaiti ki roto i te Patireia o te Atua i te rangi ra. Kua totouia mai ia Apokalupo 14:​1-4 e e 144,000 ‘te aronga i okoia mai no roto i te tangata nei’ e ka akatuakaouia ki te oraanga i te rangi ra. Te kapiti ra teianei aronga i te au tane e te au vaine, kare ra ratou i taviniia, kua tavini taakaaka atura i te Atua e to ratou au oa tangata ra. “E riro ra ratou ei taunga na te Atua, e na te Mesia, e e au to ratou iaia e kia okotai tausani i te mataiti.” (Apokalupo 20:6) E meangiti roa mai to ratou numero i to te “aronga maata rava, kare takiri e pou kia tatau, e no te pa enua ravarai, e te au kopu ravarai, e te au iti-tangata ravarai, e te au reo katoa oki” te ka ora atu i te openga o teianei akatereanga. Ka akamori katoa oki ratou i te Atua “i te po e te ao,” inara kare ia ratou tetai kapikianga no te rangi ra. (Apokalupo 7:​9, 15) Ka riro ko ratou te tumu anga no te enua ou ra ei aronga no raro ake i te Patireia o te Atua i te rangi ra.​—Salamo 37:29; Ioane 10:16.

⁹ I te ikianga i te aronga te ka tutara ma Karaiti i te rangi ra, kua ikiia e Iehova te au tangata tiratiratu tei kite ra i te oraanga ma tona au manamanata katoatoa ra. Kare e apinga tei na roto atura te au tangata tei kore teianei ariki kau taunga i kite katoa oki. No reira na to ratou oraanga ki runga i te enua nei e akatere atu i to ratou kite kia tutara ki rungao i te au tangata nei. Noatu ko Iesu uaorai “i kite aia i te akamoraro i tona au mate.” (Ebera 5:8) Kua tuatua te apotetoro ko Paulo nona ra e: “Kare oki to tatou i te taunga maata e kore e tika kia aroa mai ia tatou i to tatou au paruparu nei; i rokoia katoa oki aia i te au timataanga katoa, mei ia tatou katoa nei rai, kare rava ra e ara.” (Ebera 4:15) Mei teaa ra te pumaana anga kia kite e i roto i to te Atua ra ao ou no te tuatua tika, ka tutaraia te au tangata ma te ui ariki e te kau taunga aroa e te ngakau tangi oki!

I Roto Ainei te Patireia i ta te Atua Akakoroanga?

10. Eaa ra i kore ei te Patireia o te rangi ei tuanga no ta te Atua akakoroanga akamata anga?

¹⁰ E tuanga ainei te Patireia o te rangi no ta te Atua akakoroanga mua ra i tana anga maianga ia Adamu raua ko Eva? I roto i te tataanga no te anga maianga i roto ia Genese, kare e taiku anga no tetai Patireia te ka tutara i te au tangata. Ko Iehova uaorai to ratou Tutara, e me ka akarongo ratou kiaia, kare e umuumuia no tetai ua atu tutara anga. Te akakite maira te pene 1 o Genese e ko Iehova, penei na roto i tana Tamaiti anau mua i te rangi ra, i akono mai ia Adamu raua ko Eva. Te taiku ra te tataanga i te tuatuaanga mei “kua tuatua maira te Atua kia raua” e “kua tuatua iora te Atua” kia raua.​—Genese 1:​28, 29; Ioane 1:1.

11. Eaa te akamata anga apa kore o te tangata ra?

¹¹ Te tuatua ra te Pipiria: “Akara akera te Atua i te au mea katoa tana i anga, e i na, te meitaki roa ra.” (Genese 1:31) Te au mea ravarai i roto i te kainga i Edene ra e apa kore tikai ia. Kua noo a Adamu raua ko Eva ki roto i tetai parataito. E nga manako apa kore to raua e nga kopapa apa kore oki. Kua rauka ia raua te komunikeiti anga ma Tei Maani maira ia raua e iaia oki kia raua. E na te vai tiratiratu anga, ka anau mai raua i te au tamariki apa kore ua. Kare ua e umuumu anga no tetai kavamani ou i te rangi i reira.

12, 13. I te tupuanga kia tini te au tangata apa kore ra, eaa ra ka rauka uai i te Atua kia komunikeiti atu kia ratou?

 ¹² I te tupuanga kia tini te pamiri tangata nei, akapeea te Atua ra me komunikeiti atu ma ratou katoatoa ra? E akamanako ana i te au etu o te rangi ra. Kua akapupu kapitiia ratou ki roto i etai pupu etu tei tapaia ra e au tarava etu. E pirioni ua atu au etu i roto i etai au tarava etu ra. Ko etai e vaitata i te tirioni. E kua manako te au taineti e e vaitata i te 100 pirioni tarava etu i roto i te ao katoa e pini ua ake te akara mata ia ra! Inara, te tuatua ra Tei Anga mai: “Ka nānā na i to kotou mata ki runga, ka akara: naai te reira i anga? te arataki ra aia i taua au nuku ra ki vao ma te tatauia: kua tapa anakeia to ratou au ingoa e ia; no tona ra ririnui, e te mana maata, i kore ei tetai i ngaro.”​—Isaia 40:26.

¹³ I te mea ka rauka i te Atua ra te akara e te akono i teianei au kopapa katoatoa i te rangi ra, e mea tika e kare e manamanata nona kia akara e te akono oki i tetai numero tangata meangiti roa maira. Noatu rai i teianei, e au mirioni ua atu tona au tavini te pure ra kiaia i te au ra tataki tai. Te itae viviki atura taua au pure ra ki te Atua. No reira ko te komunikeiti anga ma te au tangata apa kore katoatoa ra kare ia e akatupu i te manamanata nona ra. Kare aia e umuumu i tetai Patireia i te rangi ra ei akara atu ia ratou ra. Mei teaa ra tetai akanoonoo anga meitaki​—kia riro ko Iehova ei Tutara, kia aere tika atu kiaia ra, e kia rauka te manakonakoanga ma te kore e mate, te nooanga e tuatau ua atu i tetai enua parataito!

“Kare tei te Tangata Uaorai”

14. Eaa ra ka umuumu mutu kore ei te au tangata i ta Iehova ra tutara anga?

¹⁴ Inara, te au tangata​—noatu e aronga apa kore ua​—ka umuumu i te tutara mutu kore a Iehova. No teaa ra? No te mea kare a Iehova i anga mai ia ratou ma te kite no te tutara anga autu tei takake i tana. Ko tetai ture ia no te tangata nei, mei ta te peroveta ko Ieremia i akakite maira: “Kua kite oki au, e Iehova e, e kare tei tangata uaorai tona aerenga: kare tei te tangata e aere nei, i te akono i tona uaorai takainga tapuae. E pāpā mai iaku, e Iehova e.” (Ieremia 10:​23, 24) E neneva no te au tangata kia manako e ka rauka ia ratou kia autu i te akatikatika anga taiate eiaa a Iehova e tutara atu ia ratou ra. Ka patoi te reira i te aerenga i angaia mai ei ia ratou ra. Ko te takake anga mei ta Iehova tutara, ka akatupu ia i te tu noinoi, te makitakita, te takinga kino, te ta ua, te au tamaki, e te mate oki. ‘Ka tutara te tangata ki rungao i tetai tangata, ei mate nona uaorai.’​—Koheleta 8:9.

15. Eaa te au tupuanga no te ikianga kino ta to tatou nga metua mua i rave?

¹⁵ E mea mii ra, kua iki to tatou nga metua mua ra e kare raua i umuumu i te Atua ei Tutara no raua ra, e kua iki raua kia noo takake mei iaia. Ei tupuanga, kare te Atua ra i akono atu ia raua i te tu apa kore ra. Kua aite raua i teianei mei tetai apinga uira ra tei tipu keia mei tona tumu uira ra. No reira i muri akera, kua aere marie raua e kua tapu oki​—i roto i te matenga. Kua riro raua mei tetai pani kua kino ra, e ko te reira te tu ta raua i tuku io ra ki ta raua anaunga. (Roma 5:12) “Ko te Mato [ko Iehova] ko tei tika rava tana angaanga ra; ko tei tau katoa tona au aerenga. . . . Kua kino ratou, kare oki to ratou titoutou i to tana ra au tamariki.” (Deuteronomi 32:​4, 5) E tika, kua riro a Adamu raua ko Eva i te mana o taua mea ora vaerua meameaau tei riro ra ei ia Satani, inara e manako apa kore ua to raua e ka rauka ia raua kia kopae atu i tana au manako anga tarevake ra.​—Genese 3:​1-19; Iakobo 4:7.

16. Akapeea ta te tuatua enua akakite anga i te tupuanga no te takake anga mei te Atua maira?

¹⁶ Te akakite maata maira te tuatua enua i te tupuanga o te takake anga mei te Atua ra. No etai tauatini mataiti, kua tauta te au tangata i te au tu kavamani ravarai, te au tu akatereanga ravarai kia puapingai te au tangata nei. Inara, kua tupu ua atu te rave kino ‘kia maata atu.’ (2 Timoteo 3:13) Kua akapapu mai te 20 anere mataiti i te reira. Kua ki ia i te au makitakita kino rava atu e te ta ua, te au tamaki, te onge kai, te putaua, e te mamaeanga no tetai ua atu tuatau i te tuatua enua ra. E noatu rai eaa te au ravenga rapakau anga i raveia, kare e roaia kua mate te tangata ravarai. (Koheleta 9:​5, 10) Na te tautaanga kia arataki i to ratou uaorai tapuae, kua tuku te au tangata ia ratou uaorai kia riro ei tamate anga na Satani e tana au temoni ra, no te maata o tona tu ra kua tapaia a Satani i te Pipiria e ko “te atua o teianei ao ra.”​—2 Korinetia 4:4.

 Te Apinga Oronga Uaia mai no te Tu Rangatira

17. Akapeea te taangaanga anga tau no ta te Atua apinga oronga ua mai no te tu rangatira ra?

¹⁷ Eaa ra a Iehova ka tuku ei i te au tangata kia aere na to ratou uaorai aerenga? No te mea nana i anga mai ia ratou ma te apinga oronga uaia mai no te tu rangatira, koia te kite i te ikianga tu rangatira. “Tei iaia te Vaerua o te Atu ra, tei reira te rangatira.” (2 Korinetia 3:17) Kare e tangata e anoano kia riro aia ei ropoti, e ma tetai ke e iki i te au tekene o te ra ravarai eaa tana ka tuatua e ka rave oki. Inara kua umuumu a Iehova i te au tangata kia taangaanga i taua apinga oronga uaia maira no te tu rangatira ei apainga, kia kite i te pakari o te raveanga i tona anoano e kia vai kauraro ua kiaia ra. (Galatia 5:13) No reira kare te tu rangatira ei mea oti takiri, no te mea ka riro te reira i te oripu anga. Ka anoanoia te akatikatikaanga no te reira i roto i te au kotinga o ta te Atua ra au ture akameitaki anga.

18. Eaa ta te Atua i akakite na te tukuanga i te tangata kia akono i te ikianga rangatira?

¹⁸ Na te tukuanga i te pamiri tangata kia aere ma tona uaorai aerenga, kua akakite mai te Atua e okotai ua taime te umuumu ra tatou i tana tutara anga. Ko tana aerenga no te tutara anga, ko tona ngateitei, ko te aerenga tika anake ia. Ka akatupu ia i te mataora maata, te merengo anga, e te puapinga oki. Ko teianei no te mea ko to tatou au manako e te au kopapa kua angaia mai e Iehova kia angaanga meitaki me te rotai ra ma tana au ture. “Ko au toou Atua ra ko Iehova, ko tei akakite ia koe i te mea e puapingaʼi koe na; ko tei arataki ia koe na te arataa e tau ei kia aere koe ra.” (Isaia 48:17) Te iki anga rangatira i roto i te au kotinga o ta te Atua au ture ra kare e riro ei apainga teiaa mari ra ka akatupu i te kai mareka tuke tuke, te au kainga, te angaanga karape e te akatangi imene. Me akono tikaia, ka tupu mai mei te anoano rangatira tetai oraanga meitaki e te akamarekaanga ki runga i tetai enua parataito.

19. Eaa te rima rave ta te Atua ra i taangaanga ei akaongi i te au tangata kiaia uaorai?

¹⁹ Inara no ta raua ikianga tarevake ra, kua akatakake te au tangata ia ratou uaorai mei ia Iehova, kua riro kia apa ua, kia topa ki te kino, e kia mate atu oki. No reira kua umuumuia ratou  kia okoia mai mei taua tu mii ra e kia akaokiia mai ki roto i tetai piri anga tika ma te Atua ra ei au tamaroa e te au tamaine nana. Te rima rave ta te Atua ra i iki ei akatupu i teianei ko te Patireia ia, e ko Tei Oko ra ko Iesu Karaiti ia. (Ioane 3:16) Na roto i teianei akanoonooanga, ka akaongiia mai ki te Atua ra te aronga tataraara tikai​—mei te tamaiti kaimoumou i ta Iesu akatutuanga ra​—e ka arikiia mai e ia ra ei tamariki nana.​—Luka 15:​11-24; Roma 8:21; 2 Korinetia 6:18.

20. Ka akapeea te akatupu anga na te Patireia i ta te Atua akakoroanga?

²⁰ Kare e puapinga koreia, ka tupu ra to Iehova anoano ki runga i te enua nei. (Isaia 14:​24, 27; 55:11) Na tona Patireia i raro ake ia Karaiti, ka akatika takiri te Atua (ka akakite papu) i tona tika kia riro ei Tei Ngateitei no tatou. Ka apai mai te Patireia i tetai openga ki te tutara a te tangata e te temoni ki rungao i te enua nei, e koia anake te ka tutara mei te rangi maira no tetai tauatini mataiti. (Roma 16:20; Apokalupo 20:​1-6) Inara a taua tuatau ra, ka akapeea te akakiteanga i te teitei atu o ta Iehova ra tutaraanga? E a muri ake i te tauatini mataiti ra, eaa te tuanga ta te Patireia ra ka rave? Na te atikara ka aru mai e uriuri i teianei au uianga.

Au Tumu no te Akamanako Akaou

• Eaa te tumu tuatua o te Pipiria ra?

• Koai ma te aronga tutara ou no te enua?

• Eaa ra ka kore ei e autu te tutara anga tangata takake i te Atua ra?

• Akapeea te akono anga tika i te tu rangatira ra?

[Au Uianga Apii]

[Tutu i te kapi 10]

Kua akaketaketa ta Iesu apiianga i ta te Atua tutara anga na roto i te Patireia

[Tutu i te kapi 12]

I te au enua ravarai kua akariro te Au Kite o Iehova i te Patireia e ko ta ratou apiianga maata

[Tutu i te kapi 14]

Te akapapu ra te tuatua enua i te au tupuanga kino no te takake anga mei te Atua

[Akameitakianga]

WWI soldiers: U.S. National Archives photo; concentration camp: Oświęcim Museum; child: UN PHOTO 186156/J. Isaac