Ta te Patireia o te Atua ka Rave

“Kia tae toou basileia. Kia akonoia toou anoano i te enua nei, mei tei te [rangi] katoa na.”​—MATAIO 6:10, akaaite ia NW.

1. Eaa te aite anga no te aerenga mai te Patireia o te Atua?

I TA Iesu apii anga i tana au pipi kia pure no te Patireia o te Atua ra, kua kite aia e ka apai mai to te reira taenga mai i tetai openga ki te au tauatini ua atu mataiti o te tutara anga tangata takake mei te Atua ra. I taua tuatau katoa ra, kare te anoano o te Atua ra i rave katoaia i te enua nei. (Salamo 147:​19, 20) Inara a muri ake i te akanoo anga o te Patireia i te rangi ra, ka raveia to te Atua anoano i te au ngai ravarai. Te vaitata rava maira te tuatau no te tauianga akauru maata ia mei te tutara anga o te tangata nei ki te tutara a te Patireia a te Atua mei te rangi maira.

2. Eaa te akairo no te taui anga mai mei ta te tangata tutara ki te tutara Patireia?

² Ei akairoanga i teianei tauianga ko te tuatau ta Iesu i tapa ra “e mate maata tei te reira tuatau, kare ïa mei muatangana mai i teianei ao, e tae rava akenei i teianei rā, e  kare oki a muri atu.” (Mataio 24:21) Kare te Pipiria i akakite mai e eaa te roa o taua tuatau ra, inara ko te au tumatetenga te ka tupu a taua tuatau ra ka kino roa atu i etai ua atu ta teianei ao i kite ana. A te akamataanga o taua mate maata ra, ka tupu tetai apinga te ka riro ei poitirere anga kino roa ki te maataanga o te au tangata i te enua nei: koia te akapouanga o te akonoanga pikikaa katoatoa ra. Kare te reira e riro ei mea poitirere ki te Au Kite o Iehova ra, no te mea kua roa ratou i te tapapa atuanga i te reira. (Apokalupo 17:​1, 15-17; 18:​1-24) Ka ope taua mate maata ra ia Aramakito me akapueurikirikiia e te Patireia o te Atua ra te akatereanga katoa a Satani ra.​—Daniela 2:44; Apokalupo 16:​14, 16.

3. Akapeea ta Ieremia akataka anga i te openga no te aronga akarongo kore?

³ Eaa te aiteanga o teianei ki te au tangata “kare i kite i te Atua, e tei kore i akarongo i te evangelia” no tona Patireia i te rangi ra i roto i nga rima o Karaiti ra? (2 Tesalonia 1:​6-9) Te akakite maira te totou Pipiria kia tatou: “I na, ka riro atura te kino mei tetai enua e tae atura ki tetai enua, e akatupuia tetai puaioio maata, mei te openga mai o te enua ra. E ko tei mate ia Iehova ra, kia tae ki te reira rā, e riro ïa mei tetai openga mai o te enua, e tae ua atu ki tetai openga o te enua ra; kare ratou e tangiia, e kare e akaputuia, e kare e tanumia; e riro ra ei teita ki runga i te enua nei.”​—Ieremia 25:​32, 33.

Te Openga o te Rave Kino

4. Eaa ra a Iehova i akatikai i te taopenga anga i teianei akatereanga kino nei?

⁴ No etai tauatini mataiti, kua akakoromaki a Iehova i te rave kino, kua rava roa no te aronga ngakau tika tataki tai kia kite e e tumatetenga tikai te tutara anga a te tangata nei. Ei akatauanga, i te 20 mataiti anake ra, e tere atu i te 150 mirioni au tangata tei tamateia i te au tamaki, te au patoianga kavamani, e etai atu au tu pekapeka oki, ta tetai tumu akakite anga i tuatua. Kua kite puia to te tangata nei tu riri i te Tamaki II o te Ao ra i te tamate angaia etai 50 mirioni, ma etai e manganui o ratou ra i mate i te au matenga rekareka ra i te au puakapa Nazi ra. Mei ta te Pipiria i totou maira, i to tatou tuatau nei ‘te au tangata kikino e te aronga pikikaa ra, e tupu rai to ratou kino, e e maata atu.’ (2 Timoteo 3:​1-5, 13) I teia tuatau nei, te ainga tau kore, te rave kino, te ta ua, te tu viivii, e te manakoanga tau kore no ta te Atua ra au turanga te tupu maata ra. No reira, te tika ra a Iehova kia apai mai i te openga ki teianei akatereanga rave kino.

5, 6. E akataka mai i te raveanga kino tei vai ana ki Kanaana i taito ra.

⁵ Te aite ra te turanga i teianei ki to Kanaana i etai 3,500 mataiti kua topa ra. Te tuatua ra te Pipiria: “Kua ope oki te au mea viivii katoa ta Iehova i makitakita ra i te raveia e ratou i to ratou au atua; e kua tae rava i te taʼu i ta ratou uaorai au tamaroa e te au tamaine ki te ai i to ratou au atua ra.” (Deuteronomi 12:31) Kua akakite a Iehova ra ki te iti tangata o Iseraela: “No te tuatua kino ra o teianei au motia e tuaru ke ei te Atua ra ko Iehova ia ratou ki mua i to aroaro.” (Deuteronomi 9:5) Kua akakite maira te tata tuatua enua Pipiria ko Henry H. Halley: “Te akamori anga ia Baala, ia Asetoreta, e etai atu atua o Kanaana ra ka o atu ki roto i etai au ravenga kikino maata roa; ko to ratou au iero te au ngai no te rave anga viivii katoa ra.”

⁶ Kua akakite mai a Halley i te riro anga kia maata ta ratou rave anga kino, no te mea i tetai o taua ngai e manganui ra, “kua kitea e te aronga ko e maata te au vairanga te vaira te au kopapa tamariki tei tuku atingaia ra kia Baala.” Kua tuatua aia e: “Ko taua ngai katoa ra kua riro ei ngai tanumanga no te au pepe anau ouia. . . . Kua akamori to Kanaana na te rave anga ainga tau kore, ei peu akonoanga, ki mua i to ratou au atua ra; e i reira, na te taanga i ta ratou tamariki anau mua ra, ei atinga ki teianei au atua rai. I te akara anga, i te turanga maata, kua riro a Kanaana ei tu mei ia Sodoma e Gomora ra e ko tetai pa enua. . . . Kua tika ainei taua tu akono anga rikarika te viivii e te takino anga kia vai mai kia roa? . . . Kua kimi manako ra te aronga ko i te au oire Kanaana akataneaia ra e eaa te Atua i kore ei e akapou vave atu ia ratou mei tana i rave ra.”

 Akatuangaia ki te Enua

7, 8. Akapeea te Atua i te tama anga i te enua nei?

⁷ Mei ta te Atua tama anga ia Kanaana ra, kare e roaia ka tama aia i te enua katoa nei e ka oronga atu i te reira ki te aronga te rave ra i tona anoano. “Na te aronga tiratiratu oki e noo i te enua, e te aronga apa kore te ka akatinamouia ki reira; ka tipu keia ra te aronga kino i te enua nei.” (Maseli 2:​21, 22) E kua tuatua te tata taramo: “E roa poto ake, e kare ua te tangata kino ra . . . Kareka te aronga maru ra, ka noo ïa i te enua, e ka rekareka ratou i te maata o te au ra.” (Salamo 37:​10, 11) Pera katoa ka akaateaia atu a Satani, “kia kore aia e pikikaa akaou i te pa enua, kia ope rava aua nga mataiti okotai tausani ra.” (Apokalupo 20:​1-3) Ae, “te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.”​—1 Ioane 2:17.

⁸ I te akatakaanga i taua manakonako anga mekameka ra no te aronga tei anoano ra kia noo e tuatau ua atu ki runga i te enua, kua tuatua a Iesu: “E ao to tei maru: e riro ia ratou te enua.” (Mataio 5:5) Te akaraanga te taiku ra aia ia Salamo 37:29, tei totou ra: “Ka riro te enua no te aronga tuatua-tika, ka noo tamou rai ratou i reira.” Kua kite a Iesu e ko te akakoroanga te reira a Iehova kia noo te aronga ngakau tika ki runga i tetai enua parataito e tuatau ua atu. Kua tuatua a Iehova: “Naku i anga te enua nei, te  tangata, e te puaka katoa ki runga i te enua ra, i te mana maata noku . . . e naku i oronga te reira ki tei tau i toku nei mata.”​—Ieremia 27:5.

Tetai Enua Ou Meitaki Roa

9. Eaa te tu o te ao ta te Patireia o te Atua ra ka akatupu mai?

⁹ I muri ake ia Aramakito, ka akatupu mai te Patireia o te Atua ra i tetai “enua ou” meitaki roa i “te vai tika anga o te tuatua-tika ra.” (2 Petero 3:13) Mei teaa ra te matara anga no te aronga ora atu ia Aramakito kia atea ke atu teianei akatereanga kino o te au mea nei! Mei teaa katoa oki to ratou marekaanga i te tomo anga ki roto i te ao ou no te tuatua tika i raro ake i te kavamani Patireia i te rangi ra, ma te au akameitakianga meitaki roa ra e te oraanga mutu kore ki mua ra!​—Apokalupo 7:​9-17.

10. Eaa te au apinga kikino kare e vai mai i raro ake i te tutara anga Patireia?

¹⁰ Kare te au tangata e akakokoia na te tamaki, te rave kino, te onge kai, me kare noatu na te puaka taae. “E e papau au i tetai koreromotu au [ma toku iti tangata], e naku e akakore i te au puaka taae ki runga i te enua nei . . . E oronga mai te rakau o te kainga ra i tona ua, e e akatupu mai te enua i tona, e ka noo mataku kore ua ratou ki to ratou enua.” “E tupaki ratou i ta ratou au koke ei auri arote, e ta ratou au korare ei tipi tope ïa, kare tetai enua e apai i te koke ki runga i tetai enua kare oki ratou e apii akaou i te tamaki. E noo ra ratou ravarai ki raro ake i tana uaorai vine, e ki raro ake i tana uaorai suke, e kare tetai e akamataku mai.”​—Ezekiela 34:​25-28; Mika 4:​3, 4.

11. Eaa ka raukai ia tatou kia irinaki e ka takoreia te au maki kopapa?

¹¹ Te maki, te mii, e noatu ko te mate ka takore katoaia. “Kare oki to reira e karanga e, Kua maki au: te au tangata e noo i reira, kua apai keia ta ratou ara.” (Isaia 33:24) “[Na te Atua], e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au taito. . . . I na, te akariro nei au i te au mea ravarai ei mea ou.” (Apokalupo 21:​4, 5) Iaia i te enua nei, kua akakite a Iesu i tona kite i te rave i taua au apinga ra na te mana ta te Atua i oronga ra kiaia. Ma te turuanga a te vaerua tapu ra, kua aere atura Iesu  i te enua katoa ma te rapakauanga i te aronga pirikoki e te akaoraanga oki i te aronga maki ra.​—Mataio 15:​30, 31.

12. Eaa te manakonakoanga no tei mate ra?

¹² E maata atu ta Iesu i rave. Kua akatu mai aia i tei mate ra. Akapeea te akatupu anga ki te au tangata akaaka ra? I tana akatuakaou anga i tetai tamaine e 12 ra mataiti, kua “va maata ua iora ratou” tona nga metua. (Mareko 5:42) Ko tetai atu akatauanga teia ta Iesu ka rave i te enua katoa nei i raro ake i te tutara Patireia ra, no te mea i reira “e tuakaouanga to tei mate, te aronga tuatua-tika e te aronga tuatua-tika kore.” (Angaanga 24:15) E tamanako ana i te va maata ua anga me ora akaou mai tetai pupu i muri ake i te pupu mei te mate maira e ka kapiti akaouia ma ta ratou aronga akaperepere ra! Kare e ekoko anga e ka raveia tetai angaanga apiianga maata i raro ake i te akaaere anga Patireia ra no te mea “ka ki te enua i te kite ia Iehova, mei te vairanga tai e ki i te tai ra.”​—Isaia 11:9.

Akatika Anga i to Iehova ra Ngateitei

13. Akapeea te akaarianga mai i te tika o ta te Atua ra tutara anga?

¹³ Kia tae ki te openga o te tauatini mataiti tutara anga o te Patireia ra, kua oti te pamiri tangata nei te akaoraia kia apa kore ua te manako e te kopapa. Kua riro te enua nei ei kainga i Edene i te ao katoa, ei parataito. Kua rauka te au, te mataora, te tinamou, e tetai taiate tangata aroa i reira. Kare i kitea i roto i te tuatua enua o te tangata nei tetai apinga mei teianei i mua ake i te tutara anga Patireia ra. Mei teaa ra tetai tuke anga maata te ka akakiteia mai i rotopu i te au tauatini mataiti tutara anga tau kore a te tangata nei e te tutara anga meitaki roa na te Patireia o te Atua i te rangi ra no tetai tauatini mataiti ua! Te tutara anga a te Atua na roto i tona Patireia kua akaariia mai ei meitaki teitei takiri roa atu i te au tu ravarai. To te Atua ra tika kia tutara, e tona ngateitei oki, ka riro kia akatika takiriia ia.

14. Eaa te ka tupu ki te aronga meameaau me ope te tauatini mataiti?

¹⁴ A te openga o te tauatini mataiti ra, ka tuku a Iehova i te au tangata apa kore ra kia akono i ta ratou ikianga rangatira e koai ta ratou ka anoano ki tavini atu. Te akakite ra te Pipiria e “e tukuiā Satani i reira i tana tapeka anga ra.” Ka tauta akaou aia kia akavare i te au tangata ra, ko tetai papaki o ratou ka iki i te takake anga mei te Atua ra. Kia arai i ‘te tu rua mai te mate i te tupu anga,’ ka akapou takiri atu a Iehova ia Satani, e tana au temoni, e te katoatoa te ka akameameaau atu i to Iehova ra ngateitei. Kare e rauka i tetai kia akaapa atu i tetai au tangata tei akapou mutu koreia i taua taime ra tei kore i rauka tetai tuatau me kare kua rave ratou i te tarevake no te tu apa ua. Kare, ka aite atu ratou kia Adamu raua ko Eva apa kore ua ra, tei iki akakoro ra kia akameameaau i ta Iehova ra tutara anga tuatua tika.​—Apokalupo 20:​7-10; Nahuma 1:9.

15. Eaa te pirianga ma Iehova no te aronga tiratiratu?

¹⁵ I tetai pae, penei ka iki te maataanga o te au tangata kia mou i te ngateitei o Iehova ra. Na te takore takiri anga i te aronga meameaau ravarai, ka tu te aronga tuatua tika ki mua ia Iehova, i te autu anga i te timata openga no te tiratiratu ra. Ka riro teianei aronga tiratiratu i reira kia arikiia e Iehova ei au tamaroa e te au tamaine nana. Na reira ka oki akaou mai ratou ki roto i te pirianga o Adamu raua ko Eva ma te Atua ra i mua ake i to raua meameaau anga. Na reira ka akatupuia ta Roma 8:21: “Kia akaora katoaia te [au tangata] angaia nei i te tapeka o te mate, kia rauka te rangatira meitaki o te tamariki a te Atua ra.” Kua totou maira te peroveta ko Isaia: “[Na te Atua] e akakore rava i te mate e tuatau ua atu; e na te Atu ra na Iehova e orei i te roi-mata i te au mata ravarai.”​—Isaia 25:8.

Te Manakonakoanga o te Ora Mutu Kore

16. Eaa ra i tikai kia akara atu ki mua ki te tutaki no te oraanga mutu kore?

¹⁶ Mei teaa ra tetai manakonako meitaki te tatari maira i te aronga tiratiratu, kia kite e ka tuku mutu kore mai te Atua ki runga ia ratou i te au puapinga maata i te pae vaerua e te pae kopapa oki! Kua tuatua tika maira te tata taramo: “Te oora nei koe i to rima, e te akamerengo nei i te kaki [tau] o te au mea ora katoa nei.” (Salamo 145:16) Te akamaroiroi maira Iehova i te aronga no te pupu o te enua  nei kia manakonako i te oraanga i Parataito ei tuanga no to ratou akarongo kiaia. Noatu rai e ko te tumu no to Iehova ra ngateitei te mea puapinga roa atu, kare aia e akaue i te au tangata kia tavini iaia ma te kore e manakonako no tetai tutaki anga. I roto katoa i te Pipiria, ko te tiratiratu ki te Atua ra e te manakonakoanga no te ora mutu kore te kapiti mou tikaia ra ei au tuanga umuumuia no tetai akarongo Kerititiano i te Atua ra. “Ko te akamori i te Atua ra, kia akarongo aia e, e Atua e tikaʼi e koia tei tutaki mai i te aronga i kimi tikai iaia.”​—Ebera 11:6.

17. Akapeea ta Iesu akakite anga e ka tika kia akamaroiroiia na to tatou manakonakoanga?

¹⁷ Kua tuatua Iesu: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) I konei kua tapeka atu aia i te kiteanga i te Atua e tana au akakoro anga ma te tutaki ta teianei ka apai mai. Ei akatauanga, i te pati anga tetai tangata rave tarevake ra kia maaraia atu aia i muri ake i to Iesu ra aerenga mai i tona Patireia, kua tuatua atura Iesu: “Tei iaku nei koe i te Parataito.” (Luka 23:43, NW) Kare aia i tuatua atu ki taua tangata ra kia akarongo noatu me kare e rauka iaia tetai tutaki. Kua kite aia e te anoano ra Iehova kia manakonako tona au tavini i te ora mutu kore ki runga i te enua parataito kia tauturu ia ratou kia akamaroiroi ia ratou e rokoia ei e te au timata anga tuke tuke i teianei ao. No reira, ko te manakonako anga i te tutaki ra ko tetai tauturu puapinga maata ia i te akakoromakianga ei Kerititiano.

Te Tuatau ki Mua o te Patireia

18, 19. Eaa te ka tupu ki te Ariki e te Patireia oki a te openga o te Tutara Tauatini Mataiti ra?

¹⁸ I te mea ko te Patireia ko tetai kavamani tua rua ia ta Iehova ra i taangaanga kia apai mai ki te enua e tona au tangata ki roto i te tu apa kore ua e kia akaongiia kiaia, eaa te tuanga te vai maira no te Ariki ko Iesu Karaiti e te 144,000 ui ariki e te kau taunga i muri ake i te Tauatini Mataiti ra? “Ko te openga iora ïa, ka tuku atu ei aia i te basileia ki te Atua, ki te Metua ra; kia ope rava te aronga au, e te mana, e te maroiroi, i te akakoreia e ia. E iaia oki te au, e kia ope rava te au enemi katoa i te tukuia e ia ki raro ake i ona vaevae.”​—1 Korinetia 15:​24, 25.

¹⁹ Me tuku atu a Karaiti i te Patireia ki te Atua, akapeea te akataka anga i te au tuatua tapu tei tuatua ra e e mutu kore ua atu te reira? Ko te au angaanga i raveia e te Patireia ka vai e mutu kore ua atu ia. Ka akangateiteiia a Karaiti e mutu kore ua atu no tana tuanga i te raveanga no te akatika anga i te ngateitei o te Atua ra. Inara i te mea kua takore takiriia atu te ara e te mate oki, e kua okoia mai te au tangata, ka akaope teia i te umuumu anga nona e ko tetai Oko. Ko te Tutara Anga no te Tauatini Mataiti a te Patireia kua oti takiri katoa; no reira kare tetai umuumu anga no tetai kavamani tua rua kia vai mai ki rotopu ia Iehova e te au tangata akarongo ra. No reira ka “riro ko te Atua i rungao i te au mea katoa i te au ngai ravarai.”​—1 Korinetia 15:28.

20. Akapeea ka raukai ia tatou kia kite e eaa ta te tuatau ki mua e mou maira no Karaiti e te 144,000 ra?

²⁰ Eaa te tuanga no te tuatau ki mua ta Karaiti e tona au oa tutara ka rave i muri ake i te oti anga te Tutara Tauatini Mataiti ra? Kare te Pipiria i akakite mai. Inara, ka papu ia tatou e ka oronga atu a Iehova kia ratou e manganui te au angaanga tavini anga i roto i tana au mea i anga maira. Kia mou ra tatou katoatoa i teia tuatau nei i to Iehova ra tu ngateitei e kia orongaia mai te ora mutu kore, kia riro e a te tuatau ki mua, ka ora atu tatou kia kite eaa ta Iehova akakoro anga no te Ariki e tona au oa ui ariki e te kau taunga, pera katoa no tona ao mekameka katoa e pini ua ake!

Au Tumu no te Akamanako Akaou

• Eaa te taui anga i te tutara anga te vaitata atu nei tatou?

• Akapeea ta te Atua ra akava anga i te aronga rave kino e te aronga tuatua tika?

• Eaa te au turanga te ka vai ki roto i te ao ou ra?

• Akapeea to Iehova ra ngateitei e akatika takiriia ei?

[Au Uianga Apii]

[Tutu i te kapi 15]

[Au Tutu i te kapi 17]

“E tuakaouanga to tei mate, te aronga tuatua-tika e te aronga tuatua-tika kore”

[Tutu i te kapi 18]

Ka oki mai te aronga tiratiratu ki roto i tetai pirianga tau ma Iehova ra