Ripoti a te Aronga Tutu Patireia

Ariki Mai to Latvia i te Tuatua Meitaki

TE AKAARI meitaki maira te Pipiria e ko to te Atua anoano koia oki ko “te tangata katoatoa kia ora, e kia rauka te kite i te tuatua-mou.” (1 Timoteo 2:4) Te aronga tei patoiia no te au mataiti e manganui i te tuatau kia rongo atu i te tuatua meitaki te akarongo ra i teianei! I Latvia, e tetai au tuanga i te ao, te ariki mai nei te tangata e tuke te mataiti e te ngai i aere mai ei i te tuatua, mei ta te au kiteanga e aru maira e akaari ra.

• I Rēzekne, e taoni i te tua itinga o Latvia, kua pati tauturu atu tetai mama e tana tamaine mapu ki tetai vaine no te au ngai aerenga. I muri ake i te akakite anga kia raua, kua oronga atu te vaine, koia tetai o te Au Kite o Iehova, i tetai pepa patianga ki te au uipaanga a te Au Kite.

I te mea e nga vaine akonoanga te mama e te tamaine, kua iki raua i te aere atu ki te uipaanga. Ia raua e aere atura, kua koreromotu raua me kitea e raua tetai apinga tau kore i reira, ka akaruke viviki raua. Inara, kua reka tikai te uipaanga e kare raua i manako ana no te akaruke. Kua ariki raua i tetai oronga anga kia apii i te Pipiria e kua akamata i te aere putuputu atu ki te au uipaanga. I roto ua i nga marama e toru, kua akakite raua e te inangaro ra raua i te kapiti atu ki roto i te angaanga tutuanga e te tapapa ra kia papetitoia.

• I tetai oire i te tua opunga o Latvia, kua aravei atu tetai Kite ia Anna e 85 ona mataiti, tei akaari i te inangaro tikai e kua ariki i tetai apii Pipiria. Kua patoi pakari tana tamaine e tetai au mema o te pamiri iaia. Inara kare a Anna i tuku ana me kore i tona mataiti e te oraanga kopapa paruparu kia arai iaia mei te rave tamou anga i tana apii i te Pipiria.

I tetai ra, kua akakite atu a Anna ki tana tamaine e ka papetitoia aia. “Me aere koe ka papetito, ka tuku au ia koe ki roto i tetai kainga akonokono,” i pau atu ei te tamaine a Anna. Inara, kare teia tamataku anga i akamaroiroi kore ia Anna. No tona turanga kopapa, kua papetitoia aia i tona uaorai kainga.

Eaa te manako o te tamaine a Anna no runga i teia? Kua taui aia i tona manako, e kua akapapa aia i tetai kai meitaki na tona mama i muri ake i te papetito angaia. I reira kua ui aia ki tona mama, “Kua papetitoia koe i teianei, eaa toou manako?” Ta Anna i pau atu? “Mei tetai pepe ou rai!”

• Ia Titema 1998, kua aravei atu e rua nga Kite i tetai opita vaeau akaangaroi o te Soviet Union i mua ana. I te mea te irinaki ra aia i Tei Anga ra, kua ariki aia i te apii i te Pipiria, e i muri mai kua kapiti mai tana vaine. Kua tere raua ki mua e kare i roaia ana kua riro mai ei nga papuritia kare i papetitoia ake. I te tuatau maana i aru mai, kua papetitoia te opita i mua ana. Kua riro te inangaro maata i te au apinga pae vaerua o te nga tokorua ei akamaroiroi anga ki te katoatoa i roto i te putuputuanga. Kapiti mai, kua akapou raua i to raua maroiroi i roto i te angaanga akatanotano akaou anga i tetai ngai ei Are Uipaanga Patireia meitaki tikai i reira rai.