Ka Rauka Ia Koe te Autu i te Akamaroiroi Kore!

KUA tata tetai tangata pakari e: “Kia potopoto te aʼo i te rā i eke ei ra, kua iti roa toou maroiroi.” (Maseli 24:10) Me kua tupu ana te akamaroiroi kore kia koe, papu e ka akatika koe ki te reira akakite anga.

Kare okotai tangata i paruruia mei te au tupu anga o te akamaroiroi kore. Penei ka vai tetai tupu anga iti o te akamaroiroi kore e tai ra me kore e rua e oti ka ngaro ke. Inara me ka o mai te manako ngakau mamae me kore te riri, penei ka vai ua atu te manamanata. Tetai au Kerititiano tei vai tiratiratu ana no etai au mataiti kua ngakau taitaiaia tikai e kua akamutu ratou i te aere ki te au uipaanga putuputuanga e te kapitianga ki roto i te angaanga orometua.

Me kua akamaroiroi koreia koe, auraka e ngakau taitaia! Kua autu manuia te au tavini tiratiratu o te tuatau i topa i te akamaroiroi kore, e ma ta te Atua tauturu, ka rauka katoa ia koe.

Me Akamamae Mai Etai i Toou Manako Ngakau

Kare koe e tapapa atu e kia paruruia mei te au tuatua tau kore me kare te au angaanga manako kore. Inara, ka rauka ia koe te patoi i te tuku i te au tu apa ua o tetai ke kia tamanata mai i taau tavini anga ia Iehova. Me kua tamamae mai tetai i toou manako ngakau, penei ka riro ei tauturu anga kia koe no te akamanako atu e akapeea a Hana, te metua vaine o Samuela, i te akonoanga i tetai turanga akamaroiroi kore.

Kua inangaro tikai a Hana i tetai tamaiti, inara kua pa ia aia. Kua anau ke ana te rua o te vaine a tana tane, ko Penina, i te au tamaroa e te au tamaine nana. I te mea ka manako tangi atu i to Hana turanga, kua manako a Penina iaia ei enemi e kua akaari i taua tu kiaia e kua “aue iora, [a Hana] e kare akera i kaikai.”​—1 Samuela 1:​2, 4-7.

I tetai ra kua aere atu a Hana ki te tapenakara i te pure. Kua kite atu a Eli te taunga teitei o Iseraela i tona vaa e kamutamuta ra. Kare i kite e te pure ra a Hana, kua manako a Eli e kua kona aia. “Mei te aa te roa o to kona anga?” i tuatua atu ei aia. “E kopae ke atu ia koe i taau wina.” (1 Samuela 1:​12-14) Ka rauka ainei ia koe i te akamanako e mei teaa rai to Hana manako? Kua aere atu aia ki te tapenakara e raukai te akamaroiroi anga. Kare aia i tapapa ana e kia akaapa tarevakeia e tetai tangata rongonui i Iseraela!

Kua akanooia te atianga no Hana kia akamaroiroi koreia. Ka rauka ua iaia i te akaruke viviki i te tapenakara, te tia anga auraka e oki akaou koi vai ei e te tavini ra a Eli i reira ei taunga teitei. Inara, kua akaperepere tikai a Hana i tona pirianga kia Iehova. Kua kite aia e kare aia e mareka me akono akapera aia. Ko te tapenakara te ngai rotopu o te akamori anga. Kua tuku a Iehova i tona ingoa ki reira. Noatu e tu apa ua tona, kua ikiia a Eli e Iehova kia komono iaia.

Te oronga maira ta Hana pau anga akangateitei ki ta Eli akaapa anga i tetai akaraanga meitaki tikai no tatou i teia tuatau. Kare aia i akatika iaia uaorai kia akaapa akakinoia, inara kua pau atu aia na roto i tetai tu ngateitei. “Kare ïa, e taku pu,” i te pau anga aia. “E vaine ngakau taitaia ua ra au: kare rai au i inu i te wina e te kava kona, kua riringi ra au i toku vaerua ki mua i te aroaro o Iehova. Auraka koe e tuatua i to tavini vaine nei e e vaine kanga: no te maata anga oki o toku nei tumatetenga, e toku nei aue, taku i tuatua io nei.”​—1 Samuela 1:​15, 16.

Kua akakite ainei a Hana i tei tika ra? Papu tikai. Inara, kua tuatua aia ma te tau kia Eli, kare i maro atu no te akaapa iaia no tana akaapa anga pikikaa. Aru mai kua pau takinga meitaki atu aia, i te na koanga: “Kia ora koe i to aerenga: e kia akatika mai oki te Atua no Iseraela i taau i pati atu iaia ra.” I te akatikatika angaia te manako,  “kua aere iora taua vaine ra [a Hana] i tona aerenga, e kua kaikai iora, e kare atura tona mata i kinokino ra.”​—1 Samuela 1:​17, 18.

Eaa ta tatou ka apii mai mei teia tataanga? Kua rave viviki a Hana i te akatika i te manako marama kore, inara kua rave aia i te reira ma te ngateitei oonu. Tei tupu mai, kua akanoo aia i tetai pirianga meitaki ma Iehova raua ko Eli. Mei teaa te meitaki te komunikeiti anga e te akono tau no te arai i te au manamanata meangiti kia tupu ki roto i tetai mea maata!

Kia kiteia e ko te akatikatika anga i te au manako patoi anga ma tetai te umuumuia ra te akaaka e te raveanga tau mei nga tua e rua. Me poka tetai taeake irinaki i te ariu mai ki taau au tauta anga no te akatikatika i te manako patoi, penei ka anoanoia koe kia akaruke i te reira ki roto i nga rima o Iehova, te irinaki anga e ka akono aia i te reira i tona tuatau tau e na roto i tana i manako.

Kua Ngere Ainei ia Koe Tetai Angaanga Akameitakianga?

Kua taitaiaia tetai no te mea kua tuku au i tetai akameitakianga akaperepereia i roto i ta te Atua angaanga. Kua rekareka ratou i te tavini anga i to ratou au taeake, i te ngere anga i te akameitakianga, kua manako ratou e kare ratou e tau akaou kia Iehova me kare ki tana akaaerenga. Me te manako akapera ra koe, penei ka rauka ia koe te manako oonu na te akamanakoanga i te akaraanga o te tata Pipiria ko Mareko, tei tapa katoaia e ko Ioane Mareko.​—Angaanga 12:12.

Kua aru atu a Mareko ia Paulo raua ko Banaba ki runga i ta raua teretere mitinari mua, inara i rotopu i te teretere anga, kua akaruke aia ia raua e kua oki mai ki Ierusalema. (Angaanga 13:13) I muri mai, kua inangaro a Banaba i te apai atu ia Mareko ma raua ki runga i tetai terepu. Inara, te akakite ra te Pipiria: “Kare rā Paulo i manako e, e tangata tau aia kia arataki katoa iaia i to ratou tere, ko tei akaruke mai ia ratou i Pamephulia ra, kare i aere katoa i taua angaanga ra.” Kua patoi a Banaba. “Tupu atura oki,” i akakite ra te papa anga, “te taumāro maata ia raua uaorai, e taka ke atura raua [a Paulo raua ko Banaba]: rave aturā Banaba ia Mareko, ano atura ki Kupero. Ko Paulo ra kapiti atura ïa kia Sila, e riro atura.”​—Angaanga 15:​36-40.

Penei kua taitaia tikai a Mareko i te kite anga e kare te apotetoro akangateiteiia ko Paulo i inangaro i te angaanga kiaia e kua tupu mai te taumaro anga no tona turanga tau tikai e kua taki atu ki te akatakake anga i rotopu ia Paulo raua ko Banaba. Inara e maata te vaira ki te tua.

Kua anoano katoa rai a Paulo raua ko Sila i tetai tokorua tutaka. I te tae anga raua ki Lusetera, kua kitea e raua tetai tangata kia mono ia Mareko, ko tetai mapu tane ko Timoteo te ingoa. I teianei penei kua papetitoia a Timoteo e rua me kare e toru mataiti i te tuatau i ikiiai aia. I tetai tua, kua kapiti ana a Mareko ki te putuputuanga Kerititiano mei te akamata anga mai te reira​—e tikai, i roa atu ia Paulo uaorai. Inara, kua rauka te tukuanga angaanga akameitakiia ia Timoteo.​—Angaanga 16:​1-3.

Eaa to Mareko manako i te kite anga aia e kua monoia aia e tetai tangata mapu, e kare i kite tikai? Kare te Pipiria i akakite mai. Noatu rai, te akakite maira te reira e kua vai maroiroi a Mareko i roto i te angaanga a Iehova. Kua rave meitaki aia i te au tuatau tei rauka iaia. Noatu kare i rauka i te tavini atu ma Paulo raua ko Sila, kua rauka iaia te teretere atu raua ko Banaba ki Kupero, e enua kainga ia no Banaba. Kua tavini katoa a Mareko raua ko Petero i Babulonia. I te openga ra, kua rauka iaia te tuatau i te angaanga atu kia Paulo​—e Timoteo​—i Roma. (Kolosa 1:1; 4:10; 1 Petero 5:13) I muri mai kua akauruia a Mareko kia tata i tetai o nga Evangeria e a!

Te vaira tetai apii anga puapinga i roto pouroa i teia. Kare a Mareko i manako maata ana no runga i tetai akameitakianga tei ngereia e kua poka aia i te ariki atu i te au akameitakianga te rauka ra kiaia. Kua angaanga maroiroi a Mareko i roto i te angaanga a Iehova, e kua akameitaki a Iehova iaia.

No reira me kua ngere ia koe tetai akameitakianga, auraka e akamaroiroi kore. Me akono koe i te manako papu tikai e te rave maroiroi, penei ka aere mai tetai atu au akameitaki anga kia koe. E maata te vaira kia raveia i roto i te angaanga a te Atu.​—1 Korinetia 15:58.

 Kua Akamaroiroi Koreia Tetai Tavini Tiratiratu

Kare i te mea ngoie ua i te akakoromaki atu no te akarongo. I tetai taime, penei ka tupu te akamaroiroi kore kia koe. E oti penei ka manako apa koe no te akamaroiroi koreia, te taopenga anga e auraka rava tetai tavini tiratiratu o te Atua kia manako akapera. E akamanako ana ia Elia, tetai o te au peroveta meitaki rava o Iseraela.

I te kite mai anga te ariki vaine o Iseraela ko Iezebela, e vaine akamaata i te akamori anga Baala, e kua tamateia te au peroveta o Baala e Elia, kua tia aia no te tamate atu iaia. Kua aro atu ana a Elia i te au enemi maata atu ia Iezebela, inara ma te poitirere kua akamaroiroi koreia aia e kua inangaro aia i te mate. (1 Ariki 19:​1-4) Akapeea te reira i te tupu anga? Kua ngaropoina iaia tetai apinga.

Kua ngaropoina ia Elia te akara atu kia Iehova e ko te Tumu o tona maroiroi. Naai i oronga i te mana kia Elia kia akatu i te mate e kia aro atu i te au peroveta a Baala? Na Iehova. Papu rai, ka rauka katoa ia Iehova i te oronga i te maroiroi kiaia kia autu i te riri o te Ariki Vaine ko Iezebela.​—1 Ariki 17:​17-24; 18:​21-40; 2 Korinetia 4:7.

Ka rauka ua i tetai te emiemi i tona irinaki anga ia Iehova. Mei ia Elia, penei i tetai taime ka akono koe i te manako tangata i tetai manamanata koi kore ei e taangaanga atu i te “pakari no runga maira” kia akono i te reira. (Iakobo 3:17) Inara, kare a Iehova i akaruke ana ia Elia no tetai tuatau poto ua.

Kua oro atu a Elia ki Bere-seba e kua aere atura ki roto i te metepara, i reira kua manako aia e kare aia e kitea mai. Inara kua kitea aia e Iehova. Kua tono atu aia i tetai angera i te akapumaana iaia. Kua akapapu te angera e kia rauka ia Elia tetai varaoa tau ouia kia kai e te au vai inu. I muri mai i te akaangaroi anga a Elia, kua akaue atu te angera iaia kia teretere no etai 300 kiro mita ki te Maunga Horeba, i reira kua akaketaketaia aia e Iehova.​—1 Ariki 19:​5-8.

I te Maunga i Horeba, kua kite atu a Elia i tetai akatutu anga akaketaketa i te akarongo o te mana o Iehova. I reira, na roto i tetai reo maru e te akaaka, kua akapapu atu a Iehova iaia e kare aia e koia anake ua. Tei reira a Iehova, e tetai 7,000 o tona taeake tei iaia katoa, kare ra i kiteia e Elia. I te openga ra, kua oronga a Iehova i tetai angaanga nana kia rave. Kare aia i akaatea ia Elia ei peroveta nana!​—1 Ariki 19:​11-18.

Rauka te Tauturu

Me te mamae ra koe i tetai taime mei te akamaroiroi kore, penei ka kitea e koe e ka meitaki mai koe me akaangaroi maata koe me kare e kai i te kai matutu. Kua kitea e Nathan H. Knorr, tei tavini ana ei mema o te Pupu Akaaere o te Au Kite o Iehova e tae ua atu ki tona matenga i te 1977, ka akaraanga meangiti i te maata anga o te taime tetai manamanata maata i muri ake i te moe meitaki anga i te po. Inara, me maro putuputu ra te manamanata penei kare te reira rapakau anga e tau​—ka anoano koe i te tauturu kia tamaki atu i te akamaroiroi kore.

Kua tuku mai a Iehova i tetai angera kia akaketaketa ia Elia. I teia tuatau, te oronga maira te Atua i te akamaroiroi anga na roto i te aronga pakari e tetai atu au Kerititiano pakari. Ka “riro oki tetai tangata [te aronga pakari] mei te punanga i te uriia ra.” (Isaia 32:​1, 2) Inara e raukai te akamaroiroi anga mei ia ratou, ka anoanoia koe kia rave manako meitaki. Noatu e kua akamaroiroi koreia mei ia Elia rai, kua teretere atu aia ki te Maunga Horeba e raukai te ikuiku anga no ko mai ia Iehova. Te rauka ra ia tatou te ikuiku anga akaketaketa na roto i te putuputuanga Kerititiano.

Me ariki tatou i te tauturu e te aro mataku kore i te akono anga i te timata anga, mei te au manako ngakau mamae, me kare te ngere anga i te au akameitakianga, te akono ra tatou i to Iehova tua o te maro anga puapinga. Teea maro anga? Kua maro a Satani e te tavini ra te au tangata ia Iehova ma te inangaro-uaorai. Kare a Satani i akaapa ana e ka patoi tatou i te Atua me aere meitaki te au mea i roto i to tatou oraanga, inara te maro ra aia e ka akamutu tatou i te tavini atu i te Atua me aro atu tatou i te au manamanata. (Iobu, pene 1 e te 2) Na te aere tamou anga i te rave ua atu i te angaanga a Iehova noatu te akamaroiroi kore, ka rauka ia tatou te tauturu i te pau atu anga i te akaapa anga pikikaa a te Tiaporo.​—Maseli 27:11.

Kua rauka pouroa ia Hana, Mareko, e Elia te  au manamanata tei keia poto ua mei ia ratou i to ratou rekareka. Inara, kua autu ratou ma to ratou au manamanata e kua akono i te au oraanga meitaki roa. Ma ta Iehova tauturu, ka rauka katoa ia koe te autu i te akamaroiroi kore!