Ruru Tetai Tangata Maani Titia i te Ua

Eaa te kapiti anga i roto i te au angaanga a tetai tangata maani titia i Lviv, Ukraine, ma te akanoo anga i tetai putuputuanga reo Rutia o te Au Kite o Iehova i Haifa, Iseraela, tetai 2,000 kiro mita e mei tetai au enua te mamao? E tua teia te akatutu ra i te tu meitaki tikai o te akakite anga a te Pipiria ia Koheleta 11:6: “Ei te popongi ka ruru ei i taau ua, e ei te aiai auraka e tāpu ua i to rima: kare oki koe i kite i te ka tupu.”

KA AKAMATA ta tatou tua i te 1990 te noo anga a Ella, e vaine mapu ngati Iuda, i Lviv. Te akapapa ra a Ella e tona pamiri no te aere atu ki Iseraela. Kare i roa i mua ake ka aere ei ratou, kua aere atu a Ella ki tetai tangata maani titia koia tetai o te Au Kite o Iehova. I taua taime ra, kua araiia te au angaanga a te Au Kite o Iehova i Ukraine. Noatu rai, kua manako te tangata maani titia no te akakite i tona au irinaki akanooia ki runga i te Pipiria kia Ella. Kua akapoitirere aia iaia na te taikuanga e e ingoa to te Atua. Kua  akatupu te reira i te manako inangaro o Ella, e kua aru mai tetai uriuri anga Pipiria meitaki.

Kua reka tikai a Ella i te uriuri anga e kua pati akaou aia i tetai i te epetoma i aru mai e tetai atu i muri mai i te reira. Te tupu ra tona inangaro, inara te vaira tetai manamanata. Te vaitata viviki ra te taime no te pamiri i te akaruke no Iseraela. E maata rai tei anoanoia e Ella kia apii! E raukai no te akapou meitaki i te taime e vaira, kua pati aia i tetai apii Pipiria i te au ra e tae ua atu ki tona akaruke anga. Noatu kare a Ella i akamata akaou i tana apii i tona tae mua anga ki Iseraela, kua aka meitaki te ua o te tuatua mou ki roto i tona ngakau. I te taeanga ki te openga o te mataiti, kua akamata akaou aia i te apii i te Pipiria ma te pakari tikai.

Kua akamata te tamaki i te Persian Gulf, e kua pomuia a Iseraela e Iraq. E tumu tuatua putuputu teia no te uriuri anga. I tetai ra i roto i te makete maata, kua rongo atu a Ella i tetai pamiri reo Rutia kua neke ou ua mai i te tuatua anga. Noatu e te apii ra aia i te Pipiria, kua aravei atu a Ella i te pamiri e kua akakite atu kia ratou i ta te Pipiria taputou o tetai ao au tikai. Tei tupu mai, kua kapiti atu te mama ruau, e Galina; te mama ko Natasha; te tamaiti ko Sasha (Ariel); e te tamaine ko Ilana ki roto i te apii Pipiria a Ella.

Ko Sasha te mema mua o te pamiri tei tae atu ki te take no te papetito anga​—noatu te au timataanga e manganui. Noatu e e tamaiti kite tikai i te apii, kua akaateaia mai aia mei te apii no te mea kare tona akava ngakau Kerititiano i akatika iaia kia kapiti atu ki roto i te terenianga vaeau, e tuanga umuumuia i te pae o te apii. (Isaia 2:​2-4) Kua apainaia atu tei tupu kia Sasha ki te Ngai Akavaanga Teitei o Iseraela i Ierusalema, tei ota ma te akapaapaa e kia akatika akaouia a Sasha e kia akamutu i tana apii. Kua kiteaia i te ngai ravarai teia akavaanga. Tei tupu mai, kua kite mai te au iti tangata Iseraela i te au irinaki anga o te Au Kite o Iehova. *

Aru mai i tona karatuati anga mei te apii teitei, kua rave atu a Sasha i te angaanga orometua tamou o te Au Kite o Iehova. I teia tuatau te tavini ra aia ei painia takake e ei tangata pakari i roto i te putuputuanga. Kua kapiti atu tona tuaine, ko Ilana kiaia i roto i te angaanga orometua tamou. Kua papetitoia to raua mama e te mama ruau ei Au Kite. Te uua ra te ua ta te tangata maani titia i ruru!

I taua taime rai, kua tere atu ki mua a Ella i te pae vaerua e kare i roaia te tutu aere ra mei tera are ki tera are. I tana ngutupa mua, kua aravei atu a Ella ia Faina, tei tae ua atura mei Ukraine maira. Te mamae ra a Faina mei te taitaia anga. Kare i roaia kua kite mai a Ella e i mua ake ka topapa ei aia i to Faina ngutupa, kua pure te vaine taitaia ki te Atua: “Kare au i kite e koai koe, inara me te akarongo mai nei koe iaku, e tauturu mai iaku.” Kua tupu te uriurianga akakeukeu i rotopu ia raua ko Ella. Kua ui a Faina i te au ui anga e manganui e kua akara meitaki i te au pau anga tei orongaia kiaia. Kare i roa ana, kua papu mai aia e te apii ra te Au Kite o Iehova i te tuatua mou mei te Pipiria. Kua akatikatika aia i tana porokaramu i te apii teitei e raukai iaia i te akapou maata i te taime ma te putuputuanga e i roto i te angaanga tutuanga. I roto ia Me 1994, kua papetitoia a Faina. Kua rave atu aia i te angaanga painia, te turuanga  iaia uaorai na te angaanga no tetai tuatau i te ngai komopiuta.

I roto ia Noema 1994, koi rave ei i te angaanga tutuanga, kua paruparu tikai a Ella. Kua aere atu aia ki te are maki i reira kua akaari mai te akara anga e te tae ra te taupo i roto i te ngakau. I te taeanga ki te aiai kua topa te tareanga toto o Ella ki te 7.2. Kua oronga atu tetai tangata pakari i roto i te putuputuanga tei reira a Ella, e tiamana o te Hospital Liaison Committee (HLC) i reira, te au tataanga no runga i te au ravenga pae vairakau e manganui tei kore i anoano kia taangaangaia te toto e te au taote. * Kua rave meitakiia te vai anga ma te manuia kare e toto, e kua meitaki mai a Ella.​—Angaanga 15:​28, 29.

Kua umere tikai to Ella taote apii maki vaine, ko Karl e ngati Iuda anauia i Tiamani. I reira kua maara mai iaia e kua kite ana tona nga metua, e nga tangata ora mai i te Akapouanga Maata, i te Au Kite o Iehova i roto i te au puakapa tamamaeanga. Kua ui a Karl i te au ui anga e manganui. Noatu e kua piti tikai i tana angaanga pae vairakau, kua akanoo a Karl i tetai tuatau no te apii putuputu i te Pipiria. I te mataiti i aru mai, te aere ra aia ki te au uipaanga Kerititiano i te epetoma.

Eaa tei tupu mai mei te ua i ruruia e te tangata maani titia? Kua kite ke ana tatou i tei tupu kia Sasha e tona pamiri. E no Ella, e orometua painia takake aia. Te akamata ra tana tamaine, ko Eina koi oti ua akera i te apii teitei, i tana angaanga ei painia. Te tavini katoa ra a Faina ei painia takake. E no Karl, to Ella taote apii maki vaine, e Kite papetitoia aia i teianei e e tavini orometua, te akakite ra i te mana rapakauanga o te tuatua mou Pipiria ki tana aronga maki e tetai atu.

Te pupu meangiti reo Rutia o te aronga tei aere atu ki tetai enua tei akamata ei tuanga o te Putuputuanga Epera Haifa kua riro mai i teianei ei putuputuanga Rutia maroiroi tere atu i te 120 papuritia Patireia. Kua tupu teia akamaata anga i tetai tuanga no tei rave meitaki tetai tangata maani titia i Lviv i te tuatau no te ruru i te ua!

[Au Tataanga Rikiriki i Raro]

[Mapu i te kapi 29]

(No runga i teia, akara i te puka)

UKRAINE

ISERAELA

[Akameitakianga]

Mountain High Maps® Copyright © 1997 Digital Wisdom, Inc.

[Au Tutu i te kapi 30]

Ko Ella raua ko tana tamaine, ko Eina

[Tutu i te kapi 31]

Tetai pupu mataora reo Rutia o te Au Kite i Haifa. Mei te kaui ki te katau: Ko Sasha, Ilana, Natasha, Galina, Faina, Ella, Eina, e Karl