“Te Ora ïa no Toou ra Au Uaua”

TE IRINAKIIA ra e kua akamataia te maata anga o te au maki o te tangata ravarai e te au taitaia i te pae ngakau mei te mataku, te mii, te vareae, te riri, te makitakita, e te manako apa. No teianei, mei teaa ra te pumaana i te tuatua a te Pipiria e ko te ‘mataku ia Iehova’ e “ora ïa no toou ra au uaua, ko te matu ïa no toou ra au ivi”!​—Maseli 3:​7, 8.

Ko te au ivi te turu anga o te kopapa. No reira, te taiku ra te Pipiria i te tuatua “au ivi” na roto i te tu akatutu i to tetai tu​—koia tikai tei akatupuia e te au manako oonu e te au manako ngakau. Inara akapeea te mataku anga ia Iehova i te riro anga e ko “te ora ïa no toou ra au uaua”?

Kua tuke te au manako o te aronga kite Pipiria no runga i te taiku anga i te “au uaua” i roto i teia irava. Te akakite ra tetai tangata akamarama no te mea “tei rotopu [te reira] o te kopapa,” te “au uaua” penei te mono ra i te au mero puapinga katoatoa. Te akakite ra tetai tangata kite e ko te tuatua “au uaua” penei te aite anga ko te tumu pito, mei tei taikuia ia Ezekiela 16:4. Me koia ia, penei te tuatua maata ra a Maseli 3:8 i to tatou anoano anga kia irinaki ki runga i te Atua​—mei tetai pepe tauturu kore e irinaki ra ki to te reira mama no te kai. Ko tetai ua atu manako koia oki e ko te “au uaua” penei te taiku ra i konei ki te au mero e te au uaua o te kopapa. I roto i te akanoonooanga o teia irava, penei te akatukeia ra teia au tuanga ki te “au ivi”​—te au mero pakari o te kopapa.

Noatu e eaa tikai to te reira aiteanga, okotai apinga papu: Te akaarianga i te tu mataku ia Iehova ko te aerenga pakari ia. Te akatanoanga ki te au turanga o te Atua te tauturu ra i to tatou tu kopapa i teianei. E tere atu i te reira, ka apai mai te reira i to Iehova tu mareka ki runga ia tatou, te ka taki atu ki tetai oraanga ope kore ma te meitaki tikai​—i te pae kopapa e te pae ngakau​—i roto i tona ao ou e aere maira.​—Isaia 33:24; Apokalupo 21:4; 22:2.

[Akameitakianga no te Tataanga i te kapi 32]

Dr. G. Moscoso/SPL/Photo Researchers