Akapeea te Tu Takaua i te Akatuke Anga i Nga Vaine

KO SANDRA tetai takaua te noo ra i Autireria. Te mate anga tana tane i etai mataiti i topa akenei, te manako viviki o Sandra e manako poitirere tikai. “Te kite anga e kua ngaro viviki iaku toku tokorua e te oa meitaki kua manamanata au. Kare roa i maara iaku e akapeea au i te oki anga ki te kainga mei te are maki mai me kare eaa taku i rave i te toenga o taua ra ra. I te au epetoma i muri akera, kua uri toku au mataku ki roto i tetai mamae anga putuputu i te pae kopapa.”

E oa pakari to Sandra, ko Elaine, e takaua no etai ono mataiti. Na Elaine i akono i tana tane, ia David, e ono marama i mua ake i tona matenga mei te maki cancer. E pakari tikai tona mamae e kare i roa ana i muri ake te matenga tana tane, kua kiteia e ia te matapo anga poto ua. E rua mataiti i muri mai kua topa aia i te ngai tangata. Kare i kitea e te taote te akairo o tona maki i te pae kopapa. Inara, kua kitea mai e ia e te mou ua ra a Elaine i tona mamae ki roto, no reira kua akakite atu aia e kia oki aia ki te kainga e kia tauta maata i te aue. “E mea roa tikai te angaanga anga i te akakore i toku mamae,” ta Elaine i akatika mai, i te kapitianga mai e me maromaroa, “e aere ua ana au ki roto i te pia moe e ka taruku i toku upoko ki roto i te au kakau o David.”

Ae, ka akatupu mai te matenga o tetai tokorua akaperepere i tetai au manako tukeke, e maata atu oki te kapitiia ra ki te tu takaua i to te noo ua anga ma te kore e tane. Ei akara anga, kua manako a Sandra i tetai taime e, kua ngaro iaia tona tu. Mei tetai au takaua mamae ou e manganui, kua manako ngoie katoa aia e te tinamou kore. Te maara ra ia Sandra e: “E mea matau ua e na taku tane e rave ana i te au iki anga openga, kua akaruke viviki ia mai ra au e kia rave i taua au iki anga. Kua tamanamanataia taku moe anga. Kua roiroi au e te paruka. E ngata tikai i te kite e eaa te ka raveia.”

Te ripiti ia ra te au tua aiteite mei to Sandra raua ko Elaine i te au ra ravarai takapini i te ao. Te akatupu ra te maki, te au u anga, te au tamaki, te tamaanga eteniki, e te au kino tei matauia kia maata te numero o te au takaua. * E manganui o teia au vaine te mamae muteki ua ra, kare i kite e eaa te ka raveia. Eaa ta te au oa e te kopu tangata ka rave i te tauturu anga i te aronga te akatanotano ra ki te tu takaua? Te atikara ka aru mai e au akataka anga etai te ka akapapu mai i te tauturu anga.

[Tataanga Rikiriki i Raro]