E Tamou i Toou Rekareka i te Tavini Anga ia Iehova
E Tamou i Toou Rekareka i te Tavini Anga ia Iehova
“E rekareka i te Atu ra, aua e tivata, e te tuatua akaou atu nei au, Kia rekareka rai kotou.”—PHILIPI 4:4.
1, 2. Akapeea i raukai i tetai taeake e tona pamiri te akono i to ratou rekareka noatu e kua ngere ratou i te au apinga ravarai?
KO JAMES, tetai Kerititiano e 70 mataiti tei noo i Sierra Leone, kua rave angaanga pakari i tona oraanga katoa. E tamanako ana i tona rekareka i tana akaputu anga kia rava te moni ei oko i tetai are tau e a pia! Inara, i tetai tuatau i muri mai i te aere atuanga a James ratou ko tona pamiri ki roto, kua akamata mai te tamaki i taua enua, e kua tutungi pu tikaiia to ratou are e tae ua atu ki te one. Kua ngere ratou i to ratou are, inara kare ratou i ngere i to ratou rekareka. No teaa ra?
2 Kua tamou marie atu a James ratou ko tona pamiri i to ratou au manako, kare ki runga i tei ngaro atura, mari ra ki runga i tei vai maira. Kua akataka mai a James: “Noatu i te tuatau mataku ra, kua rave matou i te au uipaanga, kua tatau i te Pipiria, kua pure kapiti, e kua tua aere i te meangiti ta matou i rauka ma etai atu. Kua rauka ia matou te tamou i to matou rekareka anga no te mea kua manako atu matou i to matou pirianga taka ke ma Iehova ra.” Na te manakoanga i to ratou au akameitakianga, te mea maata rava ko te pirianga vaitata ma Iehova, kua rauka i teianei au Kerititiano tiratiratu “kia tamou i te rekareka.” (2 Korinetia 13:11, NW) Inara, kare to ratou au turanga pekapeka i te mea ngoie ua kia akakoromaki. Inara kare ratou i akamutu i te rekareka ia Iehova.
3. Akapeea i tamou ei te rekareka o etai au Kerititiano mua ra?
3 Kua rokoia te au Kerititiano mua ra e te au timata anga aiteite ki tei tupu ra kia James e tona pamiri. Inara, kua tata te apotetoro ko Paulo i teianei au tuatua ki te au Kerititiano Epera ra: “Kua āriki ua [kotou] i te noni anga i to kotou apinga ma te rekareka.” I reira kua akataka mai a Paulo i te tumu o to ratou rekareka: “Kua kite oki kotou e apinga meitaki maata ua atu ta kotou.” (Ebera 10:34) Ae, e mana ririnui te manakonako anga o taua aronga Kerititiano o te anere mataiti mua ra. Kua akara irinaki atu ratou ki mua i te raukaanga tetai apinga kare e rauka kia noniia—koia te “korona ora” kare e mae, i te Patireia o te Atua i te rangi ra. (Apokalupo 2:10) I teia tuatau, to tatou manakonako Kerititiano—no te rangi me kare no te enua—ka rauka kia tauturu ia tatou kia tamou i to tatou rekareka noatu rai me ka aro atu tatou i te au pekapeka kino.
“E Rekareka i te Inanakonako Anga”
4, 5. (a) Eaa ta Paulo akoanga kia “rekareka i te inanakonako anga” i tau ei no to Roma ra? (e) Penei eaa te ka akariro kia ngere tetai Kerititiano i tona manakonako anga?
4 Kua akamaroiroi atu te apotetoro ko Paulo i te au oa akarongo i Roma ra kia “rekareka i te inanakonako anga” no te oraanga mutu kore. (Roma 12:12) E ako anga tau te reira ki to Roma. Kare i pou tetai ngauru mataiti i muri mai i ta Paulo tataanga kia ratou, kua o mai ratou ki raro i te takinga kinoanga kino roa, kua tamamaeia tetai papaki kia mate na te ikuiku anga a Emepera Nero. Kare e ekoko anga no to ratou akarongo e ka oronga atu te Atua kia ratou i tei taputouia te korona ora kua akamaroiroi atu ia ratou i to ratou mamaeanga. Ka akapeea tatou i teia tuatau?
5 Ei au Kerititiano, te manako atura tatou kia takinga kinoia. (2 Timoteo 3:12) Pera katoa, te kite ra tatou e “e tuatau ra, e te manuia” to tatou katoa nei. (Koheleta 9:11) Ka rauka i tetai tumatetenga kia apai ke atu i te oraanga o tetai ta tatou i akaperepere ra. Ka rauka i tetai maki kino kia tamate atu i tetai metua me kare oa piri vaitata. Na to tatou tamou anake anga i to tatou manakonako anga Patireia kia taka meitaki, penei ka akakinoia tatou i te pae vaerua me ka rokoia mai e taua au tu timataanga ra. No reira, ka meitaki tatou kia ui kia tatou uaorai, ‘Te “rekareka [ra ainei au] i te inanakonako anga”? Eaa te putuputu o toku akataka anga i te tuatau kia akamanako i te reira? E tika tikai ainei te Parataito e aere maira kiaku? Te akara ra ainei au iaku uaorai i reira? Te inangaro maata ra ainei au kia tae mai te openga o teianei akatereanga o te au mea nei mei toku tu i taku kite mua anga i te tuatua mou?’ Te tau ra te manako anga oonu no teia uianga openga nei. No teaa ra? No te mea me te meitaki ra to tatou ora anga, te rauka ra ia tatou te moni no te oraanga, e te noo ra i tetai tuanga o te enua kare ra e taitaia i te tamaki, te onge kai, me kare te au tumatetenga natura ra, ka rauka ia tatou—no teia atianga nei—kia ngere i te umuumu anga maata no te ao ou a te Atua te aere maira.
6. (a) I to Paulo raua ko Sila mamae anga i te mate, kua aere atu to raua manako ki runga i teaa? (e) Akapeea e raukai i ta Paulo raua ko Sila akatauanga kia akamaroiroi ia tatou i teianei?
6 Kua ako katoa a Paulo i to Roma kia “akakoromaki i te mate.” (Roma 12:12) Kua matau a Paulo i te tu no te mate. I tetai taime, kua akara aia i tetai orama no tetai tangata tei pati maira iaia “ka ano mai ki Makedonia nei” kia tauturu i te au tangata i reira kia kite ia Iehova. (Angaanga 16:9) I te reira, kua teretere atura Paulo ma Luka, e Sila, e Timoteo ki Europa. Eaa tei tatari maira i taua aronga mitinari totomapu ra? E mate! I muri ake i ta ratou tutu aereanga i te oire i Makedonia o Philipi ra, kua papaia a Paulo raua ko Sila e kua makaia ki roto i te are tapekaanga. Te taka meitaki ra, ko tetai papaki o te au tangata i Philipi kare i te manako kore ua i te tuatua Patireia ra—e patoi anga riri kino to ratou. Kua akariro ainei teianei tarurike anga o te au tupu anga i te au mitinari totomapu ra kia ngere i to ratou rekareka anga? Kare. I muri ake i to raua papa angaia e te maka angaia ki roto i te are tapekaanga, “e turuaipo akera, kua pure iorā Paulo raua ko Sila, imene atura ma te akameitaki i te Atua.” (Angaanga 16:25, 26) Inara, te mamae no te papa anga ra kare i oronga i te rekareka anga kia Paulo raua ko Sila, inara kare ko te reira ta te nga mitinari e rua ra i akamanako atu. Kua tukuia to raua au manako ki runga ia Iehova e te au tu tana i akameitaki atura ia raua. Na te ‘akakoromakianga i te mate’ ma te rekareka, kua tavini a Paulo raua ko Sila ei akatauanga meitaki no to raua au taeake i Philipi e i etai atu au ngai ke.
7. Eaa i tau ei ta tatou au pure kia kapiti i te akameitakianga?
7 Kua tata Paulo: “Tamou marie tikai i te pure.” (Roma 12:12) Te pure ra ainei koe me rokoia koe e te au atianga apiapi? Eaa taau ka pure? Penei ka taiku koe i toou manamanata tikai e ka pati no ta Iehova tauturu. Inara ka rauka katoa ia koe te kapiti atu i te au akakite akameitakianga no te au akameitakianga taau i rekareka. Me tupu mai te au manamanata, na te akaataanga ki runga i to Iehova ra meitaki i tana au akonoanga ia tatou ka tauturu ia tatou kia “rekareka i te inanakonako anga.” Ko Davida tei mamao ke atura tona oraanga mei te taitaia kore, kua tata: “E manganui, e taku Atua, e Iehova, te au angaanga taka ke i raveia e koe ra, e toou ra manako ia matou nei: kare e tika kia tatau ua atu ki mua ia koe na; e akakite au, e tuatua oki au i te reira; kare ra e tika kia tatau atu i te maata.” (Salamo 40:5) Me, mei ia Davida ra, ka akamanako putuputu tatou ki runga i te au akameitakianga ta tatou i rauka mai mei ia Iehova, ka kite tatou e kare e rauka kia kore e rekareka.
E Tamou Marie i te Vaerua Papu
8. Eaa te ka tauturu i tetai Kerititiano kia vai mataora me takinga kinoia?
8 Kua akamaroiroi a Iesu i tana au pipi kia tamou marie i te vaerua papu me rokoia ratou e te au timataanga tuke tuke ra. Kua tuatua aia: “E ao to kotou, kia akakino mai, e kia takinga-kino mai, e kia tapepe pikikaa ua mai te tangata ia kotou i te au kino katoa nei, noku nei.” (Mataio 5:11) Eaa ta tatou tumu no te mataora anga i raro ake i taua au turanga? Te rauka anga ia tatou kia akakoromaki i te patoianga e akapapu anga e tei runga ia tatou te vaerua o Iehova. Kua akakite atu te apotetoro ko Petero ki tona au oa Kerititiano i tona tuatau ra: “Kia akakinoia kotou i te ingoa o te Mesia ra, e ao to kotou; no te mea te noo ra te Vaerua kakā, te Vaerua o te Atua, ki runga ia kotou.” (1 Petero 4:13, 14) Na tona vaerua, ka tauturu katoa mai a Iehova ia tatou kia akakoromaki e, ei tupu anga, ka tamou marieia to tatou rekarekaanga.
9. Na teaa i tauturu i etai taeake kia kite i te au tumu no te rekareka ia ratou i roto i te tapekaanga no to ratou akarongo?
9 Noatu rai me tei roto tatou i te au turanga kino roa, ka kitea e tatou te au tumu no te rekareka. Kua kitea e tetai Kerititiano ko Adolf te ingoa e ko te tika te reira. Te noo ra aia i tetai enua tei araiia ra te angaanga a te Au Kite o Iehova no te au mataiti e manganui. Kua tapekaia a Adolf ratou ko tona oa e kua akautungaia no te au tuatau roa ki roto i te tapeka anga no te kore ratou e akaruke i to ratou au irinaki anga akatumuia i te Pipiria. E ngata ra te oraanga i roto i te tapekaanga, inara mei ia Paulo raua ko Sila ra, kua kitea e Adolf e tona au taeake te au tumu kia oronga te akameitaki anga ki te Atua. Ta ratou i kite i te noo mou auri anga, kua kite ratou, i te tauturu anga kia maroiroi to ratou akarongo e kia akatupu i te au tu Kerititiano puapinga, mei te oronga ua, te tangi ia etai ke, e te inangaro taeake. Ei akatauanga, i te rauka anga i tetai mou auri ra tetai apinga no te kainga maira, kua tua atu aia i tana au apinga ma te au oa akarongo ra, tei manako ra i teianei au apinga e no ko mai ia Iehova ra, koia Tei Oronga mai i “te au mea memeitaki i o maiia ra, e te au mea tika ravarai.” Kua apai mai taua au angaanga takinga meitaki ra i te rekareka ki tei oronga maira e ki te aronga tei rauka ra ia ratou etai. No reira ko te akatupu anga tikai no tei manakoia ra ei akakore i to ratou akarongo kua akariro ia ratou kia maroiroi roa atu i te pae vaerua ra.—Iakobo 1:17; Angaanga 20:35.
10, 11. Akapeea tetai tuaine te akonoanga i te uiuianga roa tei aruia mai e tetai tuatau tapekaanga roa ra?
10 Ko Ella, tei noo katoa ki tetai enua kua roa te arai anga i te angaanga Patireia, kua tapekaia no te akakite anga i tona manakonako anga Kerititiano ma etai ke ra. No te varu marama, kua raveia te au uiuianga aroa koreia kiaia. I te openga iora kua apaiia aia ki te akavaanga, kua orongaia kiaia e tai ngauru mataiti te akautunga ki roto i te are auri te ngai kare atu e tangata akamori ia Iehova. E 24 ua mataiti o Ella i taua taime ra.
11 Inara, kare a Ella i manako atu i te akapouanga i te maataanga o tona ouanga ki roto i tetai pia tapekaanga. Inara i te mea kare e rauka iaia kia taui i tona turanga, kua iki aia kia taui i tona manakoanga. No reira kua akamata aia i te manako i te are tapekaanga ra ei ngai tutu aereanga nana. “E maata te tutuanga kia raveia,” tana ia i tuatua, “e kua viviki ua te topa anga o te au mataiti.” I muri ake i te tere atu i te rima mataiti, kua uiui aroa kore akaouia a Ella. I te kiteanga e kare te au arai tapekaanga i akapou i tona akarongo, kua tuatua atu tona aronga uiui kiaia: “Kare e rauka ia matou te tuku ia koe; kare oki koe i taui.” “Kua taui au!” ta Ella pauanga ngaueue kore i pau atu. “Tei roto au i te au tu vaerua meitaki atu i teianei i toku aere mua maianga ki te tapekaanga, e e maroiroi maata atu toku akarongo i to mua ana!” Kua tuatua kapiti atu aia: “Me kare kotou e anoano kia tuku iaku kia aere, ka noo rai au tae roa kia kite a Iehova e kua tau kia akaora iaku.” Kare te rima e te apa mataiti o te tapekaanga i akangere ia Ella i tona rekareka anga! Kua kite aia i te merengo anga noatu eaa te au turanga ka kite aia iaia uaorai. Ka kite ainei koe i tetai apinga mei tana akatauanga?—Ebera 13:5.
12. Eaa te ka apai mai i te au ki te manako o tetai Kerititiano i roto i te au turanga ngata ra?
12 Auraka e manako e tei ia Ella etai apinga tuke tei akatika ra iaia kia aro atu i taua au tu akaaoanga ra. I te taikuanga i te tuatau no tona uiuianga ra i nga marama i mua ake i te rauka anga iaia tona akautunga, kua akakite a Ella: “Kua maara au i te pakapakakina anga o toku au nio, e kua manako ngakau au mei tetai manu rikiriki mataku ra.” Inara, kua ririnui to Ella akarongo ia Iehova. Kua kite aia i te tuku i tona irinaki anga kiaia. (Maseli 3:5-7) Ei tupu anga, kua tika tika maata atu te Atua kiaia i to mua ana. Kua akataka aia: “I te au taime ravarai i tomo atu ei au ki te pia uiuianga ra, kua manako ngakau au i te aerenga mai te au ki rungao iaku. . . . Te maata atu te matakuanga o te turanga, te oonu atu ia te tupu anga te au.” Ko Iehova te tumu o taua au ra. Kua akataka maira te apotetoro ko Paulo: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.”—Philipi 4:6, 7.
13. Eaa te akapapu maira kia tatou e me aere mai te mate kia tatou, ka rauka ia tatou te ririnui kia akakoromaki?
13 A Ella, tei tukua maira ki vao i muri iora, kua tamou marie i tona rekarekaanga noatu te tu ngata. Kua rave aia i teia, kare i tona uaorai maroiroi, mari ra i te maroiroi ta Iehova i oronga kiaia. Ko te tika katoa te reira no te apotetoro ko Paulo, tei tata ra: “E teianei, e mea rekareka ïa iaku kia akatietie i toku nei paruparu, kia vai marie te maroiroi o te Mesia i runga iaku nei. . . . kia paruparu oki au ra, te maroiroi ra au i reira.”—2 Korinetia 12:9, 10.
14. E akatutu mai e akapeea e raukai i tetai Kerititiano te manako papu no tetai turanga timataanga e penei eaa te tupu anga.
14 Penei e manga tuke te au taomianga taau uaorai e aro atu ana i teia tuatau mei ta tatou i uriuri manako akenei i konei. Inara, noatu eaa to ratou tu, e mea ngata te akakoromaki anga ma te au taomianga. Ei akatauanga, penei e akaapaanga maata ta te pu i taau angaanga—e maata atu i tana e rave ana no te aronga te angaanga katoa ra inara no etai atu akonoanga ke. Penei kare e rauka ia koe te kimi i tetai atu angaanga. Akapeea koe me tamou marie i toou rekareka anga? E akamaaraara ia Adolf ratou ko tona au oa, tei riro ra na to ratou tapekaanga i apii ia ratou kia akatupu i etai au tu puapinga maata. Me ka akono koe i te tauta anga ngakau tae kia akamerengo i toou pu angaanga—noatu me ko tetai tei “ngata ra kia akamarekaia”—ka rauka ia koe kia akatupu i taua au tu Kerititiano mei te akakoromaki anga e te kauraro marie. (1 Petero 2:18) Pera katoa oki, penei ka riro koe ei puapinga maata atu ei tangata angaanga, e penei ka akamaata atu i toou tika kia rauka mai tetai angaanga akamerengoanga a tetai tuatau. E uriuri manako tatou i teianei i etai atu tu e raukai ia tatou kia tamou marie i to tatou rekareka anga i te tavinianga ia Iehova.
Arataki atu te Akamama Anga mai ki te Rekareka Anga
15-17. Eaa tei kiteia mai e tetai nga tokorua te ka rauka i te akakore i te taitaia, noatu rai e kare e rauka kia takore takiriia tona tumu?
15 Penei e meangiti ua taau ikianga i te tu angaanga taau e rave ana me kare no te ngai ka angaanga koe, inara penei te vaira etai atu turanga i toou oraanga te ka rauka ia koe kia akono i tetai akatereanga. E akamanako ana i tetai tupuanga te aru mai nei.
16 Kua pati atu nga tokorua i tetai o te aronga pakari ki to raua kainga no tetai kaikaianga. I taua aiai ra, kua tuatua muna atu taua taeake ra e tana vaine e i te tuatau kua topa ua akenei kua manako ngakau teiaaia raua na te au taomianga o te ora anga. Noatu rai e angaanga ta raua tokorua te akapou ra i te taime, kare raua i roto i tetai turanga kia akara no etai atu angaanga. Kua manako ua raua eaa te roa e raukai ia raua kia rave i te reira tu.
17 I te uianga no tetai manakoanga, kua pau atu taua tangata pakari ra, “E akamama mai.” Akapeea ra? Te akapou ra taua tane ra e tana vaine e toru ora ia raua i te ra takitai i te aerenga ki te angaanga e te oki mai anga. Kua akakite atu taua tangata pakari, tei kite meitaki ra ia raua e, kia neke atu raua kia vaitata ki ta raua ngai angaanga, kia raukai ia raua te akameangiti mai i te taime akapouia e raua no te aerenga e te oki maianga i te angaanga i te au ra takitai. Ka rauka kia akapouia te taime toe mei i te akono anga i etai atu au apinga puapinga—me kare kia akaangaroi ua. Me te akangere ra te au taomianga o te oraanga i tetai tuanga o toou rekarekaanga, eaa ka kore ei e akara me ka rauka ia koe te tauturu na te rave anga i etai au akatikatikaanga?
18. Eaa ra i puapinga maatai kia tamanako matakite i mua ake i te tukuanga tika?
18 Tetai atu tu kia akameangiti mai i te taomianga na te tamanako matakite anga i mua ake ka rave ei i te au ikianga. Ei akatauanga, kua iki tetai Kerititiano kia patu i tetai are. Kua iki aia i tetai tu ngata tuke rai, noatu e kare aia i patu ana i tetai are i mua ana. I teianei kua kite aia e e rauka iaia i te kopae ke i te au manamanata umuumu koreia naringa aia i ‘akamanako i tona au takainga i mua ake i te ikianga i te tu’ no tona are. (Maseli 14:15) Kua akatika tetai atu Kerititiano kia turu i te apainga no tetai rounu na tetai oa akarongo. Kia tau ki te koreromotu, me kare e rauka i tei apai ra te tutaki i te rounu, ka riro na tei turu i te apainga ra e rave i te reira. I te akamata anga, kare e manamanata, inara i muri akera kua akamata tei apai ra i te kore e tutaki. Kua poitirere tei ouia ra e kua pati e kia tutaki atu tei turu ra i te apainga i te rounu katoa ra. Kua tuku te reira i tetai taomianga maata ki runga i te turu apainga ra. E rauka ainei kia kopaeia taua tu ra naringa i rave akamanako anga matakite aia i te au tumu katoa i mua ake ka akatikai aia kia rave i taua apainga ra no te kaiou?—Maseli 17:18.
19. Eaa etai au ravenga e raukai ia tatou kia akameangiti mai i te taitaia i to tatou au oraanga?
19 Me roiroi tatou, auraka tatou e manako e kia akameangiti mai i ta tatou taomianga e kia rauka akaou te rekareka na te akameangiti anga i te apiianga Pipiria, te angaanga tutu aereanga, e te aereanga ki te uipaanga. No teaa ra, e au aerenga puapinga maata teianei e raukai ia tatou te vaerua tapu o Iehova, tetai o tona ua ko te rekareka ia. (Galatia 5:22) Te mea matauia e akapumaana te au angaanga Kerititiano e kare e akaroiroi maata. (Mataio 11:28-30) Ko te au angaanga ra e te au tamataora anga, kare ko to te pae vaerua te akaroiroi maira ia tatou. Te apiianga kia aere ki te roi i te ora tau penei ka tauturu ia tatou ki te aerenga tika. Ka mamao te aereanga o tetai akaangaroianga. Kua tuatua a N. H. Knorr, koia tetai tei tavini ra ei mema no te Pupu Akaaere o te Au Kite o Iehova tae roa ki tona matenga, kua akakite ki te au mitinari: “Me ka maromaroa koe, te mea mua kia rave ko te akaangaroianga. Ka poitirere koe i te maata o te meitaki anga mai o tetai ua atu manamanata i muri ake i tetai po moeanga meitaki!”
20. (a) E akataka mai i etai au ravenga e raukai ia tatou kia tamou i to tatou rekareka anga. (e) Eaa etai tumu te rauka ra ia koe te tamanako no te rekareka anga? (Akara i te pia i te kapi 17.)
20 E tika taka ke to te au Kerititiano kia tavini atu i “te Atua mataora ra.” (1 Timoteo 1:11, NW) Mei ta tatou i kite ana, ka rauka ia tatou kia tamou marie i to tatou rekareka anga noatu me ka rokoia e te au manamanata kikino. E tuku tatou i te manakonakoanga Patireia ki mua ia tatou, e akatikatika i to tatou manako anga me te umuumuia ra, e kia akamama i to tatou oraanga. Ei reira, noatu eaa te turanga ka kite tatou ia tatou uaorai i roto, ka rauka ia tatou kia akono i te au tuatua a te apotetoro ko Paulo ra: “E rekareka i te Atu ra, aua e tivata, e te tuatua akaou atu nei au, Kia rekareka rai kotou!”—Philipi 4:4.
E Akamanako Ua i Teia Au Uianga:
• Eaa te au Kerititiano i tau ei kia akara papu atu i te manakonako anga no te Patireia?
• Eaa te ka tauturu ia tatou kia tamou i to tatou rekareka anga noatu i roto i te au turanga ngata?
• Eaa tatou i tau ei kia akamama mai i to tatou au oraanga?
• I roto i teea au ngai i akamama mai ei tetai papaki i to ratou au oraanga ra?
[Au Uianga Apii]
[Pia/Au Tutu i te kapi 17]
Etai Atu Au Tumu no te Riroanga kia Rekareka
Ei au Kerititiano, e manganui te au tumu no tatou kia rekareka. E akamanako i te ka aru mai nei:
1. Te kite ra tatou ia Iehova.
2. Kua kite tatou i te tuatua mou o te Tuatua a te Atua.
3. Ka rauka ia tatou kia akakoreia ta tatou au ara na to tatou akarongo i to Iesu ra atinga.
4. Te tutara nei te Patireia o te Atua—kare e roaia ka tae mai te ao ou ki konei!
5. Kua apai mai a Iehova ia tatou ki roto i tetai parataito vaerua.
6. Te rekareka nei tatou i te taokotai anga Kerititiano tau.
7. Tei ia tatou te tika kia rave kapiti i te angaanga tutu aere.
8. Te ora nei tatou, e e tuanga maroiroi to tatou.
Eia atu au tumu e manganui no te rekareka ka rauka ia koe te taiku?
[Tutu i te kapi 13]
Kua rekareka a Paulo raua ko Sila noatu i roto i te tapekaanga
[Au Tutu i te kapi 15]
Te akara atu nei ainei koe ki runga i te manakonako anga no te ao ou o te Atua?