‘Te Taporoporo Marie ra’ Ainei Koe?

KUA ako atu te apotetoro ko Paulo i te au Kerititiano o Ephesia i te anere mataiti mua ra e: “Kia matakite i to kotou aerenga, eiaa mei ta te kite kore, mei ta te aronga pakari ra. Ma te taporoporo marie i te tuatau, no te mea e tuatau kino teia.” (Ephesia 5:​15, 16) Eaa ra i anoanoiai teia akoanga? Te pau anga ki taua uianga te umuumuia ra te kite o te au turanga ta te au Kerititiano i aro atu i taua oire taito ra.

Kua kiteia mai a Ephesia no tona apinganui maata, te tu tau kore kino, te kino maata, e te au angaanga temoni tukeke ra. Kapitiia mai, te au Kerititiano i reira kua akakoromaki i te au irinaki anga apii no runga i te tuatau. Te aronga kare ratou i te Kerititiano Ereni i Ephesia ra kare e irinaki ana e te neke ra te ora i roto i tetai raini tika. Kua apiiia ratou e te apii anga Ereni e te ripitiia ra te oraanga i roto i te au aerenga mutukore. Ko tetai tangata te kaimoumou ra i tona tuatau i roto i tetai aerenga o te oraanga ka rauka katoa te oki akaou mai i roto i tetai atu aerenga. Ko teia tu manakoanga penei e kua akakeu i te au Kerititiano Ephesia kia ariki i tetai tu manako kore ua i to Iehova ra tuatau o te au tupu anga, kapiti mai tona tuatau no te akavaanga tu-Atua ra. No reira, te tau ra ta Paulo ako anga kia ‘taporoporo i te tuatau.’

Kare a Paulo e tuatua ua ra no runga i te ora ma tetai manako matauia. Te tuatua Ereni tana e taangaanga ra te akataka maira i tetai tuatau akatakaia, tetai atianga akatanoia no tetai akakoroanga taka meitaki ra. Te ako ra a Paulo i te au Kerititiano o te anere mataiti mua ra kia akono pakari i te tuatau taporoporoia, me kore te atianga reka ra, ta ratou e rekareka nei, i mua ake ka tae mai ei tona openga e ka akakoreiai te aroa tu-Atua ra e te ora tei orongaia maira.​—Roma 13:​11-13; 1 Tesalonia 5:​6-11.

Te noo aiteite nei tatou i roto i te tuatau taporoporo o te tuatau ra. Kia kore e kaimoumou i teia atianga reka kare e ripiti akaouia na te kimianga i te au tamataora poto tei orongaia mai e teianei ao, e mea pakari i te au Kerititiano kia taangaanga ratou i te tuatau tei orongaia mai kia ratou kia rave i te “tuatua tapu e te akono i te Atua” e i reira e akamaroiroiiai to ratou piri anga ki Tei Anga, ki te Atua kia Iehova ra.​—2 Petero 3:11; Salamo 73:28; Philipi 1:10.