Au Uianga a te Aronga Tatau

I naea “Tei Tapu” ra i te akatainu angaia, mei tei totouia ia Daniela 9:24?

E totou a Daniela 9:​24-​27 no runga i te mama anga mai o te “ Mesia te Ariki ra”​—ko Karaiti. No reira, kare te akatainu anga tei totouia o “Tei Tapu” ra, e taiku ana ki te akatainuanga o te Ngai Tapu Roa o te iero i Ierusalema. Mari ra, te tuatua “Tei Tapu” ra te taiku ra ki te ngai akamorianga o te Atua i te rangi ra​—te Ngai Tapu Roa i te rangi ra​—i roto i te iero vaerua maata o Iehova ra. *​—Ebera 8:​1-5; 9:​2-​10, 23.

I naea i akamata ei te iero vaerua o te Atua i te angaanga anga? Ka akamanako ana i tei tupu i te oronga anga a Iesu iaia uaorai e kia papetitoia i te 29 T.N. Mei te reira taime mai o tona oraanga, kua akatupu a Iesu i te au tuatua ia Salamo 40:​6-8. Kua akakite mai te apotetoro ko Paulo i muri mai e kua pure a Iesu ki te Atua: “Kare koe i inangaro i te tarangaara e te atinga ra, e kopapa ra taau ïa i akono noku.” (Ebera 10:5) Kua kite a Iesu e kare te Atua “i inangaro” i te au atinga animara e kia oronga tamou uaia atu i te iero i Ierusalema. Mari ra, kua akapapa ke ana a Iehova i tetai kopapa tangata apa kore no Iesu kia oronga ei atinga. Te akakiteanga i tona anoano ngakau tae, kua karanga atu a Iesu: “I na, e taku Atua, te aere nei au e akatika i toou anoano, (kua tataia te tuatua noku ra i roto i te pokaikai tuatua ra.” (Ebera 10:7) Eaa oki ta Iehova pau anga? Te akakite maira te Evangeria a Mataio: “E oti akerā Iesu i te bapetizoia, kake maira aia ki runga mei raro mai i te vai; e i na, veveteia akera te rangi iaia, akara akera aia i te Vaerua o te Atua i te eke anga mai mei te kukupa, e te to anga mai ki rungao iaia: E i na, ko te reo maira no te rangi, i te na ko anga mai e, Taku Tamaiti akaperepere teia, kua mareka rava au iaia.”​—Mataio 3:16, 17.

Te ariki anga te Atua ko Iehova i te oronga anga o te kopapa o Iesu ei atinga te aiteanga e kua tupu mai tetai atarau maata atu i te atarau tika tikai i roto i te iero o Ierusalema. E atarau teia o te “inangaro” o te Atua, me kare te akapapaanga no te arikianga i te oraanga tangata o Iesu ei atinga. (Ebera 10:10) Te akatainu anga ia Iesu ma te vaerua tapu te aite anga e kua akanoo te Atua i teianei i te katoa anga o tana akapapaanga o te iero vaerua. * No reira, i te papetito angaia a Iesu, kua akatainuia to te Atua ngai i te rangi ra, me kare kua akatakakeia, e ko “Tei Tapu” ra i roto i te akapapaanga o te iero vaerua maata ra.

[Au Tataanga Rikiriki i Raro]

[Tutu i te kapi 27]

“Tei Tapu” kua akatainuia i te papetito angaia a Iesu