E Akapaapaa ia Iehova No Tana Au Angaanga Maata!

“Kua akamaata toku vaerua i te Atu . . . e ravenga maata oki ta Tei mana ra iaku nei.”​—LUKA 1:46-49.

1. No teea au angaanga maata ta tatou ka tika kia akapaapaa ia Iehova?

TE TAU ra kia akapaapaaia a Iehova no tana au angaanga maata. I ta te peroveta ko Mose ra akakite anga i te akaora anga ia Iseraela mei Aiphiti maira, kua karanga aia: “Kua kite pu to kotou na au mata i taua angaanga maata katoa a Iehova.” (Deuteronomi 11:1-7) Aiteite katoa, i te akakite anga te angera ko Gaberiela i te anauanga o Iesu te aere maira ki te tamaine paretenia ko Maria, kua tuatua atu a Maria: “Kua akamaata toku vaerua i te Atu . . . e ravenga maata oki ta Tei mana ra iaku nei.” (Luka 1:46-49) Ei Au Kite o Iehova, ka akapaapaa tatou iaia no taua au angaanga maata mei te akamatara anga mai i to Iseraela ra mei te tuikaa anga i Aiphiti e te toanga temeio maira o tana Tamaiti akaperepere.

2. (a) Eaa te aiteanga o ta te Atua ra “akakoroanga” no te au tangata akarongo? (e) Eaa ta Ioane i kite i runga i te enua o Patomo ra?

² E manganui ta Iehova au angaanga maata kua taokotaiia atu ma tana “akakoroanga” ra kia akameitaki i te au tangata akarongo na roto i te Mesia e tana tutara anga Patireia ra. (Ephesia 3:8-13) Kua akamata te tupuanga mai o taua akakoroanga i te akatika anga ia te apotetoro ruaine ko Ioane ra kia akara atu na roto i tetai orama ngutupa tei akatueraia maira i te rangi. Kua akarongo atura aia i tetai reo mei te pu rai i te tuatua anga: “Ka aere mai na ki runga nei, e naku e akakite atu kia koe i te au mea e tikaʼi kia tupu a muri nei.” (Apokalupo 4:1) I te apai tuikaa anga ia atu e te kavamani o Roma ki te enua ko Patamo “no te tuatua a te Atua ra, e no toku akakite anga ia Iesu Mesia,” kua rauka mai ia Ioane “tetai akakite anga na Iesu Karaiti.” Ta te apotetoro i akara ra e i akarongo oki kua akakite maata mai i ta te Atua ra akakoroanga mutu kore, na te reira te oronga anga mai i te akamarama anga pae vaerua e te akamaroiroi anga tau no te au Kerititiano mou katoatoa.​—Apokalupo 1:​1, 9, 10.

3. Koai ma tei akatutuia e te 24 aronga taito ta Ioane i kite i roto i te orama ra?

³ Na roto atu i taua pa tei akatueraia akera i te rangi, kua kite atura Ioane e 24 aronga taito, tei akateronoia e kua akakoronaia mei te au ariki rai. Kua tipapa iora ratou ki raro ki mua i te Atua e kua tuatua: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.” (Apokalupo 4:​11) Ko taua aronga taito ra te akatutu maira i te au Kerititiano akatainuia katoa tei akatuakaouia ra ki roto i te turanga akateiteiia ta te Atua i taputou ra kia ratou. Kua akakeuia ratou kia akapaapaa ia Iehova no tana au angaanga maata tei taokotaiia atura ma te au mea angaia maira. Te umere katoa ra oki tatou i te kite anga i to Iehova ra “mana mutu kore anga, e te Atua anga.” (Roma 1:20) E ko te maata atu  to tatou apii anga no Iehova, ko te maata atu ia te tumu no tatou kia akateitei atu iaia no tana au angaanga maata ra.

E Akakite i ta Iehova Au Angaanga Tau kia Akapaapaaia!

4, 5. E oronga mai i etai akatauanga i akapeea ta Davida akapaapaa anga ia Iehova ra.

⁴ Kua akapaapaa te tata taramo ko Davida i te Atua ra no Tana au angaanga maata. Ei akatauanga, kua imene a Davida: “E imene akameitaki kia Iehova, tei noo i Ziona; e akakite i te au tangata ra i tana i rave ra: E aroa mai koe iaku, e Iehova e, ka akara mai i toku nei tumatetenga i te aronga i riri mai iaku nei, e tei akatu mai iaku mei te ngutupa mai o te mate ra; Kia akaope au i taku akameitaki ia koe i te au ngutupa o te tamaine o Ziona.” (Salamo 9:​11, 13, 14) I muri ake i te orongaanga ki tana tamaiti kia Solomona i te parani patuanga no te iero ra, kua akameitaki a Davida e kua akapaapaa oki i te Atua, i te na ko anga: “Tei ia koe, e Iehova, te maata, e te mana, e te kakā, e te autu, e te tapunui. . . Tei ia koe te au, e Iehova, e ko koe tei teitei ei upoko i te au mea katoa nei . . . E teianei, e to matou Atua, te akameitaki nei matou ia koe, e te akapaapaa nei i toou ingoa kakā.”​—1 Paraleipomeno 29:10-​13.

⁵ Te pati putuputu maira te au Tuatua Tapu​—ae, te raurau maira—​ia tatou kia akapaapaa i te Atua, mei ta Davida i rave ra. Te vaira e manganui te au tuatua akapaapaa anga i te Atua i roto i te puka a Taramo, e vaitata i te apa o taua au imene ra kua akatakaia e na Davida. Kua akapaapaa aia e kua akameitaki tamou oki ia Iehova. (Salamo 69:30) Pera katoa, mei muatangana maira, kua taikuia te au tuatua anga akauruia e te Atua na Davida e etai atura ei akapaapaa anga ia Iehova.

6. Akapeea te au Taramo akauruia ra i puapingai kia tatou?

⁶ Mei teaa ra te meitaki o te au Taramo ki te aronga akamori ia Iehova ra! Me anoano tatou kia akameitaki i te Atua no tana au angaanga maata katoa no tatou, penei ka tau to tatou au manako kia ariu atu ki te au tuatua manea te kitea ra i roto i te au Taramo. Ei akatauanga, i te ara mai anga ki tetai ra ou, penei ka akakeuia tatou kia taiku i te au tuatua aiteite ki teia: “E mea meitaki te akameitaki ia Iehova, e te imene akameitaki i to ingoa, e Tei Teitei e: i te akakite i to takinga-meitaki i te popongi, e te tuatua mou naau i te au aiai katoa ra; . . . te akarekareka maira oki koe iaku, e Iehova, i taau i rave ra: ka umere parua au i te angaanga a to rima.” (Salamo 92:​1-4) Me autu tatou i tetai arairai anga i to tatou tereanga ki mua i te pae vaerua, penei ka manako tatou kia akakite i te rekareka e te akameitaki na roto i te pure, mei ta te tata taramo i rave i tana imene anga: “Tatou, e imene ia Iehova: e imene nui i te mato e oraʼi tatou nei. E aere tatou ki mua i tona aroaro ma te akameitaki, ma te salamo e imene nui atu ei iaia.”​—Salamo 95:​1, 2.

7. (a) Eaa te tu tau no te au imene e manganui te imeneia ra e te au Kerititiano? (e) Eaa tetai tumu kia tae vave ki te au uipaanga e kia vai atu tae roa ki te openga ra?

⁷ E putuputu tatou i te akateitei i to tatou reo i te au imene no te akapaapaa ia Iehova i te au uipaanga putuputuanga, te au akaputuputuanga, e te au uruoaanga. E mea tau katoa oki kia kite e e manganui to taua au imene ra te akatumuia ra ki runga i te au manako akauruia mei te puka mai a Taramo. Mei teaa ra to tatou mataora kia rauka tetai akaputuanga imene e te akapaapaa i teia tuatau no te akapumaana anga ngakau kia Iehova! Te imene akapaapaaanga ki te Atua ko tetai tumu meitaki roa ia no te tae vave anga ki ta tatou au uipaanga e kia vairai ki reira e tae roa ki te openga, na reira te rave kapitianga ma te au oa akamori ra i te akapaapaa anga ia Iehova ma te imene anga e te pure oki.

 “E Akapaapaa ia Iehova”

8. Eaa te aiteanga o te tuatua “Alelu Ia,” e akapeea te tataanga matauia o te reira?

⁸ Te akapaapaaanga ia Iehova te taokotaiia ra ki roto i te tuatua “Alelu Ia,” ko tetai urianga mei te tuatua Epera tei uriia ra e “Akapaapaa ia Iehova.” Ei akatauanga, ia Salamo 135:​1-3, ka kite tatou i teia patianga pumaana, e te ketaketa: “Alelu Ia. E akapaapaa i te ingoa o Iehova; e te au tavini o Iehova, e akapaapaa. Kotou, ko tei tu mai ki roto i te are o Iehova; ki roto i te au paepae no te are o to tatou Atua. E akapaapaa ia Iehova, e meitaki oki to Iehova; e imene i tona ra ingoa, e mea mataora oki.”

9. Eaa te akakeu ra ia tatou kia akapaapaa ia Iehova?

⁹ Ia tatou e akamanako ra i ta te Atua au angaanga umere i anga maira e tana au angaanga katoatoa no tatou nei, ka akakeu te arikianga ngakau ia tatou kia akapaapaa iaia ra. Me akaata tatou ki runga i te au apinga temeio ta Iehova i rave no tona au tangata i te tuatau kua topa, ka akakeu to tatou au ngakau ia tatou kia akapaapaa iaia. E ia tatou e akamanako ra i runga i te au taputou no te au apinga maata ta Iehova ka rave mai a muri ake nei, ka kimi tatou i te au ravenga no te akakite akapaapaa anga e te akameitaki anga.

10, 11. Akapeea to tatou vai ora mai anga i te oronga anga i te tumu no tatou kia akapaapaa i te Atua ra?

¹⁰ To tatou vai anga mai te oronga maira kia tatou i tetai tumu tau kia akapaapaa ia Iehova. Kua imene a Davida: “Ka akameitaki au ia koe [e Iehova], e mea mataku e te taka ke oki toku anga angaia: e mea vavaria taau au angaanga, kua kite pu tikai oki toku vaerua.” (Salamo 139:14) Ae, e mea ‘taka ke to tatou anga angaia’ e au apinga meitaki maata oki te kite kia akara, te akarongo anga, e te kite manako anga. No reira, kare ainei tatou e tau, kia taki atu i to tatou oraanga na roto i tetai tu akapaapaa i Tei Anga mai ia tatou? Kua akakite a Paulo i te reira tu i tana tata anga: “E teianei, te kai ra e te inu ra oki, e te au mea ravarai ta kotou e rave na, e rave anake ïa ma te akakakā i te Atua.”​—1 Korinetia 10:31.

¹¹ Ka rave ra tatou i te au mea ravarai no to Iehova kaka me te inangaro tika ra tatou iaia. Kua tuatua a Iesu e ko te akauenga mua: “E anoano atu koe i toou Atua ia Iehova ma to ngakau katoa, e ma to vaerua katoa, e ma to manako katoa, e ma to ririnui katoa.” (Mareko 12:30; Deuteronomi 6:5) Ka tau tikai tatou kia anoano atu ia Iehova e kia akapaapaa oki iaia e ko Tei Anga maira ia tatou e ko Tei Oronga mai i ‘te au mea memeitaki e te au mea tika ravarai.” (Iakobo 1:​17; Isaia 51:13; Angaanga 17:28) No te mea, ko to tatou kite manakoanga, to tatou kite pae vaerua, e to tatou ririnui kopapa​—to tatou tu mana katoa e te tu karape​—no ko mai ia Iehova ra. E ko Tei Anga mai ia tatou nei, te tau ra aia no to tatou inangaro e te akapaapaa oki.

12. Akapeea toou manako ngakau no ta Iehova au angaanga maata e te au tuatua ia Salamo 40:5 ra?

¹² Te oronga maira te au angaanga maata a Iehova i te au tumu e manganui kia tatou kia inangaro e kia akapaapaa iaia! “E manganui e taku Atua, e Iehova, te au angaanga taka ke i raveia e koe ra, e toou ra manako ia matou nei,” ta Davida i imene. “Kare e tika kia tatau ua atu ki mua ia koe na; e akakite au, e tuatua oki au i te reira; kare ra e tika kia tatau atu i te maata.” (Salamo 40:5) Kare i rauka ia Davida te tatau i te au angaanga taka ke a Iehova ra, e kare katoa oki e rauka ia tatou. Inara kia akapaapaa tatou i te Atua auraka e tivata me akakiteia mai ki to tatou manako tetai ua atu o tana au angaanga maata ra.

Au Angaanga Kapitiia ma ta te Atua Akakoroanga Mutu Kore

13. Akapeea te kapiti anga o to tatou manakonakoanga ma te au angaanga maata a te Atua ra?

¹³ To tatou manakonakoanga no te tuatau ki mua kua tapeka kapitiia atu ma te au angaanga maata e te akapaapaa tau tei taokotaiia ma te akakoroanga mutu kore a te Atua ra. I muri ake i te meameaau i Edene ra, kua oronga maira Iehova i te totou mua tei akakiia ra i te manakonako. I te akakiteanga i te akautunga ki runga i te ovi ra, kua tuatua te Atua: “Ka tuku oki au i te ke ia korua ko te vaine, e to uanga e tona uanga; nana e akaparuparu i to mimiti, e naau e akaparuparu i tona pooavae.” (Genese 3:15) Kua ora maira te manakonakoanga i te Uanga taputouia mai o te vaine ra ki roto i te au ngakau o te au tangata tiratiratu ra i muri ake i ta Iehova rave anga i te angaanga maata na te akaoraanga ia Noa e tona pamiri na roto mai i te Tiruvi o te ao nei tei takore atura i tetai ao kino. (2 Petero 2:5) Na te au taputou totouia mai ki te au tangata akarongo  mei ia Aberahama e Davida ra kua oronga mai i te kite oonu kia maata atu ki roto i ta Iehova ra ka rave na roto i taua Uanga ra.​​—Genese 22:15-​18; 2 Samuela 7:​12.

14. Eaa te akatauanga teitei rava o ta Iehova ra au angaanga maata no te au tangata nei?

¹⁴ Te akakite anga meitaki rava ia Iehova e ko tei rave i te au angaanga maata no te au tangata kua tupu i tana oronga anga i tana Tamaiti anau tai​—koia te Uanga taputouia, ko Iesu Karaiti​—ei atinga oko. (Ioane 3:​16; Angaanga 2:​29-​36) Na te oko i oronga te tumu anga no te akaongi anga i te Atua ra. (Mataio 20:28; Roma 5:​11) Kua apai mai a Iehova i te aronga mua tei akaongiia ra kia kapitiia i roto i te putuputuanga Kerititiano, tei akanooia ra ia Penetekote 33 T.N. Ma te tauturu a te vaerua tapu ra kua tutu aere ratou i te tuatua meitaki kia mamao e kia atea oki, i te akaarianga e akapeea te akatuera anga a to Iesu matenga e te tuakaouanga i te aerenga no te au tangata akarongo kia kite i te au akameitaki anga i raro ake i te tutara a te Patireia o te Atua i te rangi ra.

15. Akapeea ta Iehova rave anga na roto i tetai tu taka ke i to tatou tuatau nei?

¹⁵ I to tatou tuatau nei, kua rave a Iehova na roto i tetai aerenga taka ke kia akaputu i te tuanga openga o te au Kerititiano akatainuia ra. Kua tapuia nga matangi akapouanga kia raveia te akairoanga no te toenga o te aronga 144,000, ra, te ka tutara ma Karaiti katoa i te rangi. (Apokalupo 7:​1-4; 20:6) Kua akapapu te Atua e kia akaoraia mai te au Kerititiano akatainuia ra mei te tuikaa anga pae vaerua kia “Babulonia Maata ra,” koia te patireia akonoanga i te ao nei. (Apokalupo 17:​1-5) Taua akaoraanga ra i te 1919 e te paruru anga tu-Atua tei kiteia e ratou mei reira maira kua akatika i te toenga o tei akatainuia ra kia rave i teaa? Kia marama mai i te oronga anga i te akakite anga openga i mua ake i ta Iehova ra apainga mai i te openga ki ta Satani akatereanga kino o te au mea nei i te “mate maata” te aere viviki maira.​​—Mataio 24:21; Daniela 12:3; Apokalupo 7:​14.

16. Eaa te tupu nei ei tupu anga no te angaanga tutu aereanga i te Patireia i te ao katoa i teia tuatau?

¹⁶ Na te Au Kite akatainuia o Iehova i arataki maroiroi i tetai angaanga tutuanga Patireia i te ao katoa nei. Ei tupuanga ko tetai numero te tupu maata aere ra no te “au mamoe ke atu” te riro maira i teianei ei aronga akamori ia Iehova. (Ioane 10:16) Te rekareka nei tatou e te vai tuera nei te tuatau no te aronga maru o te enua nei kia kapiti mai kia tatou i te akapaapaa anga ia Iehova. Te aronga te ka akarongo ki te patianga kia “aere mai” te papa ra no tetai akaora anga na roto i te mate maata, ma te manakonako anga no te akapaapaaanga ia Iehova e mutu kore ua atu.​​—Apokalupo 22:17.

E Au Tauatini ua Atu te Aere Maira ki te Akamori Mou

17. (a) Akapeea ta Iehova raveanga i te au angaanga maata i te turuanga o ta tatou angaanga tutuanga? (e) Akapeea te akatupu anga ia Zekaria 8:​23 i teianei?

¹⁷ Te rave ra Iehova i teianei i te au angaanga maata e te akapaapaaia ma te kapiti atu ki ta tatou angaanga tutu aereanga. (Mareko 13:10) I te au mataiti kua topa ua akenei, ‘kua kiritia mai e ia tetai ngutupa maata te taki atura ki te angaanga.’ (1 Korinetia 16:9) Na teia i raukai kia akakiteia te tuatua meitaki koropini katoa te au enua tei tu maira te au enemi ki mua. E manganui tei noo ra i roto i te poiri pae vaerua i mua ana te akarongo nei i teianei ki te patianga kia akamori ia Iehova. Te akatupu ra ratou i teia au tuatua totou: “Te na ko mairā Iehova Sabaota ra, Ei taua au rā ra e opu mai ei nga tangata tino ngauru, no roto i te au reo katoa o te pa enua ra, i te tapa kakau o tetai ngati Iuda ta ratou e opu, ka na ko atu ei, ka aere katoa tatou: kite akenei  oki matou e tei ia kotou te Atua.” (Zekaria 8:​23) Teia “nga tangata” ko te au ngati Iuda pae vaerua, koia te toenga o te au Kerititiano akatainuia i teia tuatau nei. I te mea te akatutu maira te tai ngauru i te katoaanga o tetai aronga no te enua nei, te “nga tangata tino ngauru” ra te akatutu maira i te “aronga maata,” ka apai maira kia taokotaiia ma “te Iseraela o te Atua” ta ratou ka akaputu atura ei “anana okotai.” (Apokalupo 7:​9, 10; Galatia 6:​16) Mei teaa ra te rekareka anga o te reira kia kite atu e manganui te rave ra i te tavini anga tapu kapiti katoa ei aronga akamori i te Atua ko Iehova ra!

18, 19. Eaa te akakite anga e te akameitaki ra Iehova i te angaanga tutuanga?

¹⁸ Te mareka nei tatou e e ngauru ua atu tauatini​—ae e, au anere ua atu tauatini​—te takave atura i te akamori anga mou i te au enua tei tutaraia ra e te akonoanga pikikaa tei akaraia ra e mei te mea rai kare te au tangata e ariki i te tuatua meitaki. E akara i te Yearbook of Jehovah’s Witnesses, i teianei, e akatau i te au enua te ripoti ra mei te 100,000 ki te vaitata i te 1,000,000 papuritia Patireia. Ko teia tetai akapapu anga ririnui e te akameitakiia nei te angaanga tutuanga i te Patireia e Iehova ra.​​—Maseli 10:22.

¹⁹ Ei au tangata no Iehova, te akapaapaa nei tatou e te akameitaki nei i to tatou Metua i te rangi no te orongaanga mai i te akakoroanga tikai i te oraanga, te angaanga puapinga i te tavini anga iaia, e tetai akara anga meitaki no te tuatau ki mua. Te noo nei tatou ma te manakonako anga meitaki i te akatupuanga i te au taputou tu-Atua katoa ra e te tamanako atura kia ‘tamou tikai tatou uaorai i to tatou inangaro i te Atua, e tae ua atu ki te ora mutu kore.’ (Iuda 20, 21) Mei teaa ra to tatou mareka anga kia kite e te akapaapaa ra te urupu maata i te Atua kua itae te au numero ki etai 6,000,000 i teianei! Ma ta Iehova akameitakianga te kitea ra, te aronga toenga o tei akatainuia ra kapiti katoa ma to ratou au oa mamoe ke atu kua akapapaia ki roto i etai 91,000 putuputuanga i roto i te 235 enua. Pouroa tatou te angai meitakiia ra i te pae vaerua na roto i te au tautaanga roiroi kore o “te tavini akono meitaki e te pakari.” (Mataio 24:45) Ko tetai akaaerenga teokaratiki te tere ra ki mua ma te akaaere aroa te akono ra i te angaanga Patireia na roto i te 110 opati manga o te Au Kite o Iehova. Te akameitaki nei tatou e kua akakeu a Iehova i te au ngakau o tona au tangata kia ‘akangateitei iaia ma ta ratou au apinga.’ (Maseli 3:​9, 10) No reira, te aere ua atu nei ta tatou angaanga tutu aere ki mua, ma te au apinga nenei, te au kainga Betela e te au mitinari, te au Are Uipaanga Patireia, e te au Are Akaputuputuanga te patuia ra me umuumuia.

20. Akapeea te akamanako anga ki runga i ta Iehova ra au angaanga maata e te akapaapaa anga tau te akakeu anga ia tatou?

²⁰ Kare e rauka ia tatou kia taiku i te au angaanga maata e te tau kia akapaapaaia a to tatou Metua i te rangi ra. Inara ka rauka ainei i tetai ma te tu tika ra te ngakau kia akakore i te kapitianga ma te aronga maata o tei akapaapaa ra ia Iehova? Kare! No reira, e kapiki rekareka maata te aronga inangaro katoatoa i te Atua ra: “Alelu Ia. E akameitaki ia Iehova i te au rangi ra: e akameitaki kotou katoa, ko tei noo i runga ra. E akameitaki iaia, kotou katoa, e te au angela;  . . . te au tangata ou, e te au tamaine; te au tangata metua, e te au tamariki ra: Ko te reira te akameitaki i te ingoa o Iehova; tona anake ra oki te ingoa kia akateitei; tei runga roao tona kakā i te enua nei, e te au rangi ra.” (Salamo 148:​1, 2, 12, 13) Ae, i teianei e tuatau ua atu, e akapaapaa tatou ia Iehova no tana au angaanga maata!

Akapeea Koe me Pau?

• Eaa etai o ta Iehova ra au angaanga tau kia akapaapaaia?

• Eaa koe i manako ngakau akakeuiai kia akapaapaa ia Iehova ra?

• Akapeea to tatou manakonako anga i te kapiti anga ma te au angaanga maata a te Atua ra?

• Akapeea ta Iehova raveanga i te au angaanga tau kia akapaapaaia i te turuanga i te angaanga tutuanga Patireia ra?

[Au Uianga Apii]

[Tutu i te kapi 10]

Te kapiti ra ainei koe ma te ngakau katoa i te au imene akapaapaa ia Iehova?

[Au Tutu i te kapi 13]

Te rekareka nei tatou e te vai tuera nei te tuatau no te aronga maru kia kapiti mai kia tatou i te akapaapaa anga ia Iehova ra