Patuanga IiTetai Pamiri Maroiroi i te Pae Vaerua

“E apii ra ia ratou kia pakari ma te ako a te Atu ra.”​—EPHESIA 6:4.

1. Eaa ta te Atua ra akakoroanga no te pamiri, inara eaa tei tupu ke maira?

“KIA anau korua, e kia maata roa, e e akaki i te enua nei.” (Genese 1:28) Ma taua au tuatua ra kia Adamu raua ko Eva, kua akamata atura te Atua ko Iehova i te akapapaanga pamiri. (Ephesia 3:14, 15) I te akaraanga ki mua, kua rauka i taua nga tokorua mua ra te akamanako atu ki tetai enua tei akakiia ki ta raua anaunga​—tetai pamiri akatotoaia no te aronga tataki tai apa koe ra ki runga i tetai enua parataito e tei akamori taokotai ra i Tei Anga mekameka maira ia ratou. Inara kua topa atura Adamu raua ko Eva ki roto i te ara, e kare te enua i riro kia akakiia ma te au tangata tuatua tika, mataku i te Atua ra. (Roma 5:12) Mari ra, kua taeke viviki te oraanga pamiri, e kua vai mai te makitakita, te ta ua, e te ngere i te ‘aroa,’ e maata oki i teia “tuatau openga” nei.​—2 Timoteo 3:1-5; Genese 4:8, 23; 6:5, 11, 12.

2. Eaa te au tu kite o te anaunga a Adamu ra, inara eaa te umuumuia ra kia patu i tetai pamiri maroiroi i te pae vaerua?

² Kua angaia mai a Adamu raua ko Eva i to te Atua uaorai tu. Noatu ra e tangata ara aia, kua akatikaia mai a Adamu e Iehova kia anau tamariki. (Genese 1:17; 5:1-4) Mei to ratou metua rai, e au tu akono tau to te anaunga a Adamu e kua kite i te akataka anga i rotopu i te tika e te tarevake. Kua rauka kia apiiia ratou e akapeea te akamori i Tei Anga maira ia ratou e te puapinga maata no te inangaro anga iaia ma to ratou ngakau katoa, te meta, te manako, e te ririnui katoa oki. (Mareko 12:30; Ioane 4:24; Iakobo 1:27) Pera katoa, ka rauka kia tereniia ratou i “te tuatua-tau, e kia inangaro i te aroa, e te aerenga  akamako tikai i [te] Atua ra.” (Mika 6:8) Inara, ei aronga ara, ka tau ratou kia akamanako tikai e raukai te patu i tetai pamiri maroiroi i te pae vaerua.

E Taporoporo Marie i te Tuatau

3. Akapeea e raukai i te au metua ‘kia taporoporo i te tuatau’ kia akono i te tamariki Kerititiano ra?

³ I teia au tuatau ngata, e te kino, ka tika kia maata te tautaanga e akapouia kia riro mai te au tamariki ei ‘aronga inangaro ia Iehova’ ei aronga ‘rikarika tikai i te kino.’ (Salamo 97:10) Te au metua pakari ‘ka taporoporo marie i te tuatau’ kia akono i teia akaaoanga. (Ephesia 5:15-17) Me ko koe tetai metua, akapeea koe me rave i teia? Te mea mua, e akataka i te au mea tau, te akamanako anga i “te au mea e maata ua atu te meitaki,” kapiti katoa i te apiianga e te terenianga i taau tamariki. (Philipi 1:10, 11) Te rua, e akamama mai i toou tu oraanga. Penei ka akataka ke atu koe ki te pae i te au angaanga kare ra i umuumuia tikai. Me kare penei ka tau koe kia takore atu i te au apinga tau kore kare ra e anoanoia te akapou taime ra kia akono atu. Ei metua Kerititiano, kare koe e mii e kua akono koe i te tauta anga i umuumuia ra kia akono i te au tamariki mataku i te Atua ra.​—Maseli 29:15, 17.

4. Akapeea e raukai kia taokotai tamou marieia tetai pamiri?

⁴ Te akapou anga i te tuatau ma ta kotou au tamariki, koia tikai me ka tukuia ki runga i te au tumu pae vaerua, e maata te puapinga o taua tauta anga ra e ko tetai ia o te aerenga meitaki kia tamou i te taokotai anga o tetai pamiri. Inara auraka e akaruke ua i teia i te tupu anga. E akapapa i te au tuatau naau kia akapou kapiti atu. Kare te aite anga e kia kapiti ua i te are okotai, ma te rave tataki tai i tana uaorai apinga. Ka tupu ruperupe meitaki te au tamariki ma taau uaorai akono atuanga i te au ra takitai. Ka tau te aroa e te manako anga kia akakite maoraoraia atu. Noatu i mua ake i ta ratou iki anga kia anau tamariki, ka tika te au tokorua akaipoipoia kia akamanako tikai i teianei apainga puapinga maata. (Luka 14:28) Ei reira kare ratou e manako i te akonoanga tamariki ei apainga reka kore. Kareka ra, ka manako ratou i te reira ei apainga akameitakiia.​—Genese 33:5; Salamo 127:3.

E Apii na te Tuatua e te Akatauanga

5. (a) Na teaa te akamata anga i te apiianga i te tamariki kia inangaro ia Iehova? (e) Eaa te akoanga te orongaia maira ki te au metua ia Deuteronomi 6:5-7?

⁵ Te apiianga i taau au tamariki kia inangaro ia Iehova te akamataia ra ma toou uaorai inangaro nona ra. Na tetai inangaro maroiroi no te Atua ra e akakeu ia koe kia aru tiratiratu i tana au apiianga katoa ra. Te kapiti ra teia i te akonoanga i te tamariki “e apii ra ia ratou kia pakari ma te ako a te Atu ra.” (Ephesia 6:4) Te ako maira te Atua i te au metua kia akanoo i te akatauanga no ta ratou tamariki, kia komunikeiti ma ratou, e kia apii ia ratou. Te tuatua ra Deuteronomi 6: 5-7: “E inangaro atu koe i to Atua ia Iehova ma to ngakau katoa, e ma to vaerua katoa, e ma to maroiroi katoa. E teianei au tuatua taku e akaue atu kia koe i teianei rā, ei roto i toou ngakau vai ei; E ka apii tamou tikai koe i te reira ki taau au tamariki, ko taau ïa e tuatua kia noo ua koe i roto i to are, e kia aere ua koe na te arataa ra, e kia akāvai koe ra, e kia tu koe ki runga ra.” Na te akamaroiroianga putuputu e te tuatua akaouanga, ka rauka ia koe kia tauru i te au akauenga a te Atua ra ki roto i taau tamariki. Na reira, e kite ei taau anaunga i toou inangaro no Iehova e, i muri iora, ka akamanaia kia akatupu i tetai pirianga vaitata kiaia katoa ra.​—Maseli 20:7.

6. Akapeea e raukai i te au metua kia akono i te tika e na te akatauanga e kite ei te tamariki ra?

⁶ Te inangaro ra te tamariki kia kite. Te anoano ra ratou kia akarongo e kia akara e e viviki oki i te aru i taau akatauanga. Me kite ratou e kare koe i te noinoi apinga, ka tauturu teia ia ratou kia kite e akapeea te aru i ta Iesu akoanga. Ka apii koe ia ratou auraka e apiapi i te au apinga kopapa mari ra kia ‘na mua te kimi i te basileia o te Atua.’ (Mataio 6:25-​33) Na te raveanga i te tuatuaanga kapiti tau, e te akamatutu anga no te tuatua mou Pipiria, te putuputuanga a te Atua ra, e te aronga pakari akataoongaia ra, ka apii koe i taau tamariki kia akangateitei ia Iehova e kia ariki i tana au apinga pae vaerua. I te mea e viviki te tamariki i te kite i te tu rotai kore, ka tika te au apiianga na te tuatua kia turuia na te tu akono e te tu manako te ka akakite i toou uaorai arikianga oonu i te au apinga pae vaerua. Mei teaa ra tetai akameitakianga me kite te au metua e na ta ratou akatauanga meitaki i akatupu ki roto i ta ratou tamariki  te inangaro ngakau katoa no Iehova ra!​—Maseli 23:24, 25.

7, 8. Eaa te akatauanga te akaari maira i te puapinga no te terenianga i te tamariki mei te au mataiti mua mairai, e kiaai te tutaki te tau ra no te puapinga anga?

⁷ Te puapinga o te terenianga i te tamariki mei te meangiti anga mairai te kitea ra i tetai akatauanga mei Venezuela maira. (2 Timoteo 3:15) Te o atura tetai nga tokorua ou akaipoipoia ra, ko Félix raua ko Mayerlín. E orometua painia raua. I te anau maianga ta raua tamaiti ko Felito, kua inangaro raua kia rave maata i te akonoanga iaia e ko tetai te ka akamori mou ia Iehova. Kua akamata a Mayerlín i te tatau maata kia Felito mei My Book of Bible Stories, tei neneiia e te Au Kite o Iehova ra. I tona nga mataiti mua ra i te akara anga kua kite a Felito ia Mose e etai atu au tangata akatutuia mai i teianei puka.

⁸ Iaia e ou ra, kua akamata a Felito i te tutu aereanga koia anake ua. Kua akatupu aia i tona inangaro kia riro mai ei papuritia no te Patireia, e kua papetitoia aia i muri maira. Kare i roa ana, kua riro mai a Felito ei painia tamou. Kua tuatua tona nga metua: “Ia maua e akarakara ra i ta maua tamaiti i te tereanga ki mua, kua kite maua e te kaiou ra maua i te reira kia Iehova e tana apiianga mai.”

Tauturu i te Tamariki kia Tupu i te Pae Vaerua

9. Eaa tatou i tau ei kia akameitaki no te apiianga pae vaerua ta tatou i rauka no ko mai i te pupu tavini akono meitaki e te pakari ra?

⁹ E au tatini ua atu au makatini e au anere ua atu au puka, e au tauatini ua atu Internet Web sites te oronga maira i te apiianga e akapeea te akono tamariki. E putuputu “te patoi ra etai i etai,” i na te itiu takake o te Newsweek ei no runga i te tamariki. “E maata atu oki te pekapeka me ka riro tetai akakiteanga taau i manako irinaki ra, ei mea tarevake takiri ia.” Mei teaa ra ta tatou akameitaki anga e kua oronga maata maira Iehova no te apiianga e te tupu anga pae vaerua o te au pamiri! Te akono ra ainei koe i te tuatau va mai no te au apinga katoa na roto mai i te tavini akono meitaki e te pakari ra?​—Mataio 24:45-47.

10. Akapeea ra tetai apii Pipiria meitaki a te pamiri e riro ei ei puapinga ki nga metua e te au tamariki?

¹⁰ Tetai umuumu anga puapinga maata, ko tetai apiianga Pipiria putuputu tamou marieia na te pamiri tei raveia ki roto i te reva maru ua. Kia akariro i te reira ei apiianga tau, kia rekareka, e kia akamaroiroi oki, te anoanoia ra te teateamamao anga meitaki. Na te akavaitataanga mai i ta ratou tamariki, ka kite te au metua eaa tei roto i to ratou ngakau e te manako oki. Tetai tu no te akataka anga i te meitaki o te apii a te pamiri na te akaraanga me te manako inangaro atura te au mema katoatoa o te ngutuare ki te reira.

11. (a) Eaa nga akakoroanga ka rauka i nga metua kia tauturu i ta raua tamariki kia akanoo? (e) Eaa tei tupu mai i te aruaru anga tetai tamaine Tiapani i tana akakoroanga ra?

¹¹ Pera katoa te tauturu atura te au akakoroanga pae vaerua ki tetai pamiri maroiroi i te pae vaerua, e ka tau te au metua kia tauturu atu i ta ratou tamariki kia akanoo i teia. Te kapiti ra te au akakoroanga tau i te tatauanga Pipiria i te au ra takitai, te riroanga ei papuritia putuputu no te tuatua meitaki ra, e kia tere atu ki te akatapuanga e te papetito anga. Etai atu au akakoroanga penei ka kapiti i te tavini anga i te au tuatau ravarai ei painia, i Betela, me kare ei mitinari. Iaia i te apii mua, kua akakoro tetai tamaine Tiapani ko Ayumi kia tutu akakite atu aia ki te aronga ravarai i tona pupu ra. Kia akakeu i te inangaro o tona puapii e te au oa i tona pupu, kua rauka iaia te tika kia vaio i etai au puka apii Pipiria i roto i te ngai vairanga puka. Ei tupu anga, e 13 apii Pipiria tei akanooia no tona ono mataiti i taua apii mua ra. Tetai o taua aronga apiipiiia ra i te Pipiria e etai atu i roto i te pamiri o tei apiipiiia ra kua riro mai ei au Kerititiano papetitoia.

12. Akapeea e raukai i te tamariki te puapinga maata rava mei te au uipaanga Kerititiano maira?

¹² Pera katoa te umuumuia ra no te tu pae vaerua maroiroi te aere putuputu ki te uipaanga. Kua akamaroiroi maira te apotetoro i tona au oa akarongo ‘auraka kia akaruke i to tatou akaputuputu anga mei ta tetai aronga.’ Auraka e tuku i te reira ei peu na tatou, no te mea te aronga ou e tei ruaine oki ka puapinga maata katoaia mei te taeanga ki te au uipaanga Kerititiano ra. (Ebera 10:24, 25; Deuteronomi 31:12) Ka tau kia apiiia te tamariki kia akarongo marie. Te teateamamao anga no te au uipaanga e puapinga maata katoa ia, no te mea ko te puapinga maata katoa te rauka maira no te raveanga i tetai tuanga na te paupauanga.  No te mea tetai tamaiti ou penei ka akamata na te tuatuaanga e rua ua tuatua me kare te tatauanga i tetai tuanga rikiriki o tetai parakaoa, ka riro ei puapinga maata me ka tereniia te tamariki kia kimi i te au pauanga e kia tuatua mai i roto i ta ratou uaorai au tuatua. Te akanoo ra ainei kotou te au metua i te akatauanga na te rave putuputuanga, i te au pauanga tau na kotou uaorai? Ka meitaki katoa oki no te au mema taki tai o te pamiri kia apai i tetai Pipiria, tetai puka imene, e tetai kopi o te puka te taangaangaia ra no te uriurianga Tuatua Tapu ra.

13, 14. (a) Eaa i tau ei kia angaanga kapiti te au metua ma ta ratou tamariki i te angaanga orometua ra? (e) Eaa te ka tauturu kia akariro i te angaanga tutu aere kia puapingaia e kia rekareka ia no te tamariki?

¹³ Ka arataki atu te au metua pakari i te maroiroi mapu o ta ratou tamariki ki te tavinianga ia Iehova, ma te tauturuanga ia ratou kia akariro i te tutu aereanga ei tuanga puapinga maata no to ratou au oraanga. (Ebera 13:15) Na te angaanga kapitianga anake ma ta ratou tamariki i te angaanga orometua e raukai kia papu i te au metua ra e ka tereniia ta ratou tamariki ou ra i tei umuumuia kia riro mai ei au orometua “ei rave angaanga kare e akamaanga, e te tika oki i te tua i te tuatua-mou ra.” (2 Timoteo 2:15) No reira, akapeea oki koe i reira? Me ko koe tetai metua, te tauturu ra ainei koe i taau tamariki kia akapapa no te tavini anga tutu aere? Na te raveanga i teia ka tauturu kia akariro kia rekarekaia te angaanga orometua, kia tau oki, e kia uua mai na ratou.

¹⁴ Eaa ra ka puapingai no te au metua e ta ratou tamariki kia angaanga kapiti i te angaanga orometua? Na roto i teianei tu, ka kite te tamariki e ka aru i te au akatauanga meitaki a to ratou au metua ra. I taua taime rai, ka rauka kia akara te au metua i te tu, te tu akono, e te karape oki o ta ratou tamariki. E akapapu kia apai  i ta kotou tamariki ma kotou katoa i te au tuanga tuke tuke o te angaanga orometua ra. Me ka rauka, e oronga i te pute tutu aere na te tamaiti taki tai uaorai, e ka apii atu ei iaia kia akono tau i te reira e te manea oki. Na te terenianga tamou e te akamaroiroi anga, ka patu i te ariki anga mou no te angaanga orometua, e ka kite te tamariki i te angaanga tutu aere ei tumu no te akaarianga aroa no te Atua e no te tangata tupu katoa oki.​—Mataio 22:37-39; 28:19, 20.

E Tamou i te Tu Pae Vaerua

15. I te mea e e mea puapinga kia tamou marie i te tu pae vaerua o te pamiri, eaa etai tu no te rave anga i teia?

¹⁵ E mea umuumuia te tamouanga i te tu pae vaerua no te pamiri. (Salamo 119:93) Tetai tu no te raveanga i teia kia uriuri manako ma taau pamiri i te au mea pae vaerua i te au tuatau ravarai. Te uriuri manako ra ainei koe i te tia Pipiria no te ra ma ratou katoa? Ko taau peu ainei ia kia tua i te au tupu anga no te tutu aereanga me kare te au tumu no roto mai i te makatini ou o te Punanga Tiaki e te Awake! “me aaere koe i te mataara”? Te maara ra ainei ia koe kia akameitaki ia Iehova na roto i te pure no te au ra tataki tai o te oraanga  e no tana au apinga oronga mai “me akāvai koe e me tu mai ki runga”? (Deuteronomi 6:6-9) Me kite taau tamariki i te inangaro no te Atua ra tei akaataia i roto i te au apinga ravarai taau i rave, ka tauturu teia ia ratou kia akariro i te tuatua mou na ratou uaorai.

16. Eaa te puapinga kia akamaroiroi i te tamariki kia rave i ta ratou uaorai kimikimi anga?

¹⁶ I etai tuatau, ka umuumu te tamariki i te arataki anga kia akono autu ma te au manamanata me kare au turanga te ka tu mai. Kare e kia tuatua ua kia ratou eaa ta ratou kia rave, eaa i kore ei e akaari atu kia ratou e akapeea te kimi anga i to te Atua ra au manako no runga i te au tumu na te akamaroiroianga ia ratou kia rave i te kimi anga na ratou uaorai? Te apiianga i te tamariki kia taangaanga meitaki i te au apinga e te au puka tei orongaia mai e te ‘tavini tiratiratu’ ra ka tauturu ia ratou kia akatupu i tetai pirianga vaitata ma Iehova ra. (1 Samuela 2:21e) E me tua ratou i te au puapinga o ta ratou kimikimi anga i te Pipiria ra ma etai atu mema o te ngutuare ra, ka akatupu maataia te tu pae vaerua o te pamiri katoa ra.

E Irinaki Ki Katoa ki Runga ia Iehova

17. Eaa i tau ei kia kore te au metua takaua e manako puapinga kore i te akonoanga i ta ratou tamariki ei au Kerititiano?

¹⁷ Akapeea ra te au pamiri okotai ua metua? Te aro atura teia aronga i etai au akaaoanga kapitiia mai no runga i te akono anga tamariki. Inara e te au metua takaua auraka e taitaia! Te rauka ra te autu anga, mei tei akaariia maira e te au metua takaua e manganui tei irinaki ra i te Atua, e kua akono akarongo atu i tana akoanga ra, e kua akono mai i te au tamariki meitaki, e te maroiroi oki i te pae vaerua ra. (Maseli 22:6) Inara, te au Kerititiano e au metua takaua ra ka tau kia irinaki ki katoa ki runga ia Iehova. Kia rauka ia ratou te akarongo e ka oronga mai aia i te tauturu.​—Salamo 121:1-3.

18. Ki teea au umuumu anga manako e to te kopapa o te au tamariki te tau ra te au metua kia akamanako atu, inara te tau ra kia tukuia te akaketaketa anga ki runga i teaa ra?

¹⁸ Te kite ra te au metua pakari e ‘e tuatau to te kata, e e tuatau to te ura.’ (Koheleta 3:1, 4) Tetai mea meitaki no te patuanga i te manako o tetai tamaiti e te kopapa oki ko etai tuatau kare i akatakaia no te angaanga e te au tamataora anga tau e te meitaki. Te akatangi anga imene akamatutu mai e maata oki ei imeneanga i te au imene akapaapaa i te Atua ra ka tauturu i tetai tamaiti kia akatupu i tetai tu akono meitaki te ka akono i tetai tuanga puapinga i te akamaroiroianga i tona pirianga ma Iehova ra. (Kolosa 3:16) Ko te mapu anga oki te tuatau no te teateamamao anga kia riro ei tangata pakari tei mataku i te Atua ra, e raukai te rekareka anga i te oraanga kia tupu ua atu e mutu kore roa atu ki runga i tetai enua parataito ra.​—Galatia 6:8.

19. Eaa ka raukai i te au metua kia irinaki i ta Iehova ra akameitakianga ki runga i ta ratou au tauta anga kia akono i ta ratou tamariki ra?

¹⁹ Te anoano ra Iehova i te au pamiri Kerititiano katoa kia autu ei au taokotai anga maroiroi i te pae vaerua. Me te inangaro tika ra tatou i te Atua e te rave meitaki kia akarongo i tana Tuatua, ka akameitaki aia i ta tatou au tauta anga e ka oronga mai kia tatou i te maroiroi tei tau ra kia aru i tana arataki anga akauruia ra. (Isaia 48:17; Philipi 4:13) Kia maara e ko te tuatau tei ia koe i teianei kia apii e kia tereni i taau tamariki te kotingaia ra e kare e oronga akaouia mai. E rave i tei meitaki roa e rauka ia koe kia akono i te akoanga a te Tuatua a te Atua, e na Iehova e akameitaki mai i taau au tauta anga kia patu i tetai pamiri maroiroi i te pae vaerua.

Eaa ta Tatou i Kite?

• Eaa te taporoporo anga i te tuatau i puapinga maatai i te terenianga i te tamariki ra?

• Eaa ra i umuumuiai te akatauanga meitaki a te metua ra?

• Eaa etai au aerenga puapinga maata kia tauturu i te au tamariki kia tupu ua atu i te pae vaerua ra?

• Akapeea e raukai kia tamou marieia te tu pae vaerua o te pamiri ra?

[Au Uianga Apii]

[Au Tutu i te kapi 24, 25]

Apii putuputu te au pamiri maroiroi i te pae vaerua i te Tuatua a te Atua, te aere ra ki te au uipaanga Kerititiano, e te rave kapiti ra i te angaanga orometua