Aakianga te Arataki ra ki te Akaoraanga

“IAKU i muteki ua ra, kua kino roa oku au ivi, i te ngunguru anga noku e po ua atu te rā. Te teimaa maira oki to rima i runga iaku i te po e te ao; toku mauu ra, kua riro ïa mei te marō o te tuatau paroro ra.” (Salamo 32:​3, 4) Penei paa te akaata ra taua au tuatua mamae ngakau i te mamae i te pae manako ngakau oonu ra tei kiteaia e te Ariki e Davida o Iseraela taito, e mamae tei apai mai aia ki runga iaia uaorai na te uunaanga te kore anga i aaki i te ara kino ra.

E tangata kite meitaki maata a Davida. E tangata ngakau toa aia, e tangata kavamani karape, e tangata atu pee, e ko tetai tangata akatangi imene. Inara, kare aia i irinaki ki runga i tona au kite, mari ra ki runga i tona Atua. (1 Samuela 17:​45, 46) Kua akatakaia mai aia e ko tetai tangata e tona ngakau ra “ki tona Atua kia Iehova.” (1 Ariki 11:4) Inara e tai ana ara i rave kino tikai, e penei paa kua akakite mai aia i te reira i roto ia Salamo 32. E maata ta tatou ka rauka i te apii na te kimi makitoroanga i te au turanga te arataki ra iaia ki te ara. Ka kite tatou i te au ereere kia kopaeia pera katoa te kite anga i te anoano kia aaki i ta tatou au ara e raukai i te akaou i to tatou pirianga ki te Atua.

Kua Topa Tetai Ariki Tiratiratu ki Roto i te Ara

Kua piri atura te iti tangata o Iseraela ki roto i tetai tamaki anga nuku vaeau ki te ngati Amona, inara te noo ra a Davida i Ierusalema. I tetai aiai i te aaere ua anga na runga i te tapoki are o tona are ariki ra, kua kite atura aia i tetai vaine manea te pai ra i tetai kainga i te pae mai. Kare i rauka iaia te akakoromaki inara kua akamata aia i te inangaro iaia. I te kiteanga e ko Bate-seba aia, e vaine na Uria, e tangata vaeau i roto i tona vaeau, kua pati atu a Davida iaia, e kua rave ra aia i te akaturi kiaia. I muri akera kua tono atura a Bate-seba i te akakite anga kia Davida e kua nui aia.​—2 Samuela 11:​1-5.

Kua puereereia a Davida. Me ka akaariia mai ta raua ara, te utunga no raua ra e mate. (Levitiku 20:10) No reira kua akanoo aia i tetai parani. Kua kapiki atu aia i te tane a Bate-seba, ia Uria, kia oki mai mei te tamaki anga. I muri ake i te uiui maata anga iaia no runga i te tamaki anga, kua tuatua atu a Davida kia Uria kia oki ki te kainga. Kua manako a Davida e ka rauka teia i te akakiteia mai e ko Uria te metua tane o ta Bate-seba tamaiti.​—2 Samuela 11:​6-9.

Ki to Davida manamanata, kare a Uria i atoro i tana vaine. Kua karanga a Uria e kare rava aia i manako atu i te oki ki te kainga koi akakoromaki ei ra te vaeau i te au tu ngata o te tamaki. Me piri tetai tangata Iseraela vaeau ki roto i tetai oro anga nuku vaeau, ka kopae te au tane i te piri anga ainga, e ma ta ratou uaorai au vaine. Kia vai ma ua rai ratou i te pae o te ture. (1 Samuela 21:5) Kua pati atura i reira a Davida ia Uria no tetai kaikai anga e kua akakona ia oki aia, inara kare rai aia i oki ki te kainga ki tana vaine. Kua akaapa to Uria akara anga akarongo i te ara maata a Davida.​—2 Samuela 11:​10-13.

Te ereere tei akanooia e tana uaorai ara te takapini ketaketa ra ia Davida. No te taitaia kua kite aia e tai ua rai mataara. Kua tono akaou atu aia ia Uria ki te tamaki ma tetai reta ki te tianara vaeau, kia Ioaba. Taka marama mai te manako o te reta poto ua: “E tuku ia Uria ki mua tikai i te tamaki anga ra, ka oki ei kotou ki muri kia taia aia e kia mate.” Na te tata anga ki te peni, i te akara anga kua uuna te ariki ririnui i tana au angaanga, i te tonoanga ia Uria ki tona mate.​—2 Samuela 11:​14-17.

I muri poto ua ake i te oti anga te tuatau aue anga a Bate-seba i tana tane, kua akaipoipo a Davida  iaia. Kua pati te tuatau, e kua anau ia mai ta raua tamaiti. I roto i teia katoa, kua vai muteki ua rai a Davida no runga i tana au ara. Penei ake te tauta ra aia i te akatika i tana au angaanga kiaia uaorai. Kare ainei e kua mate ngateitei a Uria i roto i te tamaki anga mei tetai ua atu rai? Pera katoa, kare ainei e kare aia i akarongo ana ki tona ariki na te kore anga e oki atu ki tana vaine ra? Ka taangaanga te ‘ngakau pikikaa’ i te au tu katoatoa o te au manakoanga kia tauta i te akatika i ta te ara.​—Ieremia 17:9; 2 Samuela 11:25.

Te Au Takainga Tarevake te Arataki ra ki te Ara

Akapeea ra a Davida, e tangata inangaro i te tuatua tika, i te tupou atu anga ki te akaturi e te ta tangata? I te akara anga kua tatanuia te au ua o tana ara i tetai au tuatau ra. Penei paa ka manakonako tatou eaa a Davida kare ra ma tona au tangata, te turuanga ia ratou i roto i ta ratou oro anga nuku vaeau i te patoi anga i te au enemi o Iehova. Ei akatuke anga, te akaangaroi ra a Davida i roto i tona are ariki, i te ngai te mamao ke ra te au tu tika anga o te tamaki i te takore atu i tona anoano tarevake no te vaine a tetai vaeau akarongo ra. I teia tuatau, e paruru angaia no te au Kerititiano mou kia piri maroiroi atu ki roto i te au angaanga pae vaerua ma to ratou au putuputuanga e kia o putuputu atu ki roto i te angaanga evangeria.​—1 Timoteo 6:12.

Kua akoia atu te ariki o Iseraela kia tata i tetai kopi o te Ture e kia tatau i te reira i te au ra ravarai. Kua oronga mai te Pipiria i te tumu no teia: “Kia apii aia e kia mataku i tona Atua ra ia Iehova, e kia akono i te au tuatua ravarai o teianei ture, e teianei au akonoanga, kia raveia: Kia kore e teitei tona ngakau i tona ai taeake ra; kia kore aia e anga ke i te akauenga ki te pae katau e te pae kaui.” (Deuteronomi 17:​18-20) I te akara anga kare a Davida i aru ana i taua ako anga i te tuatau i rave ei aia i teia au ara kino nei. Te apii putuputu anga e te manakonako anga i runga i te Tuatua a te Atua ka tauturu tikai i te paruru ia tatou mei te ravenga kino i teia au tuatau kino nei.​—Maseli 2:​10-12.

Pera katoa, te akakite tika maira te openga anga o te Ture Ngauru e: “Auraka katoa koe e morimori i te vaine a to tangata tupu.” (Exodo 20:17) I teia taime nei e manganui te au vaine e te au vaine tavini a Davida. (2 Samuela 3:​2-5) Inara kare te reira i paruru iaia i te inangaro anga i tetai vaine manea. Te akamaara maira teia papa anga ia tatou no ta Iesu au tuatua pakari: “Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” (Mataio 5:28) Kia kore e manako atu i taua au anoano tau kore ra, kia viviki ua atu tatou i te akaatea ia ratou mei roto mai i to tatou au manako e te ngakau.

Tataraara Anga e te Takinga Meitaki

Kare ta te Pipiria akapapa anga tau tikai no ta Davida ara ei akamerengo anga i to tetai anoano ra. Te oronga maira te papa anga i tetai tuatau no tatou kia kite i tetai angaanga e te akakiteanga tikai i etai au tu meitaki o Iehova​—tona takinga meitaki.​—Exodo 34:​6, 7.

I muri ake te anau anga a Bate-seba i tana tamaiti, kua tono atura a Iehova i te peroveta ia Natana kia tuatua atu kia Davida. E ravenga takinga meitaki teia. Me kare a Davida i aravei ia atu e ka vai muteki ua, e mea papu e ka akamarokiakiaia aia i te turanga o te ara. (Ebera 3:13) Ma te mataora, kua ariki a Davida i to te Atua ra takinga meitaki. Kua ko te au tuatua marama karape ra a Natana i to Davida akava ngakau, e kua akakite akaaka aia e kua ara aia i te Atua. E tikai, kua atuia a Salamo 51, tei akakite ra i to Davida ara ma Bate-seba, i muri ake i te tataraara anga e te aaki anga aia i tana ara kino. Auraka rava tatou e akatika i to tatou ngakau kia akamarokiakiaia me ka topa atu tatou ki roto i te ara kino.​—2 Samuela 12:​1-13.

Kua akakoreia te ara a Davida, inara kare i akakoreia te ako anga iaia me kore te au tupu anga o tana ra ara. (Maseli 6:27) Akapeea atu? Me ka kopae te Atua i te au mea katoatoa, ka tuku uaia atu tana au turanga. Ka aite aia mei te Taunga Maata ra ia Elia, tei oronga atu i tetai akaapa anga maru ki tana nga tamariki kino e i reira kua tuku ua atu ia raua kia rave i ta raua au angaanga kino. (1 Samuela 2:​22-25) Inara, kare a Iehova e topiri ki vao i te tangata te mamae ngakau ra mei Tona aroa takinga meitaki. Tona takinga meitaki, mei te vai maru e te oraora, ka tauturu i te tangata te apa ra kia akakoromaki i te au tupu anga o te ara.  Te maanaana o te tu-Atua no te akakore anga i te ara e te akamaroiroi taokotai anga ma te au taeake akamori ra e akaora angaia. Ae, no runga i te atinga oko o Karaiti, ka rauka i tei tataraara i te oki akaou kia tongi i “te maata o [to te Atua] aroa ua.”​—Ephesia 1:7.

“Te Ngakau Mā” e te “Vaerua Tika Tikai”

I muri ake te aaki anga a Davida, kare aia i tuku ua ki tetai manako papu kore o te puapinga kore ra. Tana au tuatua i roto i te au taramo tana i tata no runga i te au aakianga te akaari maira i te maru tana i kite e tana tauta anga i te tavini i te Atua ma te akarongo. Ei akatauanga, e akara ia Salamo 32. I roto i te irava 1, ka tatau tatou: “E ao tona, to te akakoreia tana ara, to tei tapokiia tona kino!” Noatu rai e eaa te kino i te ara, e mataora anga te ka rauka me e ngakau tae to te tangata no tana tataraara anga. Ko tetai mataara kia akaari i teia tika anga na te ariki maata anga i te apainga no te au angaanga a tetai uaorai, mei ia Davida rai. (2 Samuela 12:13) Kare aia i tauta i te akatika iaia uaorai i mua ia Iehova me kare ra te tauta anga i te pati i te apa ki tetai ke. Te karanga ra te irava 5: “Kua aaki atura au i taku ara kia koe ra; e kare au i uuna i taku nei apa: i tuatua akera oki au e, E aaki au i taku ara kia Iehova ra; e kua akakore mai koe i te kino o taua ara naku ra.” Te apai maira te aakianga tika tikai i te maru, kia kore i reira e anoanoia tetai tangata kia tamanamanataia e tona akava ngakau no te au tarevake i pati ra.

I muri ake i te patianga i te akakore anga ara kia Iehova, kua pati atu a Davida e: “E anga ana koe i te ngakau mā i roto iaku nei, e taku Atua, e akaou ana oki koe i te vaerua tika tikai i roto iaku nei.” (Salamo 51:10) Te patianga i “te ngakau mā” e te “vaerua tika tikai” te akaari maira e te kite ra a Davida i te turanga o te tu ara i roto iaia e te anoano ra aia i ta te Atua tauturu i te tamaanga i tona ngakau e te raveanga i tetai akamata anga ou. Kare i tuku ua ki te tangi anga iaia uaorai, kua tauta aia kia rave ua atu i tana tavini anga i te Atua. Kua pure aia: “E vevete ana koe, e te Atu, i toku vaa, e na toku vaa e akapaapaa ia koe.”​—Salamo 51:15.

Eaa ra to Iehova manako ki to Davida tataraara ngakau tae e te tauta maata anga i te tavini iaia? Kua oronga aia i teia akapapu anga pumaana kia Davida: “E apii atu au ia koe, e akakite atu ei kia koe i taau arataa kia aere ra; e ako atu au ia koe; ei runga ia koe toku mata vaoo ei.” (Salamo 32:8) E akapapu anga teia i to Iehova uaorai manako ki te au manako e te au anoano o te tangata tataraara ra. Kua rave a Iehova kia oronga atu kia Davida i  te apii anga maata, i te kite mamao tikai anga i te akaraanga i to runga ake i te au manamanata ra. Me ka aroia ma te timataanga i te tuatau ki mua ra, ka rauka iaia i te kite i te tupu anga o tana au ravenga e to ratou au tupu anga ki runga i etai, e ka rauka iaia i te akono pakari i reira.

Te akamaroiroi maira teia tuanga i roto i to Davida oraanga i te katoatoa tei topa ki roto i te ara kino. Na te aakianga i ta tatou ara e te akaarianga i te tataraara ngakau tae, ka rauka akaou ia tatou te apinga akaperepereia ra e tatou, to tatou piri anga ki te Atua kia Iehova. Te mamae anga poto e te akama ta tatou ka akakoromaki ra e meitaki roa atu ia i to te taitaia no te vai muteki ua anga, me kare ra te tupu anga kino te akatikaanga ia tatou uaorai kia marokiakiaia i roto i tetai mataara meameaau ra. (Salamo 32:9) Mari ra, ka kite tatou i te akakore anga ara maana o tetai Atua aroa, takinga meitaki, “te tumu o te aroa, e ko te Atua nona anake te pumaana.”​—2 Korinetia 1:3.

[Tutu i te kapi 31]

Kua manakonako a Davida e ka ora i te au tupu anga o tana ara na te tonoanga ia Uria ki tona mate