Apii Pipiria​—Me Naau Ainei?

“KARE e tatau ia me kare tetai orometua i reira.” Kua mama mai teia akamatakiteanga i mua ake i etai au Pipiria a te aronga Katorika. “Ei au Katorika kare ua rai matou i akatueraia ana ki te Pipiria,” i karangai a Kay Murdy o te Catholic Bible Institute i Los Angeles, “inara te taui ra te reira.” Me kitea mai e te au Katorika e akapeea te au Tuatua Tapu i te akakeu anga i to ratou oraanga, tana i akakite maira, “ka akatupu ratou i to ratou uaorai pongi anga e te kaki anga no te Pipiria.”

No runga i teia taui anga, kua taiku mai te makatini U.S. Catholic i tetai akatere apii anga akonoanga tei karanga e ko te au Katorika tei kapiti atu ki te au pupu apii Pipiria te manako ra “e kua akangereia ratou ei au Katorika, e e maata te au apinganui te vaira i roto i te Pipiria. Te inangaro ra ratou kia opuia mai etai o taua apinganui ta ratou i manako e kua ngere ia ratou.”

Noatu rai eaa te tumu, eaa te “apinganui” ka kitea mai e tetai tangata apiipii o te Pipiria ra? E tamanako ana: Ka inangaro ainei koe kia kite e akapeea me autu i te au taitaia o te oraanga i te au ra ravarai? Akapeea koe i te tamou anga i te au i roto i te ngutuare? Eaa ra i maata uai te kino e te tu kare e oaoa tangata ana? Eaa te tumu no te ta ua i rotopu i te au mapu i teia tuatau nei? Ka kitea te au pau anga tau ki teia e tetai atu au uianga ngata ra, i roto i te Tuatua a te Atua, te Pipiria, e e “apinganui” ratou, e tikai, kare anake ua no te au Katorika me kare ra no te au Porotetani, kareka katoa ra no te aronga Buddha, Hindu, Muslim, Shinto, e pera katoa te aronga irinaki kore i te Atua e te aronga kare e irinaki ana. Mei ta te tata taramo e tuatua ra, ‘te tuatua a te Atua e lamepa ki tona nei vaevae, e turama no tona nei arataa.’ Aiteite rai te reira kia koe.​—Salamo 119:​105.