Au Uianga a te Aronga Tatau

I te manakonako anga i to Iehova ra puareinga kia akakore i te au ara na te puapinga anga o te atinga oko ra, eaa ra i anoanoiai te au Kerititiano kia aaki ki te aronga pakari i roto i te putuputuanga ra?

Te kiteaia ra i roto i te turanga o Davida raua ko Bate-seba, kua akakore a Iehova i ta Davida ara, noatu e kino tikai, no to Davida tataraaraanga tika tikai. Te aravei anga te peroveta ko Natana iaia, kua aaki akatuera atura a Davida: “Kua ara au ia Iehova.”​—2 Samuela 12:13.

Inara, kare a Iehova e ariki anake ua i te aaki anga a tetai tangata ara e te oronga anga i te akakore anga ara mari ra ka rave katoa aia i te au apinga aroa kia tauturu i tei apa ra kia meitaki mai kia oki akaou mai ki te oraanga pae vaerua. I to Davida turanga, kua aere mai te tauturu anga na roto i te peroveta ia Natana. I teia tuatau nei, i roto i te putuputuanga Kerititiano, te vaira te au tane pakari i te pae vaerua, me kore te aronga pakari. Kua akataka mai te pipi ko Iakobo: “Te mate ra aina tetai o kotou i te maki [i te pae vaerua]? e tiki aia i te aronga pakari o te ekalesia ra; e na ratou e pure iaia ma te akatainu iaia i te manongi i te ingoa o te Atu ra: E e ora taua maki ra i te pure akarongo, e na te Atu aia e akatu ki runga; e i rave na aia i te ara ra, e akakoreia tana ara.”​—Iakobo 5:​14, 15.

Ka rauka i te aronga pakari karape ra i te akamama mai i te mamae o te ngakau te manakoia ra e te tangata ara kua mii ra. Ka tauta ratou i te aru ia Iehova i roto i ta ratou au ravenga ma ia ra. Kare  rava ratou e inangaro kia riri, noatu rai e te tau ra te ako anga pakari. Kareka ra, ka akamanako aroa tikai ratou i te au anoano o te tangata ra. Ka tauta marie ratou i te akatikatika i te manakoanga o tei ara ra na te taangaanga anga i te Tuatua a te Atua. (Galatia 6:1) Noatu rai e kare te tangata i aaki ua mai i tana ara, penei e ka akakeuia aia kia tataraara mai me araveiia atu e te aronga pakari ra, mei ia Davida rai te aravei angaia e Natana. No reira te tauturu tei orongaia atu e te aronga pakari ra ka tauturu i tei ara kia kopaeia te kino no te ripiti akaou anga i te ara e te au tupu anga kino tikai te riroanga mai ko tetai tangata tei akakoro i te rave i te ara.​—Ebera 10:​26-31.

Kare i te mea ngoie tikai kia aaki ki tetai ke i te au angaanga te manako ra tetai e e akamaia e te kimi anga kia akakoreia te ara. Te anoanoia ra te maroiroi no roto mai. No reira, e akamanako ana no tetai tuatau, no runga i tetai ravenga ke atu. Ko tetai tangata kare i akaari ana i tana ara kino ki te aronga pakari i roto i te putuputuanga te karanga ra: “Kua kite au i tetai mamae anga i roto i toku ngakau kare roa e ngaro. Kua akamaata au i taku au tauta anga i roto i te angaanga tutu aere, inara kua vai ua rai te manako anga mii.” Kua manako aia e kua rava ua rai te aaki anga ki te Atua na roto i te pure anga, inara ma te taka marama kare rava, no te mea kua kite aia i te au manako anga tei aite ra ki te Ariki ko Davida. (Salamo 51:​8, 11) Mei teaa ra te meitaki kia ariki i te tauturu anga aroa ta Iehova i oronga mai na roto i te aronga pakari ra!