E Akaketaketa i Toou Irinaki ia Iehova

Kua akanooia tetai parani tamate anga. Kua uriuri ana te au akaaere o te enua e kua rauka mai te manako no tetai ture ou. Kua inangaro ratou i te akariro i teia ei aati anga maata i te ture no tetai kia rave i te akamori anga kare i arikiia e te Au-Enua.

KUA tangi matauia ainei teia? Te ki ra te tuatua enua i te au akaraanga o te au tangata tei kimi ra no te akatupu i te manamanata na roto i te ture. Kua tupu taua kiteanga i runga akenei i roto i te Patireia Peresia i te au ra o te peroveta ko Daniela. Te ture, tei akanooia e te Ariki ko Dariu, te akakite ra: “Ko te tangata kia pati i tana patianga ki tetai atua ke, e tetai tangata ke, mari ra kia koe ra, e te ariki, e kia po toru ngauru ake, e titiriia ïa ki roto i te vaarua o te au liona ra.”​—Daniela 6:​7-9.

Eaa ta Daniela ka rave i raro ake i te akakoko anga o te mate? Ka rave tamou ua atu ainei aia i te irinaki i tona Atua, ko Iehova, me kare ka tuku au ua ainei aia e ka rave i tei akakiteia e te ariki ra? Te akakite maira te rekoti kia tatou: “Kite ua rai a Daniela e kua akairoia taua tuatua i tataia ra, kua aere atura aia ki roto i tona are; e te vai tuera ua ra te au māramārama o tona pia ki te pae ki Ierusalema, tuturi iora aia ki raro, tutoru tuturi anga i te rā okotai, e kua pure iora, e kua akameitaki i tona Atua, mei tana oki i rave i muatangana ra.” (Daniela 6:10) Kua kite meitakiia te toenga o te tataanga. Kua titiriia a Daniela ki roto i te vaarua o te au riona no tona akarongo, inara “kua mopani [a Iehova] i te vaa o te au liona” e kua akaora mai i tona tavini tiratiratu.​—Ebera 11:33; Daniela 6:​16-22.

 E Tuatau no te Akara Matatio i Tetai Uaorai

I teia tuatau, te noo nei te au tavini o Iehova i roto i tetai ao kino tikai, te aro anga atu i te au akakoko anga e manganui e meitaki ei ratou i te pae kopapa e te pae vaerua. Ei akaraanga, i roto i te tupu anga kino tikai o te makitakita anga i tetai katiri tangata i tetai au enua, kua tamateia te Au Kite e manganui. I tetai atu ngai, kua aro atu te au tavini o Iehova i te rava kore o te kai, te au tu ngata i te pae o te puapinga, te au tumatetenga natura, te au maki kino roa, e tetai atu au turanga akakoko anga maata i te ora anga. Pera katoa, kua akakoromaki atu ratou i te takinokino anga, te au taomi anga mei te angaanga, e te au timata anga tukeke no te rave i te kino, pouroa penei ka akakino i to ratou turanga pae vaerua. E tikai, te tauta pakari nei Tei Patoi maata, ko Satani, no te takore i te au tavini o Iehova ma te au ravenga te ka riro e kia manuia.​—1 Petero 5:8.

Te aro anga atu i taua au turanga, eaa ta tatou ka rave? Koi riro ei ei mea natura i te kite atu i te mataku me akakokoia to tetai oraanga, ka rauka ia tatou te akamanako i te au tuatua akapapuanga a te apotetoro ko Paulo: “Ko [Iehova] oki tei tuatua mai e, ‘Kare rava au e akaruke atu ia koe, kare oki au e taka ke ia koe, kare, kare rava atu.’ I tikaʼi ia tatou kia akamaroiroi, e kia karanga e, ‘Ko Iehova toku tauturu, kare au e mataku; eaa ta te tangata kia rave mai iaku?’” (Ebera 13:​5, 6) Ka papu tatou e te manako akapera ra a Iehova no runga i tona au tavini i teia tuatau. Inara, e mea ke rai i te kite atu i ta Iehova taputou e e mea ke rai kia irinaki papu e ka rave angaanga aia no tatou. No reira e mea puapinga tikai kia akara matatio tatou i te tumu i patuiai te irinaki ia Iehova ki runga e kia rave tatou i te au mea ravarai ka rauka ia tatou no te akaketaketa e te akono i taua tu irinaki ra. Me rave tatou i te reira, “te au o te Atua, ko tei maata ua atu i te kite tangata, e akamaroiroi mai i to [tatou] ngakau e to [tatou] manako i te Mesia nei ia Iesu.” (Philipi 4:7) I reira me tupu mai te au timataanga, ka rauka ia tatou te manako meitaki e te akono pakari i te reira.

Te Tumu no te Irinaki ia Iehova

Papu tikai e manganui ta tatou au tumu no te irinaki i Tei Anga mai ia tatou, ko Iehova. Te mea mua i roto i te reira ko te tika e e Atua aroa a Iehova e te manako ngakau tae ra i tona au tavini. Te vaira te au atianga e manganui tei rekotiia i roto i te Pipiria te akakite maira i to Iehova inangaro i te akono i tona au tavini. Te akatakaanga i ta Iehova akonoanga i tona iti tangata ikiia, ko Iseraela, kua tata a Mose: “Kua kite aia iaia i te enua medebara, i te ngai motutaa rikarika ra: kua arataki aia iaia, kua ako aia iaia: kua tiaki aia iaia mei tona uaorai koringo mata.” (Deuteronomi 32:10) I teia tuatau, te akono tamou nei a Iehova i tona au tavini, ei au pupu e ei tangata tataki tai. Ei akaraanga, i te kite anga tetai Au Kite i te rava kore pakari o te kai i te tuatau tamaki anga a te tangata i Bosnia, kua akapapu a Iehova e kia rauka ia ratou te au mea anoanoia na roto i te tauta anga mataku kore a to ratou au taeake mei Croatia e Austria mai, tei tuku i to ratou au oraanga ki roto i te tumatetenga na te teretere anga ki roto i te au ngai kino kia apai atu i te au apinga tauturu ki to ratou au taeake. *

I te mea ko te Atua ko Iehova te Mana Katoatoa, papu tikai ka rauka katoa iaia te paruru i tona au tavini i raro ake i tetai ua atu turanga. (Isaia 33:22; Apokalupo 4:8) Noatu me ka akatika a Iehova i tetai o tona au tavini kia vai tiratiratu e tae atu ki te matenga, te akamaroiroi ra aia ia ratou e te tauturu ra ia ratou kia akono i to ratou tu tiratiratu, te akariroanga ia ratou kia vai ngaueue kore, rekareka, e te maru e tae atu ki te openga. Ka rauka katoa ia tatou taua irinaki anga papu mei te tata taramo rai: “Ko te Atua to tatou akapuanga e te maroiroi, e tauturu vaitata roa ïa kia rokoia e te tumatetenga: E kore ei tatou e mataku, kia keukeu te enua, e kia uriia te au maunga ki raro ki rotopu i te tai.”​—Salamo 46:​1, 2.

Te akaari katoa maira te Pipiria ia Iehova e e Atua mou ia. Teia te aiteanga e te tika ua ra aia no tana au taputou anga. Te tika anga, te akataka maira te Pipiria iaia ei Atua te ka “kore e tika kia pikikaa.” (Tito 1:2) I te mea kua tuatua taokioki ua a Iehova i tona puareinga i te paruru e te akaora i tona au tavini, ka papu tikai ia tatou e kare ua e ka rauka iaia pera katoa te papa ra no te akatupu i tana au taputou.​—Iobu 42:2.

 Te Au Mataara no te Akaketaketa i to Tatou Irinaki Anga

Noatu kua rauka ia tatou te au tumu meitaki no te tuku i te irinaki ki roto ia Iehova, auraka tatou e manako kore i teia. Teia oki te tumu e meangiti ua to te ao irinaki i te Atua, e ka rauka i taua tu i te akaparuparu ngoie ua i to tatou irinaki anga ia Iehova. No reira, ka tau tatou kia tauta pakari i te akaketaketa e te akono tamou i taua tu irinaki anga. Te kite meitaki ra a Iehova i teia, e kua oronga mai aia i te au ravenga e raukai ia tatou te rave i te reira.

Te mea mua, kua oronga mai aia i tana Tuatua tataia, te Pipiria, te rekoti ra i te au angaanga maata e manganui tana i rave no tona au tavini. Ka akamanako ana, mei teaa te maata o toou irinaki anga i tetai me ko taau ua i kite ko tona ingoa? Penei paa e meangiti ua. Ka anoanoia koe kia kite i tana au mataara e tana au angaanga e raukai i te irinaki papu iaia, kare ainei? Ia tatou e tatau ra e te manakonako ra i taua au tataanga o te Pipiria, ka oonu to tatou kite ia Iehova e tana au mataara meitaki, e ka ariki maata atu tatou e te tau ra aia kia irinakiia. No reira te akaketaketaia ra to tatou irinaki anga iaia. Kua akanoo te tata taramo i tetai akaraanga meitaki rava i te tuatua anga aia na roto i tetai pure akatenga ki te Atua: “E akamaara ana au i te angaanga a Iehova: ka akamaara rai au i taau ra angaanga taka ke i taito ra. Ka akamaaraara rai au i taau ra au angaanga katoa, ka tuatua rai au i taau i rave ra.”​—Salamo 77:​11, 12.

I te pae mai i te Pipiria, kua rauka katoa ia tatou te puapinga maata o te kai pae vaerua i roto i te au puka akanooia ki runga i te Pipiria tei maaniia e ta Iehova akaaerenga. I roto i teia, e putuputu te taime te ki ra teia au puka i te au tataanga akakeu anga o te au tavini o te Atua i teia tuatau, te akaarianga mai e akapeea a Iehova i te oronga anga i te tauturu e te akaora anga me o ratou ki roto i te au turanga kino ra. Ei akaraanga, ko Martin Poetzinger, tei riro mai ei mema o te Pupu Akaaere o te Au Kite o Iehova, kua makiia koi tavini ra ei painia i te au ngai i Europa tei mamao mei tona enua kainga. Kare ana moni, e kare e taote te puareinga ra no te akara atu iaia. Inara kare a Iehova i akaruke ana iaia. I te openga ra, kua araveiia atu te tangata kite maata o te are maki i reira. Ei tangata irinaki i te Pipiria, kua akono teia tangata takinga meitaki i te Taeake ko Poetzinger mei tana ka rave no tetai tamaiti, te raveanga i te reira ma te kore te tutaki anga. Te tatauanga i taua tua papu e ka akaketaketa i to tatou irinaki anga i to tatou Metua i te rangi ra.

Ko tetai atu tauturu puapinga te oronga maira a Iehova no te akaketaketa i to tatou irinaki anga iaia koia oki ko te akameitaki anga akaperepere o te pure. Te akakite aroa maira te apotetoro ko Paulo kia tatou: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.” (Philipi 4:6) “Te au mea katoa ra” ka kapiti mai i to tatou manako ngakau, te au anoano, te au mataku anga, e te au taitaia. Te putuputu e te ngakau tae i ta tatou au pure, te pakari anga ia to tatou irinaki anga ia Iehova.

Ia Iesu Karaiti i te enua nei, kua aere aia i tetai taime ki tetai ngai koia ua kia pure ma te kore e tamanataia. (Mataio 14:23; Mareko 1:35) I mua ake ka tuku ei i te au iki anga pakari, kua akapou aia i te po katoa i te pureanga ki tona Metua. (Luka 6:​12, 13) Kare i te mea poitirere e kua pakari to Iesu irinaki anga ia Iehova e kua rauka iaia te akakoromaki i te timata anga kino roa atu tei tupu kiaia. Ko tana au tuatua openga ki runga i te rakau tamamae: “E taku Metua, te tuku atu nei au i toku vaerua ki to rima na.” Te akatutu maira taua tuatua irinaki anga e ki te openga kare tona irinaki anga i tona Metua i kore ana, noatu rai kare a Iehova i tomo mai i te akaora iaia.​—Luka 23:46.

 Noatu rai ko tetai atu ravenga no te patu i to tatou irinaki ia Iehova koia oki ko te taokotai putuputu anga ma te aronga te irinaki ra iaia ma te ngakau katoa. Kua akaue a Iehova i tona iti tangata kia taokotai putuputu kia apii maata atu no runga iaia e kia akamaroiroi i tetai e tetai. (Deuteronomi 31:12; Ebera 10:​24, 25) Kua akaketaketa taua taokotai anga i to ratou irinaki anga ia Iehova, te akariroanga ia ratou kia akakoromaki i te au timata anga puapinga o te akarongo. I tetai enua i Aperika kua araiia te angaanga tutuanga, kua akakoreia mei te Au Kite o Iehova te paruru anga mei te akava, te au pepa teretere, te pepa akaipoipo anga, te au rapakau anga i te are maki, e te au angaanga. I te tupu anga te tamaki a te tangata i tetai ngai, e 39 mema, kapiti mai te au tamariki, o tetai putuputuanga i te pae mai kua noo no tetai a marama i raro ake i tetai ana i te metepara e raukai te ora mai mei te pomu anga i to ratou taoni. I raro ake i taua turanga ngata, kua akaketaketa maata ta ratou uriuri anga i te irava Pipiria i te au ra e tetai atu au uipaanga ia ratou. No reira kua rauka ia ratou te akakoromaki i taua timata anga kino ma to ratou tu i te pae vaerua. Te akaari meitaki maira teia kite anga i te puapinga o te aravei putuputuanga ma to Iehova iti tangata.

Ei mea openga, kia akaketaketa i to tatou irinaki ia Iehova, kia rave maroiroi tatou i te angaanga tutu aere i te Patireia, te papaanga i te akakite i te tuatua meitaki ki tetai atu. Kua akatutuia teia e te kite anga akakeu anga o tetai papuritia mapu maroiroi i Kanata tei tuia e te maki kino te rukimia. Noatu te kino o tona maki, kua inangaro aia e kia riro mai ei painia tamou, koia oki, ei orometua tamou. I roto i tetai tuatau i te maru anga mai tona maki, kua meitaki ua aia no te akapou e okotai marama i roto i te angaanga orometua ei painia tauturu. Kare i roaia kua kinokino akaou tona turanga, e kua mate aia i nga mea marama i muri mai. Noatu rai, kua vai pakari aia i te pae vaerua e tae ua atu ki te openga, kare tona irinaki anga ia Iehova i kore ana. Kua maara i tona mama: “Ki te openga ra, kua manako maata aia i tetai atu kare iaia uaorai. Ka akamaroiroi aia ia ratou kia apii i te Pipiria, te akakiteanga kia ratou, ‘Ka kapiti akaou tatou i Parataito.’”

Akapapuanga i to Tatou Irinaki ia Iehova

“Mei te kopapa oki kia kore te vaerua, e mea mate ïa, koia katoa te akarongo kare e angaanga ra, e mea mate katoa ïa.” (Iakobo 2:26) Ko ta Iakobo i tuatua no runga i te akarongo i te Atua ka rauka katoa kia tuatuaia no to tatou irinaki Iaia. Noatu mei teaa te maata o ta tatou tuatua anga e te irinaki ra tatou i te Atua, e mea puapinga kore ia mari ra kia akatutu tatou i taua irinaki anga na roto i te au angaanga. Kua irinaki tikai a Aberahama ia Iehova e kua akapapu i taua irinaki anga na te akarongo emiemi kore anga i tana au akauenga, e tae atu i te papaanga i te akaatinga i tana tamaiti, ko Isaaka. No taua irinaki e te akarongo anga meitaki, kua kiteia a Aberahama ei oa no Iehova.​—Ebera 11:​8-10, 17-19; Iakobo 2:23.

Kare tatou e anoanoia kia tapapa i tetai timata anga pakari kia tupu kia tatou i mua ake ka akaari ei tatou i to tatou irinaki ia Iehova. Kua akakite a Iesu ki tana au pipi: “Ko te akono meitaki i te mea ngiti ra, kua akono meitaki katoa i te mea maata; e ko te pikikaa i te mea ngiti ra, kare katoa ïa i akono i te mea maata.” (Luka 16:10) Kia apii tatou i te irinaki ia Iehova i roto pouroa i ta tatou au angaanga, te akarongoanga iaia i roto i te au mea akara anga puapinga kore. Me akono tatou i te au puapinga te aere maira mei te akarongo, ka akaketaketaia to tatou irinaki anga i to tatou Metua i te rangi ra, te akariroanga ia tatou kia aro atu i te au timata anga maatamaata e te mataku anga.

I te ao e vaitata atura ki to te reira openga kino roa, papu e ka kite atu to Iehova iti tangata i te au timata anga e te au kino maata. (Angaanga 14:22; 2 Timoteo 3:12) Na te patuanga i te irinaki anga ketaketa e te meitaki ia Iehova i teianei, ka rauka ia tatou te tapapa atu ki mua e orai i roto i tetai ao ou taputouia​—me na te oraanga i roto i te mate maata me kare te rauka anga te tuakaouanga. (2 Petero 3:13) Auraka tatou e tuku i te ngere anga i te irinaki anga i to tatou tuanga kia akakino i to tatou pirianga akaperepere ma Iehova. I reira, ko tei tuatuaia no Daniela i muri mai i te akaora angaia aia mei te vaarua o te riona ka rauka katoa kia tuatuaia no tatou: “E kare rava e pakiko i kitea i runga iaia, no te mea kua irinaki aia i tona ra Atua.”​—Daniela 6:23.

[Tataanga Rikiriki i Raro]

[Tutu i te kapi 9]

Te tatauanga i te au tua o te au tavini tiratiratu o Iehova, mei ia Martin Poetzinger, te akaketaketa ra i te akarongo