Ripoti a te Aronga Tutu Patireia

Kua Akamerengoia Tona Au Anoano i te Pae Vaerua

E AIRANI a Kupero i te tua itinga apatokerau o te Tai Mediterranean. I te tuatau Pipiria ra, kua kiteia a Kupero no tona veo e te rakau memeitaki. Kua akakitekite a Paulo raua ko Banaba i te tuatua meitaki o te Patireia i reira i te tuatau o to raua terepu mitinari mua. (Angaanga 13:​4-12) I teia ra, te akakeu akapapu ra rai te tuatua meitaki i te oraanga o te au tangata Kupero e manganui ra. E tika tikai teia kia Lucas, e tangata i roto i tona 40 anga mataiti. Te akakite ra aia:

“Kua anauia au i roto i tetai ngutuare e itu tamariki i runga i tetai pama puakatoro. Mei toku tamariki anga mai, e kaki anga toku no te tatauanga. Taku puka reka roa atu ko tetai tata anga puka rikiriki o te au Tuatua Tapu Ereni Kerititiano. I te ngauru mataiti anga au, kua akatupu au e etai au oa ra i tetai pupu apii Pipiria meangiti ua. Inara, kare oki te reira i roaia, no te mea kua kapiki mai etai au tangata pakari i roto i te oire ia matou ei aronga akaruke i te akarongo.

“I muri mai, i te aereanga ki te apii i Marike, kua aravei au i te au tangata mei roto mai i te au tu akonoanga e manganui ra. Kua akaka akaou te reira i toku inangaro i te au mea pae vaerua ra. Kua akanoo au i te au ra e manganui i roto i te ngai vairanga puka o te apii teitei i te apiianga i te au akonoanga tukeke ra. Kua atoro katoa au i tetai au are pure e manganui ra, inara noatu taku au tautaanga, kare roa au i akamerengoia i te pae vaerua.

“I te otianga taku au apii i muri mai, kua oki atu au ki Kupero e kua ariki atu i tetai angaanga ei akaaere no tetai ngai rapakau anga maki. E atoro ua mai ana tetai tangata pakari ko Antonis te ingoa, e Au Kite o Iehova, iaku i taku ngai e angaanga ra. Inara, e kiteia ana tana atoroanga e te Akonoanga Otototi Ereni.

“Kare i roa ana, kua aere mai tetai tangata apii akonoanga i te akara iaku e te tamaromaroa iaku i te tuatuaanga ki te Au Kite o Iehova. I te mea kua apii ia au mei te tamariki anga e tei te Akonoanga Otototi Ereni te tuatua mou, kua akatika au e kua akamutu i te atoroanga ma Antonis e kua akamata i te uriurianga i te Pipiria ki te tangata apii akonoanga ra. Kua atoro katoa au i te au are mongoka e manganui ra i Kupero. Kua teretere atu au ki te tua tokerau o Ereni e kua atoro i te Maunga Athos, ko tei manakoia e ko te maunga tapu maata roa atu i roto i te ao o te Kerititiano Otototi. Inara, kare taku au uianga Pipiria i pauia ake.

“No reira kua pure au ki te Atua kia tauturu mai iaku i te kimi i te tuatua mou. I muri poto ua mai, kua aere akaou mai a Antonis i te atoro iaku ki taku ngai e angaanga ra, e kua manako au e ko teia te pau anga ki taku pure. No reira kua akamutu au i te atoro atu i te tangata apii akonoanga e kua akamata i te apii i te Pipiria ma Antonis. Kua tere au ki mua, e i roto ia Okotopa 1997, kua akatutu au i toku akatapu anga kia Iehova na roto i te papetito anga ki te vai.

“Ko taku vaine e ta maua nga tamaine mataiapo ra, e 14 e te 10 mataiti i taua taime ra, kua patoi mai i te akamata anga. Inara no toku tu meitaki ra, kua akamata taku vaine i te aere ki tetai uipaanga i te Are Patireia. Kua akakeu oonuia tikai aia i te takinga meitaki o te Au Kite e te tu inangaro ta ratou e akaari ra. Ko tana i umere tikai ta ratou taangaanga anga i te Pipiria. Tei tupu, kua ariki taku vaine e te nga tamaine mataiapo ra i tetai apii Pipiria ma te Au Kite o Iehova. E akamanako ana i toku reka anga i te papetitoia anga ratou tokotoru i te Uruoaanga Tapere i te “Tuatua Totou a te Atua” i te 1999!

“Ae, kua akamerengoia taku kimi anga no te tuatua mou. I teianei te taokotai ra toku ngutuare katoa, kapiti mai taku vaine te tamariki e a ra, ki roto i te akamori anga ma a Iehova.”