“No Tatou te Atua Ra, ka Tika Iaai Kia Māro Mai?”

“Ka akapeea oki tatou i teia au tuatua? No tatou te Atua ra, ka tika iaai kia māro mai?”​—ROMA 8:31.

1. Koai ma tei kapiti atu ma to Iseraela i te akaruke anga i Aiphiti, e na teaa i taki atu ia ratou kia rave i te reira?

I TE aere anga to Iseraela no te tu rangatira, i muri ake i te nooanga e 215 mataiti i Aiphiti, te maataanga o te reira taime i roto i te tu tuikaa, “e te tangata ke ke katoa e manganui i te iro katoa anga i to ratou aerenga.” (Exodo 12:38) Kua kite taua aronga kare ra i te Iseraela i te au mate mataku e tai ngauru i runga i to Aiphiti ra e kua akariro i te au atua pikikaa o reira ei au tumu akakatakata anga. I taua tuatau rai, kua kite ratou​—e maata oki mei te a o te mate e aere atura ki mua​—i to Iehova ra kite i te paruru anga i tona au tangata. (Exodo 8:​23, 24) Noatu rai e kua kotingaia to ratou kite i ta Iehova au akakoroanga, kua papu ra ia ratou tetai mea okotai: Te au atua o Aiphiti kua puapinga kore i te paruru anga i to Aiphiti, inara kua akakite tikai a Iehova i tona uaorai maroiroi i te akono i to Iseraela ra.

2. Eaa a Rahaba i turu ei i nga tangata aroro o Iseraela ra, e eaa tona irinaki anga i to raua Atua ra i kore ei e tarevake?

² E a ngauru mataiti i muri akera, i mua ua ake i te tomo anga to Iseraela i te enua Taputouia ra, kua tonokia e Iosua tei mono ia Mose ra, e rua nga tangata kia aroro i taua enua ra. I reira kua aravei atura raua ia Rahaba, koia tetai tei noo ra ki Ieriko. Mei tana i akarongo no te au angaanga mana a Iehova ra kia paruru i to Iseraela i te tuatau e 40 mataiti mei to ratou akarukeanga ia Aiphiti, kua kite aia e me te anoano ra aia i ta te Atua akameitakianga, ka tika kia turu aia i tona au tangata. No tana ikianga pakari, kua akaoraia mai aia e tona ngutuare tangata oki i te akapou anga i te peke anga i to Iseraela taua oire i muri akera. Na taua tu temeio i to ratou akaora anga i akapapu mai e tei ia ratou te Atua ra. No reira, kare i tarevake to Rahaba irinaki anga i te Atua o te Iseraela ra.​—Iosua 2:​1, 9-13; 6:​15-17, 25.

3. (a) Eaa te temeio ta Iesu i rave i vaitata i te oire patu akaouia o Ieriko ra, e akapeea ta te au orometua ngati Iuda ariu anga? (e) Eaa ta etai ngati Iuda, e i muri akera etai aronga e manganui kare i te ngati Iuda i kite?

³ E tai ngauru ma rima anere mataiti i muri iora, kua rapakau a Iesu Karaiti i tetai tangata matapo i vaitata i te oire  tei patu akaouia ra i Ieriko. (Mareko 10:​46-52; Luka 18:​35-43) Kua pati teia tangata ia Iesu kia akaari aroa ua kiaia, i te akakiteanga e kua kite aia e tei ia Iesu te turuanga a te Atua ra. I tetai pae ko te aronga arataki akonoanga ngati Iuda ra e ta ratou au pipi, kare i ariki i te au temeio tei raveia e Iesu ra ei akapapu anga e te rave ra aia i te angaanga a te Atua. Kareka ra, kua kitea e ratou te akaapa anga iaia. (Mareko 2:​15, 16; 3:​1-6; Luka 7:​31-35) Noatu rai i te aro atu anga i te tika e kua akatuakaouia maira Iesu i muri i ta ratou tamate anga iaia ra, kare ratou i akatika puareinga ua e na te Atua teia raveanga. Kareka ra, kua taki atura ratou i te takinga kinoanga i te au pipi a Iesu ra, i te tautaanga kia arai i ta ratou angaanga no “te tuatua anga i te Atu ia Iesu.” Inara ko tetai papaki ngati Iuda, e i muri mai te aronga e manganui kare i te ngati Iuda, kua akamanako atura i teianei au tupu anga e kua akamanako tika atura ia ratou. Kia ratou te taka meitaki ra e kua kopae ke atu te Atua i te au arataki ngati Iuda tei manako ra e tuatua tika ta ratou uaorai, e kua turu atu i te au pipi taakaaka a Iesu Karaiti ra.​—Angaanga 11:​19-21.

Koai Ma i Teia Tuatau ta te Atua e Turu Ra?

4, 5. (a) Akapeea to etai au tangata manako ngakau no te ikianga i tetai akonoanga? (e) I te akatakaanga i te akonoanga mou, eaa te uianga tumu anga?

⁴ I te uianga no te akonoanga tika ra, kua tuatua tetai orometua i roto i tetai uiuianga tivi i ou akenei: “Ka manono rai au e tika tetai akonoanga me ka akariro ia tetai tangata ei peretana meitaki mai e me ka akono oki kia tau i te reira.” E tika, te akariro ra te akonoanga tika i te au tangata kia meitaki mai. Inara ko te tika ainei e te akatupu maira tetai akonoanga i te au tangata meitaki atu ko te reira ua te akapapu maira e kua rauka i te reira ta te Atua turuanga? Ko te reira anake ainei te kaveinga no te akataka anga me e tika tetai akonoanga?

⁵ Te ariki ra te au tangata ravarai i te kite anga kia rave i tana uaorai au ikianga, kapiti katoa i te ikianga i ta tetai akonoanga. Inara ko te raveanga i te tu rangatira kia iki kare e akapapu mai e ka rave tetai tangata i te ikianga tika. Ei akatauanga, tetai papaki tangata te iki ra i tetai akonoanga na te tumuanga ki runga i tona maatamaata, te apinganui, te akaraanga manea, me kare na to ratou pirianga pamiri. Kare teianei au mea i tetai tu no te ikianga e te akatakaanga me e tika tetai akonoanga me kare ainei. Ko te uianga tikai i teianei tumu: Ko teea te akonoanga te raurau ra i tona au pipi kia rave i to te Atua ra anoano e te oronga maira i te akapapu anga ngaueue kore i ta te Atua ra turuanga, kia raukai i tona au tangata kia tuatua ma te irinaki anga, “No tatou te Atua ra”?

6. Eaa te au tuatua a Iesu tei akamarama maira i te tika no te akonoanga mou e te akonoanga pikikaa?

⁶ Kua akanoo maira Iesu i te tumu no te akatakaanga i te akamori mou mei te pikikaa maira i tana tuatua anga: “Kia matakite ra i te peroveta pikikaa, ko tei aere mai ia kotou ma te kakau mamoe ra, kareka i roto, e luko taae ïa. Ka kite kotou ia ratou i to ratou ua.” (Mataio 7:​15, 16; Malaki 3:18) E akara akaou tatou i etai o te au “ua,” me kare te au akairo akatakaanga, no te akonoanga mou e raukai ia tatou ma te tu tika i te akataka e koai ma i teia tuatau tei ia ratou te turuanga tu-Atua.

 Au Akairo Akatakaanga i te Aronga Tei ia Ratou ta te Atua Turuanga

7. Eaa te aite anga e kia apii anake i tei akatumuia ra ki runga i te Pipiria?

⁷ Te akatumu ra ratou i ta ratou au apiianga ki runga i te Pipiria. Kua tuatua Iesu: “Kare taku uaorai i taku e apii nei, nana ra, na tei tono mai iaku nei. Ko tei anoano marie i te akono i tona inangaro, ka kite aia i taku e apii nei, e na Atua ainei, e naku uaorai ainei.” Pera katoa oki: “No te Atua aia ra, ka akono ïa i ta te Atua tuatua.” (Ioane 7:​16, 17; 8:47) Ma te tika ra, kia rekareka i ta te Atua turuanga, kia apii anake tetai i tei akakiteia mai e te Atua i roto i tana Tuatua e kia kopae ke i te au apiianga akatumuia ki runga i te pakari tangata me kare te ikuiku anga.​—Isaia 29:13; Mataio 15:​3-9; Kolosa 2:8.

8. Eaa ra i puapinga maatai kia taiku i te ingoa o te Atua ra i te akamori anga?

⁸ Te taiku ra ratou e te akakitekite ra i te ingoa o te Atua, ko Iehova. Kua totou maira Isaia: “E i te reira rā kua tuatuaʼi kotou, E akameitaki kotou ia Iehova, e kapiki atu ki tona ingoa, e akakite ki te tangata i tana au ravenga, e akakite marie kotou e kua akateiteiia tona ingoa. E imene kotou ia Iehova; i te ravenga meitaki tu ke tana i rave ra: kua kitea a te reira i te ao katoa nei.” (Isaia 12:​4, 5) Kua apii a Iesu i tana au pipi kia pure: “E to matou Metua i te ao ra, Kia tapu toou ingoa.” (Mataio 6:9) No reira, me e ngati Iuda e me kare i te ngati Iuda, kia tavini te au Kerititiano ei ‘tangata no te ingoa [o te Atua].’ (Angaanga 15:14) I te akara anga te mareka ra te Atua kia turu i te aronga te akaparau ra kia riro ei ‘tangata no tona ingoa.’

9. (a) Eaa ra i kiteai te rekareka anga i te au mema o te akonoanga mou ra? (e) Akapeea ta Isaia akatuke anga i te akonoanga mou ma to te pikikaa ra?

⁹ Te akaata maira ratou i te tu rekareka o te Atua. Ei mana no te “tuatua meitaki ra,” ko Iehova “te Atua mataora ra.” (1 Timoteo 1:11, NW) No reira akapeea e raukai i tona aronga akamori kia mataora kore me kare kia reka kore ua? Noatu te au taitaia o teianei ao e te au manamanata, ka tamou marie te au Kerititiano mou i tetai vaerua rekareka no te mea te kaikai putuputu nei ratou i te kai vaerua meitaki. Te akatuke ra Isaia ia ratou ma te aronga te rave ra i te akonoanga pikikaa: “E teianei te na ko maira te Atu ra ko Iehova, I na, e kaikai toku aronga tavini, e pongi ra kotou; i na, e inu toku ra aronga tavini, e mate ra kotou i te kaki vai: i na, e rekareka toku ra aronga tavini, e akama ra kotou: I na, e imene toku au tavini i te rekareka ngakau ra, e pukaoa ra kotou i te mamae ngakau ra, e evakaku oki i te atiati anga o te vaerua.”​—Isaia 65:​13, 14.

10. Akapeea ta te aronga tei ia ratou ra te akonoanga mou i te kopae anga i te apii na te timataanga e te tarevake oki?

¹⁰ Kua akatumu ratou i to ratou tu akono e ta ratou au ikianga ki runga i te au kaveinga Pipiria. “E irinaki kia Iehova ma to ngakau katoa ra; auraka ra e irinaki ki toou uaorai kite,” ta tei tata ia Maseli i apii maira ia tatou, “auraka e akangaropoina iaia i toou katoa ra au aerenga; e nana e akakite kia koe i toou ra au arataa.” (Maseli 3:​5, 6) Te turu ra te Atua i te aronga te akara ra kiaia no te arataki anga e kare ki te au apiianga patoi a te au tangata tei kore ra e akarongo i to te Atua pakari. Ki te mamao o ta tetai tangata e puareinga ra kia akanoo i tona oraanga kia tau ki te Tuatua a te Atua, ka kopae aia i te apiianga na roto i te timataanga e te tarevake.​—Salamo 119:33; 1 Korinetia 1:​19-21.

11. (a) Eaa ka kore ei te au mema o te akonoanga mou ra e akatakakeia ki roto i tetai pupu orometua e tetai pupu kare ra o ratou taoonga? (e) Eaa te akatauanga ta te aronga te rave ra i te arataki anga i roto i te au tangata o te Atua ka tau ei kia akanoo no te anana?

¹¹ Kua akapapaia ratou i te tu o te putuputuanga Kerititiano i te anere mataiti mua ra. Kua akanoo maira Iesu i te kaveinga: “Kareka kotou, auraka kia tapaia ia Rabi; okotai rai oki o kotou Orometua, ko te Mesia: e taeake anake oki kotou katoa na. Auraka kotou e akametua i tetai tangata i teianei ao: okotai rai oki o kotou Metua, ko tei noo i te rangi. Auraka kotou kia Tapaia i te arataki; okotai o kotou Arataki, ko te Mesia. E tei rai i roto ia kotou nei, ei tavini ïa no kotou.” (Mataio 23:​8-11) Ko tetai putuputuanga au taeake te arai atura i tetai pupu orometua akaparau tei akangateitei ra ia ratou uaorai ma te au taoonga akateiteiia e te akateitei ra iaia uaorai ki runga ake i te aronga aere pure. (Iobu 32:​21, 22) Te aronga te tiaki ra i te anana a te Atua kua akaueia kia rave i te reira “auraka ra no te akaueue, no te anoano ra; auraka no te apinga tika kore ra kia rauka, no  te tae tikai ra o te ngakau; Auraka ma te akaueue ua ki runga i te tuanga a te Atua ra, ei kaveinga ra kotou no te anana.” (1 Petero 5:​2, 3) Kare te au tiaki Kerititiano tikai e tauta kia akariro ia ratou uaorai ei au pu ki rungao i te akarongo o etai ke ra. Ei au oa rave angaanga i te tavini anga i te Atua, ka tauta ua ratou kia akanoo i tetai akatauanga meitaki.​—2 Korinetia 1:24.

12. Eaa te turanga tau no runga i te au kavamani tangata nei ta te Atua e umuumu ra no te aronga te inangaro ra i tana turuanga?

¹² Te kauraro ra ratou i te au kavamani a te tangata nei inara te vai takake ra. Te tangata tei kore ra e ‘kauraro marie i te aronga mana taoonga ra’ kare e tau kia manakonako atu i ta te Atua ra turuanga. No teaa ra? No te mea “te aronga mana e noo nei, kua akonoia ïa e te Atua. E teianei ko tei māro atu ki te taoonga ra, kua māro aia i tei akonoia e te Atua ra.” (Roma 13:​1, 2) Inara, kua kite a Iesu e penei ka tupu tetai maro anga i te manako anga, i tana tuatua anga: “Ka apai mari i ta Kaisara ra kia Kaisara; e ta te Atua ra, e apai ïa ki te Atua.” (Mareko 12:17) Ko te aronga te inangaro ra i ta te Atua turuanga ka tika “e na mua . . . te kimi i te basileia o te Atua, e te tuatua-tika nana ra,” i taua tuatau rai kia akono i te au ture o te enua te rotai ra ma ta ratou apainga teitei atura ki te Atua. (Mataio 6:33; Angaanga 5:29) Kua akaketaketa atura Iesu i te tu takake anga i tana tuatua anga no tana au pipi: “Kare ratou i to teianei ao, mei iaku nei rai oki, kare i to teianei ao.” Kua tuatua katoa aia i muri akera: “Kare to teianei ao taku basileia.”​—Ioane 17:16; 18:36.

13. Eaa te tuanga ta te aroa e akono ra i te akataka anga i te au tangata o te Atua?

¹³ Kare ratou e akara i te tu o te tangata i te raveanga i te ‘takinga-meitaki i te tangata ravarai.’ (Galatia 6:10) Te aroa Kerititiano kare e akara i te tu o te tangata, te ariki ua anga i te au tu tangata ravarai noatu to ratou kara pakiri, te turanga puapinga me kare te kite apiianga, te pa enua, me kare te reo. Ko te raveanga i te meitaki ki te katoa ravarai e kia maata atu oki ki te aronga tei piri maira kia ratou i te akarongo te tauturu ra i te akataka i te aronga tei ia ratou ta te Atua turuanga. Kua tuatua Iesu: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”​—Ioane 13:35; Angaanga 10:​34, 35.

14. Te kitea ra ainei te ariki anga i ta te Atua au tangata i mareka ana i te ao katoa nei? E akataka mai.

¹⁴ Te puareinga ra ratou kia mamae i te takinga kinoanga no te raveanga i to te Atua anoano. Kua akamatakite atura Iesu i tana au pipi: “I takinga-kino ana ratou iaku ra, e takinga-kino katoa ratou ia kotou; i akono ana ratou i taku tuatua, e akono katoa ratou i ta kotou.” (Ioane 15:20; Mataio 5:​11, 12; 2 Timoteo 3:12) Te aronga tei ia ratou ta te Atua ra turuanga kare i ariki uaia mai, mei ia Noa rai, tei akaapa iora i to te ao nei na roto i tona akarongo. (Ebera 11:7) I teia tuatau nei ko te aronga te inangaro ra i ta te Atua turuanga kare e tau kia tavai atu i te tuatua a te Atua ra me kare kia tuku ua i ta te Atua au kaveinga ei kopae anga i te takinga kinoanga. Me ka tavini tiratiratu atu ratou i te Atua, kua kite ratou e ka ‘va ua te au tangata e ka akakino oki’ ia ratou.​—1 Petero 2:12; 3:16; 4:4.

 Te Tuatau kia Akara Matariki i te Au Tika

15, 16. (a) Eaa te au uianga ka tauturu ia tatou kia akataka i te pupu akonoanga te rekareka ra i ta te Atua turuanga? (e) Eaa te akamanako anga openga ta te au mirioni ua atu tangata i itae, e no teaa ra?

¹⁵ E ui kia koe uaorai, ‘Ko teea pupu akonoanga te kitea ra i te mou piri tikaanga ki te Tuatua a te Atua ra, noatu me te tuke ra tana au apiianga mei te au irinaki anga o te maataanga o te au tangata nei? Koai ma tei akaketaketa ra i te puapinga maata o te ingoa tikai o te Atua ra, ma te taikuanga i te reira ei akataka anga ia ratou uaorai? Koai ma te tou tika atura ki te Patireia o te Atua ko te mea anake ia ei takore atu i te au manamanata katoa o te tangata nei? Koai ma te mou ra i te au turanga a te Pipiria no te tu akono ma te akamanakoia mai e kua piro ta ratou ravenga? Ko teea pupu te akaraia maira no te kore to ratou au orometua e tutakiia, pouroa te au mema te rave ra i te tutu aere anga? Koai ma te akapaapaaia ra no te riroanga ei aronga akono i te ture, noatu e kare ratou e o atu ana i tetai tuanga i roto i te au poritiki ra? Koai ma tei akapou aroa ra i te taime e te moni i te tauturuanga i etai ke ra kia apii no te Atua e tana au akakoroanga? E noatu rai teianei au mea tau papu tikai, koai ma te vaira i te akara anga akameangitiia mai, te aviriia ra, e te takinga kinoia ra oki?’

¹⁶ E au mirioni ua atu te au tangata takapini teianei ao kua akara matariki i te au tika e kua riro kia irinaki e ko te Au Kite o Iehova anake te akono ra i te akonoanga mou. Kua rauka ia ratou teianei manako anga na te akatumu anga ki runga i ta te Au Kite o Iehova i apii ana e ta ratou tu akono ia ratou uaorai, pera katoa te akatumu anga ki runga i te au puapinga ta to ratou akonoanga i apai maira. (Isaia 48:17) E au mirioni ua atu, te tuatua ra, mei tei totouia maira ia Zekaria 8:23: “Ka aere katoa tatou: kite akenei oki matou e tei ia kotou te Atua.”

17. Eaa ra kare e aere vave anga ki mua no te Au Kite o Iehova kia tou mai e tei ia ratou te akonoanga mou ra?

¹⁷ Kua tuatua vave ainei te Au Kite o Iehova i te tou anga e tei ia ratou anake ta te Atua ra turuanga? Ko te tika, ko taua tu rai to Iseraela i Aiphiti tei karanga ra tei ia ratou te turuanga a te Atua noatu ra te irinaki anga a to Aiphiti ra, me kare i ta te au Kerititiano o te anere mataiti mua i karanga ra ia ratou te turuanga a te Atua e kare i te akonoanga ngati Iuda ra. Te tuatua ra te au tika no ratou uaorai. I roto i te 235 enua te rave ra te Au Kite o Iehova i te angaanga ta Iesu i totou ra e ka raveia e tana au pipi mou i te tuatau o te openga nei: “E tutu aereia te evangelia o te basileia nei, e kako rava ake te ao katoa nei; ei kite no  te pa enua ravarai; ko te openga iora ïa i reira ra.”​—Mataio 24:14.

18, 19. (a) Eaa ra i kore ei e tumu no te Au Kite o Iehova kia akamutu i te raveanga i ta ratou angaanga tutuanga, noatu rai te patoiia ra ratou? (e) Akapeea ta Salamo 41:11 turu anga i te tika e tei te Au Kite te turuanga a te Atua?

¹⁸ Ka rave ua atu te Au Kite o Iehova i teianei angaanga, kare rava e tuku i te takinga kino me kare patoi anga kia akameangiti mai i ta ratou angaanga. Ka tika kia raveia te angaanga a Iehova e ka raveia oki. Te au tamata anga a etai ke ra i rave i te anere mataiti kua topa kia arai i te Au Kite mei te akatupuanga i te angaanga a te Atua ra kua ope takiri ei puapinga kore, no te mea kua taputou a Iehova: “Te taoonga ra noou i angaiaʼi ra, kare ïa e manuia; e te au vaa katoa e patoi ia koe, i te akava anga ra, naau ïa e akaapa atu. Ko te tuanga teia o te au tavini o Iehova; e tei iaku ta ratou tuatua-tika, te tuatua maira Iehova.”​—Isaia 54:17.

¹⁹ Ko te tika e te maroiroi ua atura te Au Kite o Iehova i te rave angaanga i teianei i to mua ana​—e ko teia i te aro atu anga i te patoianga i te ao katoa nei​—e akapapu anga e te mareka ra Iehova i ta ratou e rave ra. Kua tuatua te Ariki ko Davida: “Ko te mea teia i kite ei au e, kua akaperepere mai koe iaku, ko toku enemi nei kare rai aia i maeva ki runga iaku.” (Salamo 41:11; 56:​9, 11) Kare rava e rauka i te au enemi o te Atua kia maeva ki rungao i te au tangata o Iehova, no te mea te aere ua atura to ratou Arataki, ko Iesu Karaiti ki mua ki te autu anga openga!

Ka Rauka Ainei ia Koe te Pau?

• Eaa etai akatauanga taito no te au tangata tei ia ratou te turuanga a te Atua?

• Eaa etai akairo akatakaanga no te akonoanga mou ra?

• Eaa ra i irinaki ei koe uaorai e tei te Au Kite o Iehova ta te Atua turuanga?

[Au Uianga Apii]

[Tutu i te kapi 13]

Te aronga inangaro i ta te Atua turuanga ka tika kia akatumu i ta ratou au apiianga ki runga ua i tana Tuatua

[Tutu i te kapi 15]

Te tavini ra te aronga pakari Kerititiano ei akatauanga no te anana