Au Uianga a te Aronga Tatau

Eaa ra te New World Translation ia 2 Petero 3:13 i karangai “au rangi ou [tere atu] e tetai enua ou,” kareka ra ia Apokalupo 21:1 te akakite ra “tetai rangi ou [okotai] e tetai enua ou”?

E akataka anga karama te tumuanga no teia te o maira te au reo taito. I te akara anga kare e puapinga takake maata e manako ia ra no runga i te aiteanga.

Ka akamanako ana na mua i te au Tuatua Tapu Epera. I roto i te tataanga o te reo taito, te tuatua Epera sha·maʹyim, e uriia ana te “(au) rangi,” e tere atu. Tona tu tere atu penei te akaata ra, kare no tetai tere atu o te teitei, mari ra e manako no tetai tere atu “o te akatotoa anga i te ngai,” me kare te manako o “tetai au tuanga takake e manganui tei kapiti katoa ia mai me kare ra te au tumu anga.” Te maramaia ra te reira e te akatotoa mamao ia ra te rangi tikai mei te enua mai ki te au tuanga katoatoa e te kapitiia maira te au etu e pirioni ua atu. Me na mua ake te atikara papu i te sha·maʹyim (aite anga tikai, “te au rangi”), vaitata rai e te uri ra te New World Translation i te reira e “au rangi,” mei ia Isaia 66:22. Me akaariia mai te sha·maʹyim e kare te atikara papu, ka rauka i te uriia mai okotai (“rangi,” mei ia Genese 1:8; 14:​19, 22; Salamo 69:34, NW) me kare ra e tere atu (“au rangi,” mei ia Genese 49:25; Akava 5:4; Iobu 9:8; Isaia 65:17, NW).

I roto ia Isaia 65:17 e te 66:22, tei roto i te tu tere atu te tuatua Epera no te au rangi, e te urianga putuputu tei ikiia ra ko te “au rangi ou e tetai [me kore, te] enua ou.”

Te aiteanga o te tuatua Ereni ou·ra·nos e “rangi,” e te aite anga no te tere atu ou·ra·noi e “au rangi.” Ma te tau, kua taangaangaia e te aronga uri o te Septuagint Ereni ra te tu okotai o Isaia 65:17 e te 66:22.

Inara akapeea i reira te taiku anga o te nga tuatua o te “rangi ou [me kare au rangi] e tetai enua ou” i roto i te au Tuatua Tapu Ereni Kerititiano ra?

Ia 2 Petero 3:13, kua taangaangaia e te apotetoro te tere atu i te reo Ereni. I mua ua ake i te reira (irava 7, 10, 12), kua tuatua aia no teianei “au rangi” kino, te taangaanga anga i te tere atu. No reira te taangaanga putuputu ra aia i te tere atu i roto i te irava 13. Pera katoa, i te akara anga te taiku maira aia no roto mai ia Isaia 65:17 taito ra, te ngai ia e tere atu i te reo Epera, mei ia 2 Petero 2:22 ra, kua taiku mai aia no roto mai i te tata anga Epera o Maseli 26:11. No reira te tou ra a Petero ki te “au rangi ou [tere atu] e tetai enua ou ta tatou e tapapa atura i tau ki tana taputou.”

Ei manga tuke anga, ia Apokalupo 21:1, i te akara anga kua taangaanga te apotetoro ko Ioane i te urianga o Isaia 65:17 i roto i te Septuagint, tei kiteaia, tei roto te tuatua Ereni no te “rangi” i te tu okotai. No reira, ko ta Ioane i tata ei: “Kite atura au i tetai rangi ou [okotai] e tetai enua ou; no te mea kua paati te rangi taito e te enua taito.”

E au akataka anga karama teia te piri atura ki te uri anga. Kia ripiti akaouia e kare e tuke anga i te aiteanga me ka tatau tetai, me kare ka tuatua no te, “au rangi ou” me kore “rangi ou.” Aiteite ua te manako o te tuatua.

[Akameitakianga no te Tataanga i te kapi 31]

Stars: Frank Zullo