Kia Rekareka ma te Manakonakoanga o te Patireia!

E ATIANGA rekareka ia tei akaputuputu mai e 5,784 aronga matakitaki ia Mati 10, 2001, i te au ngai e toru i New York State tei taangaangaia e te pamiri Betela maatamaata. Te atianga koia oki ko te karatuati anga o te 110 pupu o te apii mitinari o Gileada.

Kua turou atu a Carey Barber, e mema o te Pupu Akaaere o te Au Kite o Iehova, i te katoatoa e kua akamata i te porokaramu, na te taikuanga: “Te akariroia nei matou kia rekareka i te kite atu e kua tereniia i teianei e 110 pupu o te aronga apiipii o Gileada ei au mitinari e kua tukunaia ki te au ngai katoatoa takapini i te koropu.”

Akapeea me Vai Rekareka Ua Atu

Aru mai i te tuatua akamataanga a te Taeake ko Barber, kua tuatua atu a Don Adams ki te aronga matakitaki, kapiti atu i te 48 aronga apiipii, no runga i te tumu manako “Te Akameitakianga a Iehova te Akariro ra ia Tatou kia Apinganui.” Te akanooanga i tana tuatua ki runga ia Maseli 10:22, kua akamaaraara atu aia ki te aronga matakitaki e te tauturu ra e te akameitaki ra a Iehova i tona au tavini me tuku ratou i te au mea o te Patireia na mua i roto i to ratou au oraanga. Kua akamaroiroi aia i te aronga apiipii kia ariki i ta ratou tukuanga angaanga ou ma taua tu puareinga ra tei akaariia e te apotetoro ko Paulo i te pati angaia atu aia kia “ano mai ki Makedonia nei, e tupae mai ia matou.” (Angaanga 16:9) Noatu te vaira te au tu ngata kia autuia, no to Paulo tu puareinga i te tutu aere ki te au ngai i akaueia aia kua tupu te au akameitakianga rekareka e manganui.

Koi oti ua akera i te au mema o te pupu karatuati ta ratou apiianga e rima marama o te Pipiria e te terenianga no te akapapa anga no te angaanga mitinari. Noatu rai, kua akamaroiroi a Daniel Sydlik, e mema o te Pupu Akaaere o te Au Kite o Iehova, ia ratou kia rave tamou ua atu i te apiianga. Te tuatuaanga no runga i te tumu tuatua “Kia Riro ei Au Pipi Mou,” kua akakite aia: “Te aiteanga o te akariroanga i te tangata ei pipi koia oki ko te akarongo tamou anga i te au tuatua a Iesu. Te o maira to tatou tu puareinga no te akarongo ua atu ki tana au tuatua, ki tana akakiteanga, ki tana apiianga.” Kua tou tika atu aia e kare te au pipi a Karaiti e rave ua i ta ratou tuku anga ma te kore e akarongo atu i te reo o te Pu; tei roto te pakari o te Atua i te aerenga oraanga o Karaiti. (Kolosa 2:3) Kare e rongoia te au tuatua a Iesu e tatou e okotai ua taime e ka taopenga e kua kite maata tatou no runga iaia, no reira kua akamaroiroi te Taeake ko Sydlik i te aronga karatuati kia rave tamou ua atu i te apiianga, te taangaangaanga, e te akoanga atu i te tuatua mou Kerititiano, te akatupu ra i te rangatira.​—Ioane 8:​31, 32.

Kia vai rekareka ua atu i roto i te angaanga a te Atua, kia puareinga ua tetai i te ariki i te ako anga e te akatikatika anga. “Ka Akatikatika Ainei Toou Nga Mape ia Koe?” te ui anga tei taikuia e te tangata ikuiku Gileada ko Lawrence Bowen. Kua akaari mai aia i roto i te Pipiria te piri atura te nga mape akatutu ua ki to tetai au manako oonu roa atu e te au manako ngakau. Ka riro raua ei akatikatika i tetai me kua puta atu te ako anga akauruia no roto mai i te Tuatua a te Atua ki roto i te au  tu roto roa atu o tetai tu peretana. (Salamo 16:7; Ieremia 17:10) Ka akakeu katoa to tetai aerenga tiratiratu ia Iehova na roto i tetai mataara oonu. I muri ake i te tatauanga ia Maseli 23:​15, 16, kua ui te vaa tuatua: “Ka akatikatika ainei toou nga mape iaku?” Kua na ko atu aia: “Te pure nei matou e kia pera te reira, i reira ka akatupu ei koe ia Iehova kia kite i te mareka anga oonu roa atu i roto roa iaia uaorai. Ka akakeu koe i tona manako ngakau oonu roa atu. Ae, ka akariro koe e kia akapaapaaia to te Atua nga mape ia koe e vai tiratiratu ra ki taau au tukuanga angaanga.”

Kua orongaia te tuatua openga o teia tuanga o te porokaramu e Mark Noumair, tei tavini ana ei mitinari i Kenya i mua ake ka riro mai ei ei tangata ikuiku Gileada. Ko te ingoa o tana tuatua “E Meitaki atu te Kiteanga a te Nga Mata” te akakite maata ra i te puapinga no te tatanuanga i te tu merengo. Kia rotai ki ta Koheleta 6:9, kua ako atu te Taeake ko Noumair: “E aro atu i te tu tikai. Koia oki te ‘kiteanga a te nga mata.’ I te mea e ka moemoea ua no runga i tetai apinga taau ka inangaro i te rave inara kare e te pera ra, e manako maata no runga i te akatupu maata anga i te ka rauka i toou turanga i teianei. Te nooanga i roto i tetai ao moemoea ua, ma te au tapapa anga tau kore, me kare te manako anga no runga i te au tumu papu kore o taau angaanga ka akariro ua ia koe kia mareka kore e kia merengo kore.” Ae, noatu teiea tatou me kare noatu te au turanga, te tatanuanga i te tu merengo akono atua i roto i to tatou uaorai au turanga te akatupu ra i te tu rekareka no te tavinianga i Tei Anga Mekameka ia tatou.

 Au Kiteanga Rekareka i Roto i te Angaanga Patireia e i Gileada

I muri mai i taua ako anga tau mei taua uriuri anga, kua akakite atu te aronga apiipii i etai au kiteanga tei rekarekaia e ratou koi piri atu ei ki roto i te angaanga orometua ki te ngai tangata i te tuatau o ta ratou apiianga e rima marama. I raro ake i te aratakianga a Wallace Liverance, e retita o te Apii Gileada, kua akakite te aronga karatuati e akapeea ratou i te tuku anga ia ratou uaorai ei au orometua no te Atua. (2 Korinetia 4:2) Kua rauka i etai ia ratou te akakeu i te akava ngakau orongaia mai e te Atua o etai. Te akaari maira te au kiteanga o te aronga apiipii e akapeea te au apii Pipiria i te akamata angaia ma te aronga ngakau tae ta ratou i aravei i runga i te mataara, i roto i te angaanga orometua mei tera are ki tera are, e i roto i tetai atu au akanoonooanga. I tetai au atianga tuke, kua tuatua te au tangata inangaro e tei roto te tuatua mou i te au puka akanooia ki runga i te Pipiria a te akaaerenga a Iehova. Kua ariu papu mai tetai tangata ngutuare ki tetai irava Pipiria. Te apii nei aia i teianei i te Pipiria ma te Au Kite o Iehova.

Aru mai, kua uiui atu a Joel Adams i te au karatuati Gileada mei te au mataiti i topa ra. Ko tana tumu tuatua koia oki “Auraka e Akamutu i te Apii Ua Atu, Auraka e Akamutu i te Tavini Ua Atu ia Iehova.” Kua tau te ako anga o taua uiui anga no te au mitinari ou. Te akamaaraanga no runga i tona au ra ei mema o te 26 pupu o Gileada, kua tuatua a Harry Johnson e: “Kua apii ia mai kia matou e te arataki ra a Iehova i tona iti tangata e ka arataki ua atu i tona iti tangata. Kua riro taua tu irinaki anga ei akamaroiroianga i te au mataiti i topa ra.” Kua ako atu a William Nonkes, e mema o te 53 pupu o Gileada, i te aronga karatuati: “Tei puapinga maata, e akamanako i te au kaveinga Pipiria, e kia taangaanga i te reira ma te au tukuanga taau ka tuku i roto i te oraanga i teianei e tuatau ua atu. Te ka tupu mai, ka rauka ia koe i te vai tamou ki taau tukuanga angaanga, e ka riro kia koe te akameitakianga apinganui o Iehova.”

“Akaketaketaia kia Rave Ua Atu i to Iehova Anoano” ko te tumu tuatua ia tei ikiia e Richard Rian no tana tuanga o te porokaramu. Ko tetai o te aronga tana i uiui koia oki ko John Kurtz, e karatuati o te 30 pupu, tei akapou e tere atu i te 41 mataiti i Paniora ei mitinari. I te ui angaia atu no runga i te papaanga apii Gileada, kua akakite te Taeake ko Kurtz: “Te puka maata ko te Pipiria. E oti kua rauka ia matou te au puka tauturu kia tauturu ia matou kia marama i te Pipiria. Te rauka nei teia ki te katoatoa. Kare e tuatua muna i orongaia i Gileada. Kare rava au e kore ana i te tuatua i teia no te mea ka rauka te reira ki te katoatoa te tuatua akakite te orongaia ra i Gileada.”

Kua taopenga te Taeake ko Gerrit Lösch, e mema o te Pupu Akaaere o te Au Kite o Iehova, i te porokaramu pae vaerua na te tuatuaanga no runga i te tumu tuatua “I Runga e i Raro i to Iehova Nga Peau.” Kua akamarama mai aia e akapeea ta te Atua paruru anga e te turuanga i tona au tavini tiratiratu i te akatutu angaia i roto i te Pipiria e te nga peau o te aeto. (Deuteronomi 32:​11, 12; Salamo 91:4) I tetai taime ka oora te aeto mamaata i to te reira nga peau no tetai au ora e raukai i te paruru i ta te reira punua. I tetai taime, penei ka akakoukou te ua aeto i to te reira peau takapini i tana punua kia paruru ia ratou mei te matangi anu. Na teia tu rai e kia rotai ma tana akakoroanga, ka rauka ia Iehova te tauturu atu i tona au tavini tiratiratu, koia tikai me aro atu ratou i te au timata anga i te pae vaerua. Kare a Iehova e tuku i tona au tavini kia timataia e tere roa atu i te ka rauka ia ratou i te akono inara te oronga maira i te arataa ki vao e raukai ia ratou i te akakoromaki i te reira. (1 Korinetia 10:13) Kua taopenga te Taeake ko Lösch na te tuatuaanga: “E vai ei kia paruruia i te pae vaerua, kia vai ua tatou i raro ake i te nga peau o Iehova. Teia te aiteanga auraka tatou e akatupu i te tu akatakake. Kia noo vaitata ua tatou kia Iehova e tana akaaerenga mei te metua vaine te tu, kare e ka akatakake ia tatou uaorai mei ta raua arataki anga e te ako anga aroa.”

Kua tatau te tiamana i te au terekarama e te au turouanga mei te aronga akameitaki takapini i te koropu. I reira kua aru mai te oronga anga o te au tiporoma. I te akanoo angaia te Apii Gileada, kua akanooia ma te manako e kia iti ua te numero o te pupu e tere atu i te rima mataiti. Inara no tetai 58 mataiti kua taangaanga te Atua ko Iehova i taua apii. Mei ta te Taeake ko Barber i tuatua i roto i tana tuatua akamataanga: “Mei teaa te meitaki o te rekoti tei akanooia e te aronga karatuati Gileada mei te 1943 mai, i te akamata angaia a Gileada! Kua tupu mai na roto i ta ratou au tautaanga taokotai i te kapiti anga e au anere ua atu au tauatini aronga akaaka o te enua ki ta Iehova akaaerenga kaka.” Ae, kua tauturu teia apii mitinari i te au mirioni kia rekareka ma te manakonakoanga o te Patireia.

[Pia i te kapi 24]

TE AU TU O TE PUPU

Numero o te au enua tei komonoia: 8

Numero o te au enua tei tukuia: 18

Numero o te aronga apiipii: 48

Au mataiti avereti: 34

Te mataiti avereti i roto i te tuatua mou: 18

Au mataiti avereti i roto i te angaanga tamou: 13

[Tutu i te kapi 25]

Te 110 Pupu Karatuatianga o te Apii Pipiria Punanga Tiaki o Gileada

I te papaanga i raro ake, kua numeroia te au pa mei mua ki muri, e kua papaia te au ingoa mei te kaui ki te katau i te pa takitai.

(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4)Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.