Kia Vai Maroiroi Rava i te Akara Anga i Tei Kore e Kitea!

“I maroiroi rava atura [Mose] i te akara anga atu iaia, i Tei kore e kitea kia akara ra.”​—EBERA 11:27.

1. Eaa te tuatua tau no te Atua ta Iesu i akakite i tana Tuatua i te Maunga ra?

KO IEHOVA te Atua kare e kitea. I ta Mose pati anga kia akara i tona kaka, kua pau atura Iehova: “Kare koe e tika kia akara i toku mata; kare rava oki tetai tangata e ora kia akara mai iaku.” (Exodo 33:20) E kua tata te apotetoro ko Ioane: “Kare ua e tangata i kite i te Atua.” (Ioane 1:18) Ia Iesu Karaiti e tangata i runga i te enua nei, kare katoa aia i akara i te Atua. Inara, i tana Tuatua i te Maunga ra, kua tuatua Iesu: “E ao to tei mā te ngakau: e kite oki ratou i te Atua.” (Mataio 5:8) Eaa te aiteanga o ta Iesu tuatua?

2. Eaa i kore ei e kitea e tatou te Atua ma to tatou nga mata kopapa nei?

² Kua akataka maira te au Tuatua Tapu ia Iehova ei Vaerua akara koreia. (Ioane 4:24; Kolosa 1:15; 1 Timoteo 1:17) No reira, kare a Iesu i tuatua e ka akara tikai tatou tangata nei ia Iehova ma to tatou nga mata kopapa nei. E tika, ka kite  te au Kerititiano akatainuia ra i te Atua ko Iehova i te rangi a muri ake i to ratou akatuakaou anga ei au mea ora vaerua. Inara ko te au tangata tei “mā te ngakau” e tei ia ratou te manakonako anga no te oraanga mutu kore ki runga i te enua nei ka rauka katoa kia “kite” i te Atua. Akapeea e raukai teia?

3. Akapeea te au tangata e kite ei i etai o to te Atua ra au tu?

³ Ka kite tatou i tetai apinga no Iehova na te akara matariki anga i te au mea tana i anga maira. Penei ka manako tatou i tona mana e ka akakeuia kia akatika iaia ei te Atua Tei Anga maira. (Ebera 11:3; Apokalupo 4:11) I roto i teianei tu, kua tata te apotetoro ko Paulo: “Te au mea oki [no te Atua] tei kore e tau kia akara ra, tei kite puia nei ïa, i te au mea katoa i angaia nei, mei te maani anga mai i teianei ao; koia oki, tona ra mana mutu kore anga, e te Atua anga.” (Roma 1:20) No reira ko ta Iesu au tuatua no te akaraanga i te Atua te kapiti ra i te rauka anga te kite ngakau i etai au tu o Iehova ra. Kua akatumuia taua kiteanga ra ki runga i te kite tika e kua kite puia ia i te pae vaerua ma ‘te mata o te ngakau ra.’ (Ephesia 1:18) Te au tuatua e te au angaanga a Iesu kua akakite maata katoa mai i to te Atua ra tu. No reira kua tuatua Iesu: “Ko te akara mai iaku nei, kua akara ïa i te Metua.” (Ioane 14:9) Kua akaata apa kore maira Iesu i to Iehova ra tu. No reira, ko te kite i to Iesu ra oraanga e tana au apiianga ka rauka kia tauturu ia tatou kia kite, me kare kia kite pu, i etai o to te Atua ra au tu.

E Puapinga Maata te Kite Pae Vaerua

4. Akapeea te ngere anga i te pae vaerua i te akakite angaia e te aronga e manganui i teia tuatau nei?

⁴ I teia tuatau, e meangiti tikai te akarongo e te kite pae vaerua mou. “Kare oki i ope katoatoa te tangata i te akarongo,” ta Paulo i tuatua. (2 Tesalonia 3:2) Kua rave takiri te aronga e manganui i ta ratou uaorai kimikimi anga e kare e akarongo i te Atua ra. To ratou tu akono ara e te ngere i te pae kite vaerua te arai ra ia ratou i te kiteanga iaia ma to ratou mata no te kiteanga, no te mea kua tata te apotetoro ko Ioane: “Ko tei rave i te kino ra, kare ïa i kite i te Atua.” (3 Ioane 11) No te mea kare taua aronga ra e kite i te Atua ma to ratou mata kopapa, ka akono ratou mei te mea rai e kare aia e kite mai eaa ta ratou e rave ra. (Ezekiela 9:9) Te aviri ra ratou i te au apinga pae vaerua, no reira kare e rauka ia ratou “te kite i te Atua.” (Maseli 2:5) E tau tikai, i reira, kua tata Paulo: “Kare ra te tangata e akono i ta te kopapa nei e āriki mai i ta te Vaerua e te Atua ra: e mea neneva ïa iaia: kare oki aia e kite i te reira, no te mea, i kimiia te reira e te vaerua.”​—1 Korinetia 2:14.

5. Eaa te tika te matakiteia ra e te au tangata manako tau i te pae vaerua?

⁵ Inara, me e manako apinga pae vaerua to tatou, ka matakite tamou tatou e noatu kare a Iehova i tetai Atua kimi ua i te tarevake, te kite ra aia me akono tatou i te au manako e te au anoano kikino. E tika, “tei mua oki i te mata o Iehova to te tangata nei aerenga, e te akamaaraara ra aia i tona katoa ra au aerenga.” (Maseli 5:21) Me ka autu mai te ara ki runga ia tatou, ka akakeuia tatou kia tataraara e kia kimi i ta Iehova ra akakoreanga ara no te mea te inangaro ra tatou iaia e kare tatou e anoano kia mamae tona ngakau.​—Salamo 78:41; 130:3.

Eaa te Akariro ra ia Tatou kia Maroiroi Rava

6. Eaa te aiteanga e kia vai maroiroi ua atu?

⁶ Noatu rai e akara koreia a Iehova e to tatou nga mata, kia maaraara tatou e te akara maira aia ia tatou. Te matakite anga i tona vai maianga e te irinaki anga e te vaitata maira aia ki te aronga katoa e kapiki ra kiaia ka tauturu mai kia maroiroi rava tatou​—kia ngaueue kore e kia kore e tarurike i to tatou tiratiratu anga kiaia. (Salamo 145:18) Ka rauka kia aite atu tatou kia Mose, nona ta Paulo i tata: “No te akarongo i akaruke ei aia ia Aiphiti, kare i mataku i te riri o te ariki ra: i maroiroi rava atura aia i te akara anga atu iaia, i tei kore e kitea kia akara ra.”​—Ebera 11:27.

7, 8. Na teaa i akamaroiroi ia Mose kia kore e mataku ki mua ia Pharao?

⁷ I te raveanga i tana angaanga orongaia mai e te Atua ra kia arataki atu i to Iseraela ki vao i te tuikaa i Aiphiti ra, e putuputu a Mose i te mama atu ki mua ia Pharao takinga kino ra i roto i tetai akavaanga ariki ma te aronga apinganui o te akonoanga e te vaeau oki. Penei kua tamouia mai te au itoro ki runga i te au paruru o te are ariki ra. Inara ko Iehova noatu te akara koreia ra, e tika tikai aia kia Mose, kare mei te au itoro tei  akatutu maira i te au atua ora kore o Aiphiti ra. No reira rai kare a Mose i mataku ia Pharao!

⁸ Na teaa i oronga atu kia Mose i te mataku kore kia tu putuputu atu ki mua ia Pharao ra? Te akakite maira te au Tuatua Tapu kia tatou e “e maru maata to taua tangata ra to Mose, i to te tangata ravarai o te ao katoa nei.” (Numero 12:3) Te taka meitaki ra, ko tona maroiroi pae vaerua e te irinaki anga oki e tei te pae te Atua iaia ra kua oronga atu kia Mose i te ririnui tei anoanoia ra kia tu atu aia no ‘Tei kore ra e kitea kia akara atu’ ki mua i te ariki takinga kino o Aiphiti ra. Na roto i teea au tu te aronga te “kite” ra i te Atua kite koreia ra kia akara, i te akakite anga i to ratou akarongo anga iaia i teianei tuatau?

9. Eaa tetai aerenga e raukai ia tatou kia maroiroi ua atu?

⁹ Ko tetai raveanga kia akakite i te akarongo e kia maroiroi rava atu i te kiteanga i Tei kore e kitea kia akara na te tutuanga mataku kore noatu te takinga kinoanga. Kua akamatakite a Iesu i tana au pipi: “E ka makitakitaia mai kotou e te tangata ravarai i toku nei ingoa.” (Luka 21:17) Kua tuatua katoa aia kia ratou: “Kare te tavini i maata i tona pu. I takinga-kino ana ratou iaku ra, e takinga-kino katoa ratou ia kotou.” (Ioane 15:20) Tau tikai ki ta Iesu au tuatua, i muri poto ake i tona matenga, kua mamae tana au pipi i te takinga kinoanga na roto i te tu akakoko anga, te au tapekaanga, e te au papaanga. (Angaanga 4:​1-4, 18-21; 5:​17, 18, 40) Noatu rai e ngaru takinga kinoanga tetai, kua rave ua atu te au apotetoro a Iesu e etai atu au pipi i te tutuanga i te evangeria ma te mataku kore.​—Angaanga 4:​29-31.

10. Akapeea to tatou irinaki anga i ta Iehova ra paruru anga i te tauturu anga ia tatou i te angaanga orometua?

¹⁰ Mei ia Mose rai, kare ta Iesu au pipi mua ra i mataku i to ratou au enemi e manganui tei akaraia atura. E akarongo to te au pipi a Iesu ra i te Atua, e ei tupu anga, kua rauka ia ratou te akakoromaki i te takinga kino pakari tei tupu ra kia ratou. Ae, kua rave ua atura ratou i te maroiroi rava atu i te akaraanga i Tei kore ra e kitea kia akara. I teia tuatau, na tetai matakite tamou marie no Iehova ra i paruru ia tatou kia kore e mataku, i te orongaanga mai i te maroiroi kia tatou e te mataku kore i ta tatou angaanga tutuanga Patireia. Te tuatua ra te Tuatua a te Atua e: “E rokoia e te ii tei mataku i te tangata ra: ko tei irinaki ia Iehova ra, e ora ïa.” (Maseli 29:25) No reira, kare tatou e unui ki muri i te mataku i te takinga kino; kare katoa tatou e akama i ta tatou angaanga orometua. Na to tatou akarongo e akakeu ia tatou kia akakitekite mataku kore ki te au tangata tupu, te au oa angaanga, te au oa apii, e etai atu oki.​—Roma 1:​14-16.

Te Arataki ra Tei Akara Koreia i Tona Au Tangata

11. Kia tau ki ta Petero raua ko Iuda, akapeea tetai papaki tei taokotai atura ma te putuputuanga Kerititiano ra i te akakite anga i tetai ngere anga i te pae vaerua?

¹¹ Te tauturu ra te akarongo ia tatou kia kite ia Iehova e ko tei arataki ra i tana akaaerenga i te enua nei. No reira ka kopae ke tatou i tetai tu manako kino ki te aronga te rave ra i te apainga i roto i te putuputuanga. Kua akamatakite te apotetoro ko Petero raua ko te apa taeake o Iesu koia Iuda no etai aronga tei ngere ra i te pae vaerua e kua tuatua akakino i te au tangata tei arataki ra i roto i te au Kerititiano. (2 Petero 2:​9-12; Iuda 8) Ka tuatua ainei taua aronga apa ra na roto i taua tu ra i mua tikai i te aroaro o Iehova naringa e kopapa akaraia atu tona e ratou ra? Kare rava ia! Inara no te mea e akara koreia a Iehova, kare taua au tangata kopapa ra i akamanako tau atu i to ratou kauraro anga kiaia ra.

12. Eaa te tu akono tau ta tatou ka akakite ki te aronga te rave ra i te arataki anga i te putuputuanga?

¹² E tika, kua akapapaia mai te putuputuanga Kerititiano ra i te au tangata apa ua nei. Ka rave tarevake te aronga e tavini ra ei aronga pakari e i etai taime penei ka akamamae mai ia koe uaorai. Inara, te taangaanga ra a Iehova i taua au tangata ra ei au tiaki no tana anana. (1 Petero 5:​1, 2) Te au tangata e te au vaine manako tau ra i te pae vaerua te kite ra e ko teia tetai aerenga te arataki ra a Iehova i tona au tangata. No reira, ei au Kerititiano, ka kopae ke tatou i tetai vaerua akaapaanga kino, e ka akaari tatou i te akangateitei anga no ta te Atua ra akanoonoo anga ei arataki i tona au tangata. Na te kauraro anga ki te aronga te rave ra i te arataki anga i roto ia tatou, te akaari ra tatou e te kite ra tatou i Tei kore e kitea ra.​—Ebera 13:17.

 Akaraanga i te Atua e ko to Tatou Pu Ikuiku Maata Rava Atu

13, 14. Eaa te aiteanga kia koe no te kiteanga ia Iehova ei Pu Ikuiku Maata Rava Atu?

¹³ Te vaira tetai atu ngai te umuumuia ra te manako kite i te pae vaerua. Kua totou a Isaia: “E kite ra to kotou mata i to kotou Pu Ikuiku Maata Rava Atu.” (Isaia 30: 20, akaaite ia NW) Na te akarongo e kite ei e ko Iehova te apii maira ia tatou na roto i tana akaaerenga i te enua nei. (Mataio 24:​45-47) Te aite anga o te kiteanga i te Atua e ko to tatou Pu Ikuiku Maata Rava Atu, e tere atu i te tamouanga i tetai ravenga meitaki i te apii Pipiria e te aereanga putuputu oki ki te au uipaanga Kerititiano. Tona aiteanga ko te raveanga ki katoa i te au meitaki no te au mea orongaia mai e te Atua ra i te pae vaerua. Ei akatauanga, ka tau tatou kia akamanako maata atu ki te arataki anga ta Iehova e oronga maira na roto ia Iesu kia kore tatou e panu ke atu i te pae vaerua ra.​—Ebera 2:1.

¹⁴ I etai taime ka anoanoia te tauta anga taka ke kia raukai te puapinga ki katoa mei te kaikai vaerua maira. Ei akatauanga, penei ka na runga ua tatou i etai tataanga Pipiria ta tatou i kite ra e ngata kia kite maramaia. Te tatauanga i te au makatini Punanga Tiaki e te Awake! penei ka akaruke ua tatou i etai atikara no te mea kare etai tumu tuatua e reka ana kia tatou. Me kare penei ka tuku ua tatou i to tatou manako kia aere ke atu i te au uipaanga Kerititiano ra. Inara, ka rauka kia vai matakite tatou me ka manako marie tatou ki runga i te au tumu te akamanakoia ra. Na to tatou ariki oonu anga i te apiianga pae vaerua e rauka maira ia tatou te akaari ra e te kite ra tatou e ko Iehova to tatou Pu Ikuiku Maata Rava Atu.

Ka Tika Tatou kia Akakite i Tetai Apainga

15. Akapeea ta tetai papaki rave anga mei te mea ra e te kitea koreia ra ratou e Iehova?

¹⁵ No te maata oki o te rave kino i teia “tuatau o te openga nei,” kua riro te akarongo i Tei kore e rauka kia akaraia ei mea puapinga maata. (Daniela 12:4) Te tiratiratu kore e te ainga tau kore te totoa maata nei. Inara, e mea pakari kia maara e te akara maira Iehova i ta tatou au angaanga noatu e me kare te au tangata e kite mai ia tatou. Kua ngaro ra i tetai papaki te matakite i teianei tika. Me kare etai e kite atu ia ratou, penei ka rave ratou i te tu akono tau kore i te tuatua tapu  ra. Ei akatauanga, kare tetai papaki e arai atu i te timata anga kia akara i te tamataora anga kino e te pornography i runga i te Internet, te tivi, e etai atu au tu apinga ou. I te mea ko te raveanga i taua au mea ra ka rauka kia raveia i roto i te ngai ngaro, kua rave tetai papaki mei te mea rai e kare ta ratou akono anga e kitea mai e Iehova.

16. Eaa te ka tau kia tauturu ia tatou kia akono i te au turanga teitei a Iehova?

¹⁶ E mea meitaki kia akamanako i te au tuatua a te apotetoro ko Paulo: “E teianei, ka ope takiri rava tatou i te aaki i te tuatua iaia uaorai i te Atua ra.” (Roma 14:12) Ka tau tatou kia matakite e i te au taime ravarai e arai tatou, te ara ra tatou kia Iehova. Na te kiteanga i teia ka tau kia tauturu ia tatou kia akono i tana au turanga teitei e kia kopae ke atu i te tu akono viivii. Te akamaara maira te Pipiria kia tatou: “Kare rava e mea ngaro iaia: te vai ua nei ra te au mea katoa ma te maeu rava ki mua i tona mata, tei iaia te tuatua ia tatou nei.” (Ebera 4:13) E tika, ka tika tatou kia akakite i tetai apainga ki te Atua, inara e mea tika ko to tatou aroa oonu no Iehova ko te reira te tumu maata no tatou kia rave i tona anoano e kia mou oki i tana au turanga tuatua tika. No reira e rave tatou i te ikianga i taua au tumu mei ta tatou ikianga tamataoraanga e to tatou tu akono ma te aronga tuke ra ia tatou me e tane e me e vaine.

17. Eaa te tu manako ta Iehova e akara maira ia tatou?

¹⁷ Te manako maata maira Iehova ia tatou, inara kare te aite anga o te reira e te tapapa maira aia no tatou kia rave i te au tarevake e kia raukai iaia te akautunga ia tatou. Mari ra, te akara maira aia ia tatou ma te manako aroa, mei tetai metua te anoano ra kia tutaki i tana au tamariki akarongo. Mei teaa ra te akapumaana anga o te reira kia kite e te mareka maira to tatou Metua i te rangi i to tatou akarongo e koia “tei tutaki mai i te aronga i kimi tikai iaia”! (Ebera 11:6) Kia akono takiri tatou i te akarongo ia Iehova e ‘tavini atu iaia ma te ngakau katoa ra.’​—1 Paraleipomeno 28:9.

18. No te mea te akara maira Iehova ia tatou e te kite ra i to tatou tu tiratiratu, eaa te akapapu anga te rauka ra ia tatou mei te au Tuatua Tapu?

¹⁸ Te tuatua ra Maseli 15:3: “Tei te au ngai katoa nei to Iehova mata, i te akara anga i te kino e te meitaki.” Ae, te akara ra te Atua i te aronga rave kino e te akono atura ia ratou kia tau ki to ratou tu akono. Inara, me tei roto tatou i tei “meitaki,” ka papu ia tatou e ka akara mai a Iehova i ta tatou au angaanga tiratiratu. Mei teaa ra te akamaroiroianga akarongo o te reira kia kite ‘tatou e kare i te mea puapinga kore te angaanga a te Atu’ e koia tei kore ra e kitea ‘ka akangaro atu ei i ta tatou angaanga i rave, e to tatou anoano, i tona ingoa’!​—1 Korinetia 15:58; Ebera 6:10.

Patianga ia Iehova kia Akara Matatio ia Tatou

19. Eaa etai au puapinga te rauka maira mei te akarongo anga maroiroi ia Iehova ra?

¹⁹ Ei au tavini tiratiratu no Iehova, e okomaata tatou kiaia. (Mataio 10:​29-31) Noatu rai e kare aia e kitea kia akaraia, e tika tikai aia kia tatou, e ka rauka kia akaperepere tatou i to tatou pirianga okomaata kiaia ra. No taua tu manako ra ki to tatou Metua i te rangi ra ka apai mai i te au puapinga e manganui. Ka tauturu mai to tatou akarongo maroiroi ia tatou kia rauka tetai ngakau ma e te akava ngakau meitaki ki mua ia Iehova. Te akarongo kare ra e pikikaa te arai katoa ra ia tatou mei te akonoanga i tetai oraanga takirua. (1 Timoteo 1:​5, 18, 19) To tatou akarongo ngaueue kore i te Atua te akanoo maira i te akatauanga meitaki e ka rauka oki tetai tupu anga meitaki ki te aronga takapini ia tatou. (1 Timoteo 4:12) Pera katoa oki, ka akakeu taua akarongo ra i tetai tu akono tau i te Atua ra, i te akariroanga kia rekareka te ngakau o Iehova.​—Maseli 27:11.

20, 21. (a) Eaa ra i inangaroiai kia akara mai to Iehova ra mata ki runga ia tatou nei? (e) Akapeea tatou i te akapiri anga mai ia Salamo 139:​23, 24 kia tatou uaorai?

 ²⁰ Me e pakari tikai tatou, ka mataora tatou kia akara mai a Iehova ia tatou. Kare tatou e anoano anake kia kite mai aia ia tatou mari ra te inangaro katoa ra tatou kia rave aia i tetai akara matatio anga i to tatou au manako e te au angaanga oki. I te pure, ka meitaki tatou kia pati ia Iehova kia kimi i roto ia tatou e kia akara me e au manako tika kore tetai. Ka rauka tikai iaia te tauturu ia tatou kia akono i to tatou au manamanata e kia rave i te au akatikatika anga te anoanoia ra. E tau tikai, kua imene te tata taramo ko Davida: “E unuunumou mai koe iaku, e te Atua, kia kite oki koe i toku ngakau; e timata mai iaku, e kia kite koe i toku manako: E akara mai i te aerenga kino e vai nei i roto iaku nei, e e arataki koe iaku i te arataa e tika i te vai marie anga te meitaki ra.”​—Salamo 139: 23, 24.

²¹ Kua pati akatenga a Davida e kia kimi a Iehova i roto iaia, me e “aerenga kino” tetai. Mei te tata taramo rai, kare ainei tatou e anoano no te Atua kia kimi i to tatou ngakau e kia akara me e au manako tika kore to tatou? Na roto i te akarongo, i reira, e pati tatou ia Iehova kia akara matatio ia tatou. Inara ka akapeea me te taitaia ra tatou i tetai tarevake me kare e apinga tamamae tetai tei roto ia tatou? I reira e pure akatenga ua atu tatou ki to tatou Atua aroa, kia Iehova, e ka kauraro akaaka ua atu ei ki te aratakianga a tona vaerua tapu e te akoanga a tana Tuatua. Ka rauka ia tatou te irinaki anga e ka aere mai aia e tauturu ia tatou e ka tauturu oki ia tatou kia aruaru i tetai aerenga te ka taki atu ki te ora mutu kore.​—Salamo 40:​11-13.

22. Eaa te tamanako anga tau no tatou no runga i Tei kore e kitea?

²² Ae, ka akameitaki a Iehova ia tatou ma te oraanga mutu kore me ka akono tatou i tana au umuumuanga. Inara, ka tika tatou kia akatika i tona ririnui e te mana, mei ta te apotetoro ko Paulo i rave ra i tana tata anga: “E teianei, ei te Ariki au mutu kore, te mate kore, e te kitea kore kia akara ra, ei te Atua pakari okotai kare atu, ei iaia te teitei, e te kakā, e tuatatau ua atu. Amene.” (1 Timoteo 1:17) Kia akakite tamou marie tatou i taua manako ngakau akatapu no Iehova. E noatu eaa te ka tupu, auraka tatou e ngaueue i ta tatou tamanako anga kia vai maroiroi rava atu i te akara anga i Tei kore e kiteaia.

Akapeea Koe me Pau?

• Akapeea e raukai kia kite te au tangata i te Atua?

• Me e tika tikai a Iehova kia tatou, eaa ta tatou ka rave me takinga kinoia mai tatou?

• Eaa te aiteanga e kia kite ia Iehova e ko to tatou Pu Ikuiku Maata Rava Atu?

• Eaa tatou ka tau ei kia inangaro e kia akara matatio mai a Iehova ia tatou nei?

[Au Uianga Apii]

[Tutu i te kapi 18]

A Mose, kare i mataku ia Pharao, kua akono mei te mea e kua akara aia ia Iehova, te Atua akara koreia

[Tutu i te kapi 21]

Auraka tatou e rave mei te mea e kare a Iehova e kite mai i ta tatou e rave ra

[Tutu i te kapi 23]

Te kimi ngakau tae ra tatou i te kite i te Atua no te mea te kite ra tatou iaia e ko to tatou Pu Ikuiku Maata Rava Atu