Te Au Hasmonaean e ta Ratou Koreromotu

IA IESU i te enua nei, kua akatakakeia te akonoanga Iuda ki roto i te au pupu, pouroa te aruaru ra no te akamana ki rungao i te au tangata. Ko te reira te tutu tei akakiteia mai i roto i te au tataanga Evangeria e pera katoa i roto i te au tataanga a te tangata tuatua enua ngati Iuda o te anere mataiti mua ko Josephus.

Kua mama mai te au Pharisea e te au Sadukea ei au reo puapinga, te rauka ra te akaaere i te au manako o te tangata e tae atu i te patoi anga ia Iesu e ko te Mesia. (Mataio 15:​1, 2; 16:1; Ioane 11:​47, 48; 12:​42, 43) Inara, kare e taiku anga o teia nga pupu rongoia i roto i te au Tuatua Tapu Epera.

Kua taiku mua a Josephus i te au Sadukea e te au Pharisea i roto i te akanoonoo anga o te rua anere mataiti M.T.N. I taua tuatau te tuku au ra te au ngati Iuda e manganui ki te akonoanga Ereni, koia oki, te peu e te kimianga kite Ereni. Kua taeria te take o te maro anga i rotopu i te akonoanga Ereni e te akonoanga Iuda i te takino anga te au tutara Seleucid i te iero i Ierusalema, te akatapuanga i te reira kia Dia. Kua taki atu tetai arataki ngati Iuda maroiroi, ko Judah Maccabee, mei te pamiri rongonui te au Hasmonaean, i tetai vaeau meameaau tei akamatara mai i te iero mei te nga rima o te Ereni. *

Te au mataiti tei aru mai o te orureau anga e te autu anga a te Maccabee kua akatakaia e te anoano anga kia akanoo i te au tu pupu akatumuia ki runga i te au manako patoi, te taemoemo anga tetai ki tetai e re ei ki rungao i te katoa anga o te ngai tangata ngati Iuda. Inara eaa teia tu i tupu mai ei? Eaa ra te akonoanga Iuda i mavete ei? E pau ei, ka akara meitaki ana tatou i te tuatua enua o te au Hasmonaean.

Maata Mai te Takake Anga e te Taokotai Kore

I muri mai i te raukaanga te akakoroanga akonoanga no te akanoo anga i te akamori i te iero o Iehova, kua riro mai a Judah Maccabee ei tangata poritiki. Tei tupu mai, kua akamutu te au ngati Iuda e manganui i te aru atu iaia. Noatu rai, kua rave tamou ua atu aia i tana tamaki anga i te au tutara Seleucid, kua akanoo i tetai koreromotu ma to Roma, e kua kimi i te akanoo i tetai Au-Enua ngati Iuda akatakake. Aru mai i to Judah matenga i roto i te tamaki, kua rave ua atu tona teina ko Jonathan e tona tuakana ko Simon i te maro anga. I te akamataanga kua patoi te au tutara Seleucid i te tu maroiroi o te au Maccabee. Inara i muri akera, kua akatika te au tutara e kia akanoonoo i te au tuke anga i te pae poritiki, te akatikaanga i te au taeake Hasmonaean e kia akaaere uaorai i tetai.

Noatu e no roto mai i te uanga taunga, kare etai Hasmonaean i akono ana i te turanga ei taunga maata. E manganui te au ngati Iuda te manako ra e kia akonoia teia turanga e te au taunga o te uanga o Zadoka, ta Solomona i akataoonga  ra ei taunga maata. (1 Ariki 2:35; Ezekiela 43:19) Kua taangaanga a Jonathan i te tamaki e te kite i te raverave apinga no te akakeu i te au Seleucid kia akataoonga iaia ei taunga maata. Inara i muri ake i to Jonathan matenga, kua maata atu tei rauka i tona tuakana ko Simon. Ia Tepetema 140 M.T.N., kua tukunaia tetai akauenga puapinga i Ierusalema, tei akonoia ki runga i te au papa toka bronze i roto te tu Ereni: “Kua akatika te Ariki ko Demetrius [te tutara Seleucid Ereni] iaia [ia Simon] ei taunga maata, kua akariro iaia e ko tetai o tona au Oa, e kua tutaki i te au ingoa meitaki kiaia. . . . Kua akatika te au ngati Iuda e to ratou au taunga e kia tau a Simon ei arataki e ei taunga maata no ratou e tuatau ua atu, e tae ua atu e kia tu mai tetai peroveta irinakiia.”​—1 Maccabee 14:​38-41 (e puka tuatua enua ka kiteaia i roto i te Puka Ekoko).

To Simon turanga ei arataki e pera katoa ei taunga maata​—nona e tona uanga​—kua akatikaia kare anake e te au mana akaaere Seleucid takake e pera katoa “te Urupu Maata” o tona iti tangata. Kua akairo teia i tetai taui anga puapinga. Mei ta te tangata tuatua enua ko Emil Schürer i taiku ra, me akanooia tetai pupu poritiki e te au Hasmonaean, “ko to ratou manako maata kare e kia akatupu i te Torah [te Ture ngati Iuda] mari ra ko te akonoanga e te akatotoa anga i to ratou mana poritiki.” Inara, kua matakite e kia kore e akakino i te tu paruparu o te ngati Iuda, kua taangaanga a Simon i te taoonga, “ethnarch,” me kare “arataki o te tangata,” kare i te “ariki.”

Kare te katoatoa i mareka ana no runga i te mou anga te Hasmonaean i te akatere anga pae akonoanga e te poritiki. I na tetai au tangata kite ei e manganui, i roto i teia tuatau i akanooiai te ngai tangata Qumran. Tetai taunga o te uanga o Zadoka, kua irinakiia e koia tei taikuia i roto i te au tataanga Qumran e ko “te Puapii Tuatua Tika,” kua akaruke ia Ierusalema e kua taki atu i tetai pupu patoi ki roto i te Metepara Iudea i te pae i te Tai Mate. Kua akaapa tetai o te au Pokaikai Tuatua Tai Mate, e tuatua no runga i te puka o Habakuka, “i te Taunga Kino tei tapaia ma te ingoa tuatua mou i te akamataanga, inara i te tutara anga aia ki rungao i to Iseraela kua tupu mai te ngakau parau i roto iaia.” E manganui te aronga kite te irinaki ra e kua tau kia Jonathan me kare kia Simon taua akatakaanga a te pupu o te “Taunga Kino” e tutara ra.

Kua rave ua atu a Simon i te au oroanga vaeau kia akatotoa i te au ngai i raro ake i tana akaaere anga. Inara, kua ope viviki tana tutara anga i te tamate anga tana unonga, ko Ptolemy, iaia e pera katoa i tana nga tamaiti e rua koi umu kai ei ratou vaitata ia Ieriko. Kua poka teia tauta anga e kia rauka te akaaere anga. Kua akamatakiteia a John Hyrcanus, ta Simon tamaiti i vai mai, no runga i te tautaanga i te tamate atu iaia. Kua opu atu aia i te ka tamate atu iaia e kua rave atu i te arataki anga e te taoonga taunga maata i te mono anga i tona papa.

Tetai atu Akatotoa Anga e te Takinokino Anga

I te akamata anga, kua aro atu a John Hyrcanus i te au tamataku anga kino mei te vaeau maroiroi o Suria, inara i te 129 M.T.N., kua ruti atu te tutara anga Seleucid i tetai tamaki anga puapinga ma te au Paretia. No runga i te tupu anga o teia tamaki i te au Seleucid, kua tata te tangata kite ngati Iuda ko Menahem Stern e: “Kua topa te katoa anga o te akapapa anga o te patireia.” Kua rauka ia Hyrcanus i reira te “rave akaou ma te ki katoa i te akaaere anga poritiki i Iudea e kia akamata i te akatotoa atu ki te au ngai tukeke.” E kua rave atu aia i te akatotoa anga.

I teianei kare i tamanataia e to Suria, kua akamata a Hyrcanus no te tomo atu ki roto i tetai au ngai i vao ake ia Iudea, te akariroanga ia ratou i raro ake i tana tutara anga. Kua taui atu te aronga i reira ki te akonoanga ngati Iuda me kare ra ka takoreia to ratou oire. Ko tetai o taua oroanga koia oki ko te patoi anga i te au Idumaea (Edoma). No teia, kua tuatua a Stern: “Te taui anga i te au Idumaean ko te mea mua ia o taua tu, i te mea e ko te katoa anga o te katiri tangata tei taui kare e ko te au tangata tataki tai.” Ko tetai atu ngai tei autuia ko Samaria, i reira kua takore atu a Hyrcanus i te iero o Samaria i runga i te Maunga Gerazima. Te tuatua anga no runga i te tu meamea ua o teia koreromotu no te maroanga kia taui ki te tutara anga Hasmonaean, kua tata te tangata tuatua enua ko Solomon Grayzel e: “Teia oki te utaro a Mattathias [te papa o Judah Maccabee] te aati nei i te kaveinga tikai​—te rangatira akonoanga​—tei paruru meitakiia e te uki i mua ana.”

 Tu Mai te Au Pharisea e te Au Sadukea

I te tataanga no runga i te tutara anga o Hyrcranus kua taiku mua a Josephus no runga i te akakeu anga maata a te au Pharisea e te au Sadukea. (Kua taiku a Josephus no runga i te au Pharisea tei ora i te tuatau i tutara ei a Jonathan.) Kare aia i akakite mai no runga i to ratou akamata anga. Kua manako etai aronga kite ia ratou ei pupu no roto mai i te Hasidim, e pupu akonoanga tau ua tei turu ia Judah Maccabee i roto i tana au akakoroanga akonoanga inara kua akaruke iaia i te uri anga aia ki te poritiki.

Te ingoa Pharisea te piri atura ki te tuatua aka Epera te aiteanga te “aronga akatakake,” noatu rai te manako ra etai e te piri atura te reira ki te tuatua “aronga uri.” E aronga kite te au Pharisea mei te au tangata noa ua, kare e mei tetai uanga takake. Kua akatakake ratou ia ratou uaorai mei te peu tau kore na roto i te kimianga kite akono ua e te takake, te taangaanga anga i te au ture iero no te tapu tikai o te taunga ki te au turanga noa ua o te oraanga i te au ra ravarai. Kua akapapa te au Pharisea i tetai tu uri anga ou i te au Tuatua Tapu e te apiianga tei kiteia mai i muri mai e ko te ture tuatuaia. I te tuatau i tutara ei a Simon kua rauka ia ratou te akakeu anga maata i te akataoonga angaia tetai ia ratou ki roto i te Gerousia (e konitara no te aronga pakari), tei kiteia mai i muri mai e ko te Sunederi.

Kua akakite mai a Josephus e i te akamata anga e tangata apiipii e e tangata turu a John Hyrcanus i te au Pharisea. Inara, i tae anga ki tetai take, kua ako atu te au Pharisea iaia no te kore i tuku au ua i te taoonga taunga maata. Kua taki atu teia ki tetai taui anga maata. Kua tureia e Hyrcanus te au raveanga akonoanga a te au Pharisea. E tetai utunga, kua kapiti atu aia ki te pupu akonoanga patoi i te au Pharisea, ko te au Sadukea.

Te ingoa Sadukea penei te piri atura ki te Taunga Maata ko Zadoka, ko tona uanga kua akono i te taoonga taunga mei te tuatau mai ia Solomona. Inara, kare te katoa anga o te au Sadukea e no roto mai i teia uanga. I na Josephus ei, e aronga ngateitei e te puapinga te au Sadukea o te pa enua, e kare i rauka ia ratou te turuanga a te katoa anga o te tangata. Kua tuatua te Poropeta ko Schiffman e: “Te maata anga ia ratou . . . i te akaraanga e au taunga me kare e aronga tei akaipoipo i roto i te au pamiri o te taunga maata.” Kua roa i reira e kua piri atu ratou ki te aronga mana akaaere. No reira, te angaanga maata a te au Pharisea i te ngai papuriki e te apiianga a te Pharisea no te akatotoa anga i te tu tapu tikai mei te taunga rai ki te tangata ravarai kua manakoia ei tamataku anga te ka akakino i te mana akaaere tau ua o te Sadukea. I teianei, i roto i te au mataiti openga o te tutara anga o Hyrcanus, kua rauka akaou te mana akaaere anga i te au Sadukea.

Maata Atu te Au Poritiki, e Iti ua te Tu Tapu Tikai

Kua tutara ua te mataiapo a Hyrcanus, ko Aristobulus, e okotai mataiti i mua ake ka mate atu ei. Kua rave tamou ua atu aia i te koreromotu taui maroia ma te au Iturea e akariro atu i te tuanga i runga o Galilea i raro ake i te tutara anga a te Hasmonaean. Inara i raro ake i te tutara anga a tona teina ko Alexander Jannaeus, tei tutara mei te 103-76 M.T.N., e kua taeria e te tutara anga Hasmonaean te take o tona mana akaaere.

 Kua kopae atu a Alexander Jannaeus i te au koreromotu i mua atu e kua puareinga ua no te akataka iaia uaorai ei taunga maata e ei ariki. Kua pakari mai te au maro anga i rotopu i te au Hasmonaean e te au Pharisea, e kua taki atu ki tetai tamaki a te tangata i roto i te reira kua mate atu e 50,000 ngati Iuda. I muri mai i te akamaru angaia te meameaau, ei ravenga akamaara anga i te au ariki peikani, kua patiaia e Jannaeus e 800 aronga akarongo kore. I roto i to ratou turanga matenga, kua tamateia ta ratou au vaine e te tamariki i mua i to ratou nga mata, koi kaikai ei a Jannaeus i te ngai atea ma tana au vaine raverave. *

Noatu tona tu riri i te au Pharisea, e tangata poritiki tau ua a Jannaeus. Kua kite atu aia e kua rauka te turu anga matauia e te au Pharisea. Ko tana ako anga i mua ake ka mate ei aia ki tana vaine, ko Salome Alexandra, koia oki kia kapiti i te mana tutara anga ma ratou. Kua iki a Jannaeus iaia ki rungao i tana au tamariki tamaroa ei mono i tona patireia. Kua akapapu aia iaia ei tutara tau, te orongaanga ki te pa enua i tetai tuatau au tikai i raro ake i te tutara anga Hasmonaean (76-67 M.T.N.). Kua akanooia te au Pharisea ki te au turanga akaaere, e kua akakoreia te au ture no te patoi anga i ta ratou au akamori anga.

I te matenga a Salome, kua maro atu tana tamaiti ko Hyrcanus II, tei riro mai ei taunga maata, e Aristobulus II e kia rauka te mana akaaere. Kua ngere nga tokorua te manako oonu i te pae poritiki o to raua ui tupuna, e i te akaraanga kare nga tokorua i marama i te puapinga o te vai mai anga o Roma i taua ngai i muri ake i te inga anga te patireia Seleucid. I te 63 M.T.N., kua uri nga teina tuakana ki te tutara o Roma kia Pompey koi vai ei i Damaseko e kua pati atu e kia akao mai aia i roto i ta raua maro anga. I taua mataiti rai, kua mati atu a Pompey e tona vaeau ki roto ia Ierusalema e kua rave atu i te akaaere anga i reira. Ko te akamataanga ia o te openga o te patireia Hasmonaean. I te 37 M.T.N., kua tutaraia a Ierusalema e te Ariki ko Heroda Maata e Idumea, tei akatikaia e te Mana Akaaere o Roma ei “Ariki o Iudea,” “ei kapitianga e ei oa no te iti tangata Roma.” Kua kore te patireia Hasmonaean.

Te Koreromotu a te Hasmonaean

Te tuatau o te au Hasmonaean, mei ia Judah Maccabee kia Aristobulus II, kua akanoo i tetai tumu anga no te akatakake anga akonoanga tei vai mai ia Iesu i te enua nei. Kua akamata te au Hasmonaean ma te maroiroi no te akamori i te Atua, inara kua puapinga kore tei reira i roto i te manako uaorai. Kua taki atu to ratou taunga, tei rauka te tuatau no te taokotai i te tangata kia aru i te Ture a te Atua, i te pa enua ki roto i te maro anga i te pae poritiki. I roto i teia reva, kua tupu mai te au manako akonoanga tukeke. Kua kore te au Hasmonaean, inara te putoto anga no te akaaere anga akonoanga i rotopu i te au Sadukea, te au Pharisea, e tetai atu kua akatutu mai i te pa enua i teianei i raro ake ia Heroda raua ko Roma.

[Au Tataanga Rikiriki i Raro]

[Tutu i te kapi 30]

(No runga i teia, akara i te puka)

Te Au Tutara Hasmonaean

Judah Maccabee

Jonathan Maccabee

Simon Maccabee

↓

John Hyrcanus

↓ ↓

Aristobulus

Salome Alexandra — akaipoipo — Alexander Jannaeus

↓ ↓

Hyrcanus II

Aristobulus II

[Tutu i te kapi 27]

Kua kimi a Judah Maccabee no te akatakake i te ngati Iuda

[Akameitakianga]

The Doré Bible Illustrations/Dover Publications, Inc.

[Tutu i te kapi 29]

Te au Hasmonaean e tamaki ra no te akamaata i te akaaere anga ki rungao i te au oire kare i te ngati Iuda

[Akameitakianga]

The Doré Bible Illustrations/Dover Publications, Inc.