Au Uianga a te Aronga Tatau
Au Uianga a te Aronga Tatau
Ia 1 Petero 4:3, kua tatau tatou e i piri ana etai au Kerititiano ki roto i te “au ravenga viivii a te idolo ra.” Kare ainei e e ravenga viivii pouroa te akamori itoro, tei akaapaia e tei araiia e te Atua ra?
Ae, i to te Atua ra manako, e ravenga viivii pouroa te akamori itoro. Ko te aronga te kimi ra i tona mareka anga kare e akamori i te itoro.—1 Korinetia 5:11; Apokalupo 21:8.
Inara, i te akara anga te taiku ra te apotetoro ko Petero i te akamori itoro i roto i tetai atu mataara. No tetai tumu, i rotopu i te au pa enua taito e manganui, e mea matauia te akamori itoro e kare i tapupu tureia e te au mana taoonga. Koia oki, kare te ture o te enua i arai i taua akamori itoro ra. E tuanga katoa oki etai akamori itoro no te koreromotu o te pa enua me kore te kavamani. Mei tera te tu, kua piri atu etai ki roto i te ‘au tu akamori itoro ma te kore e tapupu tureia’ i mua ake ka riro mai ei ei au Kerititiano. (New World Translation, 1950 tataanga) Ei akaraanga, ka tau kia akamanakoia e kua akatu te Ariki o Babulonia ko Nebukanesa i tetai tiki itoro auro, inara kare to Iehova ra au tavini ko Sadaraka, Meseka, e Abedenego i akamori atu i te reira.—Daniela 3:1-12.
I tetai turanga manako, kua kapitiia mai ki te au ravenga akamori itoro e manganui ra te au angaanga kino tikai te tuke ra i tetai atu ture me kare te tu akono tau tei akamataia mei roto mai i te akava ngakau akatuangaia ra. (Roma 2:14, 15) Kua tata te apotetoro ko Paulo i te au ravenga kino tikai te “mea tika kore” e te “mea akama ra,” e te maata anga o te taime ka kiteaia teia i tetai ngai i roto i te au ravenga akonoanga ra. (Roma 1:26, 27) Ko te au tane e te au vaine tei piri ki roto i te akamori itoro viivii kare i akono ana i te tapupu i te ture o te tu tangata ra. E mea tau tikai i reira e kia akaruke taua aronga tei riro mai ei au Kerititiano i taua au angaanga viivii ra.
Tei kapitiia i mua akenei, kua akaapaia e te Atua e Iehova taua au akamori itoro tei matauia i rotopu i te aronga kare i te ngati Iuda. No reira kare ratou i tau i te ture. *—Kolosa 3:5-7.
[Tataanga Rikiriki i Raro]
^ para. 6 Te tata anga Ereni ia 1 Petero 4:3 ko te aite anga tikai te “au itoro kare i tau i te ture.” Kua taiku tukekeia te tuatua i roto i te au Pipiria reo Papaa ma taua au akataka anga mei te, “akamori itoro kare i tureia,” “te au akamori itoro araiia,” e te “au akamori itoro ture koreia.”