E Tu Akakoromaki Ainei Toou?

KUA tupu ainei te riri kia koe no te tu tau kore o tetai tangata? Te riri viviki ra ainei koe me akakino pakari te akakeu anga pikikaa i rotopu i toou au oa vaitata?

Tetai taime te umuumuia ra te raveanga viviki e te ngaueue tikai kia akamutu i te ara pakari mei te totoa anga. Ei akaraanga, i te tamataku anga te raveanga tau kore i te akaviivii i to Iseraela i te 15 anere mataiti M.T.N., kua rave tau meitaki a Phinehaza te utaro a Aarona no te akaatea ke i tei kino ra. Kua mareka atu te Atua ko Iehova no runga i tana i rave, te na ko anga: “Kua akaanga ke io nei a Phinehaza . . . i toku riri i te tamariki a Iseraela, i te maroiroi nona i rotopu ia ratou noku nei, i kore ei i pou te tamariki a Iseraela iaku i taua riri noku ra.”​—Numero 25:​1-11.

Kua rave a Phinehaza i te angaanga tau no te akamutu i te totoa anga kino. Inara akapeea to tatou tu riririri kare e akaraia no te tu apa ua o tetai au tangata? Me rave viviki tatou me kare ma te kore te tumu tika, ka riro tatou kare ei tangata paruru i te tuatua tika mari ra e ko tetai kare e rauka i te akakoromaki​—tetai tei kore e akatika i te tu apa ua o tetai atu. Eaa te ka tauturu ia tatou kia kopae i teia ereere?

‘Ko Iehova tei Akakore i Taau Katoa ra Au Apa’

A Iehova e “Atua vareae (maroiroi); e Atua kare e akatika ua i te akarere anga.” (Exodo 20:5, NW tataanga i raro ake) I te mea e koia Tei Anga, tei iaia te tika anga e kia oronga tatou i te akamori anga akono ua kiaia. (Apokalupo 4:11) Inara, te akakoromaki ra a Iehova i te tu paruparu o te au tangata ra. No runga iaia, kua imene iora te tata taramo: “E aroa e te takinga-meitaki to Iehova; kare e riri vave, te maata ra te aroa. Kare aia e tamou i te akamura mai . . . Kare akenei aia i akaoko mai ia tatou e kia aite ki ta tatou au ara; kare oki i tutaki mai ia tatou e kia aite ki to tatou au kino.” Ae, me tataraara tatou, ko te Atua ‘tei akakore i taau katoa ra au apa.’​—Salamo 103:​3, 8-10.

No te mea kua marama aia i te tu ara ua o te au tangata, kare a Iehova e “tamou i te akamura mai” i te aronga rave kino tei tataraara ra. (Salamo 51:5; Roma 5:12) Te tika, e akakoroanga ia nana kia akakore i te ara e te tu apa ua. Kia akaoti meitakiia te reira, kare e tuku mai ki runga ia tatou “kia aite ki to tatou au kino,” te akatotoa aroa maira te Atua i te akakoreanga ara tei akanooia ki runga i te atinga oko o Iesu Karaiti. Kare etai ia tatou e akavaia e tau ei kia ora me kare a Iehova i akaari i te tu tangi aroa i te ngai i tau ra. (Salamo 130:3) Mei teaa te mareka tikai ia tatou e e Atua tangi aroa tikai to tatou Metua i te rangi ra tei umuumu maira ma te tau tikai i te akamori anga kiaia!

Anoanoia te Akaaiteite Anga

I te mea te akaari ra te Atu Ngateitei o te ao katoa e pini ua ake i te tu akakoromaki na roto i te akonoanga i te au tangata apa ua, kare ainei tatou e tau kia pera? Kua akatakaia te akakoromaki e “ko te tu kia akono tamou marie ma te au manako me kore au angaanga a tetai atu.” Tei ia tatou ainei taua tu​—te inangaro anga no te akono tamou marie e te autu anga me tuatua tetai me kore ka rave i te au apinga kare i kino roa inara penei kua tau kore i roto i te tuatua me kore te angaanga?

E tika, ka anoanoia tatou kia kopae i te manako maata i te tu akakoromaki. Ei akatauanga, kua raveia te au tu kino tikai me akakoromaki te au mana akonoanga i te au orometua takinokino tei rave maro ua atu i te mirimiri i te au tamaroa e te au tamaine. “Te akono anga i te au tamariki ei au tupu anga no te ara,” i akakite ei tetai tangata ripoti i Ireland, “kua neke ua atu  te au mana akaaere o te akonoanga i te orometua rave akapera [ki tetai ngai ke].”

Te akaneke anga i taua tangata ra e akaraanga ua ainei o te tu akakoromaki tau? Kare! Ka tamanako ana e kua akatika atu tetai pupu rapakau i tetai tangata vai tau kore kia vai ua atu, te akaneke anga iaia mei tetai are maki ki tetai, noatu rai te tamate ra me kore te akakino ra aia i tana aronga maki. Penei ka akatupu te tu tiratiratu no te angaanga e kia “akakoromaki” uaia atu. Inara akapeea te au tangata i ngere i to ratou au oraanga me kore kua kino tikai no te manako kore me kare te au raveanga ta ua?

Te vai katoa ra te kino no te kore anga i akaari i te tu akakoromaki. Ia Iesu i te enua nei, kua kimi tarevake tetai pupu ngati Iuda tei kiteia e ko te au Zealot no te taangaanga i te akaraanga o Phinehaza i te tauta anga i te akatika i ta ratou au angaanga. Ko tetai angaanga pakari tei raveia e tetai o te au Zealot koia oki kia “kapiti atu ma te au urupu tangata i Ierusalema i te tuatau o te oroa e tetai atu au atianga aiteite e ka koputa atu ma te matipi i tei mareka koreia e ratou kare ra i kiteia mai.”

Ei au Kerititiano, kare tatou e rave mei tei raveia e te au Zealot i te tamate anga i te aronga kare tatou e mareka ana ia ratou. Inara te taki ra ainei tetai tu akakoromaki kore ia tatou kia takino atu na roto i te au ravenga ke i te aronga kare tatou e mareka ana​—penei na te tuatua akakino anga ia ratou? Me e tu akakoromaki tikai to tatou, kare tatou e tuatua akakino ia ratou.

Ko te au Pharisea o te anere mataiti mua tetai atu pupu akakoromaki kore. Te akaapa tamou ra ratou i tetai ua atu e kare i manako ana no runga i te tu apa o te tangata. Kua akavaavaa te au Pharisea ngakau parau i te au tangata, te tuatua akakino anga ia ratou e kua “taumaaia ïa.” (Ioane 7:49) No te au tumu meitaki, kua akaapa a Iesu i taua au tangata manako tuatua tika-uaorai, te na ko anga: “Aue kotou, e te au tata tuatua, e te au Pharisea e, e aronga pikikaa! te oronga nei kotou i te ngauru o te minete e te aneto e te kumino, e te akaruke nei i te au mea mamaata o te ture, te tuatua-tau, te aroa, e te akarongo: ko ta kotou ïa e akono e tikaʼi, e auraka katoa e akaruke i tera.”​—Mataio 23:23.

Te akakite anga i teia, kare a Iesu e te akameangiti ra i te puapinga maata no te akonoanga i te Ture a Mose. Te akaari ua ra aia e ko te au turanga te “mea mamaata,” me kore te mea puapinga, o te Ture te umuumu ra e kia taangaangaia te reira ma te tau e te tangi aroa. Mei teaa te tuke ia Iesu ratou ko tana au pipi mei te au Pharisea e te au Zealot akakoromaki kore!

Kare te Atua ko Iehova e Iesu Karaiti e akatika ana i te kino. Kare e roaia, ‘ka tukuia mai te mate i te aronga kare i kite i te Atua, e tei kore i akarongo i te evangelia.’ (2 Tesalonia 1:​6-10) Inara, i roto i tona tu maroiroi no te tuatua tika, kare rava a Iesu i kore ana i te akaata i te tu maru, tangi aroa, e te inangaro o tona Metua i te rangi ra no te katoatoa te inangaro ra i te rave i te mea tika. (Isaia 42:​1-3; Mataio 11:​28-30; 12:​18-21) Mei teaa te akaraanga meitaki ta Iesu i akanoo no tatou!

E Akono Tamou Marie i Tetai e Tetai Atu

Noatu ka rauka ia tatou te maroiroi maata no tei tika ra, kia maroiroi tatou i te taangaanga i ta te apotetoro ko Paulo ako anga: “E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei te Mesia i akakore i ta kotou na, e akapera katoa kotou.” (Kolosa 3:13; Mataio 6:​14, 15) Te umuumu maira te tu akakoromaki e kia autu marie tetai i to tetai au tu apa ua e te au tarevake i roto i teia ao apa ua. Ka tau tatou e kia manako tikai no runga i ta tatou e tapapa ra mei tetai atu.​—Philipi 4:5.

Te akakoromaki kare te aite anga e te akatika ra i te rave anga tarevake me kore te akono matapo ra i te au kino. Penei kare e rotai ana etai manako anga o tetai o te au taeake irinaki me kore te tu akono ki ta Iehova au turanga. Noatu kare i pakari tikai te akatakake anga e ka taki atu ki te kopaeanga i te Atua, penei ka oronga te reira i te akairo akamatakite anga te  akakite anga mai e te umuumuia maira te au akatikatika anga. (Genese 4:​6, 7) Mei teaa ra te aroa no te aronga e au apainga i te pae vaerua ta ratou no te tauta anga i te akatikatika i tetai tei rave tarevake na roto i te tu maru! (Galatia 6:1) Inara, e manuiai na roto i teia tauta anga, ka anoanoia te rave anga ma te manako anga kare ma te tu akaapa ua.

“Ma te Maru e te Kauraro Marie Atu”

Akapeea te akono anga i te tu akakoromaki ki tetai tangata e tuke tona manako no te akonoanga mei to tatou? Tetai “Apiianga Matauia” tei tukunaia ki roto i te au Apii Pa Enua tei akanooia i Ireland i te 1831 te tatau ra: “Kare a Iesu Karaiti i akakoro ana e kia maroia tana akonoanga ki runga i te au tangata na roto i te au ravenga ta ua. . . . Te tauetono anga ma to tatou tangata tupu kare ia e ko te mataara tau no te akakeu anga ia ratou e tei roto tatou i te tika e tei roto ratou i te tarevake. Ka akapapu ua kia ratou e kare tei ia tatou te tu Kerititiano.”

Kua apii a Iesu e kua rave na roto i tetai tu tei akavaitata i te tangata ki te Tuatua a te Atua, kia pera katoa tatou. (Mareko 6:34; Luka 4:​22, 32; 1 Petero 2:21) Ei tangata apa kore ma te kite oonu takake orongaia mai e te Atua, ka rauka iaia te tatau i te au ngakau. No reira, me ka anoanoia kua rauka ia Iesu i te akaapa pakari i te au enemi o Iehova. (Mataio 23:​13-33) Kare i te mea akakoromaki kore nona kia rave i teia.

Kare mei ia Iesu rai, kua ngere tatou i te tu no te tatau anga i te ngakau. No reira, kia aru tatou i te ako anga a te apotetoro ko Petero: “Ka akatapu ra kotou i te Atua ra ia Iehova i to kotou ngakau; e kia tika ua rai ia kotou kia akakite atu ki te tangata katoa e ui mai ia kotou i te manako i roto ia kotou na, ma te maru e te kauraro marie atu.” (1 Petero 3:15) Ei au tavini no Iehova, kia paruru tatou i ta tatou e irinaki ra no te mea kua akanoo meitakiia te reira ki runga i te Tuatua a te Atua. Inara ka anoanoia tatou kia rave i teia na roto i tetai mataara te akaari ra i te tu ngateitei no tetai e no to ratou au irinaki anga ngakau tae. Kua tata a Paulo: “Ei tuatua aroa ua anake ta kotou, kia rapakauia i te tai, i te kite anga i te mea tika kia tuatua atu ki te tangata katoa ra.”​—Kolosa 4:6.

I roto i tana Ako rongonui i te Maunga, kua tuatua a Iesu: “E te au mea katoa ta kotou i anoano ia etai ke ra, na reira katoa kotou ia ratou.” (Mataio 7:12) No reira, e akono tamou marie tatou i tetai e tetai e e akaari i te tu ngateitei ki te aronga ta tatou e tutu aere ra. Na te akaaiteite anga i to tatou maroiroi no te tuatua tika ma te akakoromaki anga tei akanooia ki runga i te Pipiria, ka akamareka tatou ia Iehova e ka akakoromaki ua atu.

[Tutu i te kapi 23]

E kopae i te tu akakoromaki kore o te au Pharisea

[Tutu i te kapi 23]

Kua akaata a Iesu i te tu akakoromaki o tona Metua. Te pera ra ainei koe?