E Vaerua Mate Kore Ainei Toou?
E Vaerua Mate Kore Ainei Toou?
“TE AU tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra,” i tata ei te apotetoro ko Paulo. (2 Timoteo 3:16) Ae, e puka tuatua mou te Pipiria te aere maira no ko mai i te Atua, ko Iehova.—Salamo 83:18.
I te mea ko Iehova Tei Anga i te au mea ravarai, kapiti mai i te au tangata, kua kite meitaki aia e eaa te ka tupu kia tatou me mate tatou. (Ebera 3:4; Apokalupo 4:11) E i roto i tana Tuatua akauruia, te Pipiria, kua oronga mai aia i te au pau anga tika e te merengo ua ki te au ui anga no runga i te ora anga i muri ake.
Eaa te Vaerua?
I roto i te Pipiria, te au tuatua tei uriia te “vaerua” ko te aite anga e “ao.” Inara e maata atu ta teia e akakite maira i te akaea ua anga. Ei akaraanga, te akakite ra te tata Pipiria ko Iakobo: “Mei te kopapa oki kia kore te vaerua, e mea mate ïa.” (Iakobo 2:26) No reira, ko te vaerua te mea e akaora ra i te kopapa.
Kare ua teia ririnui akaora i te ao, me kare te akaea anga, e neke aere ra i roto i te ate mama. Eaa ra? No te mea i muri ake me akamutu te akaea anga, ka vai ua te ora i roto i te au teera no tetai tuatau poto ua—“no tetai au miniti,” i na The World Book Encyclopedia ei. No teia tumu ka manuia te au tauta anga no te akaora akaou. Inara me mate te mana ora mei te au teera o te kopapa, ka puapinga kore te au tautaanga pouroa no te akatupu e kia ora akaou. Kare okotai ao, me kare e reva, i roto i te ao e rauka i te akaora akaou i te teera okotai. Ko te vaerua, i reira, koia oki ko te ao ora kitea koreia—te akamataanga o te ora—te akono ra e kia ora te au teera. Te akaroaia ra teia ao ora e te akaea anga.—Iobu 34:14, 15.
Te tupu ra ainei taua vaerua i roto ua i te au tangata ra? Te tauturu maira te Pipiria ia tatou kia rauka te taopenga anga tau no teia. Kua akatika te ariki pakari ko Solomona no te au tangata e te au animara e “okotai oki o ratou katoa ra aʼo,” e kua ui aia: “Koai te kite i te vaerua tangata e riro ki runga ra? e te vaerua o te puaka e riro ki raro i te one ra?” (Koheleta 3:19-21) No reira te tuatuaia ra e e vaerua to te au animara e te au tangata katoa. Akapeea e raukai te reira?
Te vaerua, me kare te ao ora, ka rauka kia akaaiteia ki te uira te aere ra na roto i tetai matini me kare tetai apinga. Penei ka taangaangaia te uira kitea koreia e kia rave i te au angaanga tukeke, tei runga ra i te tu o te apinga te ka angaanga ra. Ei akaraanga, ka rauka te umu uira i te akatupu i te vera, tetai komopiuta kia oronga mai i te au tuatua akakite e te raveanga i te au tareanga, e tetai tivi kia akaari mai i te au tutu e te tangi anga reo. Inara, kare te uira e mono atu i te au tutu o te apinga ta te reira e akatupu ra kia angaanga. Te vai ua ra te reira ei ririnui. Ma te aiteite, kare katoa te ao ora e mono atu i tetai o te au tutu o te mea ora ta te reira e akaora ra. Kare o te reira tu peretana, kare e rauka i te manako. E “okotai oki o ratou katoa ra aʼo” to te au tangata e te au animara. (Koheleta 3:19) No reira, me mate tetai tangata, kare to te reira vaerua e ora ua atu ki roto i tetai ngai ei mea ora.
Eaa, i reira, te turanga o tei mate ra? E eaa te ka tupu ki te vaerua me mate tetai tangata?
“Ka Riro Akaou Rai Koe ei One-Pueu”
I te akarongo kore akakoro anga te tangata mua, ko Adamu, i ta te Atua akaueanga, kua tuatua atu Aia kiaia: “E kai koe i taau kai ma te pata i te ou ki runga i to rae, e oki ua atu koe ki raro i te one; no reira mai oki koe: e one-pueu oki koe, e ka riro akaou rai koe ei one-pueu.” (Genese 3:19) Iea a Adamu i mua ake i ta Iehova anga mai anga iaia i te one pueu? Kare ua aia! Kare aia i vai ana. No reira i ta te Atua ko Iehova tuatua anga no Adamu e ka “oki ua atu koe ki raro i te one,” te tuatua ra aia e ka mate a Adamu e ka oki akaou kia riro ei au mea o te one. Kare a Adamu e tapae atu ki te ngai no te vaerua. I te matenga kua riro akaou a Adamu kia vai kore ua. Ko tana utunga ko te matenga—te kore anga o te ora—kare e ko te aerenga ki tetai ngai.—Roma 6:23.
Akapeea etai atu tei mate ra? Kua akataka meitakiia mai te turanga o tei mate ra ia Koheleta 9:5, 10, i reira ka tatau tatou: “Kare a tei mate apinga i kite . . . Kare e kimianga, kare e parani, kare e kite me kare e manako kite pakari, i roto i te vaarua tanumanga.” (Moffatt) No reira, ko te matenga, ko te tu vai kore ua. Kua tata te tata taramo e me mate tetai tangata, “te riro nei oki tona vaerua, te oki nei aia ki tona ra one; kore rava atura tana i akakoro i taua rā ra.”—Salamo 146:4.
Te taka meitaki ra, kare a tei mate ra i kite, kua kore te ora. Kare a ratou apinga i kite. Kare ratou e kite mai ia koe, kare e akarongo mai ia koe, me kare e tuatua kia koe. Kare e rauka ia ratou te tauturu ia koe e kare katoa koe e kino ia ratou. Auraka koe e mataku i tei mate ra. Inara akapeea i reira e te “riro nei oki” e kia kore te vaerua mei tetai tangata i tona tuatau matenga?
Te “Oki ra te Vaerua ki te Atua”
Te akakite ra te Pipiria me mate tetai tangata, te “oki ra te vaerua ki te Atua i oronga maira.” (Koheleta 12:7) Ko te aite anga ainei o teia e te aere tika atura tetai vaerua ora na roto i te mareva ki to te Atua ngai vai anga? Kare! Te aerenga manako ta te Pipiria e taangaanga ra no te tuatua “oki” kare te reira e te umuumu ra i te aere anga mei tetai ngai ki tetai. Ei akatauanga, kua akakiteia ki te au Iseraela tiratiratu kore: “E ariu mai kotou kiaku, e naku e ariu atu kia kotou, te tuatua mairā Iehova Sabaota ra.” (Malaki 3:7) Te aite anga i to Iseraela ‘ariu anga’ kia Iehova koia ko te uri mai anga mei te aerenga tarevake e kia akatanotano akaou ki ta te Atua au mataara tuatua tika. E ko te aiteanga i to Iehova ‘ariu anga’ ki to Iseraela koia oki ko te akara mareka akaou anga i tona iti tangata. I nga atianga te o maira ki roto i te “ariu” anga te tu, kare i tetai neke anga mei tetai ngai ki tetai.
Ma te aiteite ra, i te matenga kare te aere anga mei te enua ra ki te rangi ra i tupu tika tikai me “oki” atu te vaerua ki te Atua. Me akaruke ana taua mana ora i tetai tangata, ka rauka ua i te Atua i te akatupu akaou i te reira kiaia. No reira te “oki ra te vaerua ki te Atua” i te tu e tei i te Atua te tika anga i teianei no tetai manakonakoanga kia ora taua tangata ra a te tuatau ki mua.
Ei akaraanga, ka akamanako ana i ta te Tuatua Tapu e akakite ra no runga i to Iesu matenga. Te akakite ra te tata evangeria ko Luka e: “Kua kapiki aturā Iesu ma te reo maata, na ko atura, E taku Metua, te tuku atu nei au i toku vaerua ki to rima na: e oti akera taua tuatua ra, tuku atura i te vaerua.” (Luka 23:46) I to Iesu vaerua e mate atura, kare aia e te aere tika tika atura ki te rangi. Kare a Iesu i akatuia mai mei te mate e tae roa ki te toru ra. E kua pou e 40 ra i mua ake ka kake atu ei aia ki te rangi ra. (Angaanga 1:3, 9) Inara, i te tuatau i mate ei aia, kua tuku papu atu a Iesu i tona vaerua ki roto i nga rima o tona Metua, te irinaki anga i roto i te tu karape o Iehova i te akaora akaou iaia.
Ae, ka rauka ua i te Atua i te akaora akaou i tetai tangata. (Salamo 104:30) Mei teaa ra te meitaki o te manakonakoanga ta teia e oronga maira!
Tetai Manakonakoanga Papu
Te karanga ra te Pipiria: “Te vaitata mai nei oki te ora, e akarongo ei te aronga katoa i roto i te rua i tona [to Iesu] reo, E kua aere mai ki vao.” (Ioane 5:28, 29) Ae, kua taputou mai a Iesu Karaiti e pouroa te aronga te akamaaraia ra e Iehova ka akatu akaouia mai, me kare ka akaora akaouia mai. I roto ia ratou ko te aronga tei aruaru i tetai aerenga tuatua tika ei au tavini no Iehova. Inara kua mate atu e au mirioni ua atu au tangata ma te kore i akaari me ka ariki ratou i ta te Atua au turanga tuatua tika. Penei kare ratou i kite no runga i ta Iehova au umuumu anga me kare kua ngere ratou i te tuatau tau no te rave i te au taui anga i anoanoia. Te manako katoaia ra e te Atua te au tangata tataki tai mei teia rai e ka akatuia mai, no te mea te karanga ra te Pipiria: “E e tuakaouanga to tei mate, te aronga tuatua-tika e te aronga tuatua-tika kore.”—Angaanga 24:15.
I teia tuatau, te ki nei te enua i te makitakita e te putoto anga, te ta ua e te akamaringi toto, te akataero anga e te maki. Me akaora akaouia mai tei mate ra ki runga i taua enua, papu tikai ka poto ua te mataora. Inara kua taputou mai Tei Anga ra e kare e roa atu ka akaope aia i teia taiate tangata o teia tuatau tei raro i ta Satani te Tiaporo akatereanga. (Maseli 2:21, 22; Daniela 2:44; 1 Ioane 5:19) Ka riro i reira tetai taiate tangata tuatua tika—“te enua ou”—ei umere anga tika tikai.—2 Petero 3:13.
I taua taime ra “kare oki to reira e karanga e, kua maki au.” (Isaia 33:24) E pera te riri anga o te matenga ka akakoreia, no te mea ka “orei [oki te Atua] i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” (Apokalupo 21:4) Mei teaa te meitaki o teia manakonakoanga no te aronga “i roto i te rua”!
Me akakore a Iehova i te kino mei te enua, kare aia e takore atu i te aronga tuatua tika ma te aronga kino. (Salamo 37:10, 11; 145:20) Ko te tika, ka ora atu tetai “aronga maata rava” o te au tangata “no te pa enua ravarai, e te au kopu ravarai, e te au iti-tangata ravarai, e te au reo katoa oki” i “te mate maata,” te ka takore i teia ao kino. (Apokalupo 7:9-14) No reira, ka turou atu tetai aronga maata i te aronga tei mate ra.
Te umuumu ra ainei koe i te kite akaou i toou aronga akaperepere ra? Te inangaro ra ainei koe i te noo e tuatau ua atu ki roto i te Parataito i te enua nei? Kia apii koe i reira i te kite tika tikai o to te Atua anoano e te au akakoroanga. (Ioane 17:3) Ko to Iehova anoano ia “i te tangata katoatoa kia ora, e kia rauka te kite i te tuatua-mou.”—1 Timoteo 2:3, 4.
[Tutu i te kapi 4]
“E one-pueu oki koe, e ka riro akaou rai koe ei one-pueu”
[Tutu i te kapi 5]
Ka akaaiteia te vaerua ki te uira
[Tutu i te kapi 7]
Ka apai mai te tuakaouanga i te rekareka mutu kore