“Kua Akaapa Tikai Ainei te Atua kia Tutungiia te Tangata i Roto ia Era?”

“Te apii ra ainei korua i roto i tetai pupu apiipii anga?”

Ko teia ui anga nei kua tapoitirere ia Joel raua ko Carl. Te akarakara nei nga tangata mapu​—e nga tangata tauturu te tavini ra i te opati maata o te Au Kite o Iehova i Brooklyn, New York​—i roto i tetai are toa oko puka vaitata ua mai. Ia Joel e akara ra i te au papaanga tuatua Pipiria, kua akakite atu a Carl kiaia no runga i tetai uriuri anga tana i rekareka i roto i te angaanga orometua. I te akarongo anga i tetai tuanga o teia puka anga, kua araveiia atu raua e tetai tangata e tu ua maira i te pae mai ia raua.

Inara, e manako ke atu oki to teia tangata nei e me tei roto nga tangata mapu ra i tetai pupu apiipii anga. Kua akataka atura aia: “E akonoanga Iuda taku, kua akakite mai tetai o toku au oa Kerititiano kiaku e ka tutungiia au i roto ia era no te mea kua kopae te ngati Iuda ia Iesu. Kua tamanamanata tikai teia iaku. Kare e akara anga tau taua utunga no ko mai i te Atua aroa. Kua akaapa tikai ainei te Atua kia tutungiia te tangata i roto ia era?”

Kua akakite atu a Joel raua ko Carl ki teia tangata ngakau tae e e aronga apiipii tikai raua no te Pipiria. Kua akaari atu raua mei roto mai i te au Tuatua Tapu e te manako kore ra tei mate e te moe ua ra i te mate te tiakianga i tetai tuakaou anga. No reira, kare ratou i kite i te tamamae anga me kore te mamae anga o te ai era. (Salamo 146:​3, 4; Koheleta 9:​5, 10; Daniela 12:13; Ioane 11:​11-14, 23-26) Te tae anga ta ratou pukapuka anga e 45 miniti ki te openga, kua oronga atu taua tangata i tona ngai noo anga kia Joel raua ko Carl e kua pati atu i tetai akakiteanga maata no runga i te tumu tuatua.

Me e ngai tamamae anga veravera a era, ka pati atu ainei tetai tangata kia tonokia ia ki reira? Inara, ko Iobu pateriareka, te anoano ra kia ngaro ke atu i tona manamanata, kua ui i teia pati anga: “Naai e oronga mai i teia kiaku, penei e kia paruruia au e koe na i roto ia era, e e uuna iaku e pati ua atu toou riri?” (Iobu 14:13, Douay Version) Te taka meitaki ra, kare a Iobu i irinaki ana ia era e e ngai tamamae anga. Mari ra, kua kimi aia i te paruru anga i reira. Ko te matenga ko tetai tu kore ua te reira, e te era o te Pipiria e vaarua tanumangaia no te tangata.

Me ka inangaro koe i tetai ua atu akakiteanga e eaa te ka tupu kia tatou me mate tatou e eaa te manakonako anga a muri ake ra, te pati maanaia atu nei koe kia ariu mai ki te oronga anga te ka aru mai.