Origen—Akapeea Tana Apiianga i te Akakeu Anga i te Ekaretia?
Origen—Akapeea Tana Apiianga i te Akakeu Anga i te Ekaretia?
“Te arataki maata roa atu o te Ekaretia i muri mai i te au Apotetoro.” Na reira a Jerome, e tangata uri o te Pipiria Vulgate Ratino, i te akapaapaa anga i te tangata apiipii akonoanga o te toru anere mataiti ko Origen. Inara kare te maata anga i manako teitei ana ia Origen mei tei reira rai. Kua manako etai iaia ei aka kino mei reira mai kua tupu mai te au irinaki anga tuke. I te au tuatua a tetai tangata tata o te 17 anere mataiti, kua akakite te aronga akaapa ia Origen: “Te katoa anga o tana apiianga e mea neneva ia e te kino roa, e poitini tamate anga a te Ovi, tana i ruaki mai ki roto i te ao.” E tika, e tere atu i te a anere mataiti i muri ake i tona matenga, kua akakiteia a Origen e e tangata irinaki tuke.
EAA ra i raukai ia Origen te tu akamareka anga e te tumu ririia? Eaa te akakeu anga tana i rave ki runga i te tupu anga apiianga o te ekaretia?
Maroiroi no te Ekaretia
Kua anauia a Origen vaitata i te 185 T.N. ki roto i te oire Aiphiti o Alexandria. Kua rauka iaia te apii anga meitaki i roto i te tataanga Ereni, inara kua akakeu tona papa, ko Leonides, iaia kia akapou aiteite i te maroiroi no te apiianga i te au Tuatua Tapu. I te tae anga a Origen ki te 17, kua tata te emepera o Roma i tetai akauenga i te akariro anga e e mea kino tikai te taui anga i ta tetai akonoanga. Kua titiriia te papa o Origen ki roto i te are auri no te mea kua riro mai aia ei Kerititiano. Kua ki i te maroiroi, kua tauta a Origen i te kapiti atu kiaia i roto i te are auri e kia tamate katoaia. Te kiteanga i teia, kua uuna te mama o Origen i tona kakau kia arai iaia no te akaruke i te kainga. Na roto i tetai reta, kua pati a Origen ki tona papa: “E matakite auraka e taui i toou manako no matou oki.” Kua vai ngaueue kore a Leonides e kua tamateia atu, kare i akaruke mai i tetai apinga na tona pamiri. Inara kua tere atu a Origen ki mua i roto i tana au apiianga e raukai i te turu atu i tona mama e te are teina e ono na te apiianga i te tataanga Ereni.
Te akakoroanga o te emepera koia oki kia akamutu i te totoa anga o te Akonoanga Kerititiano. I te mea kua takete atu tana akauenga kare ua i te aronga apiipii e pera katoa i te au puapii, kua akaruke atu te katoa anga o te aronga apii akonoanga Kerititiano ia Alexandria. I te pati akatenga anga te au tangata kare i te Kerititiano te tauta ra kia rauka te ikuiku anga Tuatua Tapu i te mapu ko Origen no te tauturu, kua akono aia i teia angaanga e e akauenga ia no ko mai i te Atua. E manganui tana aronga apiipii kua tamateia, tetai i mua ake ka akaoti ei i ta ratou au apiianga. E tumatetenga kiaia uaorai, kua akamaroiroi ua a Origen i tana aronga apiipii, noatu me tei mua ratou i tetai tiati, i roto i te are auri, me kore te vaitata ra kia tamateia. Te ripoti maira te tangata tuatua enua o te a anere mataiti ko Eusebius ia ratou
e aratakiia ra kia tamateia, kua “turou atu [a Origen] ia ratou ma te mataku kore na te ongi anga.”Kua akatupu a Origen i te tu riri o te manganui kare i te au Kerititiano, tei akaapa iaia no te taui anga e te matenga o to ratou au oa. E putuputu te taime kua ora atu aia i te akapupu anga a te urupu e tetai mate takinga kino. Noatu kua maroia kia neke mei tetai ngai ki tetai ngai kia akavare i te aronga kimi iaia, kare a Origen i tuku ana i te au no tana apiianga. Kua akaumere taua tu mataku kore e te akatapuanga ia Demetrius, te epetikopo o Alexandria. No reira, e 18 rai o Origen mataiti, kua akataoonga a Demetrius iaia e ko te upoko o te apii no te apiipii anga akonoanga i Alexandria.
I te openga ra, kua riro mai a Origen ei tangata kite rongonui e ei tangata tata meitaki rava. Kua tuatua tetai e kua tata aia e 6,000 puka, inara e tuatua ua teia. Kua rongonui aia no tana Hexapla, e mea maatamaata tikai, e tataanga e 50 voriumu o te au Tuatua Tapu Epera. Kua akapapa a Origen i te Hexapla i roto i nga pa e ono te ki ra: (1) i te tataanga Epera e te Arama, (2) te urianga Ereni o taua tataanga, (3) ta Aquila urianga Ereni, (4) ta Symmachus urianga Ereni, (5) te Septuagint Ereni, ta Origen i akara akaou kia aite tikai ki te tataanga Epera, e (6) ta Theodotion urianga Ereni. “Na roto i teia taokotai anga i te au tataanga,” i tata ei te tangata kite Pipiria ko John Hort, “kua manakonako a Origen i te akamarama atu i te aiteanga o te au irava e manganui i te reira ka akaraanga e kare e maramaia e tetai tangata tatau reo Ereni me kore ka akapikikaaia me ka rauka ua iaia te Septuagint.”
‘Auraka kia Rai te Manako i te Tangata nei i Tei Tataia Ra’
Noatu rai, kua akakeu oonu te reva akonoanga oripu ua o te toru anere mataiti i ta Origen akaraanga no te apiianga i te au Tuatua Tapu. Noatu e te vai pepe ua ra a Kerititome, kua akakino keia te reira ma te au irinaki anga kare i roto i te irava, e te apii ra te au ekaretia totoa aere i te au apiianga tuke tuke.
Kua ariki a Origen i tetai o teia au apiianga kare i roto i te irava, te tapaanga i te reira e ko te apiianga a te au apotetoro. Inara kua manono ua aia i te tamanako atu i tetai au ui anga. E manganui tana aronga apiipii i taua taime ra te maro ra ma te au itiu kimi kite noa ua. Te tauta anga i te tauturu ia ratou, kua apii meitaki a Origen i te au pupu apiianga kimi kite tuke tuke te akatanotano ra i te au manako o tana aronga apiipii ou ua. Kua anoano atu aia no te oronga ki tana aronga apiipii i te au pau anga merengo ua ki ta ratou au uianga kimi kite.
I te tauta anga no te akarotai i te Pipiria ma te apiianga kimi kite, kua irinaki tikai a Origen ki runga i te ravenga allegorical no te urianga i te au Tuatua Tapu. Kua manako aia e e aiteanga pae vaerua ua to te Tuatua Tapu inara kare ra i te mea tika tikai. Mei tei akaariia mai e tetai tangata kite, kua akatika teia ia Origen “i te au ravenga no te akara atu ki roto i te Pipiria noatu e eaa te au manako kare i roto i te Pipiria tei tau ki tana akapapa apiianga akonoanga, koi manako tutu ua ei (e kare e ekoko anga te manako ua ra iaia) ei tangata aruaru tikai e te uri tiratiratu i te manako o te Pipiria.”
Te oronga maira tetai reta ta Origen i tata ki tetai o tana aronga apii i te manako oonu ki roto i tana e manako ra. Kua akataka oki a Origen e kua maani te au Iseraela i te au apinga no te iero o Iehova ma te au auro o Aiphiti. I roto i teia kua kitea e ia te turuanga allegorical no tana taangaangaanga i te apiianga Ereni kia apii i te Akonoanga Kerititiano. Kua tata aia: “Mei teaa te puapinga o te au mea tei apainaia mai no Aiphiti ki te au tamariki Iseraela, tei kore i taangaanga meitakiia e to Aiphiti ra, inara kua taangaangaia e te au Epera, ma te arataki anga a te pakari o te Atua, no te angaanga a te Atua.” No reira kua akamaroiroi a Origen i tana aronga apiipii kia “rave mai mei te apiianga a te au Ereni i te ka riro penei ei tumu anga no te apii anga me kore e akapapaanga no te Akonoanga Kerititiano.”
Kua akaaveave teia akaraanga kare i araiia no te urianga i te Pipiria i te akataka anga i rotopu i te apiianga Kerititiano e te apiianga Ereni. Ei akaraanga, i roto i tana puka te ingoa On First Principles, kua akataka a Origen ia Iesu e ‘ko te Tamaiti anau tai, tei anauia mai, inara ma te kore e akamataanga.’ E kua tuatua mai aia: ‘Tona akamataanga e mea mutu kore ia e tuatau ua atu. Kare e na roto i te raukaanga te ao ora i akariroiai aia ei Tamaiti, kare no tetai raveanga kitea uaia, mari ra na roto i te tu o te Atua.’
Kare i kitea e Origen teia manako i roto i te Pipiria, no te mea te apii ra te au Tuatua Tapu e ko te Tamaiti anau tai a Iehova koia ‘te mua o te au mea Kolosa 1:15; Apokalupo 3:14) Kia tau ki te tangata tuatua enua akonoanga ko Augustus Neander, kua rauka ia Origen te manako o te “uki mutu kore” na roto i tana “apiianga kimi kite i roto i te pupu apii a Plato.” No reira, kua aati a Origen i teia kaveinga Tuatua Tapu: “Auraka kia rai to kotou manako i te tangata nei i tei tataia ra.”—1 Korinetia 4:6.
ravarai i angaia ra’ e “te tumu o te au mea ravarai a te Atua i angaia ra.” (Akaapaia ei Tangata Irinaki Tuke
I tona au mataiti mua ei puapii, kua rave ke te Pupu Akaaere Orometua o Alexandria mei ia Origen i tona taoonga orometua. Kua tupu teia penei kua vareae te Epetikopo ko Demetrius i to Origen tu rongonui. Kua neke atu a Origen ki Paretaina, i reira kua vai te akaraanga mareka iaia ei tangata paruru rongonui i te apiianga Kerititiano ma te maata rava, i reira kua tamou ua atu aia ei orometua. Te tika, i te tupu anga te “irinaki anga tuke” i te Itinga, kua manakoia tana angaanga e kia akapapu ki te au epetikopo tarevake kia oki ki te akonoanga matauia. I muri mai i tona matenga i te 254 T.N., kua akavaavaaia te ingoa o Origen. No teaa ra?
I muri mai i te riro anga te Akonoanga Kerititiano ei akonoanga rongonui, ko ta te ekaretia i ariki ei apiianga noa ua kua akataka tika tikai ia. No reira, kare te au uki i aru mai o te pupu apiipii akonoanga i ariki ana i te au manako e manganui o Origen e tetai taime kua manako e kare i tau meitaki tikai. No reira kua akatupu tana au apiianga i te taumaro anga kino tikai i roto rai i te ekaretia. I te tauta anga i te akatikatika i teia au maro anga e kia akanoo i to reira tu taokotai anga, kua akaapa te ekaretia ia Origen ei tangata irinaki tuke.
Kare e ko Origen ua tei tarevake. Te tikaanga, kua totou te Pipiria i te akarukeanga mei te au apiianga ma a Karaiti. Kua akamata teia apoteiti i te tupu ua e tae vaitata mai ki te anere mataiti mua, i muri mai i te matenga te au apotetoro a Iesu. (2 Tesalonia 2:6, 7) I te openga ra, kua akanoo tetai au Kerititiano tutu ua ia ratou uaorai e ko te “tumu anga apii anga,” te akakite anga i tetai atu ei “aronga irinaki anga tuke.” E tikai, kua akaruke maata tikai a Kerititome i te Akonoanga Kerititiano mou.
“Te Tuatua Taumāroia ra i Tapikipikiia e e Kite”
Noatu te au tamanako anga e manganui o Origen, kua ki tana au angaanga i te au manako meitaki. Ei akaraanga, kua akono tamou te Hexapla i to te Atua ingoa i roto i nga reta Epera mua e a, tei tapaia e ko te Tetragrammaton. Te oronga maira teia i te kiteanga puapinga e kua kite te au Kerititiano mua e kua taangaanga i te ingoa tikai o te Atua—ko Iehova. Noatu rai, kua akamatakite tetai pateriareka o te rima anere mataiti tona ingoa ko Theophilus e: “Te au angaanga a Origen mei tetai enua kiia e te au tiare tuke tuke. Me kitea e au tetai tiare manea i reira, ka kato au i te reira; inara me ka akaraanga taratara tetai kiaku ka kopae au i te reira mei tetai taratara mamae rai.”
Na te kairoanga i te au apiianga Pipiria ma te apiianga Ereni, kua riro mai ta Origen apiianga e kua kiia e te tarevake, te au tupuanga e mea kino anga no Kerititome. Ei akatauanga, noatu kua kopaeia te maata anga o te au tamanako anga o Origen kare e tumu i muri maira, kua tauturu tona au manako no runga i te “uki mutu kore” o Karaiti no te akanoo anga i te tumu anga o te apiianga kare i roto i te Pipiria te Toru Tai. Te puka The Church of the First Three Centuries kua akakite e: “Te tamata anga i te apiianga kimi kite [tei akamataia mai e Origen] kua akakoroia e kia vai ua atu.” Eaa te tupu anga? “Kua takinoia te tu mama o te akarongo Kerititiano, e kua tere maata ua mai te au tarevake ki roto i te Ekaretia.”
No tana tuanga, ka rauka ua ia Origen i te akono i te ako anga a te apotetoro ko Paulo e kia kopae i te kapiti anga atu ki te apoteiti na te “ariu ke koe i te tuatua rikiriki mako kore kare e puapinga ra, e te tuatua taumāroia ra i tapikipikiia e e kite.” Kareka ra, na te akanooanga i te maata anga o tana apiianga ki runga i te “kite,” kua “tatipake rava akenei [a Origen] i te akarongo.”—1 Timoteo 6:20, 21; Kolosa 2:8.
[Tutu i te kapi 31]
Te akaari ra ta Origen “Hexapla” e kua taangaangaia to te Atua ingoa i roto i te au Tuatua Tapu Ereni Kerititiano
[Akameitakianga]
Published by permission of the Syndics of Cambridge University Library, T-S 12.182
[Akameitakianga no te Tataanga i te kapi 29]
Culver Pictures