‘Te Vai ra te Meitaki No te Tuatua-tika Ra’

“I VAI ou ana au, e teianei kua ruaine; kare ra au i kite i te tangata tuatua-tika i te akaruke angaia, e tona uanga i te pati aere anga i te kai,” i na te tata taramo ei ko Davida i tona ruaine anga. (Salamo 37:25) Te inangaro ra te Atua ko Iehova i te aronga tuatua tika e te akono akaperepere ra ia ratou. I roto i tana Tuatua, te Pipiria, kua raurau aia i te aronga akamori mou kia kimi i te tuatua tika.​—Zephania 2:3.

E turanga no te tu tika te tu tuatua tika ma te Atua na te akonoanga i tana au turanga o te meitaki e te kino. Te akamaroiroianga ia tatou kia akatano ki to te Atua anoano, te tou maira te pene 10 o te puka Pipiria o Maseli ki te au akameitakianga puapinga te rekarekaia ra e te aronga te rave akapera ra. I roto i teia te maata anga o te au kai matutu i te pae vaerua, te angaanga tutakianga e te akamerengoanga, e tetai pirianga meitaki ma te Atua e te tangata. Ka akamanako ana tatou, i reira, ia Maseli 10:​1-14.

Tetai Akakeu Anga Meitaki

Te au tuatua akamata anga o taua pene kare e akaruke mai ana i te ekoko anga e koai te tangata tata i nga tuanga o te puka o Maseli. Te na ko ra te reira: “Te au Maseli na Solomona.” Te akatakaanga i tetai akakeu anga meitaki kia aru i te aerenga tika, kua karanga te Ariki ko Solomona o Iseraela taito e: “E tamaiti kite ra, e rekareka anga ïa na te metua tane: kareka te tamaiti neneva ra, e aueanga ïa na tona metua vaine.”​—Maseli 10:1.

Mei teaa ra te mamae maata tei kiteia e te au metua me akaruke tetai o ta ratou uanga i te akamori anga i te Atua mou e te ora! Kua takete te ariki pakari i te tu taitaia o tetai metua vaine, penei kia taiku e te taitaia oonu ra aia. Kua riro teia ei mea tika kia Doris. * Te akakite ra aia: “I te akaruke anga ta maua tamaiti e 21 mataiti i te tuatua mou, kua ati ngakau tikai maua ko taku tane, ko Frank. Kua kino roa toku mamae i to Frank. Kare te pati anga o te 12 mataiti i rapakau i taua mamae anga.”

Ka akakino te tamariki i te tu mataora o to ratou metua tane e ka akatupu i te mii ki to ratou metua vaine. Kia akaari tatou i te pakari e kia apai mai i te rekareka ki to tatou nga metua. E ma te maata atu, kia akarekareka tatou i te ngakau o to tatou Metua i te rangi ra, ko Iehova.

‘Ka Merengo Ua te Vaerua o te Aronga Tuatua-Tika’

“E apinga rauka anga kino ra, kare ïa e puapinga e rauka,” i na te ariki ei, “kareka te mea tika ra, e ora oki te mate i te reira.” (Maseli 10:2) Ki te au Kerititiano mou e noo oonu ra ki roto i te tuatau openga, e au tuatua puapinga teia. (Daniela 12:4) Te vaitata maira te akapouanga o teianei ao manako kore i te atua. Kare e rauka i te turanga tinamou a te tangata​—te materia, te moni, me kare te vaeau​—te oronga mai i te paruru anga a te tuatau o te “mate maata” te vaitata maira. (Apokalupo 7:​9, 10, 13, 14) Ko “te aronga tuatua tika [ua] ka noo ki runga i te enua e ka vai te aronga tiama i reira.” (Maseli 2:21, The New English Bible) Kia akono, i reira, tatou e ‘na mua ra i te kimi i te basileia, e ta te [Atua] tuatua-tika.’​—Mataio 6:33.

Kare te au tavini o Iehova e tapapa atu i te ao ou tei taputouia mai e kite ei i ta te Atua au akameitakianga. “Kare te vaerua o te aronga tuatua-tika e paeua ia Iehova: kareka te apinga a te aronga kino ra, e ravea keia ïa e ia.” (Maseli 10:3) Kua oronga maata mai a Iehova i te au kai pae vaerua na roto i “te tavini akono meitaki e te pakari.” (Mataio 24:45) Papu tikai e au tumu ta te aronga tuatua tika no te ‘imene i te rekareka ngakau ra.’ (Isaia 65:14) E mea mareka anga te kite ki tona meta. Te kimianga i te au apinganui pae vaerua e mea rekaia e ia. Kare tei kino ra i kite i taua tu mareka anga.

 ‘Ka Apingaia tei Maroiroi Ra’

Te akameitakiia ra te aronga tuatua tika na roto i tetai mataara ke. “E putaua tona to tei angaanga ma te rima akatau: kareka te rima o te maroiroi ra, e apinga ïa. Ko tei akaputuputu i te tuatau mou ra, e tamaiti pakari ïa: ko tei moe ua i te mou ra, e tamaiti akatupu akama ïa.”​—Maseli 10:​4, 5.

Ko teia puapinga katoa koia oki ko te au tuatua a te ariki ki te aronga angaanga i te tuatau kokoti anga. Kare te tuatau kokoti anga i te taime moe ua. E tuatau ia no te angaanga maroiroi e te roa. Ae, e tuatau rapurapu ia.

Te manakoanga no runga i te kokoti anga, kare i te ua titona, mari ra i te tangata, kua akakite a Iesu ki tana au pipi: “Te maata ua nei te mou, te iti nei ra te aronga e kokoti: E teianei, e pure kotou i te Atu o te mou [ko te Atua ko Iehova], kia unga mai aia i tetai aronga ei rave i taua mou nana ra.” (Mataio 9:​35-38) I roto i te mataiti 2000, e tere atu i te 14 mirioni tei tae atu ki te Akamaara Anga i te matenga o Iesu​—e taki rua taime te maata i te numero o te Au Kite o Iehova. Koai ka patoi, i reira, e ko “te au koro ra; kua teatea ïa i teianei kua mou”? (Ioane 4:35) Te pati ra te aronga akamori mou i te Pu e kia maata te aronga angaanga koi tauta maroiroi ei ratou uaorai i roto i te angaanga akariro anga i te tangata ei pipi kia rotai ma ta ratou au pure. (Mataio 28:​19, 20) Mei teaa te puapinga ta Iehova akameitaki anga i ta ratou tautaanga! I roto i te 2000 mataiti tavini anga, tere atu i te 280,000 aronga ou tei papetitoia. Te tauta katoa ra teia aronga kia riro mai ei au puapii o te Tuatua a te Atua. Kia kite katoa tatou i te rekareka e te merengo anga i roto i teia tuatau kokoti anga na te rave maata anga i roto i te angaanga akariro anga i te tangata ei pipi.

‘Te Vai ra te Meitaki ki Runga i Tona Upoko’

“Te vai ra te meitaki ki runga i te upoko o te tuatua-tika ra,” i na Solomona ei, “te tapokiia ra te vaa o te aronga kino e te takinga-kino.”​—Maseli 10:6.

Ko tei tiama e te tuatua tika i te ngakau te oronga ra i te akakite anga maata o tona tu tuatua tika. E takinga meitaki e te akamatutuanga tana tuatua, e te papu tikai ra tana au angaanga e te oronga ua. Kua ariki mareka ua tetai iaia. Kua rauka i taua tangata ra ta ratou tu ariki anga​—ta ratou au akameitakianga​—e kua tuatua meitaki ratou no runga iaia.

I tetai tua, ko tetai tangata kino, e tangata riri uaia me kare te akatupu kino ra e te rave akakoro i te kino ki tetai atu. Penei ka tangi anga reka tana tuatua anga e ka ‘tapoki i te takinga-kino’ tei uunaia i roto i tona ngakau, inara i te openga ra ka tuku au aia ki te ta ua me kare te tuatua akakino. (Mataio 12:​34, 35) Me kare ra, “ka tapoki [me kare ka topiri] te ta ua i te vaa o te aronga kino.” (Maseli 10:6, NW tataanga i raro) Te akakite ra teia e te rauka ra i tetai tangata kino mei tetai tana i akaari ra, koia oki ko te tu riri. Kua tapoki teia, mei tera te tu, me kare kua topiri, i tona vaa e kua akamuteki iaia. Eaa te au akameitakianga ka rauka i taua tangata ra mei tetai?

“E akameitakiia te aronga tuatua-tika kia maaraia ra,” i tata ei te ariki o Iseraela, “kareka te ingoa o te aronga kino ra, ka pe ïa.” (Maseli 10:7) Te akamaara mareka uaia ra tei tuatua tika ra e tetai atu, tei puapinga roa e te Atua ko  Iehova. Na tona vai tiratiratu anga e tae ua atu ki te matenga, kua ‘rauka ia Iesu te ingoa maata ua atu i te meitaki’ i te au angera. (Ebera 1:​3, 4) Te akamaaraia ra te au tane e te au vaine tiratiratu i mua ake i te tuatau Kerititiano i teia ra e te au Kerititiano mou ei akaaraanga tau kia aruia. (Ebera 12:​1, 2) Mei teaa te tuke i teia mei te ingoa o te aronga kino ra, tei riro mai ei apinga rikarikaia e te reka kore! Ae, “e ngari ake te rongo meitaki i te apinga maata ra; e te kite meitakiia mai i te ario e te auro ra.” (Maseli 22:1) Kia akono tatou i tetai ingoa marekaia ma Iehova e to tatou au taeake.

‘Te Tangata Apa Kore Tona Aerenga, te Aere ra ïa ma te Mataku Kore’

Te akatukeanga i tei pakari ki tei neneva ra, kua akakite a Solomona: “Tei pakari te ngakau ra, e āriki mai ïa i te akauenga: kareka te neneva tuatua ua ra, ka inga ïa.” (Maseli 10:8) Kua kite meitaki tetai tangata pakari e “kare tei te tangata e aaere nei, i te akono i tona uaorai takainga tapuae.” (Ieremia 10:23) Kua kite aia i te umuumu anga no te kimianga i te arataki anga no ko mai ia Iehova e te ariki ua ra i ta te Atua au akauenga. Ko tei neneva i tona ngutu ra, i tetai tua, kua poka i te marama i teia tuatua. Kua apai mai tana tuatua manako kore i te kino kiaia.

Te rekareka katoa ra tetai tangata tuatua tika i te tu tinamou tei kopaeia e tetai tangata kino. “Tei apa kore tona aerenga, te aere ra ïa ma te mataku kore: ko tei akamingi ra i tona aerenga, e akakiteia ïa. Ko tei kamokamo i tona mata, kua akatupu ïa i te aue: kareka te neneva tuatua ua ra, ka inga ïa.”​—Maseli 10:​9, 10.

E tu tika to te tangata akono tiratiratu i roto i tana au rave anga. Kua rauka iaia te tu ngateitei e te irinaki o tetai atu. E tangata angaanga akaperepereia tetai tangata tu tika e ma te putuputu kua orongaia te au apainga maata. Tona rongo anga tu tika te akono ra iaia kia rauka te angaanga noatu me kare e maata ana te angaanga. Pera katoa, te tauturu ra tona tu tika ki te reva rekaia e te poniaau i te kainga. (Salamo 34:​13, 14) Te tinamou ra aia i roto i tona pirianga ma tetai au mema o tona pamiri. E ua o te tu tiratiratu te tinamou.

E tuke te turanga ma tetai tangata te ka tuku au ki te tu tika kore no te tu noinoi. Penei ka tauta tei akavare ra i te arai i tona tu tika kore ma te tuatua pikikaa me kare ra ma te au akairo o te kopapa. (Maseli 6:​12-14) Te kamo anga o tona nga mata ma te akatupu kino me kare te akakoro akavare penei ka akatupu i te tu riri ki tana au tangata i akavare ra. Inara kare e roaia, kua kiteia te tu pikikaa o taua tangata ra. Kua tata te apotetoro ko Paulo: “Te vai ua nei te ara a tetai papaki tangata, te na mua ra ïa, e taka ua atura; kareka ta tetai papaki, na muri ïa te kitea. Koia katoa te tuatua meitaki a tetai papaki, te kitea uaia nei ïa na mua: e te kore i kitea ra, kare rai e ngaro me uuna.” (1 Timoteo 5:​24, 25) Noatu koai tei o atu ki roto​—me e metua, e oa, e tokorua akaipoipo, me kare tetai taeake​—ka akamaeuia te tu tika kore i te openga ra. Koai ka irinaki i tetai tangata e rongo anga tu tika kore tona?

‘Tona Vaa e Punavai ïa no te Ora’

“Te vaa o te tangata tuatua-tika ra, e punavai ïa no te ora,” i na Solomona ei, “te tapokiia ra te vaa o te aronga kino ra e te takinga-kino.” (Maseli 10:11) Ka  rauka i te au tuatua mei te vaa i te rapakau me kare te akakino. Ka rauka i te reira i te akaou e te akaoraora i tetai tangata, me kare ra ka rauka i te reira i te akamamae iaia.

Te akatakaanga i te akakoroanga i muri ake i te au tuatua tei taikuia, kua akakite te ariki o Iseraela e: “Na te riri e akatupu i te taumāro: kareka te aroa ra, e tapoki ïa i te au ara katoa ra.” (Maseli 10:12) Te akatupu ra te makitakita i te au maro anga i roto i te taiate tangata, te akakeu anga i te putoto anga. Kia akaatea te aronga inangaro ia Iehova i te makitakita mei to ratou au oraanga. Akapeea? Na te monoanga i te reira ma te aroa. “Ka ngaro oki te apa e manganui i te aroa.” (1 Petero 4:8) Ka “tapoki [te aroa] i te au mea katoa,” koia oki “pouroa te au mea kua tapokiia.” (1 Korinetia 13:7; Kingdom Interlinear) Kare te aroa tau i te Atua e tapapa ana i te tu tiama mei te aronga apa ua. Koi kore ei e akakite ua i te au tarevake o tetai, te tauturu ra taua aroa ia tatou kia akangaropoina i ta ratou au tarevake me kua o mai te raveanga kino ki roto. Te akakoromaki ra te aroa i te au akonoanga tau kore i roto i te angaanga orometua, i ta tatou ngai angaanga, me kare i te apii.

Kua tuatua te ariki pakari: “Tei te vaa o te tangata kite ra te tuatua pakari i te kitea anga: e te vai ra te pāpā no te tua o te neneva ra.” (Maseli 10:13) Te arataki ra te tu pakari o tetai tangata marama i tona au takainga. Te au tuatua pumaana tana ka taiku ka tauturu i tetai kia aaere na runga i te ara o te tuatua tika. Kare aia me kare tei akarongo atu kiaia e taki ia ki runga i te ara tika e te maro anga​—te rakau opara anga.

‘E Akaputu ra i te Kite’

Eaa te ka tauturu i ta tatou au tuatua kia riro ei ‘kauvai ki ra i te pakari’ kare i te au tuatua tau kore? (Maseli 18:4) Te pau maira a Solomona: “Te akaputu ra te aronga pakari i te kite: ko te mate ra tei vaitata mai i te vaa o te neneva.”​—Maseli 10:14.

Te umuumu anga mua koia oki kia ki to tatou manako i te kite akamatutuanga o te Atua. Okotai ua tumu o taua kite ra. Kua tata te apotetoro ko Paulo: “Te au tuatua tapu katoa i tataia ra, e mea akauruia mai e te Atua, e e mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra. Kia apa kore te tangata o te Atua, ma te tau tikai i te au angaanga memeitaki katoa ra.” (2 Timoteo 3:​16, 17) Kia taporoporo tatou i te kite e kia ko ki roto i te Tuatua a te Atua mei te mea ra e te kimi ra i te apinganui. Mei teaa te rekarekaanga e te tutakianga o taua kimi anga ra!

E kiteai te pakari i runga i to tatou ngutu, kia itae katoa te kite o te au Tuatua Tapu ki roto i to tatou ngakau. Kua akakite a Iesu ki tana aronga akarongo ra: “E tuku mai te tangata meitaki i te mea meitaki no roto i te putunga meitaki i roto i tona ngakau; e tuku mai te tangata kino te mea kino, no roto i te putunga kino i roto i tona ngakau: no te ki oki o te ngakau i tuatuaʼi te vaa.” (Luka 6:45) No reira, kia akamaaraara putuputu ua tatou no runga i ta tatou e apii ra. E tika, te umuumu ra te apiianga e te akamaaraara anga i te tauta anga, inara mei teaa ra te puapinga anga o taua apiianga ra! Kare e tumu no tetai kia aru i te aerenga kino o te aronga tuatua manako kore i te au manako kino.

Ae, ka rave tetai tangata pakari i tei tika i nga mata o te Atua e kua rauka i te akakeu i tetai na roto i te tu meitaki. Te rekareka ra aia i te orongaanga maata o te kai pae vaerua e e maata tana ka rave i roto i te angaanga puapinga a te Atu. (1 Korinetia 15:58) Ei tangata tiratiratu, te aaere tinamou ra aia e kua rauka to te Atua tu mareka anga. E tikai, e manganui te au akameitakianga a tei tuatua tika. Kia kimi tatou i te tuatua tika na te akatanoanga i to tatou au oraanga ki te au turanga a te Atua no te meitaki e te kino.

[Tataanga Rikiriki i Raro]

[Tutu i te kapi 25]

Tauturu te tu tika i te oraanga pamiri kia mataora

[Tutu i te kapi 26]

‘Ka akaputu te aronga pakari i te kite’