Kia Mou Apa Kore ma te Ki i te Kite

Au Uruoaanga​—Akapapu Anga i te Tu Rekareka o to Tatou Taokotaianga Taeake

KO JOSEPH F. Rutherford e 50 mataiti ra, tei roto i te oraanga kinokino vaitata rai e tai mataiti i muri ake i tetai tapeka anga tau kore, kua tavini rekareka ana ei bellhop. Kua maroiroi aia i te apai i te au kiri kakau e te tauturu anga i te au taeake Kerititiano ki to ratou au pia otera. Tokorua ona nga taeake tei tapekaia i mua ana​—e nga taeake Apiipii Pipiria​—kua oronga i te au tuku anga angaanga no te pia ki tetai pupu maata te tiaki ra i te au ngai noo anga. Te rave ua ia nei te angaanga e tae ua atu ki muri ake te turuaipo. Kua tupu te mataora maata kia ratou pouroa. Eaa oki te atianga?

Ko te 1919 te mataiti, e ko te Aronga Apiipii Pipiria (tei kiteaia i teia tuatau ko te Au Kite o Iehova) kua akaora akaouia mai mei tetai tuatau takinga kino. Kia akaakamaroiroi i to ratou au pupu, kua rave ratou i tetai uruoaanga i Cedar Point, Ohio, U.S.A., mei ia Tepetema 1 ki te 8, i te 1919. Te ra openga o te uruoaanga, kua akarongo meitaki atu tetai pupu 7,000 mataora ra i te Taeake Rutherford i te akamaroiroi tataki tai anga i te aronga uruoaanga ma te tuatua: “E komono kotou no te Ariki o te au ariki e te Atu o te au atu, i te akakitekite anga ki te au tangata . . . i te patireia kaka o to tatou Atu ra.”

I roto i te au tangata o Iehova, te oki ra ki muri te au uruoaanga ki te tuatau o Iseraela taito. (Exodo 23:​14-17; Luka 2:​41-43) Ko taua au akaputuputu anga e au atianga rekareka, i te tauturuanga i te katoatoa tei tae mai kia vai tamou i to ratou au manako ki runga i te Tuatua a te Atua. Pera katoa, te au uruoaanga a te Au Kite o Iehova i teia tuatau kua akatumuia ki runga i te au manako pae vaerua. Ki te aronga akarakara ngakau tae ko taua au akaputuputu anga tu rekareka ra te oronga maira i te tupu anga kare e rauka i te akakoreia e te taokotai ra te Au Kite i roto i te au piri anga ketaketa o te taokotaianga taeake Kerititiano.

Te Au Tauta Anga kia Tae

Kua kite te au Kerititiano o teia tuatau e ko ta ratou au uruoaanga e au tuatau ia no te akamaroiroi anga pae vaerua e te ikuiku anga i roto i te Tuatua a te Atua. Te akamanako ra ratou i teia au uipaanga mamaata ei mea tau ia i te tauturuanga ia ratou kia ‘mou apa kore ma te ki i te kite i te au anoano o te Atua ra.’ (Kolosa 4:12) No reira, kua turu ngakau katoa te Au Kite i teia au akaputuputu anga, i te raveanga i te au tauta anga kia tae ratou.

No etai, kia tae ratou ki taua au uruoaanga te umuumuia ra kia akono i te akarongo e te autuanga i te au arairai anga mei te maunga rai te tu. Ei akatauanga, e tamanako ana i tetai Kite ruaine i Austria. Noatu te toto vene e te anoanoia ra te au patia insulin i te au ra, kua akapapu aia e kia tae aia i te au ra katoatoa o tetai uruoaanga tapere i tona enua. I Initia, ko tetai ngutuare maata o te Au Kite te noo oonu ra i roto i te putaua e ngata tikai kia tae ki tetai uruoaanga. Kua oronga tetai mema o te ngutuare i te tauturu. “Kare e inangaroia kia ngere i te atianga,” tana i karanga ei, “kua oko au i toku nga poe taringa auro ei tutaki i te tere. E atinga puapinga tikai ia, i te mea e kua akamaroiroi mai te taokotai anga e te au kite anga i to matou akarongo.”

I Papua New Guinea, ko tetai pupu kare i papetitoia, e au tangata tei inangaro ra kua tauta pakari kia tae atu ki tetai uruoaanga tapere i te kapitara. Kua aravei atu ratou i tetai tangata i to ratou oire koia te ona o tetai apinga akaoro no te papuriki e kua ui atu e eia moni tana ka tiati i te apai ia ratou ki te uruoaanga. I te mea e aka moni te umuumuia ra e kare e rauka ia ratou, kua tapapa atu ratou i te rave i te angaanga i te are o te tangata, i te akaouanga i tona pia kuki. No reira kua rauka ia ratou i te aere atu ki te uruoaanga tapere e te puapinga anga i te taeanga ki te katoa anga o te porokaramu.

 Kare te ngai mamao i te mea manamanata ki te Au Kite o Iehova te inangaro ra kia tae ki te au uruoaanga. I te 1978, kia tae ki tetai uruoaanga i Lille, i Varani, kua aere atu tetai tereketi mapu no Poland mai e 1,200 kiro mita na runga i te patikara takatakai e ono ra. I te tuatau maana o te 1997, e rua nga Kite no Mongolia mai kua rave i tetai tere e 1,200 kiro mita kia tae ki tetai akaputuputu anga Kerititiano i Irkutsk, i Rutia.

Te Angaanga ra te Taokotaianga Taeake Mou

Te taokotai anga e te taokotaianga taeake ta te Au Kite e akaari ra i ta ratou au uruoaanga kua kitea meitakiia e te aronga akarakara manako tau ra. Kua reka te manganui e kare e papakitai i rotopu i te aronga uruoaanga e te vai ua ra te tu maana tika tikai i rotopu i te aronga tei aravei i tetai e tetai no te taime mua.

I te tuatau i ou akenei i te uruoaanga pa enua i Autireria, kua inangaro tetai arataki o te tere tei aru mai i te au tereketi turoto uruoaanga e tai epetoma ra kia roroa mai te noo anga ma ratou te reka anga i te piri anga kia ratou. No te reka i to ratou aroa e te tu taokotai anga, kare aia e irinaki ana e kua matau meitaki ratou, i te mea e e aronga ke te maata anga ia ratou. Te tae anga ki te tuatau ka akaruke ei aia, kua kapiki atu aia kia ariu mai ratou. Te tuatuaanga kia ratou ei “au tungane e te au tuaine,” kua akamata aia i te akameitaki ia ratou inara kare i rauka i te akaoti, no te mea kua ki aia i te manako ngakau e kua aue atura.

I te 1997, kua rave a Sri Lanka i te uruoaanga tapere mua e toru reo i roto i tetai taitiamu maata. Kua oronga aiteite ia mai te katoa anga o te porokaramu ki roto i te reo Papaa, Sinhalese, e te Tamil. I roto i te ao te maata ra te au maro anga eteniki, ko taua akaputuputu anga e toru reo ra kare i kitea koreia. Kua ui atu tetai akava ki tetai taeake: “Naai e akatere ana i teia uruoaanga​—na te Sinhalese, te Tamil, me kare na te Papaa?” “Kare e na teia au pupu e akatere ana i te uruoaanga,” i pau atu ei te taeake. “Te rave kapitipiti pouroa nei matou i teia.” Kare te tangata akava i irinaki mai. Te kapiti mai anga te au pupu katoatoa o te reo e toru ra no te pure openga e te tangi maata mai anga tetai “Amene” taokotai ra i roto i te taitiamu, kua pokarakara maata mai te aronga uruoaanga. Kare rava e mata maro i roto i te aronga matakitaki. Ae, e akapapu anga rekareka tikai te au uruoaanga no to tatou taokotaianga taeake.​—Salamo 133:1. *

[Tataanga Rikiriki i Raro]