Eaa ra te Mea Puapinga Tikai?

E mea mataora oki te raukaanga mai tetai apinga puapinga tikai. Inara eaa te reira? Ko tetai aka moni? Te oko maata me kare te tuke anga o te poe? Te rongonui e te ngai teitei? E puapinga maata tikai teia ki te au tangata e manganui. Te rauka anga mai ratou ka oronga mai i te au apinga o te oraanga, i te maani anga i te oraanga ei mea puapinga maata atu, me kare ra te akamerengo anga i tetai anoano oonu kia kitea ia e tei rauka mai. Te aruaru ra ainei tatou kia rauka taua au apinga ra, i te manakoanga e ka rauka ia ratou i te akatupu i to tatou au akakoro anga e te au inangaro no te tuatau ki mua?

NO TE tuanga maata, te akatumu ra te au tangata i tetai apinga puapinga ki runga i te akaki anga i to ratou au anoano me kare i te akamerengo anga i to ratou au anoano tangata. Te akaperepere ra tatou i te au apinga te akakeu ra i te manako no te meitaki e te mou anga i te manakonako no tetai tuatau tinamou. Te akaperepere ra tatou i te au apinga te ka apai viviki mai i te akamaru anga, te pumaana, me kare te kite anga. Inara, te tukuanga i te puapinga tei akatumuia ki runga i to tatou au inangaro tauiui ia ra me kare ki te au manako ra e mea tutu ua e e poto ua te akara anga. Ko te tika, kua akanooia te puapinga tika tikai na roto i ta tatou i kite e ko tei anoano maata ravaia e tatou.

Eaa ta tatou e anoano maata ra? Kare tetai apinga ke e puapingaia ma te kore te apinga maata okotai ra​—koia te ora. Me kare te ora, kare tatou e vai mai. Kua tata te ariki o Iseraela taito ko Solomona e: “Kare ra a te aronga i mate ra e tuatua i kitea . . . Kare oki e angaanga, kare e kimianga, kare oki e kite, kare oki e pakari, i roto i te vaarua [e vaarua tanumanga no te tangata].” (Koheleta 9:​5, 10) Me mate tatou, kua maroia tatou kia akaruke i te au apinga katoatoa tei rauka ia tatou. To tatou anoano maata rava, i reira, koia oki kia rauka tetai apinga te ka akaora i to tatou au oraanga. Eaa ra ta te reira ka rave?

Eaa ra te ka Akaora i to Tatou Au Oraanga?

“E akapuanga tei te moni,” i karanga ei te Ariki ko Solomona. (Koheleta 7:12) Me rava te moni, ka rauka ia tatou i te oko mai i te kai e tetai kainga tau. Penei ka rauka i te moni i te tauturu ia tatou kia rekareka i te aere mataora atu ki tetai au ngai mamao. Ka tauturu mai ia i to tatou au anoano me kare e rauka ia tatou i te angaanga akaou no  te ruaine me kare te tu makimaki. E manganui te ka rauka mai me e moni tetai. Inara, kare e rauka i te moni i te akaora i to tatou au oraanga. Kua ako te apotetoro ko Paulo ia Timoteo: “E ako atu i te aronga apinga maata i teianei ao, eiaa ei ngakau teitei, eiaa oki e irinaki i te apinga maata mou kore, ei te Atua ora ra.” (1 Timoteo 6:17) Pouroa te moni i roto i te ao kare e rauka i te oko i te ora no tatou.

E akamanako i te tua o tetai tangata ko Hitoshi te ingoa. Kua utuutuia mei roto mai i te putaua, kua anoano pakari a Hitoshi e kia apinganui. Kua irinaki tikai aia i te mana o te moni e kua manako aia e ka rauka kia oko ia te au tangata ki te reira. I reira kua aere mai tetai tangata ki to Hitoshi ngutupa e kua ui kiaia me kua kite ainei aia e kua mate a Iesu Karaiti nona. Kua akakeu teia ui anga ia Hitoshi kia kite e no te mea kua manako aia e kare tetai tangata i mate nona. Kua aere atu aia ki tetai tuatua Pipiria na te katoatoa e kua poitirere i te akarongo anga i te ako kia ‘meitaki to mata.’ Kua akamarama te vaa tuatua e ko te mata “meitaki” ko tetai ia tei akara mamao e tei akara tikai ki te au apinga vaerua. (Luka 11:34) I te mea e ka angaanga pakari i te moni, kua akamata a Hitoshi i te tuku i te au apinga puapinga pae vaerua na mua i roto i tona oraanga.

Ka oronga katoa mai te au apinga materia kia tatou i tetai tuanga o te tu ngaueue kore e te tu tinamou. Me maata atu ia ka rauka i te akamama mai i to tatou taitaia no runga i to tatou au anoano i te ra tataki tai. Ko tetai are manea i te ngai tangata tupu rekaia ra penei e ka oronga mai kia tatou i tetai manako akatupu anga. Te au kakau manea e tetai motoka memeitaki ra ka oronga mai i te akara mareka anga a etai ke kia tatou.

E akameitakianga ia kia ‘rave i te meitaki no ta tatou katoa ra au angaanga.’ (Koheleta 3:13) E me e toenga tetai penei e ka tauturu ia i to tatou aronga akaperepere ra kia ‘akaangaroi marie ratou, e kaikai, e inu, e kia rekareka ratou uaorai.’ Inara, ka ngaro ke atu te puapinga o te au apinga materia. I roto i tetai akamatakite anga no runga i te noinoi, kua tuatua a Iesu Karaiti: “E maata ua oki to te tangata nei apinga, kare oki tei taua apinga nona ra tona ora.” (Luka 12:​15-21) Te au apinga, noatu te moni me kare te puapinga, kare e akapapu mai i te ora no tatou.

Ei akatauanga, kua akaipoipo a Liz ki tetai tangata manuia i te pae moni. Kua akakite mai aia: “E kainga manea to maua e e rua motoka, e kua tuku rangatira to maua turanga i te pae moni ia maua kia rekareka i te au mea pouroa ta te ao i oronga mai na roto i te au apinga materia . . . Akaraanga tuke ra, te manamanata nei rai au no runga i te moni.” Kua akataka mai aia: “E maata atu te ka ngere ia maua. Te akara anga e ko te maata atu tei rauka ia koe, e iti ua to manako tinamou.”

E puapinga maata katoa tikai te rongonui e te ngai teitei ki te manganui penei e no te mea ka apai mai ratou i te akapaapaa anga e te akangateitei anga. I roto i te ao o teia tuatau ko tetai angaanga manuia e tupu anga vareae ia. Te tatanuanga i te au tareni tukeke me kare te au tu karape penei e ka tauturu ia ia tatou kia maani i tetai ingoa no tatou uaorai. Penei ka akapaapaa etai ia tatou, te akangateitei anga i to tatou au manako, e te taitaia anga kia autu ia to tatou mareka anga. Pouroa teia e mea mataora e te merengo. Inara, i te openga ra, ka ngaro ke atu. Tei ia Solomona te kaka e te mana katoatoa te ka rauka i tetai ariki, inara kua tuatua aue aia: “Kare oki e tamou tikaia te manako anga, to te tangata pakari e to te neneva; e ope rava oki te au mea e vai nei i te akangaropoinaia.” (Koheleta 2:16) Kare te oraanga ei tutaki anga no te rongonui me kare te ngai teitei.

Ko tetai tangata toi ko Celo te ingoa kua ariki i tetai apinga puapinga maata roa atu i te rongonui. Ei tangata karape, kua tau aia no te apiianga te ka akamaata i tona kite karape. Kare i roa ana kua orongaia mai te akapaapaa anga o tana angaanga i roto i te nuti e mei te aronga akaapa ati. E manganui o tana au toi anga kua akaariia i te au oire mamaata o Europa. Kua akakite mai a Celo: “Ka akatika atu au e i tetai tuatau ko te apinga maata roa atu i roto i toku oraanga ko te ati. Inara, kua kitea mai e au e, me aruaru ra au i taku angaanga ka akaaiteia ki te tautaanga i te tavini anga i nga pu toko rua ra. (Mataio 6:24) Kua papu iaku e ko te apinga maata roa atu te ka rauka iaku i te rave koia oki te tutuanga i te tuatua meitaki o te Patireia o te Atua. No reira kua rave au i te iki anga kia akaruke i taku angaanga ei tangata toi.”

 Eaa te Mea Puapinga Maata Roa Atu?

I te mea e kare e aiteanga no tetai apinga ke me kare e puapinga ma te kore te ora, eaa te ka rauka ia tatou te ka oronga mai i te akapapu anga e ka ora ua atu tatou? Kua akamata pouroa mai te ora mei te Atua ia Iehova. (Salamo 36:9) E tikai, “nona oki to tatou ora, e i aaere ei, e i noo ei oki.” (Angaanga 17:28) Kua tuku aia i te ora mutu kore ei apinga aroa ki te aronga tana e inangaro ra. (Roma 6:23) Eaa ra ta tatou ka rave kia rauka mai teia apinga aroa?

Ko te rauka anga te apinga aroa o te ora mutu kore tei runga ia i to tatou piri vaitata anga kia Iehova. No reira, e puapinga maata atu tona mareka anga, i tetai atu apinga ke tei rauka ia tatou. Me rauka mai ia tatou, e manakonako anga to tatou no te mataora tika tika e te mutu kore. Inara, me kare te mareka anga o te Atua, ka aro tatou i te takore anga mutu kore. Te taka meitaki ra, i reira, e ko tetai apinga te ka rauka i te tauturu ia tatou kia rauka mai tetai piri anga meitaki kia Iehova e mea puapinga maata ia.

Ta Tatou ka Rave

Tei runga to tatou manuia anga i te raukaanga mai ia tatou te kite. Te tumu o te kite tika ra ko te Tuatua a Iehova, te Pipiria. Te akakite ua maira ia kia tatou e eaa ta tatou ka rave kia akamareka i te Atua. No reira te anoanoia ra tatou kia mako te apii i te au Tuatua Tapu. Ko tetai tauta anga pakari kia kite tatou katoatoa no runga i te Atua ia Iehova e ia Iesu Karaiti te akatupu ra i te ‘kite te aite anga o te ora mutu kore.’ (Ioane 17:3, NW) Ko taua kite e apinganui ia kia akaperepereia!​—Maseli 2:​1-5.

Te kite tei rauka ia tatou mei roto i te Tuatua a te Atua te tauturu ra ia tatou kia rave i te takainga ka aru mai​—akonoanga i te akarongo i roto ia Iesu Karaiti. Kua akakite mai a Iehova e ko te katoatoa tei aere maira kiaia ka na roto mai ia Iesu. (Ioane 14:6) Te tika anga, “kare rava oki e ora i tetai ke.” (Angaanga 4:12) Te vaira to tatou akaora anga maata, kare i runga i te ‘ario e te auro . . . , mari ra ki runga i te toto apinga maata o te Mesia.’ (1 Petero 1:​18, 19) E mea tau kia akaari tatou i to tatou akarongo na te irinakianga i te au apiianga a Iesu e te aruanga i tana akaraanga. (Ebera 12:​1-3; 1 Petero 2:21) E mei teaa ra te puapinga i tona atinga! Na te taangaanga anga i tona au puapinga te akataka ra i te tuatau mutu kore ki mua no te tangata katoatoa. Me taangaanga kiia te reira no tatou, kua orongaia mai kia tatou te apinga aroa o te puapinga tika tikai o te ora mutu kore.​—Ioane 3:16.

Kua karanga atura Iesu: “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.” (Mataio 22:37) Te aroaanga ia Iehova te aite anga kia ‘akono tatou i tana au akauenga.’ (1 Ioane 5:3) Te umuumu maira tana au akauenga e kia vai takake mai tatou mei te ao, kia tamou i te tu akono tau tikai, e kia turu tiratiratu i tona Patireia. Ko te reira te mataara ta tatou ka “iki i te ora” kare i te mate. (Deuteronomi 30:19, NW) Me ‘ka akavaitata atu [tatou] ki te Atua, ka akavaitata mai aia kia tatou.’​—Iakobo 4:8.

Te akapapu anga i to te Atua ra mareka anga e maata roa atu ia i te au apinganui katoatoa ra o te ao. Ko te aronga tei rauka te reira ko ratou te au tangata apinganui roa atu i runga i te enua! No reira, ka tauta tatou kia rauka mai te puapinga tika o te apinganui​—to Iehova tu mareka anga. E no reira, e tuku ki to tatou ngakau i te ako anga a te apotetoro ko Paulo: “E aruaru atu i te tuatua-tika, i te akono i te atua, i te akarongo, i te anoano, i te akakoromaki, e te maru. Kukumi ua ïa i te kukumianga meitaki ra i te akarongo; e opu atu i te ora mutu kore.”​—1 Timoteo 6:​11, 12.

[Au Tutu i te kapi 21]

Eaa te mea puapinga tikai kia koe? Ko te moni, te au apinga materia, te rongonui, me kare ra ko tetai atu apinga ke?

[Tutu i te kapi 23]

Te anoanoia ra tatou kia mako te apii i te au Tuatua Tapu