Ka Vai Tika Ainei ia Koe te Meitaki o Iehova?

“Ka iri teia katoa nei au meitaki ki runga ia koe, e ka vai tika rai ia koe, kia akarongo koe i te reo o to Atua ra o Iehova.”​—DEUTERONOMI 28:2.

1. Eaa te mea ka akataka e me ka rauka i to Iseraela ra te au akameitakianga me kare te au kino ra?

I TE vaitata anga ki te openga o to ratou aaereanga no te 40 mataiti i te metepara ra, te noo puakapa ra to Iseraela i te ngai Mataataa o Moabi ra. Te vai maira te Enua Taputouia i mua ake ia ratou. I reira kua tata a Mose i te puka o Deuteronomi, tei kapiti ra i te papaanga no te au akameitakianga e te au kino, me kare te au taumaa anga. Me ka ‘akarongo ua atu te au tangata o Iseraela i te reo o te Atua ra o Iehova’ na te akonoanga iaia, ka “vai tika rai” te au akameitakianga ia ratou. Kua aroa Iehova ia ratou ei au “tangata tikai” nona e kua anoano kia akaari atu i tona ririnui no ratou ra. Inara me kare ratou e akarongo tamou marie kiaia, e mea papu e ka tupu mai te au kino kia ratou ra.​—Deuteronomi 8:​10-14; 26:18; 28:​2, 15.

2. Eaa te aiteanga o nga verepa Epera tei uriia ra e “kia akarongo” e ka “vai tika rai” ia Deuteronomi 28:2 ra?

² Te verepa Epera tei uriia ra “kia akarongo” ia Deuteronomi 28:2 te akataka maira i te rave tamou marie anga. Kare te au tangata o Iehova e tika kia akarongo poto ua kiaia i etai atianga; ka tika ratou kia akarongo tamou marie ei aerenga no te oraanga. Ei reira anake te au akameitakianga tu-Atua ra e vai tikai ia ratou. Te verepa Epera tei uriia ra e “vai tika rai” kua akatakaia ei tuatua kimianga e e putuputu te aiteanga “kia opuia” me kare “kia itaeia.”

3. Akapeea e raukai e kia aite atu tatou kia Iosua ra, e eaa teia i puapinga maatai?

³ Kua iki te arataki ngati Iseraela ko Iosua kia akarongo kia Iehova e kia kite oki i te au akameitakianga. Kua tuatua Iosua: “E akataka ana kotou i teianei rā i ta kotou e akamori . . . Kareka au e toku ra ngutuare, e akamori ïa matou ia Iehova.” I te akarongoanga i te reira, kua pau maira taua aronga tangata ra: “Auraka rava ïa tuatua ia matou nei i te akaruke ia Iehova, e te akamori i te au atua ke.” (Iosua 24:​15, 16) No to Iosua ra tu akono meitaki, kua o aia ki roto i te aronga tokoiti ua o tona uki tei tomo atura ki roto i te Enua Taputouia. I teia tuatau, te tu nei tatou ki runga i te tapa no tetai Enua Taputouia tei teitei rava atu​—e enua parataito e maata roa atura te au akameitakianga i to te tuatau ia Iosua ra te tatari maira i te aronga katoa tei akamarekaia mai e te Atua. Ka vai tika mai ainei taua au akameitakianga ra ia koe? Ka rauka ra ia koe me akarongo tamou marie koe ia Iehova. Ei tauturu kia akamaroiroi ia koe kia iki i te rave i te reira, e akamanako ana i te tuatua enua o te iti  tangata Iseraela i taito ra e pera katoa oki te au akatauanga kia apiiia o te aronga tataki tai ra.​—Roma 15:4.

Akameitakianga me Kare e Kino?

4. I te akarongo anga i ta Solomona pure, eaa ta te Atua i oronga kiaia, e akapeea te manako ngakau tau no tatou i taua au akameitakianga ra?

⁴ I te maata anga o te tuatau o to te Ariki ko Solomona ra tutara anga, kua rauka i to Iseraela e maata te au akameitakianga no ko mai ia Iehova ra. Kua rekareka ratou i te tinamou e te maata oki o te au apinga memeitaki ra. (1 Ariki 4:25) Kua riro ta Solomona apinganui ei mea rongonui, noatu kare aia i pati ki te Atua ra no te apinganui. Kareka ra, iaia e ou ra e te kamakura oki, kua pure aia no tetai ngakau akarongo​—ko tetai patianga ta Iehova i oronga atura na te akameitakianga iaia ma te pakari e te maramaanga. Na teia i raukai ia Solomona kia akava tika i te au tangata ra, e te kiteanga i rotopu i te meitaki e te kino. Noatu rai e kua oronga katoa te Atua i te apinganui e te kaka kiaia, ei tangata ou, kua ariki a Solomona i te puapinga maata o te au apinga pae vaerua. (1 Ariki 3:​9-13) Noatu rai me e maata ta tatou apinga i te pae kopapa me kare ra, mei teaa ra to tatou akameitakianga me rekareka tatou i te akameitakianga a Iehova e te apingaia ra oki i te pae vaerua!

5. Eaa tei tupu i te koreanga te au tangata o Iseraela e Iuda ra i te akarongo tamou marie kia Iehova?

⁵ Kua ngere to Iseraela ra i te akaari i te arikianga no ta Iehova ra akameitakianga. No te mea oki kare ratou i akarongo tamou marie kiaia ra, kua rokoia ratou e te au kino tei totouia maira. Na teia i akatupu te reanga to ratou au enemi ki runga ia ratou ra e kua tuikaaia te au iti tangata o Iseraela e Iuda katoa oki. (Deuteronomi 28:36; 2 Ariki 17:​22, 23; 2 Paraleipomeno 36:​17-20) Kua kite mai ainei te au tangata o te Atua ra mei taua mamaeanga ra e ko te au akameitakianga tu-Atua ka vai mai anake ki te aronga tei akarongo tamou marie ra kia Iehova? Kua rauka te tuatau i te toenga o te au ngati Iuda tei oki akaou atura ki to ratou enua kainga i te 537 M.T.N. kia akakite me kua rauka ia ratou te “ngakau ki te pakari” e kua kite i teianei i te umuumuanga kia akarongo tamou marie i te Atua.​—Salamo 90:12.

6. (a) Eaa a Iehova i tono ei ia Hagai raua ko Zekaria kia totou ki tona au tangata? (e) Eaa te kaveinga tei akatutuia e ta te Atua ra tuatua na roto ia Hagai?

⁶ Kua patu te au ngati Iuda tei oki atura ki to ratou enua i tetai atarau e kua akamata i te patu i te iero i Ierusalema ra. Inara i te tu maianga te patoianga maroiroi, kua paruparu to ratou tu totomapu e kua akamutu i te patu anga. (Ezera 3:​1-3, 10; 4:​1-4, 23, 24) Kua akamata katoa ratou i te tuku anga i te tuanga mua ki to ratou uaorai pumaana anga. No reira, kua tono atura te Atua i nga peroveta ko Hagai raua ko Zekaria kia akakaka akaou i te totomapu o tona au tangata no te akamori anga mou. Na roto ia Hagai, kua tuatua atura Iehova: “E kotou e, ko te tuatau ainei teia kia noo kotou ki roto i to kotou au are apapaia ra, e e vaoo tanea uaia teianei are [no te akamori anga]? . . . Ka akamaaraara ana i te kotou na au aerenga. E maata ta kotou i ruru, e iti ra tei apaiia mai; kua kai kotou, kare ra i merengo. . . . E tei rauka iaia te tutaki ra, i rauka ïa no te pute motumotu ra.” (Hagai 1:​4-6) Te tuku atinga i te au aruaru anga pae vaerua no te kimi i te au puapinga kopapa kare ia e akatupu mai i te akameitakianga a Iehova ra.​—Luka 12:​15-21.

7. Eaa ra Iehova i tuatuai ki te au ngati Iuda: “Ka akamaaraara ana i to kotou na au aerenga”?

⁷ No te apuku angaia e te au manako o te au ra tataki tai, kua ngaropoina i te au ngati Iuda ra i te au akameitakianga tu-Atua ra i te tu ua e te au tuatau uua anga ka vai tika rai ia ratou me ka akakoromaki anake ratou i te aerenga no te akarongo i te Atua ra, noatu i te aro anga i te patoi anga. (Hagai 1:​9-11) Mei teaa ra te tau, i reira, te akamaroiroi anga: “Ka akamaaraara ana i to kotou na au aerenga”! (Hagai 1:7) Ko te tika, te akakite atura Iehova kia ratou: ‘E tamanako ana! E akara i te pirianga i rotopu i ta kotou angaanga puapinga kore i te au kainga e te tu tanea o toku are akamori anga.’ I te openga ra kua itae atu te au tuatua akauruia ra a nga peroveta a Iehova ra i te au ngakau o ta raua aronga tei akarongo maira, no te mea kua akamata akaou te au tangata i te angaanga i runga i te iero, te akaotianga i te reira i te 515 M.T.N.

8. Eaa te akamaroiroi anga ta Iehova i oronga ki te au ngati Iuda i te tuatau ia Malaki ra, e no teaa ra?

⁸ I muri iora, i te tuatau o te peroveta ko Malaki, kua akamata akaou te au ngati Iuda ra i te  emiemi i te pae vaerua, tae roa kia oronga i te au atinga ariki koreia ki te Atua. (Malaki 1:​6-8) No reira, kua akamaroiroi atura Iehova ia ratou kia apai mai i te ngauru anga o ta ratou au apinga manga ki roto i tona are vairanga e kia timata iaia kia kite me ka kore aia e kiriti i te au maramarama o te au rangi ra e ka riringi mai i te au akameitaki anga ki runga ia ratou tae roa kia kore e apinga e anoano akaouia. (Malaki 3:10) Mei teaa ra te neneva o te au ngati Iuda ra kia rave angaanga maata no te au apinga tikai ta te Atua ra ka oronga maata atu na ratou naringa oki ratou i akarongo tamou marie ki tona reo!​—2 Paraleipomeno 31:10.

9. Ka akara matatio tatou i te au oraanga o teea nga aronga e toru o te Pipiria ra?

⁹ Kapiti atu ki te orongaanga mai i te tuatua enua o Iseraela, kua tata te Pipiria i tetai papaanga o te au oraanga o te aronga tataki tai e manganui tei rauka ra ia ratou te au akameitakianga tu-Atua me kare te au kino, tei runga i te tika e me kua tamou marie ratou i te akarongoanga ia Iehova e me kare ra. E akara tatou kia kite e eaa ta tatou ka rauka mai mei nga aronga e toru​—ia Boaza, ia Nabala, e Hana. No runga i teianei tu, penei ka anoano koe kia tatau i te puka o Ruta e pera katoa ia 1 Samuela 1:1​–​2:21 e ia 1 Samuela 25:​2-42.

Kua Akarongo Atura Boaza ki te Atua

10. Eaa te tu aiteite o Boaza raua ko Nabala ra?

¹⁰ Noatu rai e kare a Boaza raua ko Nabala i ora ana i te tuatau okotai ra, tei ia raua etai tu aiteite. Ei akatauanga, i noo ana aua tangata ra i te enua o Iuda. E nga tangata enua apinganui raua, e kua rauka ia raua tetai tuatau takake no te akakite i te tu aroa ki etai ke tei ngere ra. Inara ra ka ope te tu aiteite anga i reira.

11. Akapeea ta Boaza akaari anga e i akarongo tamou marie aia ia Iehova ra?

¹¹ Kua ora a Boaza i te tuatau o te au akava o Iseraela ra. Kua akono aia ia etai ke ra ma te akangateitei, e tana aronga rave kokoti anga kua manako akateitei atu iaia ra. (Ruta 2:4) I tona akarongo anga i te Ture, kua akapapu a Boaza e i tana kokoti anga i te mou o tona enua, kua akarukeia tetai ngai na te putaua e te uarere. (Levitiku 19:​9, 10) Eaa ta Boaza i rave i tona kite anga no runga ia Ruta raua ko Naomi ra e te akara anga i to Ruta tu akono tau i te orongaanga no tona metua vaine ongai ruaine ra? Kua oronga aia i te manako anga takake kia Ruta e kua akaue atura i tana au tangata angaanga kia tuku atu iaia kia koi i roto i tana koro ra. Na tana au tuatua e no tana au angaanga aroa, kua akakite a Boaza e koia tetai tangata tau i te pae vaerua ra tei akarongo atura kia Iehova. No reira kua  rauka iaia ta Iehova akaperepere e te akameitakianga oki.​—Levitiku 19:18; Ruta 2:​5-16.

12, 13. (a) Akapeea ta Boaza akaari manako oonu anga no ta Iehova ture no te oko akaouanga? (e) Eaa te au akameitakianga tu-Atua tei vai maira kia Boaza?

¹² Te akakite anga maata rava e kua akarongo tamou marie a Boaza i ta Iehova ra ravenga noinoi kore i tana akonoanga i ta te Atua ra ture no te oko akaouanga. Kua akono a Boaza i tei rauka katoa ra iaia kia akapapu e ko te akatuanga anga a tona kopu tangata​—koia te tane a Naomi kua takake ra, ko Elimeleka​—ka vai rai i roto i te pamiri a Elimeleka. Na na roto i te “akaipoipo anga taokete,” ka akaipoipo tetai vaine takaua i tetai kopu tangata piri vaitata ki tana tane kua mate ra e raukai te akatuanga anga ki te tamaiti te ka anauia mai e raua ra. (Deuteronomi 25:​5-10, NW; Levitiku 25:​47-49) Kua oronga a Ruta iaia uaorai no te akaipoipo anga ei mono ia Naomi, kua topa ra tona mataiti no te anauanga tamariki. I muri ake i te akakore anga tetai kopu tangata piri vaitata o Elimeleka ra kia tauturu ia Naomi, kua rave a Boaza ia Ruta ei vaine nana. Ta raua tamaiti ko Obeda kua manakoia ei anaunga na Naomi e kua riro ei tuanga tau i te ture ra no Elimeleka.​—Ruta 2:​19, 20; 4:​1, 6, 9, 13-16.

¹³ E maata te au akameitakianga tei vai mai kia Boaza ra no tona akonoanga noinoi kore ma te ture a te Atua ra. Na roto mai i tana tamaiti ko Obeda, kua akameitakiia raua ko Ruta ma te tika kia riro ei tupuna no Iesu Karaiti. (Ruta 2:12; 4:​13, 21, 22; Mataio 1:​1, 5, 6) Mei te au akonoanga noinoi kore a Boaza ra, ka kite tatou i te au meitaki te vai tika maira ki te aronga tei akaari ra i te aroa no etai ke e ka akono kia rotai ma te au umuumu anga a te Atua ra.

Kare a Nabala i Akarongo

14. Eaa to Nabala ra tu ei tangata?

¹⁴ Ei tuke anga ma Boaza, kare a Nabala i akarongo kia Iehova. Kua aati aia i ture a te Atua: “E aroa ra koe i to tangata tupu mei toou aroa ia koe uaorai na.” (Levitiku 19:18) Kare a Nabala i tetai tangata manako pae vaerua; ‘e tangata rotoriri ra aia, e te ravenga kikino.’ Noatu rai i tona au tavini kua manako iaia ei “tangata tuatua kino maata.” Te tau ra, tona ingoa, ko Nabala, te aite anga e “neneva,” me kare e “auouo.” (1 Samuela 25:​3, 17, 25) No reira akapeea ta Nabala akono anga i te va mai anga tetai tuatau kiaia kia akaari i te takinga meitaki ki tetai tei ngere ra​—kia Davida, tei akatainuia e Iehova ra?​—1 Samuela 16:13.

15. Akapeea ta Nabala akonoanga ia Davida ra, e i akapeea te tuke anga o Abigaila mei tana tane no runga i teianei tumu?

¹⁵ I te nooanga puakapa a Davida ratou ko tana au tangata i te pae i ta Nabala ra au anana, kare i pati ana i tetai tutaki anga, no te paruruanga mei te aronga keia. “Mei te patu ra ratou ia matou i te ao e te po,” ta tetai tiaki mamoe a Nabala ra i tuatua. I te patianga te au karere a Davida ra no etai kai, i reira, ‘kua kauvae a Nabala ia ratou’ e kua tono atura ia ratou kia aere ke atu kare e apinga i to ratou rima. (1 Samuela 25:​2-16) Kua apai viviki atura te vaine a Nabala, ko Abigaila i etai manga kia Davida. No te veravera i te riri, te vaitata ra a Davida i te aere atu kia tamate ia Nabala e tana au tangata. Inara no to Abigaila viviki i te akono kua akaora i te aronga e manganui e kua akakore i to Davida riroanga kia apa i te toto. Inara ko to Nabala tu noinoi e te rotoriri kua mamao roa te aereanga. E vaitata i te tai ngauru ra i muri akera, kua “taia iorā Nabala e Iehova, mate rava akera.”​—1 Samuela 25:​18-38.

16. Akapeea e raukai ia tatou kia aru ia Boaza e kia kopae ke i te au aerenga o Nabala ra?

¹⁶ Mei teaa ra te tukeanga i rotopu ia Boaza raua ko Nabala! I te mea ka tau tatou kia kopae ke atu i te tu rotoriri e te noinoi oki o Nabala, e aru ra tatou i te tu takinga meitaki e te noinoi kore o Boaza ra. (Ebera 13:16) Ka rauka ia tatou te rave i te reira na te akonoanga i te akoanga a Paulo: “E kia rauka ta tatou ravenga, e takinga-meitaki tatou i te tangata ravarai, kia maata atura ki to te ngutuare o te akarongo ra.” (Galatia 6:10) I teia tuatau, “te au mamoe ke atu” a Iesu, te au Kerititiano e manakonako anga to ratou no te enua, tei ia ratou te tuatau no te raveanga i te meitaki ki te aronga akatainuia o Iehova, te toenga o te 144,000, te ka orongaia te mate kore kia ratou i te rangi ra. (Ioane 10;16; 1 Korinetia 15:​50-53; Apokalupo 14:​1, 4) Te manako maira Iesu i taua au angaanga aroa ra mei te mea rai e kua raveia kiaia uaorai, e te raveanga i teianei au mea memeitaki ka akatupu i te au akameitakianga apinganui a Iehova ra.​—Mataio 25:​34-40; 1 Ioane 3:18.

To Hana Au Timataanga e te Au Akameitakianga

17. Eaa te au timataanga tei aro atura ia Hana, e eaa te tu akono tana i akakite ra?

¹⁷ Kua vai katoa te akameitakianga a Iehova ki te vaine ngakau tae ra kia Hana. Kua noo aia ki te ngai maunga ra o Epheraima ma tana tane ngati  Levi, ko Elikana. Mei tei akatikaia e tei akanoonooia e te Ture ra, e vaine ke atu tana​—ko Penina. Kua vai mai a Hana ei vaine pa, ko tetai tu kino ia no te vaine Iseraela, ko Penina ra e manganui tana tamariki. (1 Samuela 1:​1-3; 1 Paraleipomeno 6:​16, 33, 34) Inara, kare i akapumaana atu ia Hana, kua akono aroa kore ua atura Penina e kua akaongoongo ia Hana tae roa kia tae te roimata e te kore oki e kai. E kino rava atu oki, kua tupu teia i te “au mataiti ravarai,” i te au taime katoa i aere ei te pamiri ki te are o Iehova i Silo. (1 Samuela 1:​4-8) Mei teaa ra te ngakau kino ia Penina, e mei teaa oki tetai timataanga no Hana! Inara, kare a Hana i akaapa ia Iehova; kare katoa oki aia i noo ki te kainga me aere tana tane ki Silo. No reira, i te openga, e mea papu ka vai mai tetai akameitakianga apinganui nona.

18. Eaa te akatauanga tei akanooia maira e Hana?

¹⁸ Kua akanoo mai a Hana i te akatauanga meitaki no te au tangata o Iehova i teia tuatau, e maata oki no te aronga tei mamae ngakau ra no te au tuatua aroa kore a etai ke ra. I roto i taua au turanga ra, kare te akatakake anga ia koe uaorai i te pauanga no te reira. (Maseli 18:1) Kare a Hana i tuku i tona au timataanga kia akameangiti mai i tona anoano kia tae atu ki te ngai e apiiia te Tuatua a te Atua ra e kua akaputu mai ei tona au tangata no te akamori anga. No reira kua vai mairai tona maroiroi i te pae vaerua. Kua akakiteia mai te oonu o tona tu i te pae vaerua i roto i tana pureanga manea tei tataia ra ia 1 Samuela 2:​1-10. *

19. Akapeea tatou i te akakiteanga i to tatou ariki anga no te au mea vaerua ra?

¹⁹ Ei au tavini no Iehova i teia tuatau nei, kare tatou e akamori ana i te tapenakara. Inara, ka rauka ia tatou te akakite i to tatou arikianga no te au mea vaerua, mei ta Hana i rave ra. Ei akatauanga, ka rauka ia tatou kia akaari i to tatou arikianga oonu no te apinganui i te pae vaerua i to tatou aere putuputu anga ki te au uipaanga Kerititiano, te au akaputuputuanga, e te au uruoaanga. E taangaanga tatou i teia au atianga kia akamaroiroi atu i tetai e tetai i te akamori anga mou ia Iehova, nana ra i oronga mai no tatou i te tuatau ‘kia akamori iaia ma te mataku kore, ma te tapu, e te tuatua-tika.’​—Luka 1:​74, 75; Ebera 10:​24, 25.

20, 21. Akapeea a Hana i te tutaki angaia no tona akamori tau i te Atua?

²⁰ Kua akamanakoia atura Iehova i to Hana akamori anga tau i te Atua e kua tutaki maata atura iaia. I tetai aere anga o te pamiri ra i tetai mataiti ki Silo, kua pure akatenga a Hana tei tae ra te roimata ki te Atua e kua tia atura: “E Iehova Sabaota e, kia tika ia koe i te akara mai i te mate o to tavini vaine nei, e kia manako mai koe iaku, kia kore koe e akapoina i to tavini vaine nei, kia oronga maira koe i tetai tamaiti tamaroa na to tavini vaine nei, ei reira au e orongaʼi iaia kia Iehova, e ope rava ake ona puke rā i te ao nei.” (1 Samuela 1:​9-11) Kua akarongo atura te Atua i te patianga a Hana e kua akameitaki atura iaia ma tetai tamaiti, tana i tapa ra ko Samuela. E kia akatopaia e ia te u ra, kua apai atu aia iaia ki Silo e raukai iaia te tavini i te tapenakara ra.​—1 Samuela 1:​20, 24-28.

²¹ Kua akakite a Hana i tona inangaro no te Atua ra e kua akatupu i tana tia kiaia no Samuela ra. E tamanako ana i te akameitakianga maata ta raua ko Elikana i rekareka no ta raua tamaiti akaperepere i te tavini anga i te tapenakara o Iehova ra! E manganui te au metua Kerititiano kua kite i te au rekareka aiteite e te au akameitakianga no te mea kua tavini ta ratou au tamaroa e te au tamaine ei au orometua painia tamou, ei au mema no te pamiri Betela, me kare i roto i etai atu au tu te ka akangateitei ia Iehova ra.

E Akarongo Tamou Marie ia Iehova!

22, 23. (a) Eaa te ka papu ia tatou me akarongo tamou marie tatou i to Iehova reo? (e) Eaa te ka uriuri manakoia i te atikara te aru mai nei?

²² Eaa ta tatou ka papu me akarongo tamou marie atu tatou ia Iehova? Ka riro tatou kia apinganui i te pae vaerua me ka akakite tatou i te inangaro  ma te ngakau katoa no te Atua e ka akatupu oki i to tatou akatapuanga kiaia. Noatu rai me ko te aiteanga no taua aruaruanga e ka tika kia akakoromaki tatou i te au timataanga ketaketa, te papu ra e ka vai mai ta Iehova akameitakianga no tatou​—e putuputu na roto i etai au tu maata atu i ta tatou ka tamanako.​—Salamo 37:4; Ebera 6:10.

²³ E manganui te au akameitakianga ka orongaia ki te au tangata o te Atua i te tuatau ki mua. No te akarongo anga meitaki ia Iehova, ka akaoraia te “aronga maata rava” na roto atu i “te mate maata” e ka kite i te au rekareka anga o te oraanga i roto i te ao ou o te Atua ra. (Apokalupo 7:​9-14; 2 Petero 3:13) Ei reira ka akamerengo ki katoa a Iehova i te au inangaro tuatua tika o tona au tangata katoatoa. (Salamo 145:16) Inara, mei ta te atikara ka aru mai e akaari ra, noatu i teianei te aronga te ka akarongo tamou marie i te reo o Iehova te akameitakiia ra ma ‘te au mea memeitaki e te au mea tika ravarai, no runga ïa.’​—Iakobo 1:17.

[Tataanga Rikiriki i Raro]

Maara Ainei ia Koe?

• Eaa te ka rauka i te tuatua enua o Iseraela kia apii mai ia tatou no te au akameitakianga tu-Atua?

• Akapeea i tuke ei a Boaza raua ko Nabala ra?

• Akapeea e raukai ia tatou kia aru ia Hana ra?

• Eaa tatou ka tau ei kia akarongo tamou marie i te reo o Iehova?

[Au Uianga Apii]

[Tutu i te kapi 10]

Kua pure te Ariki ko Solomona no tetai ngakau akarongo, e kua akameitaki atura Iehova iaia ma te pakari

[Tutu i te kapi 12]

Kua akono atura Boaza ia etai ke ma te ngateitei e te takinga meitaki

[Tutu i te kapi 15]

Kua akameitaki maataia a Hana no te irinakianga ia Iehova