Taokotaiia te Tangata e te Akamori Anga Mou

NOATU te akatakake ra te akonoanga ei mea matauia i te au tangata ravarai, tei te akamori anga i te Atua mou te mana no te taokotai i te tangata. I te riro anga to Iseraela ei iti tangata ikiia e te Atua, e manganui te aronga Kenitara ngakau tae tei ariu atu ki te akamori anga mou. Ei akaraanga, kua akaruke a Ruta i te au atua o tona iti tangata Moabi e kua tuatua atu kia Naomi: “Ko toou iti-tangata, ko toku katoa ïa iti-tangata; e toou ra Atua, ko toku ïa Atua.” (Ruta 1:16) I te tae anga mai ki te anere mataiti mua T.N., kua riro mai tetai au Kenitara e maata te numero ei aronga akamori i te Atua mou. (Angaanga 13:48; 17:4) I muri mai i te akamata anga ta Iesu au apotetoro i te tutaka aere i te au ngai mamao ma te tuatua meitaki, kua taokotaiia mai tetai au tangata ngakau tae ki roto i te akamori anga i te Atua mou. “E to kotou ariu anga mai ki te Atua, mei te au idolo maira, e akamori i te Atua ora e te mou,” i tata ei te apotetoro ko Paulo. (1 Tesalonia 1:9) E mana taokotai ainei to te akamori anga i te Atua mou i teia tuatau?

Kua maro te aronga ekoko e mea tarevake no te tuatua i te “aronga akamori mou” me kare “te Atua mou.” Penei te manako akapera ra ratou no te mea kare ratou i kite i tetai tumu mei te reira ka rauka te tuatua mou i te apiiia. Inara kua kite te aronga kimi i te tuatua mou mei te au ngai ke e kare te akamori anga i tetai mea manako uaia. Ko tei tau ua e kia akamoriia e tatou koia oki ko Tei Anga i te au mea ravarai​—te Atua ko Iehova. (Apokalupo 4:11) Koia te Atua mou, e tei iaia te tika anga no te iki e akapeea aia me akamoriia.

Ei tauturu ia tatou kia kite i tana au umuumu anga, kua komunikeiti mai a Iehova kia tatou na roto i tana Tuatua, te Pipiria. Vaitata rai pouroa te au tangata i te enua nei i teia tuatau kua rauka ia ratou te Pipiria me kare tetai au tuanga o te reira. Pera katoa, kua tuatua te Tamaiti a te Atua: “I tāpu tika kotou i taku tuatua, . . . Ka kite ïa kotou i te tuatua-mou.” (Ioane 8:​31, 32) No reira, ka kiteaia te tuatua mou. E au mirioni ua atu au tangata ngakau tika mei te au akonoanga tukeke te rave mataku kore ra i teia tuatua mou e te taokotaiia nei i roto i te akamori anga mou.​—Mataio 28:​19, 20; Apokalupo 7:​9, 10.

Taokotai Anga i te Ao Katoa i to Tatou Tuatau!

Te akakite ra tetai totou kitea uaia i roto i te puka Pipiria o Zephania no runga i te akaputuputu anga o te au tangata tuke te ngai i aere mai ei. Te na ko ra te reira: “Ei reira oki au [a Iehova] e tuku atu ei i te vaa viivii kore ki te au tangata nei, kia tautopa katoatoa ratou i te ingoa o Iehova; kia tavini atu ratou iaia ma te manako okotai.” (Zephania 3:9) Mei teaa te manea i teia tutu o te au tangata tauiia te tavini taokotai ra i te Atua!

Aea teia e tupu ei? Te na ko maira Zephania 3:8: “E tapapa mai ana ra iaku, te tuatua mairā Iehova, e kia tae ki te rā e tu ei au ki runga i taku e ka noni ra; teia oki taku i akakoro ana e akaputuputu i te pa enua, e uipa mai i te au basileia; kia riringi atu au i toku mainaina ki runga ia ratou, i te vera anga o toku riri kia ope; e pou rava oki te enua katoa nei i te ai ra i toku nei vareae.” Ae, i roto i te tuatau te akaputu ra a Iehova i te au pa enua inara i mua ake ka riringi mai ei aia ki runga ia ratou i tona riri otooto, kua oronga aia ki te aronga maru o te enua i tetai taui anga ma tetai reo viivii kore. Ko teia taua tuatau ra, no te mea te raveia nei te akaputuanga i te au pa enua ravarai i te tamaki o te ra maata o te Atua Mana Katoatoa ia Aramakito.​—Apokalupo 16:​14, 16.

Kia taokotai i tona iti tangata, kua oronga a Iehova i tetai reo viivii kore kia ratou. Te kapiti maira ki roto i teia reo viivii kore te marama meitaki anga i te tuatua mou Pipiria no runga i te Atua e tana au akakoroanga. Te tuatuaanga i te reo viivii kore te kapiti maira i te irinaki anga i te tuatua mou, te apiianga i te reira ki tetai atu, e te noo rotai anga ma te au ture e te au kaveinga a te Atua. Te umuumu maira te reira i te kopae anga i te au poritiki akatakake e te  kiriti tumu anga mai mei te ngakau te au tu noinoi uaorai, mei te iriiri pakiri e te au tu raveanga pa enua akatakake o teia ao. (Ioane 17:14; Angaanga 10:​34, 35) Ka rauka i te aronga ngakau tika te inangaro ra i te tuatua mou i te apii i teia reo. Ka akamanako ana e akapeea te aronga e rima tei taikuia i te atikara i mua ana​—kua akatakakeia i mua ana i te pae akonoanga​—i te taokotai angaia i teianei i roto i te akamori anga i te Atua okotai e te mou, ko Iehova.

Taokotaiia Ratou i Roto i te Akamori Anga Mou

I te oko anga a Fidelia, e vaine akono ua e Katorika Roma, i tetai Pipiria no te angaanga apii a tana tamaine, kua pati atu aia i tona orometua kia akamarama mei te reira e eaa tei tupu ki tana tamariki tei mate e rima ra. “Mei teaa te maromaroa!” i nana ei. No reira i te aravei anga mai te Au Kite o Iehova iaia, kua ui atu aia i tetai ui anga mei te reira rai kia ratou. I te tatau anga mai mei tana Pipiria i te tuatua mou no runga i te turanga o te mate, kua kite mai aia e akapeea te akonoanga i te akavare anga iaia. Kua kite mai aia e kare a tei mate ra apinga i kite e no reira kare e te mamae ra i roto ia Limbo me kare i tetai atu ngai ke. (Salamo 146:4; Koheleta 9:5) Kua titiri pouroa a Fidelia i tana au tiki akonoanga, kua akaruke i te akonoanga, e kua akamata i te apii i te Pipiria. (1 Ioane 5:21) No te ngauru mataiti i topa, kua rekareka ana aia i te apiianga i te tuatua mou Tuatua Tapu ki tetai atu.

Kua neke atu a Tara no Kathmandu mai ki tetai enua i reira te vaira e iti ua te au iero Hindu. No reira kua atoro atu aia i tetai ekaretia Methodist i te manakonakoanga no te akamerengo i tona au umuumu anga i te pae vaerua. Inara kare i kitea e ia te pauanga ki tana ui anga no runga i te turanga mamae o te tangata. I reira kua aravei atu te Au Kite o Iehova iaia e kua tauturu atu no te apii i te Pipiria kiaia. Te akakite ra a Tara: “Kua kite mai au e kare tetai Atua aroa i apa no te au mamaeanga i te ao . . . kua mareka tikai au i te manakonakoanga o tetai ao ou o te au e te rotai anga.” (Apokalupo 21:​3, 4) Kua akaatea a Tara i tana au tiki Hindu, kua akamutu i te aru i te au peu akonoanga a tona enua tangata, e kua kitea te mataora tikai i roto i te tauturuanga no te akamerengo i te au anoano anga i te pae vaerua o tetai atu ei Kite no Iehova.

E tangata totou puapinga a Panya, e tangata irinaki ia Buddha, i te atoro anga te Au Kite o Iehova iaia i Bangkok, no reira kua reka tikai aia i te au totou i roto i te Pipiria. Te na ko maira a Panya: “I te kite mai anga au i te tumu i tuke ei te au turanga i teianei mei tei akakoroia e Tei Anga ra e kua akapapa aia no te akamatara i te kino tei akatupuia e te aronga tei kopae iaia e tona mana ngateitei, mei te mea rai e kua akaateaia tetai arai anga mei toku nga mata. Kua rotai tikai te au tuatua a te Pipiria. Kua inangaro mai au ia Iehova ei peretana; kua oronga mai teia i te akakeu anga kiaku kia rave i taku i manako e mea tika. Kua inangaro tikai au i te tauturu i tetai atu kia kite i te tuke anga i rotopu i te kite pakari o te tangata e te pakari tau i te Atua. Kua taui tikai te pakari mou i toku oraanga.”

Kare i roa atu, kua akamata a Virgil i te ekoko maata no runga i tana au irinaki anga akonoanga. Kare i pure ki te Atua no tetai mataara tauturu i te au tangata kerekere e no tana i manako ei akaaerenga iriiri pakiri e tei akatupu i te makitakita no te aronga teatea, kua pure aia no te tuatua mou, me e eaa oki te reira, e teiea te reira. “I te ara mai anga au i tera mai ra i muri ake i taku pure akatenga anga ki te Atua,” i maara ei a Virgil, “kua kitea e au tetai makatini Punanga Tiaki i roto i te are. . . . Penei kua tukunaia mai te reira i raro i te ngutupa.” Kare i roa atu te apii pakari ra au i te Pipiria ma te Au Kite o Iehova. I nana ei: “No te taime mua i roto i toku oraanga, kua merengo tikai au. . . . Kua iti mai te ata manakonakoanga ki roto iaku.” Kare i roaia kua taokotai atu a Virgil ma te aronga tei oronga ki te au tangata i te manakonakoanga mou anake ua  tei akanooia ki roto i te Tuatua a te Atua, te Pipiria.

Kua umere tikai a Charo no Marike Ratino mai i te kite anga atu tetai Kite ko Gladys tona ingoa e te ngata ra iaia no te akono i tana tamariki rikiriki e kua akamata i te tauturu iaia na te apai anga iaia ki te makete. Kare i roa atu, kua ariki a Charo i tetai oronga anga na Gladys​—tetai apii Pipiria oronga ua. I te apii anga mai a Charo mei tana Pipiria e kare te au tangata meitaki pouroa e aere ki te rangi e ka akameitaki katoa a Iehova i te au tangata i te enua nei ma te ora mutu kore, kua poitirere tikai aia. (Salamo 37:​11, 29) Kua akakite ana a Charo i teia manakonakoanga ki tetai atu no tetai 15 mataiti i topa.

Ka akamanako ana i te katoa anga o te au enua i te noo angaia e te au tangata ngakau tae tei taokotaiia i roto i te akamori anga ia Iehova, te Atua mou anake! Kare teia i te moemoea. Ko teia ta Iehova i taputou ana. Na roto i tana peroveta ko Zephania, kua akakite te Atua: “E vaoo ra au i roto ia koe i te au tangata akaaka e te ao, e ka irinaki ratou i te ingoa o Iehova. Kare . . . e rave i te kino; kare oki ratou e tuatua i te tuatua pikikaa; kare oki e arero pikikaa e kitea i roto i to ratou vaa; . . . e kare ua tetai e akamataku mai.” (Zephania 3:​12, 13) Me te reka ra koe i teia taputou, e tamou ngakau i ta te Pipiria raurau anga: “E kimi ia Iehova, e te aronga akaaka ravarai o te enua nei, ko tei rave i te tuatua-tau nana ra; e kimi i te tuatua-tika, e kimi i te akaaka, peneiake kotou ko te uunaia i te rā e riri ei a Iehova ra.”​—Zephania 2:3.