Akapeea e Raukai ia Koe Kia Tauturu i Tetai Tamaiti “Kaimoumou”?
Akapeea e Raukai ia Koe Kia Tauturu i Tetai Tamaiti “Kaimoumou”?
‘Kia rekareka ko to teina i ngaro ana, e kua kitea mai nei.’—LUKA 15:32.
1, 2. (a) I akapeea te akono anga a tetai papaki tamariki ki te tuatua mou Kerititiano ra? (e) Penei e akapeea te manako ngakau o te au metua e te tamariki i taua au turanga ra?
“TE AKARUKE nei au i te tuatua mou!” Mei teaa ra te poitirereanga te nga metua mataku i te Atua tei tauta pakari ra kia akono ake i ta raua tamariki i roto i te oraanga Kerititiano kia akarongo atu i teianei au tuatua mei ko mai i te tamaiti ra! Ko etai atu mapu kua “topa ua” kare tikai e akakite ana i to ratou au manako. (Ebera 2:1) E manganui to ratou i akatutu maira i te tamaiti kaimoumou i te parapore a Iesu, tei akaruke ra i te are o tona metua e kua kaimoumou atura i tana tuanga i te enua mamao ke ra.—Luka 15:11-16.
2 Noatu rai e kare e maata te Au Kite o Iehova ra i rokoia e teianei manamanata, no te aronga ra tei rokoia, kare e au tuatua akapumaana te ka takore takiri atu i to ratou mamae ngakau. E kare oki e tau kia manako koreia te tu mataora kore te ka tupu ki taua mapu akono tau kore ra. I roto oonu iaia ra, penei ka akataitaia tona akava ngakau iaia. I te parapore a Iesu ra, i te openga ko te tamaiti kaimoumou ra kua “rako tangata maira aia,” e kua rekareka tona metua. Akapeea e raukai i te au metua e etai atu i roto i te putuputuanga ra kia tauturu i te aronga tamariki kaimoumou ra ‘kia rako tangata mai ratou ra’?—Luka 15:17.
Eaa Tetai Papaki i Iki Ei kia Akaruke
3. Eaa etai tumu i iki ei te au tamariki kia akaruke i te putuputuanga Kerititiano ra?
3 E au anere ua atu tauatini o te aronga ou te mataora nei i te tavini ia Iehova i roto i 2 Timoteo 4:10) Me kare penei te akamanako ra ratou e arairai maata rava te koro paruru anga a Iehova ra. Tetai akava ngakau apa, te akainangaro anga i tetai tamaiti me kare tamaine, me kare te anoano kia arikiia mai e te au oa o tona mataiti ka akariro katoa ei tumu no te topa ua mei te anana a Iehova ra. Penei ka akamutu ua te mapu i te tavinianga i te Atua no te akara anga pikikaa ua te tuanga a tona nga metua ra me kare etai atu Kerititiano ra.
te putuputuanga Kerititiano. Eaa ra, i reira, i akaruke ei etai atu aronga ou ra? Penei te manako ngakau ra ratou e te ngere ra ratou i etai apinga te orongaia maira e teianei ao. (4. Eaa te tumu putuputu te akariro ra i te aronga ou kia aere ke?
4 Te au tu manako meameaau e te tu akono o te tamaiti ra e akakiteanga i te tu paruparu i te pae vaerua, i to roto i tona ngakau. (Maseli 15:13; Mataio 12:34) Noatu eaa te tumu no te aere ke anga tetai mapu, te aka no taua manamanata ra e putuputu te vaira i tona kore anga i “te kite i te tuatua-mou.” (2 Timoteo 3:7) E maata atu i te aerenga na roto i te au rave anga ua no te akamorianga ia Iehova, e mea puapinga maata kia tatanu te aronga ou ra i tetai pirianga vaitata kiaia ra. Eaa te ka tauturu ia ratou kia rave i te reira?
E Akavaitata Atu ki te Atua
5. Eaa te umuumuia ra no tetai tangata ou kia tatanu i tetai pirianga nona uaorai ma te Atua ra?
5 “E akavaitata atu ki te Atua,” ta te pipi ko Iakobo i tata, “e nana e akavaitata mai kia kotou na.” (Iakobo 4:8) Kia rave i te reira, ka tika kia tauturuia tetai tangata ou kia tatanu i tetai tongi anga no te Tuatua a te Atua ra. (Salamo 34:8) I te akamata anga ka umuumuia te “u” nana—koia te apiianga tumu o te Pipiria. Inara iaia ka mareka i te Tuatua a te Atua ra e ka anoano i tetai tongianga no “te kai pakari”—koia te akakiteanga oonu i te pae vaerua ra—kare e mamao atu te pakari pae vaerua nona i reira. (Ebera 5:11-14; Salamo 1:2) Ko tetai mapu tei akatika ra e kua apukuia aia i te aerenga o teianei ao kua akamata i te ariki i te au puapinga pae vaerua. Na teaa i tauturu iaia kia ariu mai? I te ariu anga ki tetai taiku anga kia tatau i te katoa anga o te Pipiria, kua rave aia i tetai tatauanga putuputu i te Pipiria ra. Ae, i te tatau putuputuanga i te Tuatua a te Atua e mea maata ia no te tatanuanga i te tatua piri vaitata ma Iehova.
6, 7. Akapeea e raukai i te au metua ra kia tauturu i ta ratou tamariki kia akatupu i te inangaro no te Tuatua a te Atua ra?
6 Mei teaa ra te puapinga maata e kia tauturu te au metua i ta ratou tamariki kia tatanu i te inangaro no te Tuatua a te Atua! Noatu rai te raveanga i te apii putuputu na te pamiri, kua taokotai atu tetai tamaine mapu ma te aronga akono tau kore ua. No tana apii pamiri, te maara ra iaia: “Me ui mai taku Metua i te au uianga, kua tatau ua atu au i te au pauanga, kare au i akara atu i tona mata.” Kare e kia tatau ua i te au tataanga i te tuatau o te apii a te pamiri ra, ka akono te au metua pakari i te apii marie anga atu. (2 Timoteo 4:2) No tetai mapu kia rekareka i te apii anga, ka tika aia kia manako ngakau e te o atura aia ki roto. Eaa ka kore ei e ui atu i etai au uianga manako tika atura e tuku nana e akakite iaia uaorai? E akamaroiroi atu i te tangata ou ra kia akataka tau mai i te tumu te uriuri ia ra. *
7 Pera katoa oki, e akariro i te uriurianga Tuatua Tapu ra kia oraora. Me ka tau, e akono na te aronga ou ra e akakite atu te au tupuanga Pipiria ra e te au nuku. E tauturu atu ia ratou kia kite manako i te ngai e te au tu no te enua i tupu ei taua au mea i uriuriia ra ki reira. Te taangaanga anga i te au mapu e te au papaanga penei ka tauturu ia mai. Ae, ma tetai tamanako anga meangiti, ka rauka kia akariro i te apii a te pamiri ra kia oraora mai e kia tuke tuke oki. Ka meitaki katoa oki te au metua kia akara matatio i to ratou uaorai pirianga ma Iehova ra. Ia raua uaorai ka akapiri vaitata atura kia Iehova, ka tauturu katoa raua i ta raua tamariki kia pera katoa oki.—Deuteronomi 6:5-7.
8. Akapeea te pure i te tauturu anga i tetai kia akapiri vaitata atu ki te Atua?
8 Te tauturu katoa ra te pure i tetai kia akapiri vaitata atu ki te Atua. Tetai tamaine koi tomo ua atura ki roto i te au mataiti o tona mapu anga kua manako ngakau e te kika keia ra aia i rotopu i te aerenga oraanga Kerititiano e tona taokotai anga ma te au oa kare ra i piri atu ki tona akarongo. (Iakobo 4:4) Eaa tana i rave no te reira tu? “No te taime mua rava,” tana i akakite, “kua pure tikai au kia Iehova no toku tu manako ngakau ra.” Kua manako taopenga aia e kua pauia mai tana pure i te kitea anga e ia i roto i te putuputuanga Kerititiano ra tetai oa tana ka irinaki atu. I te manako ngakau anga e kua arataki mai a Iehova iaia, kua akamata aia i te patu i tetai pirianga nona uaorai ma te Atua ra. Ka rauka i te au metua kia tauturu atu i ta ratou tamariki na te akameitaki maianga i te tu o ta ratou uaorai au pure. Me te pure ra ei pamiri, ka rauka i te au metua kia riringi atu i to ratou ngakau kia manako ngakau ei ta ratou tamariki i te tatua i rotopu i to ratou au metua e Iehova oki.
Kia Akakoromaki Inara kia Ngaueue Kore
9, 10. Eaa te akatauanga ta Iehova i akanoo mai i te akakoromakianga roa ma to Iseraela tei aere ke ra to ratou manako?
9 Me akamata tetai mapu i te topa ua atu, penei ka tauta aia kia akataka ke iaia uaorai e kia arai i te au tauta anga a tona au metua kia rave i tetai uriurianga pae vaerua kiaia. Eaa ta te au metua ka rauka kia rave i taua turanga taitaia ra? E akamanako ana i ta Iehova i rave ma to Iseraela taito ra. Kua akakoromaki aia ma to Iseraela “kaki ketaketa” tere atu i te 900 mataiti i mua ake i te akarukeanga ia ratou ki to ratou ra arataa tau kore. (Exodo 34:9; 2 Paraleipomeno 36:17-21; Roma 10:21) Noatu rai ta ratou ‘akakokoanga putuputu iaia,’ e “ki i te aroa” a Iehova kia ratou. “Kua akaoki putuputu ra aia i te riri nona ra, kare oki tona riri i akaope takiriia.” (Salamo 78:38-42) E apa kore te Atua ra i tona akonoanga ia ratou. Ka aru nga metua aroa ra ia Iehova e ka akakoromaki me kare te tamaiti ra e akarongo viviki ki ta raua tauta anga kia tauturu atu iaia ra.
10 Ko te akakoromakianga roa, me kare te tamou marie, kare te aiteanga e e “akakoromakianga roa ua”; te akakite maira i te kore anga e tuku ua i te manakonako anga katoa no te akameitaki anga mai i tetai pirianga pekapeka ra. Kua akanoo maira Iehova i tetai akatauanga e akapeea te akakoromakianga roa. Kua rave aia i te akamata anga na te tonoanga i tana au karere ki to Iseraela ra e “kare i tukumoe i te tono anga.” “No te mea te aroa ra [Iehova] i tona iti-tangata,” noatu rai e “kua taitoito ra ratou i te au karere a te Atua, e kua akavaavaa i tana tuatua.” (2 Paraleipomeno 36:15, 16) Kua pati atura aia ki to Iseraela, i te na koanga: “Ka ariu mai ana kotou katoa i tenana i tona ra aerenga kino.” (Ieremia 25:4, 5) Inara, kare a Iehova i tuku ua i tana au kaveinga tuatua tika. Kua apiiia atu to Iseraela ra “ka ariu mai ana” ki te Atua e ki tona au turanga.
11. Akapeea e raukai i nga metua te akakoromakianga roa mari ra kia ngaueue kore i te akonoanga i tetai tamaiti te aere ke ra?
11 Ka rauka i te au metua te aru ia Iehova i te akakoromakianga roa na te kore anga e akaruke viviki ua i te tamaiti te aere ke atura. Ma te kore e ngere i te manakonako anga, ka rauka ia ratou te rave i te tamata anga kia akatuera i te komunikeiti anga me kare kia akanoo akaou i te komunikeiti anga. I te mouanga ki te au kaveinga tuatua tika ra, ka rauka ia ratou kia pati i te tamaiti ra e “kare i tukumoe” kia oki akaou mai ki te aerenga no te tuatua mou ra.
Me Akaateaia Tetai Kare ra i Pakarikari Mai
12. Eaa te apainga a nga metua ki tetai tamaiti kare i pakarikari mai e noo ra kia raua mari ra kua akaateaia mai i te putuputuanga?
12 Ka peea me ka o atu tetai kare ra i pakarikari mai ki roto i te ravenga tarevake kino ra tei noo ra ma tona nga metua e no tona tu tataraara kore kua akaateaia mai mei te putuputuanga ra? I te mea e te noo ra taua tamaiti ra i tona nga metua, te vaira ia raua te apainga no te apiianga e te akoanga iaia kia rotai ma te Tuatua a te Atua. Akapeea ra te rave anga i teia?—Maseli 6:20-22; 29:17.
13. Penei ka akapeea nga metua i te tauta anga kia itae i te ngakau o te anaunga tei tarevake ra?
13 Penei ake—ka tika, e ka meitaki atu—kia oronga i taua apiianga ra e te akoanga i te tuatau te apii ra ko korua anake i te Pipiria. Ka tika te metua kia akara mamao atu i te tu manako ketaketa o te tamaiti ra e kia tauta kia kite eaa tei roto i tona ngakau. Eaa te tu atea katoa o tona ra maki i te pae vaerua? (Maseli 20:5) Ka rauka ainei kia itaeia te tuanga maru o tona ngakau ra? Eaa te au tuatua tapu te ka rauka kia taangaanga meitakiia? Te akapapu maira te apotetoro ko Paulo kia tatou: “E mea ora oki te tuatua a te Atua, e te ririnui, e kokoi maata oki to te reira i to te koke matarua ra, e te koputa mama takiri anga oki e taka ke ua atu te vaerua e te ngakau, e te paunga e te uo ivi ra; e te akara matariki oki i te manako e te vananga o te ngakau ra.” (Ebera 4:12) Ae, ka rauka i te au metua kia rave maata atu i te tuatua ua ki ta ratou anaunga e auraka e o akaou atu ki te raveanga tarevake ra. Ka rauka ia ratou kia tauta i te tamata e te utuutu oki i te rapakauanga.
14. Eaa te takainga mua ka tau tetai mapu rave tarevake ra ka akono kia akaora i tona pirianga kia Iehova, e akapeea nga metua i te tauturu anga i taua tamaiti ra kia rave i taua takainga?
14 Te anoanoia ra tetai mapu tei apa ra kia akaora i tona pirianga ma Iehova ra. Te takainga mua tana ka rave koia oki kia “tataraara . . . e e ariu mai.” (Angaanga 3:19; Isaia 55:6, 7) I te tauturuanga i te aronga mapu i roto i to ratou ngutuare kia tataraara, ka tika te au metua ‘kia akakoromaki marie ia ratou i te kino, ma te apii anga maru’ oki i te tamaiti kare ra i te tu akaperepereia. (2 Timoteo 2:24-26) Ka tau ratou kia “ako” atu iaia i te tu Pipiria. Te tuatua Ereni tei uriia ra e “ako” ka rauka katoa kia uriia e ‘oronga anga i te akakite papu.’ (Apokalupo 3:19; Ioane 16:8) No reira, kia ako atu, te kapiti ra i te akaarianga kia rava te kite anga kia akapapu ki te tamaiti ra i te tu ara o tona aerenga. E tika, kare i te mea ngoie ua te raveanga i te reira. I te ngai ka rauka, kia akauru atu nga metua ki tona ngakau, na te taangaanga anga i te au Tuatua Tapu tau kia akakeu atu iaia. Ka tau raua kia tauta i te tauturu iaia kia ariki i te umuumu anga kia “rikarika i te kino, e kia inangaro i te meitaki.” (Amosa 5:15) Penei ka oki mai aia kia ora aia “i te ereere a te diabolo ra.”
15. Eaa te tuanga ta te pure ka rave i te akaoraanga i te piri anga o tetai tei apa ra kia Iehova?
15 I te akaoraanga i te pirianga o tetai ma Iehova ra, e mea tika ra kia pure. Inara, kare tetai e tau kia “pure” no tetai tei rave akakoro ra i te ara tei taka tika ra e kua rave tataraara koreia e tetai tangata tei taokotai atu i mua ana ma te putuputuanga Kerititiano ra. (1 Ioane 5:16, 17; Ieremia 7:16-20; Ebera 10:26, 27) Inara, ka rauka i nga metua kia pati kia Iehova kia oronga atu i te pakari kia akono i taua turanga ra. (Iakobo 1:5) Me ka akakite tetai mapu tei akaateaia i te tu tataraara inara ‘te akaapa ra tona ngakau iaia ki te Atua’ penei ka pure tona nga metua e me kite mai te Atua i tetai tumu no te akakore anga i te ara a taua tamaiti ra, e kia raveia Tona anoano. (1 Ioane 3:21) Na te akarongoanga i teianei au pure ka tau kia tauturu i taua mapu ra kia akara ia Iehova ei Atua aroa ra. *—Exodo 34:6, 7; Iakobo 5:16.
16. Akapeea e raukai ia tatou te tauturu atu i te au mema pamiri no te tamariki kare i pakarikari mai tei akaateaia ra?
16 Me ka akaateaia tetai mapu papetitoia ra, ka manakoia mai te au mema o te putuputuanga ra ‘kia kore ratou e kapiti atu’ kiaia. (1 Korinetia 5:11; 2 Ioane 10, 11) Penei na teianei e tauturu iaia i te openga ‘kia rako tangata mai’ e kia oki akaou mai ki te koro paruruia a te Atua ra. (Luka 15:17) Inara, me ka oki mai aia e me kare, ka rauka i te au mema o te putuputuanga ra kia akamaroiroi atu i te pamiri o te mapu tei akaateaia ra. Ka rauka ia tatou katoatoa kia kimi no te au tuatau kia akaari i “te aroa katoa anga” e kia “ngakau maru” kia ratou ra.—1 Petero 3:8, 9.
Akapeea e Raukai ia Etai Ke i te Tauturu
17. Eaa ta te au mema putuputuanga ka tau kia tamou i to ratou manako i te tautaanga kia tauturu i tetai tamaiti te aere ke ra?
17 Akapeea oki tetai mapu kare ra i akaateaia mai i te putuputuanga Kerititiano ra mari ra kua riro kia paruparu i te akarongo? “Kia mamae tetai melo ra,” ta te apotetoro ko Paulo i tata, “e mamae katoa te au melo ravarai ma [ia katoa].” (1 Korinetia 12:26) Ka rauka i etai katoa ra kia akamanako atu i taua mapu ra. Inara, te umuumuia ra tetai matakite anga, i te mea ka rauka i tetai mapu te makiia ra i te pae vaerua kia mana tau kore atu ki etai aronga ou ra. (Galatia 5:7-9) I roto i tetai putuputuanga, kua anoano etai aronga kua pakari kia tauturu atu i etai mapu tei riro ra kia paruparu i te pae vaerua kua pati atu ia ratou kia akaputu atu i te akatangi anga i te au imene tei matauia ra. Inara noatu e kua papa ua taua aronga mapu ra e kua rekareka i taua au kapitianga ra, i te openga kua taki atu to ratou mana ki runga i etai ra kia tipu i to ratou pirianga ma te putuputuanga ra. (1 Korinetia 15:33; Iuda 22, 23) Eaa te ka tauturu i taua tamaiti makiia ra, kare ko te auakaputuanga tamataora ra ma te kore ua e arataki anga pae vaerua, mari ra ko te taokotai anga te ka tauturu iaia kia tatanu i te tongi anga no te au apinga vaerua ra. *
18. Akapeea tatou i te aru anga i te tu akono o te metua o te tamaiti kaimoumou i roto i te parapore a Iesu ra?
18 Me ka oki mai tetai mapu tei akaruke ra i te putuputuanga ki te Are Uipaanga Patireira me kare ka aere mai ki tetai akaputuanga, e tamanako ana e akapeea tona manako ngakau. Kare ainei tatou e tau kia akaari i te tu akono turou atu a te metua o te tamaiti kaimoumou i te parapore a Iesu ra? (Luka 15:18-20, 25-32) Kua tuatua tetai mapu tei akaruke ra i te putuputuanga Kerititiano e i muri akera kua aere atu ki tetai uruoaanga tapere: “Kua manako au e kare te au tangata ravarai e manako mai i tetai peretana mei iaku nei, inara kua aravei mai te au taeake e te au tuaine iaku e kua turou mai oki iaku. Kua akatukia oonuia mai toku ngakau.” Kua akamata akaou aia i te apiianga i te Pipiria e kua papetitoia i muri akera.
Auraka e Akamutu Ua
19, 20. Eaa tatou i tau ei kia tamou marie i te tu akono papu no tetai tamaiti kaimoumou ra?
19 I te tauturuanga i tetai tamaiti “kaimoumou” ‘kia rako tangata mai’ te umuumuia ra te akakoromaki anga e ka riro ei akaaoanga ki nga metua e ki etai atu oki. Inara auraka e akamutu ua. “Kare ua te Atu i akaroaroa i tana i tuatua maira, mei ta tetai pae e karanga ra e, e akaroaroa; e akakoromaki maata ra tona ia tatou, kare rava e anoano e kia mate atu tetai, kia rauka katoatoa ra te tataraara.” (2 Petero 3:9) Tei ia tatou te akapapu anga Tuatua Tapu e te anoano ra a Iehova kia tataraara te au tangata e kia ora oki. Ko te tika, e kua tamata aia i te akapapa i tetai akanoonooanga kia akaongi mai i te au tangata kiaia uaorai. (2 Korinetia 5:18, 19) Kua akariro tona akakoromaki anga kia rauka kia rako tangata mai te aronga e au mirioni ua atu.—Isaia 2:2, 3.
20 Kare ainei e tau te au metua, i reira, kia taangaanga i te ravenga Tuatua Tapu ravarai kia tauturu i ta ratou tamaiti kaimoumou kia rako tangata mai? I te aruanga ia Iehova, e akakoromakianga roa ia koe e rave ra i te au takainga papu kia tauturu i taau tamaiti kia oki akaou mai kia Iehova. E mou ngaueue kore i te au kaveinga Pipiria, e tauta oki kia akaata i to Iehova ra au tu aroa, te tuatua tau, e te pakari ia koe e pure ra kiaia no tana tauturu. Mei te aronga meameaau ketaketa e manganui tei akarongo ra ki ta Iehova patianga aroa kia oki mai, peneiake taau tamaiti me kare te tamaine kaimoumou ra ka oki akaou mai ki te anana paruruia a te Atua ra.—Luka 15:6, 7.
[Au Tataanga Rikiriki i Raro]
^ para. 6 No etai atu manako e akapeea te apii meitaki i te aronga ou ra, e akara i Te Punanga Tiaki, Tiurai 1, 1999, kapi 13-17.
^ para. 15 Kare taua au pure ra e orongaia i te ngai tangata no tetai tamaiti akaateaia ra i te au uipaanga putuputuanga ra, i te mea penei kare etai i kite i te turanga o te peretana tei akaateaia ra.—E akara i The Watchtower, o Okotopa 15, 1979, kapi 31.
^ para. 17 No te au manako akatakaia, e akara i te Awake! Tiunu 22, 1972, kapi 13-16; Tepetema 22, 1996, kapi 21-3.
Maara Ainei ia Koe?
• Penei eaa te tumu no te manamanata i akaruke ei te au mapu i te putuputuanga?
• Akapeea e raukai kia tauturu i te tamariki kia tatanu i tetai pirianga ma Iehova ra?
• Eaa nga metua i tau ei kia akono i te akakoromakianga roa mari ra kia ngaueue kore i te tauturuanga i te tamaiti kaimoumou ra?
• Akapeea e raukai i te aronga i roto i te putuputuanga kia tauturu atu i tetai mapu kaimoumou ra kia oki akaou mai?
[Au Uianga Apii]
[Tutu i te kapi 15]
Te pure ngakau tae a nga metua ka tauturu i ta raua tamariki kia kite i te tatua i rotopu i nga metua e Iehova ra
[Tutu i te kapi 15]
E puapinga maata te tatauanga i te Tuatua a te Atua no te tatanuanga i te tatua piri vaitata ma Iehova
[Tutu i te kapi 17]
E turou atu i tetai tamaiti kaimoumou ra me ka ‘rako tangata mai aia ra’
[Tutu i te kapi 18]
E rave i te au takainga papu kia tauturu i taau tamaiti kia oki mai kia Iehova