Akarongo Mou​—Ka Rauka Ainei?

“E irinaki anga oraora e te mataku kore te akarongo i roto i te ngateitei o te Atua, e mea papu e te tinamou tikai kua tuku au tei irinaki ra i tona oraanga no te reira e tauatini taime.”​—MARTIN LUTHER, 1522.

“No te au anoano e te au akakoroanga kua rauka ia tatou tetai taiate tinamou i roto i teia i te akaraanga te ngaro nei te akarongo Kerititiano.”​—LUDOVIC KENNEDY, 1999.

TE TUKE maata ra te au manako no runga i te akarongo. I te tuatau i topa, kua riro ei mea matauia te akarongo i te Atua. I teia tuatau, i roto i te ao ekoko e te mamaeanga, te ngaro viviki nei te akarongo mou i te Atua e i roto i te Pipiria.

Akarongo Mou

Ki te manganui, te aiteanga o te “akarongo” koia oki kia rauka te irinaki anga akonoanga me kare te aruanga i tetai tu akamori anga. Inara, mei tei taangaangaia i roto i te Pipiria, te aiteanga tikai o te “akarongo” koia oki ko te irinaki pu tikai​—ki katoa, e irinaki ngaueue kore i roto i te Atua e tana au taputou. E tu ia te akairo ra i tetai pipi a Iesu Karaiti.

I tetai atianga, kua tuatua a Iesu Karaiti no runga i te anoano kia pure e “auraka e maromaroa.” I te rave akapera anga, kua ui mai aia i tetai uianga me ka vai rai te akarongo mou i to tatou tuatau. Kua ui aia: “Kia tae maira te Tamaiti a te tangata nei, e kitea ainei e ia [“teia,” NW] akarongo i te enua nei?” Eaa ra aia i ui ei i taua ui anga?​—Luka 18:​1, 8.

Ngaro te Akarongo

E manganui te au apinga ka akatupu i te tangata kia akangaro i to ratou akarongo. I roto i teia te vaira te mamae anga e te au timata anga o te ora anga i te au ra. Ei akaraanga, e orometua te Poropeta ko Michael Goulder i Manchester, England, i te tuatau o te tumatetenga pairere 1958 Munich i roto i te reira e manganui te pupu tueporo Manchester United tei mate. I roto i tetai porokaramu tivi BBC, kua akamarama te vaine akakite ko Joan Bakewell e “kua manako puapinga kore [a Goulder] no te maata oki o te turanga mamae o te tangata.” Ko tetai tumu no teia “kua ngaro [iaia] tona akarongo i te Atua tei akao mai ki roto i te akakoroanga o te tangata.” Kua  akakite a Goulder i tona irinaki e “kare te Pipiria . . . i te tuatua papu na te Atua” mari ra, “ko te tuatua papu kore a te tangata ra, penei ma tetai akauru anga tu-Atua i konei e i ko.”

Tetai taime ka ngaro ke te akarongo. Ko te reira tei tupu ki te tangata tata e te akakite ra ko Ludovic Kennedy. Kua tuatua aia mei tona tamariki anga “kua tupu ua te au manako ekoko e te au manako papu kore [no runga i te Atua] e kua tupu katoa [tona] irinaki kore.” I te akaraanga kare e rauka i tetai i te oronga kiaia i te au pau anga tau ki tana au ui anga. E tupu anga poitirere tikai te matenga o tona papa i te moana tei akaparuparu maata i tona akarongo. I te au pure ki te Atua kia “akaora mai ia matou mei te au kino i te tai e mei te ta ua a te enemi” kare i pauia mai i te akaaruru angaia e te takinokino angaia te pai patete tei runga tona papa e te au pai tamaki Tiamani i te tuatau o te Tamaki II o te Ao.​—All in the Mind—​A Farewell to God.

Kare i tuke ua taua au tupu anga. “Te akarongo,” i na te apotetoro ei ko Paulo, “kare oki i ope katoatoa te tangata.” (2 Tesalonia 3:2) Eaa toou manako? Ka rauka ainei te akarongo mou i roto i te Atua e i tana Tuatua i roto i tetai ao ekoko maata tikai? E makitoro i ta te atikara ka aru mai e akakite ra no runga i teia tumu manako.