Au Uianga a te Aronga Tatau

Eaa oki te “akaangaroianga” te taikuia ra ia Ebera 4:​9-11, e akapeea tetai me “akao i taua akaangaroianga”?

Ki te au Kerititiano Epera o te anere mataiti mua, kua tata te apotetoro ko Paulo: “E teianei te vai ra mari te akaangaroianga no te tangata o te Atua. Ko tei o oki i tona akaangaroianga ra, e akaangaroi ïa aia i tana uaorai angaanga, mei te Atua oki i tana. E teianei, e akamaroiroi tatou i te akao i taua akaangaroianga ra, ko te topa atu aea tetai, mei ia ratou i topa i te akarongo kore.”​—Ebera 4:​9-11.

I te tuatua anga a Paulo no to te Atua akaangaroianga mei Tana angaanga, i te akaraanga te taiku ra aia ki tei akakiteia ia Genese 2:2, i reira ka tatau tatou: “Akaoti iora oki te Atua i tana angaanga i te rā itu ra, i tana i anga ra; e noo ua iora aia i te rā itu i tana katoa ra angaanga, i tana i anga ra.” Eaa ra a Iehova i ‘noo ua iora i te rā itu’? Papu e kare no te mea te umuumu ra aia i te noo ua “i tana katoa ra angaanga, i tana i anga ra.” Te oronga maira te irava ka aru mai i te akakite anga: “E kua akameitaki iora te Atua i te rā itu, e akatapu atura i te reira; no te mea i reira tona noo ua anga i tana katoa ra angaanga, i ta te Atua i anga e i rave.”​—Genese 2:3; Isaia 40:​26, 28.

Kua tuke te “rā itu” mei tetai o te au ra e ono i roto i te tu e ko te reira te ra ta te Atua i akameitaki e kua akatapu ra, tera ra te tu, e ra tei akanooia, me kare tei akatapuia no, tetai akakoroanga takake. Eaa oki taua akakoroanga? I mua ana, kua akakite mai te Atua i tana akakoroanga no runga i te tangata ravarai e te enua. Ki te tane mua e te vaine, kua tuatua te Atua: “Kia anau korua, e kia maata roa, e e akaki i te enua nei, e e akavi; e kia mana korua ki rungao i te au ika o te tai, e ki rungao i te au manu o te reva, e ki rungao i te au mea ora katoa e totoro aere ua ki rungao i te enua nei.” (Genese 1:28) Noatu kua oronga te Atua ki te tangata ravarai e te enua i tetai akamata anga apa kore, ka pou te tuatau no te akariroanga i te katoa anga o te enua e kia akaviia e kia tauiia ki roto i tetai parataito kiia e te pamiri tangata apa kore, mei tei akakoroia e te Atua ra. No reira, i “te rā itu,” kua akaangaroi te Atua, me kare kua noo ua, mei tetai atu au angaanga i te enua e raukai i te akatika i tana i anga ra kia tupu ua atu kia tau ki tana akakoroanga. I te openga o taua “rā” ra, pouroa te au mea ta te Atua i akakoro ka tika tikai. Mei teaa te roa o taua akaangaroianga?

I te akara akaou anga i ta Paulo tuatua i roto ia Epera, ka kite tatou e kua tou tika aia e “teianei te vai ra mari te akaangaroianga no te tangata o te Atua,” e kua raurau aia i tona au taeake Kerititiano kia rave pakari ratou i te “akao i taua akaangaroianga ra.” Te akaari mai nei teia i te tata anga a Paulo i taua au tuatua, “te rā itu” o to te Atua akaangaroianga, tei akamata mai mei etai 4,000 mataiti i mua ana, te tere ua ra te reira. Kare rava te reira e ope kia oti roa ta te Atua akakoroanga no te tangata ravarai e te enua i te openga o te Tutara Anga Tauatini Mataiti o Iesu Karaiti, koia oki “te Atu rai ïa o te sabati.”​—Mataio 12:8; Apokalupo 20:​1-6; 21:​1-4.

Ma taua manakonakoanga meitaki ki mua, kua akamarama mai a Paulo e akapeea tetai me akao atu ki roto i to te Atua akaangaroianga. Kua tata aia: “Ko tei o oki i tona akaangaroianga ra, e akaangaroi ïa aia i tana uaorai angaanga.” Te akakite mai nei teia kia tatou noatu kua rauka te akamata anga apa kore, kare te katoa anga o te tangata ravarai i tomo atu ki roto i to te Atua akaangaroianga. Teia oki te tumu kare a Adamu raua ko Eva i iki no te akono i ta te Atua akaangaroianga i “te rā itu” na te arikianga i tana akapapaanga no raua. Mari ra, kua meameaau raua e kua inangaro i te takake mai mei te Atua. Ko te tika, kua aru atu raua i ta Satani au ravenga kare i ariki ana i ta te Atua arataki anga aroa ra. (Genese 2:​15-17) Tei tupu mai, kua ngere ia raua te manakonakoanga no te ora ua atu anga ki runga i tetai enua parataito. Mei reira mai, kua akatuikaaia te au tangata ravarai ki te ara e te mate.​—Roma 5:​12, 14.

Kare ta te tangata meameaau anga i tamanata ana i ta te Atua akakoroanga. Kua tere ua atura tona ra akaangaroianga. Inara, kua oronga mai a Iehova i tetai apinga aroa​—te oko​—na roto i tana Tamaiti, ko Iesu Karaiti, e raukai i te katoatoa tei ariki i te reira tei akatumuia ki runga i te akarongo te akara atu ki mua mei te akamatara angaia e kia akaangaroi mei te apainga teiaa o te ara e te mate. (Roma 6:23) No reira oki a Paulo i raurau ei i te au taeake Kerititiano kia ‘akaangaroi mei tana angaanga.’ Kua umuumuia ratou kia ariki i ta te Atua apinga oronga e orai kare e tauta i te rave i tei meitaki no ratou a te tuatau ki mua, mei ia Adamu raua ko Eva ra. Kua anoano  katoaia ratou kia kopae i te kimianga i ta ratou uaorai au angaanga no te akatika uaorai.

Te manako kore anga i to tetai uaorai anoano e raukai i te rave atu i to te Atua anoano e mea akaangaroianga e te noo ua. Kua akakite a Iesu i teia pati anga: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka oki ia kotou te akaangaroianga i to kotou vaerua. Te maru nei taku amo, e te māmā nei taku apainga.”​—Mataio 11:​28-30.

Ta Paulo uriuri anga i to te Atua akaangaroianga e akapeea tetai me akao atu ki roto te papu ra e e tumu anga akamaroiroiia ki te au Kerititiano Epera i Ierusalema, tei akakoromaki i te takinokino anga e te aviri anga no to ratou akarongo ra. (Angaanga 8:1; 12:​1-5) Ma te aiteite, ka riro katoa ta Paulo au tuatua ei tumu akamaroiroianga ki te au Kerititiano i teia tuatau. Te kiteanga e te vaitata mai nei ta te Atua akatupuanga i te taputou no te akariro i te enua ei parataito i raro ake i te Patireia tuatua tika, kia akaangaroi katoa tatou mei ta tatou uaorai angaanga e kia rave maata no te akao atu ki roto i taua akaangaroianga.​—Mataio 6:​10, 33; 2 Petero 3:13.

[Au Tutu i te kapi 31]

Ka kiteia ta te Atua taputou no tetai parataito i te enua i te openga o tona akaangaroianga