Eaa te Aite Anga Kia Tiratiratu?

KUA manako te ngati Iuda Hasid mei te rua anere mataiti M.T.N. ia ratou uaorai kua tiratiratu tikai. No ko mai to ratou ingoa i te cha·sidhʹ, te tuatua Epera no te “tiratiratu.” Kua raveia mai mei te nauna cheʹsedh, tei uri putuputuia e “aroa takinga meitaki,” “aroa tiratiratu,” “takinga meitaki,” “meitaki,” “akaaroa.” Kia tau ki te Theological Dictionary of the Old Testament, ko te cheʹsedh “e maroiroi, oaoa, e te akakoromakianga [e te] iki anga kare ua e no te tu o te au tangata, pera katoa oki te angaanga tei mama mai mei roto mai i teia tu. E angaanga ia kia akaora me kare kia akamaata i te oraanga. E akao anga ia no tetai tangata te mamae ra i te manuia kore me kare te taitaia. E akaari anga ia no te piri anga oa.”

Tei papu ra, e i roto i te au reo e manganui kare okotai tuatua i rauka i te akakite i te aiteanga tikai te kapitiia ra ki teia tuatua Epera tei taangaangaia i roto i te Pipiria. I tetai ua atu tu, te tu tiratiratu i roto i te tu o te Pipiria e maata ua atu te aite anga i to te akono akarongo anga ki te au angaanga. Te kapiti ra ia i te manako o te piri aroaanga ma te rave akapapu anga i te angaanga e puapingaiai tetai. Kia marama e eaa te aite anga o te tu tiratiratu tikai, e akamanako ana e akapeea a Iehova i te akaari anga i te reira kia Aberahama, Mose, Davida, te iti tangata o Iseraela, e ki te au tangata katoa ra.

Kua Akaari a Iehova i te Tu Tiratiratu

Kua akakite atura a Iehova ki tona oa kia Aberahama: “Ko au toou paruru.” (Genese 15:1; Isaia 41:8) Kare teia i te au tuatua ua. Kua paruru a Iehova e kua akaora ia Aberahama e tona ngutuare mei ia Pharao e mei ia Abimeleka. Kua tauturu aia ia Aberahama i te akaora anga ia Lota mei roto mai i te taokotai anga o te ariki tokoa ra. Kua akaoki a Iehova i te au mana anau anga o Aberahama 100 mataiti e ia Sarai 90 mataiti ra e na roto ia raua i raukai kia anauia mai te Uanga taputouia ra. Kua komunikeiti putuputu a Iehova kia Aberahama na roto i te au orama, te au moemoea, e te au karere angera. E tikai, kua akaari a Iehova i te tu tiratiratu kia Aberahama iaia e ora ra e pera katoa i muri roa ake i tona matenga. I te au anere mataiti i tere atu, kua akono a Iehova i tana au taputou ki te uanga o Aberahama, te iti tangata o Iseraela, noatu to ratou akarongo kore. To Iehova piri anga ma Aberahama ra e akaari anga ia e eaa te tu tiratiratu tikai​—e aroa tei uriia ki roto i te angaanga.​—Genese, pene 12 ki te 25.

Kua karanga ia e kua “karangaranga ua mai a Iehova kia Mose ko te mata e te mata, mei te tangata e tuatua ua ki tona taunga.” (Exodo 33:11) Ae, e pirianganao to Mose ma Iehova i to tetai ua atu peroveta i mua ake ia Iesu Karaiti. Akapeea ra a Iehova i te akaari anga i te tu tiratiratu kia Mose?

Ei tangata 40 mataiti ra ma te mana e te kite, kua rave a Mose ki runga iaia uaorai ma te ngakau akaparau i te akaora i tona iti tangata. Inara kare i tae ake te tuatau.  Kua oro ke atu aia no tona oraanga. E 40 mataiti i tona akono anga i te mamoe i Midiana. (Angaanga 7:​23-30) Noatu rai, kare a Iehova i akaruke iaia. Te tae anga ki te tuatau tau, kua akaoki akaouia mai a Mose kia arataki ia Iseraela ki vao ia Aiphiti.

Mei te reira katoa, kua akaari a Iehova i te tu tiratiratu kia Davida, te rua o te ariki rongonui o Iseraela. Ia Davida e mapu ua ra rai, kua akakite atu a Iehova ki te peroveta ko Samuela e: “Ka tu, ka akatainu iaia; koia oki tena.” Mei reira mai, kua paruru tiratiratu a Iehova e kua arataki ia Davida iaia e pakari maira ei ariki no te tuatau ki mua ia Iseraela katoatoa. Kua akaora atu a Iehova iaia “i te vaevae o te liona, e te vaevae o te daba” e mei te rima o te tuputupua Philiseti ra ko Golia. Kua oronga aia i te autu kia Davida i muri ake te autu anga i te au enemi o Iseraela, e kua akaora a Iehova ia Davida mei te tao a Saula vareae, tu makitakita ra.​—1 Samuela 16:12; 17:37; 18:11; 19:10.

Ae, kare a Davida i te tangata tiama. Ko te tika, kua ara tikai aia. Inara, kare ra i akaruke iaia, kua akatotoa a Iehova i te aroa tiratiratu kia Davida tei tataraara oonu. I roto i to Davida oraanga, kua rave ripiti akaou a Iehova i te akaora e te akamaata i te oraanga. Kua akao mai aia no tetai tangata te mamae taitaia ra. E aroa takinga meitaki, tikai ia!​—2 Samuela 11:​1–​12:25; 24:​1-17.

Te iti tangata o Iseraela ei katoa anga kua tomo atu ki roto i tetai piri anga akaperepere akatapuia ma Iehova i te akatika anga ratou i te au tuatua o te Ture koreromotu a Mose i te Maunga Sinai ra. (Exodo 19:​3-8) No reira, kua akatutuia mai a Iseraela i roto i tetai piri anga akaipoipo ra ma Iehova. Kia Iseraela te tuatuaia ra: “Kua kapiki a Iehova ia koe ra: te vaine oki i akaipoipo.” E kua karanga atura a Iehova kiaia: “I te aroa [“takinga meitaki,” NW] mutu kore ra e aroa atu ei au ia koe.” (Isaia 54:​6, 8) Akapeea ra a Iehova i te akaari anga i te tu tiratiratu i roto i teia piri anga akaperepere?

Na Iehova i rave mua i te akono no te au anoano o te ngati Iseraela e kia akaketaketa i to ratou au piri anga kiaia. Nana i akaora ia ratou mei Aiphiti, te akapapa anga ia ratou ei iti tangata, e kua arataki atu ia ratou ki roto i tetai “enua e taʼe a vai ua te u, e te meli.” (Exodo 3:8) Kua oronga putuputu aia i te apii anga pae vaerua na roto i te au taunga, te ngati Levi, e te au peroveta e manganui e te au karere. (2 Paraleipomeno 17:​7-9; Nehemia 8:​7-9; Ieremia 7:25) Te taruri ke anga te iti tangata i te tavinianga i tetai au atua ke, kua akatikatika a Iehova ia ratou. Te tataraara anga ratou, kua akakore aia i ta ratou ara. Tei akatika ia, e “vaine” ngata te iti tangata o Iseraela. Inara, kare a Iehova i viviki i te akaruke iaia. No tana au taputou kia Aberahama, kua mou tiratiratu Aia ki te ngati Iseraela e tae ua atu Tana au akakoro anga i te kapiti anga ma ratou i te akatupuia. (Deuteronomi 7:​7-9) Mei teaa ra te akatau anga meitaki no te aronga akaipoipo i teia tuatau!

Te akaari katoa ra a Iehova i te tu tiratiratu ki te au tangata katoa ra i te oronga anga aia i te au mea i anoano ia no te oraanga o te au tangata ravarai, te tuatua tika e te tuatua tika kore ra. (Mataio 5:45; Angaanga 17:25) Tei maata atu i te reira, kua oronga mai aia i te atinga oko o tana Tamaiti e raukai i te au tangata ravarai te tuatau kia  akaora ia mai mei te tuikaa anga ki te ara e te mate e kia rekareka i te au manakonako anga kaka o te apa kore, te ora mutu kore i roto i te Parataito. (Mataio 20:28; Ioane 3:16) Ko te oko orongaia te ravenga teitei roa atu kia akaora e kia akamaata i te ora. E tika rai ia e e “akao anga no tetai tangata te mamae ra i te manuia kore me kare ra te taitaia.”

E Akapapu i Toou Tu Tiratiratu ma te Au Angaanga Papu Tikai

Te aiteite ra ki te aroa takinga meitaki, te apai katoa ra te tu tiratiratu i tetai manako ketaketa o te tu taokotai anga. Me akaariia mai te aroa takinga meitaki kia koe, mei te reira te tapapa katoa ia ra. Te tu tiratiratu te tutaki akaouia ra na roto i te meitaki. E kua marama a Davida i te au taiku anga tei piri atura ma te cheʹsedh tei kiteaia i roto i tana au tuatua: “E akamori tika atu au i to nao tapu ra, ka akameitaki atu ei i toou ingoa.” No teaa ra? “No toou aroa [“takinga meitaki,” NW] e no taau tuatua-mou.” (Salamo 138:2) Ko tetai tei ariki i te aroa takinga meitaki o Iehova, e mea papu e kua akakeuia a Davida kia akamori e kia akapaapaa iaia. No reira, ia tatou e akamanako ra i to Iehova akaari anga i te aroa takinga meitaki kia tatou, kua akakeuia ainei tatou kia ariu atu? Ei akatau anga, me kua akakinoia to Iehova ingoa, te akakeuia ra ainei toou manako no tona ra tu kia tuatua atu koe i te paruru iaia?

Kua tupu te reira ki tetai Kerititiano ou ua e tana vaine i te aere anga raua ki te tanumanga o tetai kopu tangata tei mate i te u patikara matini. E uipaanga kare i te akonoanga, e ko tei tae atu kua akatikaia kia tuatua i tetai apinga no runga i tei mate ra. Kua akamata tetai vaa tuatua i te akaapa i te Atua e ko te mate anga o teia tamaiti mapu kare i tapapaia te tuatau na te tuatuaanga e, ‘kua inangaro te Atua iaia i te rangi, no reira kua apai aia iaia.’ E ngata tikai no to tatou taeake Kerititiano i te vai muteki ua. Kua tu atu aia i mua i te paata, noatu rai e kare ana Pipiria e te au tata anga. “I toou manako e ka akatika tetai Atua tei teitei akaaroa, tangi aroa ra, i te au turanga mei teia rai?” tana i ui atu ei. No reira kua akamata aia ma tetai tuatua anga e tai ngauru miniti ma te au taiku anga Tuatua Tapu i te akatakaanga e eaa tatou i mate ei, e eaa ta te Atua i rave i te akaora anga i te au tangata mei te mate, e te manakonako anga umere no tetai tuakaou anga ki te ora mutu kore i runga i tetai enua parataito. Tere atu e 100 tangata tei tae mai kua pokarakara atu. I muri mai kua maara i te taeake e: “E rekareka oonu toku kare au i kite ana i mua ana. Kua akameitaki au ia Iehova no te apiianga mai iaku i tona pakari e te orongaanga mai kiaku te tuatau kia paruru i tona ingoa tapu.”

Te tu tiratiratu kia Iehova kua kapiti mai te tu tiratiratu ki tana Tuatua, te Pipiria. No teaa ra? No te mea i roto i te au kapi o te Pipiria, te apii maira a Iehova ia tatou e akapeea e orai. Te au ture e te au kaveinga tei rekotiia i roto i reira e mea memeitaki tikai e e au akaraanga puapinga maata no te oraanga. (Isaia 48:17) Auraka e akatika i te taomi anga a tetai ra me kare toou uaorai au tu paruparu kia tuku ia koe kia tapae ke i te akarongo anga i te au ture a Iehova. Kia vai tiratiratu ki te Tuatua a te Atua.

Te tu tiratiratu ki te Atua te kapiti katoaia ra ki te tu tiratiratu ki tana akaaerenga. Tei umuumuia ra, kua tere atu te au mataiti te vaira te au akatikatika anga e te au akatanotano anga kia marama tatou i tetai au tuatua tapu. Te tika ra e kare rava tetai i angai meitakiia i te pae vaerua mei ia tatou rai. (Mataio 24:​45-47) Kare e ekokoanga, kua noo tamou a Iehova ma tana akaaerenga o teia tuatau. Kare ainei tatou e akapera? Kua akapera rai a A. H. Macmillan. I mua ake i tona matenga, kua karanga aia: “Kua kite au i te tupu anga o te akaaerenga a Iehova mei te akamataanga meangiti mai, i toku akatapu anga iaku uaorai ki te Atua i te mataiti rua ngauru ma toru i roto ia Tepetema 1900, ki tetai taiate takapini i te ao o te au tangata mataora tei akakitekite totomapu i tana au tuatua mou. . . . Kua papu maata iaku i to mua ana, i toku kite anga e te vaitata ra ki te openga taku angaanga ki te Atua i runga i te enua, e te arataki ra a Iehova i tona iti tangata e kua oronga kia ratou i ta ratou e anoano ra i te tuatau tau.” Kua tavini tu akarongo e te tiratiratu te Taeake Macmillan vaitata atu ki te 66 mataiti, e tae ua  atu ki tona matenga ia Aukute 26, 1966. E akaraanga memeitaki aia no te tu tiratiratu ki te akaaerenga akara mataia a te Atua.

Tei kapiti ia mai ei tiratiratu ki te akaaerenga, ka vai tiratiratu ainei tatou ki tetai e tetai? Me aro atu i te tamataku anga o te takinga kino tikai, ka vai tiratiratu ainei tatou ki to tatou au taeake e te au tuaine? I te tuatau o te Tamaki II o te Ao, kua akanoo te au taeake i Netherland i tetai akaraanga memeitaki o te tu tiratiratu. Ko tetai tangata pakari, ko Klaas de Vries, no roto mai i te Putuputuanga Groningen, kua raveia te uiui anga, kino akaaroa kore e te Nazi Gestapo, kua tukunaia ki roto i te tapeka anga koia ua e 12 ra ma te varaoa ua e te vai, e oti kua uiui akaouia. Ma tetai pupui te tou atura kiaia e tei raro ake i te tamataku anga o te mate, e rua miniti tei orongaia kiaia kia akakite e teiea te au taeake rave apainga, e pera katoa oki tetai akakite anga puapinga maata. Okotai ua mea ta Klaas i tuatua atu: “Kare kotou e akarongo i tetai mea mei iaku. . . . Kare au e riro mai ei tangata pikikaa.” E toru taime kua tamataku ia aia ma te pupui. I te openga ra kua akamutu te Gestapo, e kua tuku ia atu a Klaas ki tetai are auri ke. Kare rava aia i pikikaa ana i tona au taeake.

Ka akatotoa ainei to tatou tu tiratiratu ki to tatou kopu tangata vaitata maira​—to tatou tokorua akaipoipo ra? Noatu e kua akangateitei a Iehova i tona pirianga koreromotu ki te iti tangata o Iseraela, te tiratiratu ra ainei tatou ki ta tatou au tia akaipoipo anga? E maata atu i te piri anga ngaueue kore, e aruaru i tetai piri anga vaitata ma to tokorua. E rave na mua i te akatinamou i toou akaipoipo. E akapou i tetai tuatau kapiti anga, te komunikeiti rangatira e te maoraora anga ma tetai ki tetai, te turu anga e te akamaroiroi anga i tetai e tetai, te akarongo anga ki tetai e tetai, te kata kapipiti anga, te aue kapipiti anga, te kanga kapipiti anga, te angaanga kapipiti anga kia rauka te au akakoroanga kapiti, te akamareka anga i tetai e tetai, ei oa. E matakite tikai kia kopae i te akatupuanga i te au manako akainangaro ki tetai. Noatu e e tika e e mea tau kia akatupu i te au oa e te au oa piri vaitata ki tetai i vao ake i toou akaipoipo, ko te au manako akainangaro kia rimitiia ki to tokorua. Auraka rava e tuku i tetai kia aere mai ki rotopu ia koe e to tokorua.​—Maseli 5:​5-20.

Kia vai tiratiratu ki te au taeake irinaki e te ngutuare. Te pati ra te au mataiti, eiaa e akangaropoina ia ratou. Kia aravei, tata, ringi, e atoro atu. Te ngai ta te arataa o te ora e arataki ra ia koe, e tauta kia kore e tamaromaroa ia ratou. Kia akamataora ia ratou i te tuatua anga e kua kite ia koe me kare e piri anga to ratou kia koe. Na te tu tiratiratu kia ratou e akaketaketa ia koe no te tika e e tumu akamaroiroi anga ia noou.​—Esetera 4:​6-16.

Ae, te tu tiratiratu tika tikai te kapiti maira i te au angaanga papu kia akaora i te au piri anga akaperepere. E rave i tei rauka ia koe i te tutaki akaou i te aroa takinga meitaki o Iehova. E aru i te tu tiratiratu o Iehova i roto i taau au raveanga ma te putuputuanga Kerititiano, ki to tokorua akaipoipo, te ngutuare, e te au oa. E akakite tiratiratu i to Iehova tu tika meitaki ki toou au tangata tupu. E tika ta te tata taramo i tana tuatua anga: “Ka imene au i te aroa o Iehova e tuatau ua atu: na toku vaa e akakite i te tuatua-mou naau, i tera uki i tera uki.” (Salamo 89:1) Kare ainei tatou e vaitata atu ana ki taua Atua ra? E tikai, “tona aroa [“takinga meitaki,” NW], ka tu ïa e rimua.”​—Salamo 100:5.

[Tutu i te kapi 23]

A. H. Macmillan