Ei Apiianga Mei te Nu Tamara

“EAKARA anga taurekareka tuke ua akerai te manea.” Akapera tetai enetaikoropitia Pipiria i te akataka anga no runga i te nu tamara. I te tuatau Pipiria e teianei, te akamanea ra te au nu tamara i te O Nile o Aiphiti, e te oronga maira ratou i te marumaru akaangaroi takapini i te au puna vai o te Metepara Negeb.

Mei te maata anga o te au tu nu tamara, e tu tika tuke ua akerai to te nu tamara. Te taeria ra e tetai te 30 mita te teitei e te uua ra i te ua no etai 150 mataiti. Ae, e mea taurekareka te nu tamara ki te mata tangata e te maviriviri oki te ua. I te mataiti taki tai te uua maata ra te reira i te au kaui tamara. I te okotai kaui e tere atu i te 1,000 tamara. No te au tamara, kua tata tetai mana akaaere e: “Ko te aronga tei . . . matau ua i te tamara mei tei tamaroia o taua ua rakau tei akaariia mai i raro ake i tetai tataanga i roto i te are toa, kare e rauka i te akamanako e mei teaa te reka tikai i te kai ou ua i te reira.”

Ma te tau ra, te akaaite ra te Pipiria i tetai au tangata ki te au nu tamara. Kia akara marekaia mai e te Atua, mei tetai nu tamara uua ra, kia akono ua tetai tangata i te tu tika e te rave tamou ra i te akono i te au angaanga meitaki. (Mataio 7:​17-20) No teia tumu, kua taangaangaia te au tutu o te nu tamara tei taraiia ei apinga akamanea i roto i te iero o Solomona e te iero i roto i te orama a Ezekiela. (1 Ariki 6:​29, 32, 35; Ezekiela 40:​14-16, 20, 22) No reira, kia arikiia mai te akamori anga a tetai e te Atua, kia rauka i tetai te au tu inangaroia o te nu tamara. Te akamarama maira te Tuatua a te Atua: “Ka ruperupe te tangata tuatua-tika mei te nu tamara ra.”​—Salamo 92:12.