Ripoti a te Aronga Tutu Patireia

Itaeanga i te Aronga Ngata i te Aravei

TE TAUTA ra te Au Kite o Iehova i te aravei i te katoatoa te ka rauka ia ratou ma te tuatua Patireia. I tetai taime, ka pou te maroiroi tuke ua akerai no te itae i te aronga kare e aravei putuputuia ana i te kainga. (Mareko 13:10) Na teia tu, te akakite maira tetai orometua painia takake i roto i tetai enua Marike Apatonga i te kiteanga ka aru mai.

“I tetai ra kua kite mai au e ka atoro atu te kavana o te enua i te ngai tei akatakaia mai kia maua ko taku vaine kia angaanga. I te mea koia tetai kare e kitea ana i te kainga, kua tata au i tetai reta kiaia e kua kapiti atu i tetai au puka Pipiria tuke tuke, te kapitianga i te poroutia Eaa ta te Atua e Umuumu Maira ia Tatou? e nga puka Mankind’s Search for God e te Te Kite te ka Arataki ki te Ora Mutu Kore. Kua akamarama taku reta i te akakoroanga o teia au puka taki tai.

“No te mea te inangaro ra au i te kite i tona manako no runga i te puka, kua pati atu au i te aravei iaia. I etai nga epetoma i muri mai kua akatikaia mai au kia aravei atu, e kua apai atu au i tetai kopi o te vitio Jehovah’s Witnesses​—The Organization Behind the Name. Kua pou te uipa anga e rua ora. I muri mai i te akaraanga i te vitio ma te kavana, kua ui atu au kiaia i tona manako no te reira. Kua pau mai aia: ‘Kare atu e akaaerenga i te enua nei mei ta kotou. Te anoano nei au i tetai aronga mei ia kotou rai i te tauturu mai iaku kia akaoti i taku au angaanga no toku kavamani!’ I reira kua ui mai aia kiaku me kua aere ana au ki te opati maata o ta matou akaaerenga. Kua akakite atu au kiaia noatu kua riro ana ei akakoroanga noku mei te 14 mataiti mai, kare i rauka iaku te tuatau no te atoro atu i to matou opati maata i te ao i Brooklyn, New York. Ko tetai ia o te au akakoroanga ngata no te itae atu. Kua akara tika ua mai aia iaku no tetai tuatau poto. I reira kua tuatua mai aia kiaku e te inangaro ra aia e kia rauka iaku taua tuatau ra. Kua akapapa aia i to maua pepa tika anga e kua oronga mai i to maua tiketi pairere ei apinga aroa!

“Te rauka putuputu nei i te kavana te makatini Punanga Tiaki e te Awake! Te manakonako nei maua e kare e roa atu ka rauka ia maua i te akamata i tetai apii Pipiria ma ia.”