Ka Rauka ia Koe te Akarongo Mou

I te 19 anga a Sarah Jayne, kua kite mai aia e kua tu aia i te “cancer” i te ngai tukuanga ua. I muri mai i te vai anga, kua meitaki mai aia e kua manako papu no te tuatau ki mua. Ko te tika, kua papu tikai aia, e i tona 20 anga, kua tapaoia aia e kua akamata i te rave i te au parani no tona akaipoipoanga. I taua mataiti rai kua tupu akaou mai te “cancer,” e kua kite mai aia e e nga mea epetoma ua tona i te ora anga. Kua mate a Sarah Jayne ia Tiunu 2000, i mua ake ka tae ei ki tona 21 mataiti.

KO TE mea umere i te aronga atoro ia Sarah Jayne i roto i te are maki koia oki ko tona tu maru tikai no te tuatau ki mua, e pera tona irinaki oonu i roto i te Atua e tana Tuatua, te Pipiria. Noatu taua tumatetenga kino tana e aro atura, kua papu tikai iaia te manakonakoanga o te tuakaouanga​—e ka kite akaou aia i tona au taeake. (Ioane 5:​28, 29) “Ka kite akaou au ia kotou pouroa i roto i ta te Atua ao ou,” i nana ei.

Ka manako etai i taua tu akarongo ei mea pikikaa. “Eaa oki te oraanga i muri ake i te matenga e irinaki anga ia i rotopu i te aronga papu kore,” i ui ei a Ludovic Kennedy, “e i te tangi anga o te pu openga ka vai te au keke e te vai ale, e te caviar e te tangi anga pu no ratou katoa, e i roto i tetai ngai ruperupe ia Edene ka piri atu ratou ki roto i te au ora mataora ma te aronga tei aere i mua atu e tetai te ka aru mai i muri akera?” No te reira, ka ui tatou. Ko teaa te mea tau tikai​—kia irinaki e ko “teia oraanga tei rauka ua ia tatou, no reira kia rave tatou i tei meitaki no te reira,” mei ta Kennedy i taiku ra, me kare ra kia irinaki i te Atua e tana taputou o te tuakaouanga? Kua iki a Sarah Jayne i te mea openga ra. Akapeea i raukai iaia i te akatupu i taua akarongo?

 ‘Kia Kimi i te Atu e Kitea Atu’

Kia akatupu i te akarongo e te irinaki ki roto i tetai, ka anoanoia koe kia kite iaia e kia apii akapeea aia i te manako anga e te rave anga angaanga. Te o atura te ngakau ki roto i teia angaanga e pera katoa te manako. Te aite katoa ra me no runga i te akatupuanga i te akarongo mou ki roto i te Atua. Ka anoanoia koe kia kite iaia, kia apii no runga i tona au tu e tona tu peretana, kia kite e mei teaa te tu papu iaia e te irinaki ua tei akapapuia mai e ia i roto i tei tuatuaia e tei raveia e ia.​—Salamo 9:10; 145:​1-21.

Te manako ra etai e kare teia e rauka. E mamao roa te Atua, i na ratou ei, e e mea ngaro​—me te vaira ainei aia. “Me e tika tikai te Atua i te akaraanga ki te au Kerititiano mei ia Sarah Jayne rai,” i ui ei tetai tangata ekoko, “eaa aia i kore ei i akakite mai iaia kia tatou katoatoa?” Inara e mamao tikai ainei te Atua e kare e kitea? I roto i tetai tuatua ki te aronga kimi kite e te kite ra i Atene, kua tuatua te apotetoro ko Paulo e “ko te Atua i anga i teianei ao, e te apinga tini ravarai i roto” kua oronga katoa mai i te au mea ravarai tei anoanoia e raukai ‘kia kimi iaia e kitea atu.’ Ko te tika, i na Paulo ei: “Kare ra aia i atea ke atu ia tatou katoa nei.”​—Angaanga 17:​24-27.

Akapeea, i reira, koe i te ‘kimi i te Atu e kitea atu’? Kua rave etai i teia na te akaraanga i te ao katoa e pini ua ake takapini ia ratou. No te manganui, te oronga maira te reira i te akakiteanga ei akapapu kia ratou e te vaira Tei Anga. * (Salamo 19:1; Isaia 40:26; Angaanga 14:​16, 17) Te manako ra ratou, mei te apotetoro rai ko Paulo, e “te au mea oki [a te Atua] tei kore e tau kia akara ra, tei kitea puia nei ïa, i te au mea katoa i angaia nei, mei te maani anga mai i teianei ao; koia oki, tona ra mana mutu kore anga, e te Atua anga.”​—Roma 1:20; Salamo 104:24.

Ka Anoanoia e kia Rauka ia Koe te Pipiria

Inara, kia patu i te akarongo tikai i roto i Tei Anga ra, ka anoanoia e kia rauka ia koe tetai apinga tei orongaia mai e ia. Eaa oki te reira? Te Pipiria​—ta te Atua Tuatua akauruia, i roto i te reira te akakite maira aia i tona anoano e te akakoroanga. (2 Timoteo 3:​16, 17) “Aria ana,” i na etai ei, “akapeea e raukai ia koe i te irinaki i tetai apinga te akakiteia maira e te Pipiria me kite atu koe i te au apinga kino tei raveia e te au tangata te tuatua ra e te aru ra i te Pipiria?” E tika, e rekoti kino tikai to Kerititome no te pikikaa, te takinokino, e te akono tau kore. Inara ka kite ua tetai tangata tau e te akameamea ua ra a Kerititome i te aru i te au kaveinga a te Pipiria.​—Mataio 15:8.

Te akamatakite maira te Pipiria e ka maata te tangata ka tuatua e te akamori ra i te Atua inara, ko te tika, ‘te akaruke ra i te Atu tei oko ia ratou ra.’ “E no ratou,” i na te apotetoro ei ko Petero, “e akakinoiaʼi te arataa tuatua-mou ra.” (2 Petero 2:​1, 2) Kua tuatua a Iesu Karaiti no teia aronga e “aronga rave tuatua kino” te ka akataka meitakiia mai e ta ratou au angaanga kino. (Mataio 7:​15-23) Kia kopae i ta te Atua Tuatua no te rekoti o Kerititome te aite ra mei te titirianga i tetai reta no ko mai i tetai taeake irinakiia no te mea kare i tau te tangata tei apai atura i te reira.

Me kare te Tuatua a te Atua ka ngata i reira i te patu i te akarongo tikai. Na roto anake i te au kapi o te Pipiria te oronga maira a Iehova i tana tua o te au mea ra. Te oronga maira aia i te au pau anga ki te au ui anga puapinga no te tumu i tuku uai aia i te mamae e te kino e eaa tana ka rave no taua turanga. (Salamo 119:​105; Roma 15:4) Kua irinaki a Sarah Jayne e ko te Pipiria e Tuatua akauruia na te Atua. (1 Tesalonia 2:13; 2 Petero 1:​19-21) Akapeea ra? Kare ra e no te mea kua akakite atu tona nga metua kiaia, mari ra kua akanoo aia i tetai taime no te akara tika atu i te tupuanga pouroa te akaari maira i te Pipiria ei akakite anga umere tikai no ko mai i te Atua. (Roma 12:12) Ei akaraanga, kua kite mai aia, i te akakeu anga ririnui a te Pipiria i roto i te au oraanga o te aronga tei akono i ta te reira au kaveinga. Ma te tauturu a te au puka mei The Bible​—God’s Word or Man’s?, * kua makitoro meitaki katoa aia i te akakite anga e manganui i roto ra te akapapu maira i te akauru anga tu-Atua.

“Na te Kite Mari e Raukaʼi te Akarongo”

Inara, kare i rava ua e kia rauka te Pipiria  me kare kia irinaki e kua akauruia te reira. “Na te kite,” i tata ei te apotetoro ko Paulo, “mari e raukaʼi te akarongo.” (Roma 10:17) Te akarongoanga i te Pipiria, kare e kia rauka ua te Pipiria, ko te reira te ka patu i te akarongo. Ka “kite” koe i ta te Atua e tuatua ra na te tatauanga e te apiianga i tana Tuatua. Ka rauka katoa i te aronga ou i te rave i teia. Te karanga ra a Paulo e “mei to tamariki anga” a Timoteo te apii angaia “i te tuatua tapu i tataia ra” e tona metua vaine e te mama ruau. Te akakite maira ainei teia e kua o mai te akangaro anga manako? Kare! Kare a Timoteo i akavareia me kare i pikikaaia na roto i etai tu. Kua “tukuia atu” kiaia i tana i rongo ra e tei tatau ra.​—2 Timoteo 1:5; 3:​14, 15.

Kua akakeuia a Sarah Jayne na roto i taua tu ra. Mei te au Berea o te anere mataiti mua, “kua āriki ua oki [aia] i te tuatua [mei tona nga metua e tetai atu puapii] ma te ngakau maora.” Mei te tamariki anga mai, kare e ekoko anga kua tuku aia i te irinaki tau ki roto i tei akakiteia e tona nga metua kiaia. I muri mai, i te maata anga mai aia, kare aia i ariki matapo ua me kare i aru ua i te au apinga tei apiiia kiaia. Kua ‘kimi aia i te tuatua i tataia ra, i te tau anga oki i taua tuatua ra, kare e rā i tukua.’​—Angaanga 17:11.

Ka Rauka ia Koe te Patu i te Akarongo Mou

Ka rauka katoa ia koe te patu i te akarongo mou​—te tu akarongo tei akatakaia mai e te apotetoro ko Paulo i roto i tana reta ki te au Kerititiano Epera ra. Ko taua akarongo ra, i nana ei, “ko te akarongo nei, ko te tumu tikai ïa i te au mea i tatariia nei, e te kite ïa i te au mea kare i akaraia nei.” (Ebera 11:1) Te raukaanga taua akarongo, ka papu tikai ia koe e pouroa taau manakonakoanga e te au tapapa anga, kapiti mai i ta te Atua au taputou no te tuakaouanga, ka kitea ia. Ka papu ia koe e kua akanooia taua manakonakoanga ki runga i te au tika anga papu roa, kare ki runga i te manako moemoea ua. Ka kite koe e kare rava a Iehova i poka no te akono i tana au taputou. (Iosua 21:45; 23:14; Isaia 55:​10, 11; Ebera 6:18) Ka tika tikai te taputou a te Atua no tetai ao ou kia koe mei te mea ra e tei konei te reira. (2 Petero 3:13) E ka kite meitaki koe ma to nga mata akarongo e ko te Atua ko Iehova, a Iesu Karaiti, e te Patireia o te Atua e tika tikai ia, kare i te moemoea.

Kare koe i akaruke uaia e ko koe ra i roto i te patu anga i te akarongo mou. I te pae mai i te akariroanga e kia rauka ua tana tuatua, kua oronga katoa mai a Iehova i tetai putuputuanga Kerititiano i te ao katoa te akono ra no te tauturu i te au tangata ngakau tika kia patu i te akarongo  i te Atua. (Ioane 17:20; Roma 10:​14, 15) E ariki pouroa i te tauturu ta Iehova e oronga maira na roto i taua akaaerenga. (Angaanga 8:​30, 31) Mei te mea e e ua te akarongo no te vaerua tapu o te Atua, e pure tamou no taua vaerua kia tauturu ia koe kia akatupu i te akarongo mou.​—Galatia 5:22.

Auraka e tuku au ki te aronga ekoko te ka aviri ua i tetai tei akatutu i te akarongo i roto i te Atua e tana Tuatua. (1 Korinetia 1:​18-21; 2 Petero 3:​3, 4) Ko te tika, e puapinga maata tikai te akarongo mou i roto i te akaketaketaanga i toou tu anga i te patoi atu i te au maro anga. (Ephesia 6:16) Kua kitea e Sarah Jayne e kua tika tikai te reira, e kua akamaroiroi ua atu aia i tei atoro ra iaia i roto i te are maki kia patu ua i to ratou uaorai akarongo. “E akariro i te tuatua mou e naau uaorai,” i nana ei. “E apii i te Tuatua a te Atua. E noo vaitata ki ta te Atua akaaerenga. E pure tamou. E rave maroiroi i te angaanga a Iehova.”​—Iakobo 2:​17, 26.

I te kiteanga i tona akarongo i roto i te Atua e te tuakaouanga, kua tuatua tetai o tona neti e: “Te irinaki tikai nei koe i teia, kare ainei.” I te ui angaia e eaa tei oronga kiaia i te akaraanga papu noatu tona au timataanga, kua pau atu aia: “Ko te raukaanga te akarongo ia Iehova. E oa tika tikai aia kiaku, e te inangaro oonu ra au iaia.”

[Au Tataanga Rikiriki i Raro]

[Tutu i te kapi 6]

“Mei to tamariki anga” a Timoteo i te apii angaia “i te tuatua tapu i tataia ra” e tona metua vaine e te mama ruau

[Tutu i te kapi 6]

Kua akameitakiia to Berea no te makitoroanga i te au Tuatua Tapu i te au ra

[Akameitakianga]

From “Photo-Drama of Creation,” 1914

[Au Tutu i te kapi 7]

Te akarongoanga e te akonoanga i te Pipiria, kare e kia rauka ua te patu ra i te akarongo

[Tutu i te kapi 7]

“Ka kite akaou au ia kotou pouroa i roto ta te Atua ao ou”