Au Uianga a te Aronga Tatau

Akapeea ra nga amo te apai ra i te aruna o te koreromotu i te akanoo anga ia, i te mea e kua akakite mai a 1 Ariki 8:8 e te kitea ra raua i roto i te ngai Tapu?

Te oronga anga a Iehova i te akapapa anga kia Mose no te puakapa i te metepara ra, ko tetai tumu puapinga ko te aruna o te koreromotu. Ko teia pia, e pia tei tapokiia ki te auro te mou ra i nga papa o te Ture e tetai atu au apinga. Kua akaruke ia i roto i te are i roto roa, te ngai Tapu Rava. I runga i te tapoki o te Aruna e rua nga tutu auro o nga kerupi te oora ra i nga peau. I nga tua o te Aruna, te vaira te au tatai e raukai i nga amo ra i te apai, tei maani ia mei te rakau titima tei vai ia ki te auro. E mea tau, kua momono ia nga amo na roto i nga tatai i te pae o te Aruna. No reira, ma te Aruna i tona ngai i roto i te ngai Tapu Rava o te puakapa, te anga ra ki te itinga, ko nga amo ra kua anga ia ki tokerau e tonga. Kua aiteite tikai te reira i muri mai te vai anga te Aruna i roto i te iero ta Solomona i patu.​—Exodo 25:​10-22; 37:​4-9; 40:​17-21. *

Na tetai paruru e akataka ke i te ngai Tapu Rava mei te ngai Tapu (te pia i vao ake). Kare te au taunga i roto i te ngai Tapu e akara atu ki roto i te ngai Tapu Rava e kia akara atu i te Aruna, i te akaari mai anga te Atua iaia uaorai. (Ebera 9:​1-7) No reira, penei e akara anga ekoko ia 1 Ariki 8:8: “I kitea nga ope amo i roto i te ngai-tapu rava ra, i mua ake i te ngai-tuatua, no te roa, kare ra i kitea i vao.” Kua maani ia rai te manako aiteite i roto ia 2 Paraleipomeno 5:9. Akapeea ra te nga amo i kiteai e tetai ke i roto i te ngai Tapu o te iero ra?

Kua manako etai e kua amiri nga amo ra i te paruru, i te akatupu anga i te au pukupuku kitea ia. Inara kare te reira e tano me te anga ra nga amo ki tokerau e tonga, ma te paruru i te pae i nga amo. (Numero 3:38) Te vaira te akataka anga tau maata atu. Penei e ka kitea ia nga amo me e manga va tetai i rotopu i te paruru e te patu o te iero me kare me ka tomo atu te taunga maata ki roto i te ngai Tapu Rava ra. Kua arai te paruru i tetai akara anga atu i te Aruna uaorai, inara ko nga amo e akaroaia ra i te pae i nga tua ra penei e ka akaari ia mai na roto i te va anga. Me te tau ra teia akataka anga, kare tatou e manako ketaketa no runga i te reira.

Te taka meitaki ra, e manganui te au akataka anga ta tatou ka kite. Kua taiku mai te apotetoro ko Paulo i te au tu tokoiti ua i roto i tana reta ki te au Epera. Kua tuatua mai aia i reira: “Kare ra e meitaki kia tuatua ua atu i taua au mea ra i teianei.” (Ebera 9:5) Te akatuakaou anga te aere maira no te aronga tiratiratu ra ka akatuera i te au tuatau akamatutu anga kia apii ia mai e taua au tangata mei ia Mose, Aarona, Bezaleela, e etai aronga tei kite i te akapapa anga e te angaanga anga o te puakapa.​—Exodo 36:1.

[Tataanga Rikiriki i Raro]