E Kimi i Tetai Ngakau Tau ki To Iehova

“E anga ana koe i te ngakau mā i roto iaku nei, e taku Atua, e akaou ana oki koe i te vaerua tika tikai i roto iaku nei.”—SALAMO 51:10.

1, 2. Eaa ra tatou i tau ei kia akamanako i to tatou ngakau?

E ROA tona tu e manea oki te akara anga. I te akaraanga iaia, kua umere maata te peroveta ko Samuela e kua manako e ko teia te tamaiti mataiapo a Iese ko ta te Atua ia i iki kia riro ei ariki i muri ake ia Saula. Inara kua akakite atura Iehova: “Auraka e akara i [te mata o taua tamaiti na], e tona tu i te teitei; no te mea kua kopaeia aia e au. . . . E akara oki te tangata ki te tu i vao ake, karekā Iehova e akara ïa i te ngakau.” Kua riro atura ta Iehova ra iki anga ko te tamaiti openga a Iese, ko Davida—“tetai tangata nona e tau ki tona uaorai ngakau.”—1 Samuela 13:14; 16:7.

² Ka rauka i te Atua i te tatau i te ngakau tangata, mei tana i akataka meitaki maira i muri ake ra: “Ko au ko Iehova, tei kimi matatio i te ngakau, tei timata i te manako; kia oronga atu au ki te tangata katoa ra i tei tau i tona ra au aerenga, tei tau i te ua o tana e rave ra.” (Ieremia 17:10) Ae, “ko Iehova ra tei timata i te ngakau.” (Maseli 17:3) Inara eaa, te ngakau o te tangata ta Iehova e akara matatio ra? E eaa ta tatou ka rave kia kimi i tetai ngakau tau i tona ra?

“Te Tangata Ngaro ra ko te Ngakau”

3, 4. I roto i teea tu i taiku maataiai te “ngakau” i roto i te Pipiria? Oronga mai i te au akatauanga.

³ Kua tataia te tuatua “ngakau” vaitata i te tauatini taime i roto i te au Tuatua Tapu. I te maata anga o te au tu te taikuia ra i roto i te tu akatutu anga. Ei akatauanga, kua tuatua a Iehova ki te peroveta ko Mose: “E karanga atu koe ki te tamariki a Iseraela, e rave ratou i te atinga au noku: ta te tangata ravarai kia oronga ua mai i te reira ma te ngakau katoa ra, ta kotou ia e rave ei atinga au noku.” E ko te aronga tei apai maira i te atinga ko “te tangata katoa i tae tona ngakau.” (Exodo 25:2; 35:21) Te taka meitaki ra, ko tetai tu o te ngakau akatutuia ko te akakeu anga—te mana i roto roa te raurau ra ia tatou kia rave. Te akaata katoa maira to tatou ngakau akatutuia i to tatou au manako ngakau, to tatou au anoano e te au inangaro oki. Ka rauka katoa kia ki te ngakau i te riri me kare kia ki i te mataku, kia ngaae no te mii me kare kia mataora i te rekareka. (Salamo 27:3; 39:3; Ioane 16:22; Roma 9:2) Ka rauka kia akaparau me kare kia taakaaka,  kia aroa me kare kia makitakita.—Maseli 16:5; Mataio 11:29; 1 Petero 1:22.

⁴ No reira, e putuputu te “ngakau” i te taokotaiia atu ki te akakeu anga e te manako ngakau, inara ko te “manako” te kapitiia atura ki te kite manako. Ko teia te au tu e matauiai taua au tuatua nei me ka taikuia i roto i te au tuatua anga i te au Tuatua Tapu ra. (Mataio 22:37; Philipi 4:7) Inara kare te ngakau e te manako e tuke roa te aite anga. Ei akatauanga, kua raurau atura Mose i to Iseraela: “E akamaara meitaki ana to ngakau [me kare, “e akamaara meitaki ana i to manako,” tata anga i raro ake] ko Iehova anake ra te Atua mou.” (Deuteronomi 4:39, akaaite ia NW) Ki te aronga tata tuatua tei kimi ravenga ra kia patoi iaia, kua na ko atura Iesu: “Eaa kotou i manako kino ei i roto i to kotou ngakau?” (Mataio 9:4) “Te maramaanga,” “te kite,” e te “akamanakoanga” ka rauka katoa kia taokotaiia atu ki te ngakau ra. (1 Ariki 3:12; Maseli 15:14; Mareko 2:6, NW) No reira, te ngakau akatutuia ra, ka rauka katoa kia kapiti i to tatou kite—to tatou au manako me kare to tatou maramaanga.

5. Eaa te aiteanga no te ngakau akatutuia ra?

⁵ Kia tau ki tetai angaanga uriuri anga, ko te aite anga o te ngakau akatutuia ko “te tuanga rotopu te matauia ra, te ngai i roto roa, e no reira te tangata i roto roa i te akakiteanga iaia uaorai i roto i tana au angaanga tuke tuke ra, i tona au anoano, te au inangaro, te au manako ngakau, te inangaro pakari, te au akakoroanga, tona au manako, te akara anga, te akamanako ua anga, tona pakari, te kite, te karape, tana au irinaki anga e tana au akamarama anga, tona maara anga e tona akava ngakau.” Te akatutu maira te reira e eaa tikai to roto ia tatou, “te tangata ngaro ra ko te ngakau.” (1 Petero 3:4) Ko tera ta Iehova e kite ra e te akara matatio ra. No reira, kua rauka ia Davida i te pure: “E anga ana koe i te ngakau mā i roto iaku nei, e taku Atua, e akaou ana oki koe i te vaerua tika tikai i roto iaku nei.” (Salamo 51:10) Akapeea tatou me kimi i tetai ngakau ma?

 “E Akakeu i to Kotou Au Ngakau” ki te Tuatua a te Atua

6. Eaa te akamaroiroi anga ta Mose i oronga ki to Iseraela ia ratou e noo puakapa i te ngai Mataataa i Moabi ra?

⁶ I te akamaroiroianga i te au tamariki o Iseraela tei akaputuia ra ki te ngai Mataataa i Moabi ra i mua ake i te tomoanga ki roto i te Enua Taputouia ra, kua tuatua atura Mose: “E akakeu i to kotou au ngakau ki te au tuatua ravarai taku e karanga atu nei i te akamatakiteanga ia kotou i teianei ra, e kia akaue kotou i ta kotou au tamariki kia akono e kia rave i te au tuatua ravarai i teia ture.” (Deuteronomi 32:46, NW) Kua anoanoia to Iseraela kia “akarongo meitaki tikai.” (Knox) Na te kiteanga meitaki anake i te au akauenga a te Atua ra e raukai ia ratou kia apii tamou tikai i te reira ki roto i ta ratou anaunga.—Deuteronomi 6:​6-8.

7. Eaa te o atura i te ‘akakeuanga i to tatou ngakau’ ki te Tuatua a te Atua ra?

⁷ Ko tetai umuumu anga tavini no te kimianga i tetai ngakau ma ko te raukaanga te kite tika i te anoano o te Atua e te au akakoroanga. E okotai ua tumu no taua kite ra, ko te Tuatua akauruia a te Atua. (2 Timoteo 3:​16, 17) Inara, ko te kite manako ua, kare e tauturu ia tatou kia kimi i te ngakau te ka akamareka ia Iehova. No te kite kia akatupu i to roto tikai ia tatou, ka tika tatou i te ‘akakeu i to tatou ngakau’ kia, me kare “kia akamaara tikai i te ngakau,” i ta tatou e apii ra. (Deuteronomi 32:46, An American Translation) Akapeea te rave anga i teia? Te akataka maira te tata taramo ko Davida: “Te manako nei au i te tuatau taito ra; te akamaaraara nei au i taau ra au angaanga katoa; te akaeatu ua nei au i te au angaanga a to rima ra.”​—Salamo 143:5.

8. Eaa te au uianga ta tatou ka akamanako ia tatou e apii ra?

⁸ Ka tau katoa oki tatou kia akamanako ariki ki runga i ta Iehova ra angaanga. I te tatauanga i te Pipiria me kare te au puka akatumuia i te Pipiria, ka tau tatou kia akamanako ki rungao i te au uianga mei: ‘Eaa ta teianei e apii maira kiaku no Iehova? Eaa te au tu akono o Iehova taku i kite te akaariia maira i konei? Eaa ta teianei tataanga e apii maira kiaku no ta Iehova e mareka ra e te mareka kore ra? Eaa te au tupuanga no te aruanga i te aerenga te inangaro ra a Iehova e kia akaaiteia atu i te aruanga i tana e makitakita ra? Akapeea te pirianga o teianei akakite anga ki taku i kite ke ra?’

9. Eaa te puapinga o ta tatou uaorai apiianga e te akamanko anga oki?

⁹ Kua akataka maira a Lisa * e toru ngauru ma rua ra mataiti e i akapeea tona riro anga kia ariki i te puapinga o te apii akakoroanga e te akamanako anga oki: “I muri ake i toku papetito angaia i te 1994, kua rave angaanga maata au i te tuatua mou no nga mataiti e rua. Kua aere atu au ki te au uipaanga Kerititiano katoatoa, kua rave e 30 ki te 40 ora i te marama i roto i te angaanga tutu aere, e kua taokotai atu ma te au oa Kerititiano. I reira kua akamata au i te panu ke atu. Kua tomo oonu au e kua tae roa kia aati i te ture a te Atua ra. Inara kua rako tangata mai au e kua iki kia tama i toku oraanga. Mei teaa ra toku mataora e kua kite a Iehova i toku tataraara e kia ariki akaou mai iaku! E tamou putuputu ana au i te akamanko e: ‘Eaa ra au i topa ke ei?’ Te pauanga tei putuputu ra i te oki mai kiaku koia oki kua manako kore au i te apii anga e te akamanako akakoroanga. Kare te tuatua mou o te Pipiria i itae tikai i toku ngakau. Mei teianei e aere atu ki mua, ka riro taku uaorai apiianga e te akamanako anga ei tuanga maata i toku oraanga.” Ia tatou e tupu ra i to tatou kite anga ia Iehova, i tana Tamaiti, e tana Tuatua, mei teaa ra te puapinga e kia akataka tatou i tetai tuatau no te akaata anga tau!

10. Eaa ei mea rapurapu e kia taporoporo tatou i te tuatau no ta tatou uaorai apii e te akamanako anga oki?

¹⁰ I roto i teianei ao maata te angaanga, e akaaoanga tikai te kimianga tuatau no te apii anga e te akamanako anga. Inara, te tu nei te au Kerititiano i teia tuatau i te tapa no tetai Enua Taputou meitakiia maira​—ko to te Atua ao ou no te tuatua tika ra. (2 Petero 3:13) Te au tupu anga umere, mei te akapouanga o “Babulonia Maata” ra e te tamaki anga a “Goga i te enua o Magoga” ki runga i te au tangata o Iehova ra, te vaitata mai nei. (Apokalupo 17:​1, 2, 5, 15-17; Ezekiela 38:​1-4, 14-16; 39:2) Te au mea te vai maira ki mua penei ka tuku i to tatou inangaro ia Iehova kia  timataia. E mea rapurapu i teianei kia taporoporo tatou i te tuatau e kia akono i to tatou ngakau i te Tuatua a te Atua!​—Ephesia 5:​15, 16.

‘E Akapapa i Toou Ngakau kia Akarakara i te Tuatua a te Atua’

11. Akapeea to tatou ngakau i te akaaite angaia ki te one?

¹¹ Te rauka ra kia akaaiteia atu te ngakau akatutuia ki te one te tanuia ra te ua o te tuatua mou ki roto. (Mataio 13:​18-23) Te mea matauia ka akapapaia te one tikai kia akapapu ei te tupu anga meitaki o te au mea tatanuia. Ma te aiteite, ka tau katoa te ngakau kia akapapaia, me kare kia teateamamaoia, kia tau ei te ariki anga i te Tuatua a te Atua ra. “Kua akonokono ua ana oki a Ezera [te taunga] i tona ngakau e kimi, e e rave, i te ture a Iehova.” (Ezera 7:10) Akapeea tatou me akapapa i to tatou ngakau?

12. Eaa te ka tauturu ei teateamamao i te ngakau no te apii?

¹² Ko tetai akapapa anga meitaki i te ngakau me tatau tatou i te Tuatua a te Atua ko te pure anga ma te ngakau tae. Te akamataia ra e te akaotiia ra te au uipaanga a te aronga Kerititiano akamori mou ma te pure. Mei teaa ra te tau e kia akamataia ta tatou uaorai tuatau apiianga i te Pipiria ma te pure ngakau tae e kia tamou marie i te tu akono no te pure anga i te tuatau katoa o ta tatou apiianga!

13. Kia kimi i te ngakau tau ki to Iehova, eaa ta tatou ka tika kia rave?

¹³ Ka tika te ngakau akatutuia ra kia papa i te akataka ke atu i te au manako tauruia mai i mua ana. Kare te aronga arataki akonoanga i to Iesu ra tuatau i anoano kia rave i teia. (Mataio 13:15) I tetai pae, a Maria, te metua vaine o Iesu ra, kua “akaeatu akera i roto i tona ngakau” i te au tuatua mou tana i akarongo ra. (Luka 2:​19, 51) Kua riro mai aia ei pipi tiratiratu na Iesu. Kua akarongo atura a Ludia o Tuatira ia Paulo, “e akamaoraoraia iora tona ngakau e te Atu, kia akono aia.” Kua riro katoa aia ei vaine irinaki. (Angaanga 16:​14, 15) Auraka rava tatou e mou ketaketa ua i te au manako tangata me kare te au apiianga akonoanga akaperepereia ra. Kareka ra, kia puareinga tatou “kia riro atu te tangata ravarai ei pikikaa, e tuatua-mou rai ta te Atua.”​—Roma 3:4.

14. Akapeea tatou i te teateamamao anga i to tatou ngakau kia akarongo atu i te au uipaanga Kerititiano ra?

¹⁴ Te akapapaanga i te ngakau kia akarongo i te au uipaanga Kerititiano e mea puapinga maata ia. Penei ka akaanga ke te au manako tau kore i to tatou manako anga mei te au mea e tuatuaia maira. Te au tuatua te tuatuaia maira ka oronga mai e meangiti ua te mana ki runga ia tatou me te aere ke ra to tatou manako ki runga i te au apinga tei tupu ra i mua ake me kare te manako ra i te au mea te tatari maira kia tatou apopo. Ka tau tatou kia akatika ngaueue kore kia akarongo e kia apii oki me kia puapingaia tatou i te au mea te tuatuaia maira. Mei teaa ra te au puapinga ka rauka ia tatou me ka tamanako tatou kia kite i te au tuatua tapu te tuatuaia maira e te aiteanga oki te akakiteia maira e te reira!​—Nehemia 8:​5-8, 12.

15. Akapeea te tu taakaaka i te tauturu anga ia tatou kia maata atu te tau no te apii?

¹⁵ Mei te kapitianga i te au apinga tau kia akameitaki mai i te one ra, ka pera katoa ta tatou tatanuanga i te tu akaaka, te kakianga no te apinga vaerua, te irinaki, te mataku i te Atua, e te inangaro i te Atua ra ka akameitaki mai i to tatou ngakau akatutuia ra. Na te tu akaaka e akamaru mai i te ngakau, i te tauturuanga ia tatou kia riro kia maata atu te tau no te apiianga. Kua tuatua a Iehova ki te Ariki o Iudea ko Iosia: “No te mea kua maru toou ngakau ra, e kua taakaaka koe ia koe uaorai ki mua i te aroaro o Iehova, i to kite anga i te tuatua i tuatuaia . . . kua aue koe ki mua iaku; kua akarongo katoa au ia koe.” (2 Ariki 22:19) E akaaka te ngakau o Iosia e te ariki mai oki. Na te tu akaaka i raukai i nga pipi ‘apii koreia e te kite kore oki’ na Iesu kia mou e kia akono oki i te au tuatua mou pae vaerua tei kore ra i rauka “i te aronga pakari e te kite.” (Angaanga 4:13; Luka 10:21) Kia ‘taakaaka tatou ia tatou uaorai ki mua i te aroaro o to tatou Atua’ ia tatou e tauta ra kia kimi i te ngakau tau ki to Iehova ra.​—Ezera 8:21.

16. Eaa i anoanoiai te tauta anga no te tatanu anga i te kaki anga i te kaikai vaerua?

¹⁶ Kua tuatua a Iesu: “E ao to tei akaaka te ngakau: no ratou te basileia o te ao.” (Mataio 4:3) I te mea kua orongaia mai kia tatou te kite i te pae vaerua, penei na te au taomi anga mei teianei ao kino me kare te au tu mei te kopae rai ka akaaveave i to tatou akava ngakau i tei umuumuia  e tatou. (Mataio 4:4) Ka tika tatou kia akatupu i tetai kaki anga tau no te kai vaerua ra. Noatu me kare tatou e kite i te mareka anga i te akamata anga i te tatauanga Pipiria e ta tatou uaorai apii anga, ma te rave tamou anga ka rauka kia kite tatou e ko te kite ‘ka riro ei mea mataora i to vaerua ra,’ na te reira tatou e akara inangaro atu ei i te au tuatau apii anga.​—Maseli 2:​10, 11.

17. (a) Eaa ra a Iehova i tau ei no to tatou irinaki takiri anga? (e) Akapeea e raukai ia tatou te tatanu i te irinaki anga i te Atua ra?

¹⁷ “E irinaki kia Iehova ma to ngakau katoa ra; auraka ra e irinaki ki toou uaorai kite,” ta te Ariki ko Solomona i akamaroiroi maira. (Maseli 3:5) Te ngakau te irinaki ra ia Iehova te kite ra e noatu eaa Tana ka pati mai me kare ka arataki na roto i tana Tuatua te tika ra. (Isaia 48:17) E tika te tau ra a Iehova kia irinaki takiriia e tatou. Te rauka ra iaia i te rave i te au apinga ravarai tana i akakoro ra. (Isaia 40:​26, 29) No teaa ra, te aiteanga tikai o tona ingoa “Ka Akariro Aia kia Tupu,” te patu ra i te irinaki anga i tona kite kia akatupu i tana i taputou ra! Tei iaia te ‘tuatua-tika i tona katoa ra au aerenga; e te takinga-meitaki i tana katoa ra au angaanga.’ (Salamo 145:17) Inara, kia tatanu i te irinaki anga i roto iaia, ka tau tatou kia “tongi ana kia kite i te meitaki o Iehova” na te akonoanga i ta tatou i apii mei te Pipiria ra i to tatou uaorai oraanga e na te akaataanga ki runga i te meitaki ta teianei e akatupu mai nei.​—Salamo 34:8.

18. Akapeea te mataku tau i te Atua ra i te tauturu anga ia tatou kia ariki i ta te Atua ra arataki anga?

¹⁸ I te tou atuanga ki tetai atu tu te ka akariro i to tatou ngakau kia ariki i te aratakianga tu-Atua ra, kua tuatua a Solomona: “Ko Iehova ra taau e mataku, ka akaruke ei i te kino.” (Maseli 3:7) Kua tuatua a Iehova no Iseraela i taito ra: “Naringa e, ko te tu ïa o to ratou ngakau i roto ia ratou, kia mataku mai ratou iaku, e kia akono tikai i taku au akauenga katoa, auraka e tukumoe, kia meitaki ratou, e ta ratou au tamariki e tuatau ua atu!” (Deuteronomi 5:29) Ae, te aronga te mataku ra i te Atua ka akarongo iaia. Tei ia Iehova te kite “kia oronga mai aia i te maroiroi ki te aronga i tika te ngakau iaia” e kia akautunga oki i te aronga tei kore e akarongo kiaia. (2 Paraleipomeno 16:9) Kia akatere to tatou mataku anga tapu i te akamareka kore i te Atua ra i ta tatou au angaanga katoa, te au manako, e te au manako ngakau oki.

‘E Anoano Atu ia Iehova ma to Ngakau Katoa’

19. Eaa ta te aroa tuanga i te akariroanga i to tatou ngakau kia akarongo atu ki ta Iehova arataki anga?

¹⁹ E tere atu i etai ua atu tu katoa, ka akariro tikai te aroa i to tatou ngakau kia akono i te arataki anga a Iehova. Te ngakau ki i te aroa no te Atua ka akariro i tetai peretana kia inangaro kia kite eaa te ka akamareka i te Atua ra e eaa te ka akamareka kore iaia. (1 Ioane 5:3) Kua tuatua a Iesu: “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.” (Mataio 22:37) Kia akaoonu atu tatou i to tatou anoano no te Atua ra na te akariroanga i te reira ei ravenga kia akaata i tona ra meitaki, na te tuatua putuputu anga kiaia ei oa piri vaitata, e na te tuatua akatenga anga nona ki etai atura.

20. Akapeea tatou i te kimi anga i te ngakau tau ki to Iehova ra?

²⁰ Na te akamanako akaou anga: Ko te kimi anga i tetai ngakau tau ki to Iehova te o atura te akatikaanga kia mana te Tuatua a te Atua i roto ia tatou ra, koia te peretana ngaro o te ngakau ra. Ta tatou uaorai apii anga tau i te au Tuatua Tapu e te akamanako anga meitaki e mea anoanoia. Ka meitaki atu te rave anga i teia ma te ngakau teateamamaoia​—te ngakau kare ra e au manako no muatangana mairai, tetai tei ki ra i te au tu te ka akariro ia tatou kia tau no te apii! Ae, ma ta Iehova ra tauturu, ka rauka tetai ngakau meitaki. Inara, eaa te au rave anga ka rauka ia tatou kia akono ei paruru i to tatou ngakau?

[Tataanga Rikiriki i Raro]

Akapeea Koe me Pau?

• Eaa te ngakau akatutuia ta Iehova e akara matatio ra?

• Akapeea tatou i te ‘akakeu i to tatou ngakau’ ki te Tuatua a te Atua ra?

• Akapeea ta tatou akateateamamao anga i to tatou ngakau kia kimikimi i te Tuatua a te Atua ra?

• I muri ake i te akamanako anga i teianei tumu manako, eaa taau e manako ngakau ra kia rave?

[Au Uianga Apii]

[Tutu i te kapi 17]

Kua akamanako ariki atura Davida i te au apinga pae vaerua ra. Te pera ra ainei koe?

[Au Tutu i te kapi 18]

E teateamamao i toou ngakau i mua ake i te apiianga i te Tuatua a te Atua ra