Ka Rauka Ainei ia Koe i te Akariro i te Ao ei Ngai Meitaki Atu?

“Kare e rauka i te au poritiki i te pau meitaki i te papaanga o te taiate. Kare te reira i akapapa meitakiia no te akanoo akaou i te au irinaki anga no te tu akono tau tei matauia. Kare e rauka i te au koreromotu meitaki roa i te akanoo i te au mea puapinga no te aaere anga me kare te akaipoipo anga, i te akariro anga i te au metua tane kia akono i ta ratou tamariki, i te akatupu akaou i te riri me kare te akama tei tupu ana i mua ana . . . Te maata oki o te au manamanata i te pae o te tu akono tau te tamanata nei ia tatou kare ia e rauka i te akakoreia e te ture.”

TE AKATIKA akapera ra ainei koe ki te au tuatua a tetai tei tauturu i mua ana i te kavamani U.S.? Me koia ia, eaa te pau anga ki te au manamanata e manganui i teia tuatau te tupu maira mei te noinoi, te inangaro kore i roto i te au pamiri, te au tu akono tau kore, te kopaeanga, e tetai atu au mea akakai te akakore ra i te papaanga o te taiate? Te manako ra etai au tangata e kare e pau anga, no reira kua akono ua ratou i to ratou oraanga i tei rauka meitaki ia ratou i te rave. Kua manakonako tetai e a tetai ra ka tu mai tetai arataki akakeu pakari ra e te kite tikai, penei e arataki akonoanga, e ka tou atu ia ratou ki te arataki anga tau.

Ko te tika, e rua tauatini mataiti i topa, kua inangaro te tangata i te akariro ia Iesu Karaiti ei ariki no ratou no te mea kua kite atu ratou e kua tukunaia mai aia e te Atua e kua tau meitaki kia riro mai ei tutara. Noatu rai, i te kite anga a Iesu i to ratou au akakoroanga, kua akaruke viviki aia i taua ngai ra. (Ioane 6:​14, 15) “Kare to teianei ao taku basileia,” i akamarama ei aia i muri akera ki tetai kavana Roma. (Ioane 18:36) Inara, i teia tuatau, e iti ua ka akono i to Iesu tua​—pera katoa te au arataki akonoanga tei akatutu ua ei aronga aru iaia. Kua tauta etai o teia aronga i te akariro i teia ao ei ngai meitaki atu, penei na te tauta anga i te akakeu i te au tutara noa ua me kare na te akonoanga i tetai opati no ratou uaorai. Ka kite tatou i teia na te akaraanga i te au mataiti 1960 ra e te 1970 ra.

Te Au Tauta Anga Akonoanga no te Akamako Mai i te Ao

I te tuatau openga o te 1960, kua putoto atu tetai aronga apii akonoanga i te au enua i Marike Ratino no te aronga putaua e te aronga mamae ra. No teia ra, kua akapapa ratou i te apii anga matara ua, i roto i te reira kua akamaramaia a Karaiti e kare ua ei akaora i roto i te aite anga o te Pipiria mari ra i roto katoa i te tu poritiki e te pae moni. I Marike, kua manata oonu tikai tetai au arataki akonoanga e manganui no runga i te kino o te au mea puapinga o te tu akono tau e kua akanoo i tetai akaaerenga tei tapaia e ko te Moral Majority. Ko ta te reira akakoroanga koia oki kia tuku i te au tangata ki roto i te opati poritiki te ka akariro ei ture i te au mea puapinga no te pamiri. Ma te aiteite, i roto i tetai au enua Muslim e manganui, kua tauta tetai au pupu i te arairai i te rave anga pikikaa e tei maata atu na te akamaata anga i te akono pu tikai i te Koran.

Te irinaki ra ainei koe e te meitaki nei te ao no taua au tauta anga? Te akaari maira te au tata anga, i te katoa anga, e te topa ua atura te au mea puapinga o te tu akono tau e te atea i rotopu i te aronga apinganui e te putaua te maata atura, kapiti mai i te au enua te kiteaia ra te apii anga matara ua.

No te mea kua poka te Moral Majority i roto i ta te reira au akakoroanga i Marike, kua topiri tei  akamata ra, ko Jerry Falwell, i taua akaaerenga i te 1989. Kua tupau mai tetai atu au akaaerenga i tona ngai. Noatu rai, ko Paul Weyrich, ko tei taangaanga mua i taua tuatua “tu akono tau no te katoatoa,” kua tata i roto i te makatini Christianity Today: “Noatu me ka autu tatou i roto i te au poritiki, kua manuia kore ta tatou autu anga no te akatupu i te au papaanga takinga meitaki ta tatou e irinaki ra ei mea puapinga.” Kua tata katoa aia: “Kua riro mai te au peu matauia ei mea akaaka roa atu. Kua taii tatou ki roto i te topa anga o te peu o tetai au tuanga maata roa o te tuatua enua, e topa anga maata tikai e kua autu atura te au poritiki.”

Kua akaari mai te tangata tata pepa e e tata ko Cal Thomas i tana i manako ei tarevake anga maata i roto i te tautaanga i te akateitei i te taiate tangata na roto i te au poritiki: “Te tupu maira te taui anga tikai mei tetai ki tetai, kare e na roto i te re anga i te iki anga, no te mea kare e ko te puapinga e te poritiki to tatou manamanata maata mari ra ko te tu akono tau e te pae vaerua.”

Inara akapeea koe me akatikatika i te au manamanata i te pae akono tau e te pae vaerua i roto i tetai ao kare te au turanga papu, i reira te iki ra te au tangata no ratou uaorai i te mea tika e te tarevake? Me kare e rauka i te au tangata rongoia e tei akakoro meitaki ra​—i te pae akonoanga me kare ra​—i te akariro i teia ao ei ngai meitaki tikai, naai i reira? Mei ta tatou ka kite i roto i te atikara ka aru mai, te vaira te pau anga. Ko te tika, te vaira te pau anga i roto i te tumu i karangai a Iesu e kare tona Patireia e no teianei ao.

[Akameitakianga no te Tataangas i te kapi 3]

Children: UN photo; globe: Mountain High Maps® Copyright © 1997 Digital Wisdom, Inc.