Kua Rave Matou i Tei Rauka Meitaki ia Matou!

“E RAVE i tei rauka meitaki ia koe.” Kua orongaia taua ako anga tau ki tetai mitinari e tetai mema o te Pupu Akaaere o te Au Kite o Iehova. Inara, eaa ka orongai i taua ako anga tau ki tetai orometua kite? Kare ainei e e aronga tau te au mitinari te autu ra i te au ra i te au manumanu, te au ovi, te vera, te maki, e te au tu ngata tuke tuke?

Ko te tika, e aronga noa ua te au tane e te au vaine mitinari o te Au Kite o Iehova, e au Kerititiano no to ratou inangaro oonu ia Iehova e to ratou au tangata tupu kua akakeu ia ratou kia tavini i roto i te au enua tuke tuke. Te tauta ra ratou i te tavini ia Iehova ki tei rauka meitaki ia ratou i te rave, te akara atu anga kiaia no te maroiroi.​—Ephesia 6:10.

Kia kite maata atu no runga i te angaanga mitinari, ka akamanako ana taua e te akapou ra taua i tetai ra i te atoroanga i tetai kainga mitinari tau ua i Aperika Opunga.

Tetai Ra i Roto i te Angaanga Mitinari

Te vaitata nei i te 7:00 a.m. Kua tae taua ki tetai kainga mitinari kua tano atu e kia piri atu ki roto i tetai uriuri anga o te irava Tuatua Tapu no te ra. Kua turou maana mai te ngauru mitinari ia taua e kua neke atu e kia va mai tetai ngai noo anga no taua i te kaingakai. Ia maua e aravei ra i tetai e tetai, kua akakite mai tetai o te au mitinari, kua pou e manganui te au mataiti i roto i tana tukuanga angaanga, i tetai tupu anga mataora tei tupu kiaia i roto i te anganga orometua. Inara kua akamutu marie ta matou uriuri anga i te akamaara anga mai te tiamana o taua ra o te uriuri anga ki te pupu mataora e kua tae te taime no te akamanako i te irava no te ra. Ka raveia te uriuri anga i roto i te reo Varani. Noatu kare taua e tuatua ana i taua reo, kua taka meitaki mei te tu o ta ratou tuatua anga e te taangaanga meitaki nei te au mitinari kare i anauia i reira i te reo.

I muri mai i te uriuri anga i te Tuatua Tapu, kua raveia te pure ngakau tae, e i reira kua tae te taime no te kaikai anga popongi. Ia taua e rave ra i te au kai cereal maata tikai, kua raurau mai te mitinari e noo maira i te pae ia taua e kia tuku maua i te au meika tipupuia ki runga i te reira. Kua akamarama atu taua e kare taua e reka ana i te au meika, inara kua taputou mai aia e ka taui taua i to taua manako me tamata oki taua i te au meika i reira. No reira kua tuku atu taua i tetai au potonga ki ta taua cereal. Kua tika oki aia! E reka tikai teia au meika​—e vene oki mei te aiti kirimi rai! E kua akapapuia mai kia taua e ko te varaoa Varani te orongaia ra kua tunuia i teia popongi i roto i tetai are toa i tetai tua mai i te mataara mei te kainga mitinari.

I muri mai i te kaikai i te popongi, ka akapou taua i te ra ma tetai tokorua mitinari, ta taua ka tapa ko Ben raua ko Karen. Kua rongo ana taua i te ngai uua i teia enua Aperika Opunga, e te inangaro nei taua i te akapapu i te au ripoti.

I te tae anga matou ki te ngai tiaki pati, kua kite atu matou penei e tatini ua tangata e tiaki ra.  Kare i roa ana, te rave ra to taua nga tokorua mitinari i tetai uriuri anga oraora ma tetai vaine e tana tamaiti no runga i tetai tumu tuatua Pipiria. Kare i kite i te reo Varani, kua tu ua maua i reira e kua kata ua! Koi ariki ei taua vaine i nga kopi o Te Punanga Tiaki e te Awake!, kua tae mai te pati, i reira kua tauta te katoatoa i te kake kapipiti atu ki runga i te reira, i taua taime rai! Ia matou e piki ra ki runga, kua opara atu te urupu ia matou na muri mai. E mea ngata tikai no te akono i te tu parani ia tatou e aere ra ki muri i te pati. I te akamata anga te tangata akaoro, kua mou piri atu tatou. Mei tetai taime, kua tapupu viviki te pati, e kua kake mai tetai au tangata e kua piripiri oki. Kua kata atu taua i te au patete i runga, e kua kata mai ratou. Mei teaa to taua anoano i te tuatua atu kia ratou!

I to matou pati e aere viviki ra, kua akara atu matou ki vao i te maramarama i te au angaanga e tupu ra i runga i te mataara. Te aaere ra nga vaine e rua i te pae i tetai e tetai ma tetai apinga teiaa i runga i to raua upoko. Te parani ra tetai ia raua i tetai pakete vai maatamaata. Kua oora tetai tangata okooko i tetai parangikete i te pae mataara e kua akapapa ki runga i te reira i te au apinga akamanea iti ua tana e manakonako ra no te oko. I te au ngai ravarai te vaira te au tangata te tutaki ra me kare te oko ra vaitata rai i te au apinga ka rauka i te tutakiia me kare te okoia.

Ma te poitirere kua kite mai a Ben, e tu ra i te pae mai iaku, e te paopao ra tetai apinga i tona nga vaevae. Eaa oki te reira? Kua ki oki te pati, inara kua tupu akaou te paopao anga. Kua rauka iaia i te akara atu ki raro. I roto i tetai pute i te pae i tona vaevae te vaira tetai mokora ora tei tuku mai i to te reira katu i vao i te pute e kua pao atu iaia! Kua akamarama mai a Ben e papu e te apai ra te ona o te mokora i te reira ki te makete kia okoia.

I te tae anga tatou ki ta matou ngai angaanga, kua mareka tikai tatou i te kite atu e ka atoro atu tatou i tetai ngai tangata Aperika tau ua. I te taeanga ki te kainga mua, kua pokarakara maroiroi a Ben kia akamatakite atu i te tangata o te kainga. Akapera oki te tangata me “topapa i te ngutupa” i teia tua o te ao. Kua aere mai tetai mapu tane e kua akamarama mai e maata roa tana angaanga inara kua pati mai kia oki akaou atu taua i taua ra rai.

I te pae mai, kua aravei atu taua i tetai vaine te tuatua ra i tetai reo kare a Ben i marama meitaki. Kua kapiki atu aia i tana tamaiti e kua pati atu iaia kia uri no runga i ta Ben ka tuatua. I te akamutu anga a Ben, kua ariki te vaine i tetai poroutia no runga i te au tumu tuatua Pipiria, e kua taputou mai tana tamaiti no te akamarama atu no runga i te reira. I te toru o te kainga, te vaira te au mapu tane e noo ra i mua i te aua. Kua tu viviki e rua ia ratou mei to raua noo anga e raukai i te au manuiri te noo ki raro. Kua aru mai tetai uriuri anga oraora no runga i te taangaanga i te koroti i roto i te akamori anga. Kua akanoonooia te akapapa anga e kia akamaata atu i te uriuri anga i tera mai epetoma. Kua tae te taime no te atoro akaou i taua mapu tane piti ra ta taua i aravei i te kainga mua. I te akaraanga kua rongo ke ana aia no runga i ta taua uriuri anga ma te au mapu tane i te pae mai. E manganui tana ui anga Pipiria e kua pati mai e kia akonoia tetai apii Pipiria. I muri ake i te akaraanga i tana karena, kua akatika a Ben no te oki atu a taua taime rai i te epetoma ka aru mai. Ia tatou e oki atura ki te kainga mitinari no te kaikai avatea, kua akamarama mai a Ben raua ko Karen e kia parani meitaki raua i ta raua angaanga apii Pipiria no te mea ka rauka ngoie ua ia raua i te akamata maata i te au apii Pipiria i te ka rauka ia raua i te akono atu.

Kua akameitaki atu taua ia raua no runga i te taka meitaki o to raua reo Varani. Kua akamarama mai a Ben e kua tavini ana raua ko Karen ei nga mitinari e ono mataiti, e te akamata nei raua no te akono tau i te reo Varani. I te apiianga i tetai reo ou kare ia i te mea ngoie, i akapapu mai ei raua, inara kua puapinga te tamou marie anga.

I te 12:30 p.m., kua akaputuputu pouroa mai te au mitinari takapini i te kaingakai. Kua kite mai taua i te au ra tataki tai, kua tukunaia tetai mitinari tuke kia akapapa i te kai i te popongi e te avatea e kia tama i te au mereki a muri mai. I teia ra, kua akapapa mai tetai o  te au mitinari i te moa varaipani reka tikai e te pitate varaipani, ma tetai salad tomati​—tana i akapapa ra!

Eaa ta Ben raua ko Karen parani no te avatea? Kua akamarama mai raua e e akaangaroi ana te katoatoa mei te ra mei te 1:00 p.m. ki te 3:00 p.m., tei matauia kua taangaanga te au mitinari i taua tuanga o taua taime no te apii anga me kare no te akaangaroi anga. Kare taua i poitirere ana i te tuatua anga mai a Karen kia taua kare e roaia ka matau te au mitinari ou i teia peu!

I muri mai i te tuatau akaangaroi anga, kua oki akaou matou ki roto i te angaanga orometua. Kare rai tetai tangata tei inangaro ra ta Ben i tauta ana i te atoro no tetai tuatau i te kainga, inara kua aere mai nga mapu tane ki te ngutupa i te pokarakara anga a Ben i tona nga rima. Kua akakite mai raua kia matou e kua taiku ana te tangata o te kainga e ka atoro atu a Ben e kua tuatua pakari mai e kia rauka ia raua tetai puka Pipiria tauturu ua Te Kite te ka Arataki ki te Ora Mutukore. Kua mataora matou no te akaruke atu i tetai kopi o taua puka na raua. Aru mai, kua kake atu matou ki runga i tetai pati te ka apai atu ia matou ki tetai ngai i reira ka rave a Karen i tetai apii anga Pipiria ma tetai vaine inangaro ra.

Ia tatou e aere ra na runga i tetai mataara kiia e te tangata, kua akakite mai a Karen kia taua e kua aravei atu aia i taua vaine i tetai ra koi aere ei raua i roto i tetai taxi ma tetai atu au patete. Kua oronga atu a Karen i tetai aenga pepa na te vaine kia tatau i taua tuatau teretere anga. Kua tatau te vaine i te aenga pepa e kua pati mai i tetai mea tuke. Kua tatau aia i te reira ma te inangaro maata. I te akamutu anga te akaoro anga, kua rave a Karen i te akapapa anga no te atoro akaou i taua vaine i tona kainga e kua akamata i tetai apii Pipiria tau tikai i roto i te poroutia Eaa ta te Atua e Umuumu Maira ia Tatou? I teia ra, te aere nei a Karen i te akono i te apiianga rima o taua poroutia.

Kua mataora tikai maua no to maua ra i roto i te angaanga koro, inara te vaira te au ui anga na maua no runga i te angaanga mitinari. Kua akapapu mai to maua nga taeake akono e me tae atu matou ki te kainga, ka akapapa raua i tetai kai tau na matou e ka pau mai i ta maua au ui anga.

Akapeea Ratou i te Akono Tamou Anga i te Aerenga Tau

Koi kai ei i te au uamoa varaipani, ma te varao Varani, e te titi, kua apii maata atu taua no runga i te oraanga mitinari. E ra akaangaroi anga te Monite no te au mitinari me kare te akono ra i te au mea. Kua akapou te maata anga o te au mitinari i tetai taime o taua ra i te tataanga ki te au pamiri e te au taeake. E mea puapinga te au nuti mei te kainga kia ratou, e te reka ra te au mitinari no te tukuanga e te raukaanga te mere.

I te mea te noo ra e te angaanga vaitata ra te au mitinari, e mea puapinga e kia akono ratou i te komunikeiti anga meitaki na roto i te oaoa anga ma tetai au taeake mitinari e na te uriuri anga i te au mea pae vaerua. No te reira, kapiti atu i te akonoanga i tetai papaanga tamou o te apii Pipiria, i te au aiai Monite e apii ana te au mitinari i te Pipiria ma te makatini Punanga Tiaki. Kua akataka mai a Ben e me noo kapipiti te au mitinari mei te au ngai tuke te aerenga mai, ka rauka kia kopaeia te au manako tuke meangiti ua, inara ka tauturu te au apinga pae vaerua te  apiianga a te pamiri ia ratou kia akono i te reva au ua e te taokotai tikai. Kua akakite mai aia ka tauturu katoa e auraka kia manako maata tetai i tetai uaorai.

E mea puapinga katoa te tu akaaka. Kua tukunaia te au mitinari, kare e kia taviniia mai, mari ra kia tavini atu. Kua akakite mai to maua nga taeake e ko tetai o te au mea ngata kia tuatua i roto i tetai ua atu reo koia oki “te tataraara nei au,” koia tikai me tataraara mai tetai tangata no tetai apinga tana i tuatua me kare i rave akakoro kore ra. Te akamaara maira a Ben kia maua i te akaraanga a te Pipiria o Abigaila, tei tataraara no te tu kino o tana tane e kua akamaru atu i tetai turanga te ka taki atu ki te tumatetenga. (1 Samuela 25:​23-28) Te turanga “kia noo ma te au” e tuanga puapinga ia no te riro anga mai ei mitinari meitaki.​—2 Korinetia 13:11.

Okotai taime i te marama ka akono te au mitinari i tetai uipaanga no te uriuri anga i te au mea te o atura te pamiri, e pera katoa i te taui anga i te papaanga. I muri mai, kua kaikai te katoatoa i te kai venevene. Kua akaraanga ei akapapa anga tau teia​—e te reka tikai​—kia taua.

I te akamutu anga te kaikai anga, ka tutaka aere taua i te kainga mitinari. Kua kite atu taua, koi akanooia te kainga ma te tau ua, te rave taokotai ra te au mitinari i te akono e kia ma ua te reira. Te vaira te piriti, tetai matini pua kakau, e tetai umu. Kua akakite mai a Karen kia taua e i roto i te au enua toropika, mei teia rai i Aperika Opunga, ka rauka rai te matini akaanuanu. Te ngai noo anga tau ua, te kai reka, e te matakite anga i te pae kopapa te tauturu ra i te au mitinari kia vai matutu e te angaanga ua.

Akara ki Runga i te Au Mea Papu

Kua umere tikai maua no runga i te au mea ta maua i kite ra. Ka rauka ainei e kia riro te angaanga mitinari e no maua? Akapeea e raukai ia maua i te kite? Kua oronga mai to maua nga taeake akono i tetai au mea ka tau kia akamanakoia.

Te mea mua, kua akakite mai raua kia maua, kare te au mitinari Kerititiano e aere i te kimi i te angaanga tarekareka. Te kimi ra ratou i te au tangata ngakau tika tei inangaro i te apii no runga i te au taputou meitaki a te Atua. Te akapou ra te au mitinari e 140 ora i te marama okotai i roto i te angaanga koro, no reira e mea puapinga te inangaro i te angaanga orometua.

‘Inara,’ kua umere maua, ‘akapeea te au ovi, te au moko, e te au manumanu?’ Koi kiteai teia i roto i te au tukuanga angaanga mitinari e manganui, te akakite maira a Ben kia maua, ka matau ua te au mitinari i te reira. Kua karanga mai aia e e au mea tuke ua ake to te tukuanga angaanga mitinari, e kare e roa atu, ka akara tika te au mitinari ki runga i te au tu papu o ta ratou tukuanga angaanga. Ko te au turanga i mua ana tei akamanakoia ei mea “tuke” kare e roaia ka riro mai ei mea matauia, e i tetai turanga ka reka ia. Ko tetai mitinari tei tavini ana i Aperika Opunga no tetai au mataiti e manganui i mua ake ka maro ei te au apainga nona uaorai iaia kia oki ki te kainga kua tuatua e kua ngata atu iaia i te akaruke i tana tukuanga angaanga i te akaruke i tona uaorai enua i te au mataiti i topa ra. Kua riro tana tukuanga angaanga mitinari ei kainga nona.

Kua Papa Ainei Koe?

Kua oronga mai a Ben raua ko Karen i tei maata i te akamanakoia e maua. Akapeea koe? Kua manako ana ainei koe i te tavini ei mitinari i tetai enua ke? Me koia ia, penei te vaitata atura koe ki taua akakoroanga mei taau i manako. Ko tetai o te au mea maata tei umuumuia koia oki ko te inangaro i te angaanga orometua tamou e te rekareka anga i te angaanga tauturu i te tangata. E akamaara, kare te au mitinari i te aronga ririnui roa mari ra e au tane e te au vaine tau ua. Te rave ra ratou i tei rauka meitaki ia ratou no te akatupu i tetai angaanga puapinga rava.

[Au Tutu i te kapi 27]

Te akamata ra te au ra taki tai ma tetai uriuri anga i te irava Pipiria

[Au Tutu i te kapi 28, 29]

Au tutu mei Aperika mai

[Tutu i te kapi 29]

Ka riro te oraanga mitinari ei mea puapinga tikai