Naai Tatou e Akataka ke Atu i te Aroa o te Atua?

“Te anoano nei tatou iaia, no te mea koia ana tei anoano maiia tatou nei.”​—1 IOANE 4:​19.

1, 2. (a) Eaa ra i puapinga maatai te kiteanga e te aroaia maira tatou? (e) Noai te aroa ta tatou e umuumu maata ra?

MEI teaa ra te puapinga maata kia koe kia kite e te aroaia maira koe? Me te tamaiti varevare anga mai ki te pakari anga, ka ruperupe te au tangata i te aroa. Kua akara ainei koe i tetai pepe tei takave aroaia ra i roto i nga rima o tona metua vaine? E putuputu te taime, e noatu eaa te tupu ra takapini iaia, me akara atu taua pepe ra ki roto i nga mata katakata o tona metua vaine, te vai pumaana ra aia, te au ra i roto i nga rima o te metua vaine te aroa ra iaia. Me kare te maara ra ainei koe i akapeea toou tu i taua tuatau pekapeka ra i etai taime i toou au mataiti ou anga ra? (1 Tesalonia 2:7) I etai tuatau, penei kare koe i kite e eaa taau i anoano me kare noatu eaa toou manako ngakau, inara mei teaa te puapinga maata kia kite e kua aroa mai toou metua tane e te metua vaine ia koe! Kare ainei i te tauturu kia kite e kua rauka ia koe te aravei atu ia raua ma tetai ua atu manamanata me kare uianga? E tika ra, i te oraanga katoa, ko tetai o to tatou au umuumuanga maata roa atu koia oki kia aroaia mai. Te akapapu maira taua aroa e e puapinga to tatou.

² Te aroa akakoromakianga o nga metua o tetai te tauturu tika maira i te tupuanga tika e te tau oki. Inara, ko te irinaki anga e te aroa maira to tatou Metua i te rangi, ko Iehova, ia tatou e maata rava atu te puapinga ki to tatou pae vaerua e te manako ngakau oki. Tetai papaki o te aronga tatau i teia makatini penei kare to ratou nga metua i utuutu tikai ia ratou. Me ko te tika te reira i toou turanga, e akamaroiroi. Noatu me kare te aroa metua ra me i puapinga kore te reira, na te aroa tiratiratu o te Atua ra e pau mai i te reira.

3. Akapeea ta Iehova ra akapapu anga ki tona au tangata i tona aroa no ratou?

³ Kua tou maira Iehova, na roto i tana peroveta ia Isaia, e ka rauka kia “akangaropoina” tetai metua vaine i tana tamaiti e utuutu ra, mari ra kare aia e akangaropoina i tona au tangata. (Isaia 49:15) Mei te reira katoa, kua tuatua irinaki maira Davida: “Akaruke ua toku metua tane e toku metua vaine iaku, ei reirā Iehova e rave mai ei iaku.” (Salamo 27:10) Mei teaa ra te akapapuanga! Noatu eaa toou au turanga, me kua o mai koe ki roto i tetai pirianga akatapuia ki te Atua ko Iehova, ka tau koe kia maara e ko tona aroa noou e maata rava atu i to tetai tangata ra!

E Tamou ia Koe Uaorai ki to te Atua Aroa

4. Akapeea te akapapu anga ki te au Kerititiano o te anere mataiti mua ra i to te Atua aroa?

⁴ I naea koe i kite muai i to Iehova ra aroa? Penei, e aiteite toou kite anga ki to te au Kerititiano i te anere mataiti mua ra. I te pene 5 o ta Paulo reta ki to Roma kua akataka manea maira i akapeea te aronga rave ara, tei akataka keia ra mei te Atua, i te riro anga kia kite i te aroa o Iehova ra. I te irava 5, ka tatau tatou: “Kua riringiia mai te anoano o te Atua ki roto i to tatou ngakau e te Vaerua Tapu i orongaia mai kia tatou nei.” I te irava 8, kua tuatua katoa mai a Paulo: “Kua akamaata ua maira te Atua i tona aroa ia tatou nei, i te mea te vai tangata ara ua nei rai tatou, i mate ei te Mesia no tatou nei.”

5. I akapeea koe i ariki ei i te maata o to te Atua ra aroa?

⁵ Na roto i tetai tu aiteite, i te oronga angaia te tuatua mou mei te Tuatua a te Atua ra kia koe e kua akamata koe i te akono i te akarongo, kua akamata te vaerua tapu o Iehova i te angaanga i roto i toou ngakau. I teianei tu kua akamata koe i te ariki i te maata o ta Iehova i rave i te tonoanga mai i tana Tamaiti akaperepere kia mate noou. Na reira ta Iehova tauturu anga ia koe kia kite e akapeea tikai te maata o tona aroa no te au tangata. I toou kite anga i te reira, noatu rai e kua anauia mai koe ei tangata ara tei takake ra mei iaia, kua akatueraia mai e Iehova te mataara no te au tangata kia akariroia ei tuatua tika ma te manakonako anga no te oraanga mutu kore, kare ainei toou ngakau i akatukiaia? Kare ainei koe i manako ngakau i te inangaro ia Iehova ra?—Roma 5:10.

6. Eaa tatou i manako ngakau ei i etai taime e te mamao ke atura tatou mei ia Iehova?

⁶ I te akavaitata angaia e te aroa o to Metua i te rangi ra e te akatikatika anga i toou oraanga kia arikiia mai e ia, kua akatapu koe i toou oraanga ki te Atua. Te rekareka nei koe i teianei i te au ma te Atua. Inara, kare ainei koe e manako ngakau mamao ke atu ana mei ia Iehova? Ka rauka te reira kia tupu ki tetai ua ia tatou nei. Inara kia maara e kare te Atua e taui ke. Te tamou marie ra e te ngaueue kore oki tona aroa mei te ra ra, kare ra e akamutu te tukuanga mai i tona marama maana ki te enua nei. (Malaki 3:6; Iakobo 1:17) I tetai tua, ka rauka ia tatou kia taui—noatu me no tetai tuatau poto ua. I te takauri anga te enua, e apa ua o te paraneta ra e riro ana kia tapokiia e te poiri. Pera katoa oki, me ka ariu ke atu tatou mei te Atua, noatu no tetai tu kotinga ua, penei ka kite tatou i te anu i to tatou pirianga kiaia ra. Eaa ta tatou ka rave kia akatikatika i taua turanga ra?

7. Akapeea te akara anga matatio ia tatou uaorai te tauturu anga ia tatou kia vai tamou marie i te aroa o te Atua?

⁷ Me te kite ra tatou i tetai takake anga mei te aroa o te Atua ra, ka tau tatou kia ui kia tatou uaorai: ‘Kua akono tau kore ua ainei au i te aroa o te Atua ra? Kua akaariu marie ainei au mei te Atua ora e te aroa ra, i te akaarianga mai na roto i te au tu tuke tuke i tetai akarongo paruparu? Kua akanoo ainei au i toku manako ki runga “i ta te kopapa” kare “i ta te Vaerua ra”?’ (Roma 8:​5-8; Ebera 3:12) Me kua akataka ke mai tatou ia tatou uaorai mei ia Iehova, ka rauka ia tatou i te akono i te au takainga kia akatikatika i taua au tumu ra, kia oki akaou ki tetai pirianga vaitata e te maanaana ma ia katoa ra. Te raurau maira Iakobo kia tatou: “E akavaitata atu ki te Atua, e nana e akavaitata mai kia kotou na.” (Iakobo 4:8) E tauru ki to ngakau i te au tuatua a Iuda ra: “E aku au akaperepere e, i te patu anga ia kotou uaorai, i to kotou akarongo tapu maata ra, i te pure anga ma te Vaerua Tapu. Tamou tikai kotou i to kotou uaorai inangaro i te Atua.”—Iuda 20, 21.

Kare te Taui Anga o te Au Turanga e Akaanga Ke i to te Atua Aroa

8. Eaa te au taui anga ka rauka kia viviki te tupuanga i to tatou au oraanga?

⁸ Tei roto to tatou oraanga i teianei akatereanga o te au mea nei i te au tauianga e manganui. Kua kite te Ariki ko Solomona e, “e tuatau ra, e te manuia ua, to [tatou] katoa ra.” (Koheleta 9:11) I te po okotai, penei ka taui takiri to tatou oraanga. I tetai ra te ora meitaki ra tatou, i tetai ra maira te maki kino ra tatou. I tetai ra te akara anga tinamou ra ta tatou angaanga, i tetai ra maira kare a  tatou angaanga. Kare e akamatakiteanga, kua rokona vivikiia mai tetai tei akaperepereia ra e te mate. Te rekareka ra tetai au Kerititiano i tetai enua i te au turanga ponuiaau no etai tuatau, e ma te viviki ua i reira, kua tupu mai te takinga kinoanga ta ua. Penei kua akaapa pikikaa ia tatou, e no teia tu, ka mamae tatou i etai tu tau kore. Ae, kare te oraanga i tu ngaueue kore me kare i tinamou oki.—Iakobo 4:​13-15.

9. Eaa ra ka meitaki ei kia akamanako i tetai tuanga o Roma pene 8 ra?

⁹ Me rokoia mai te au apinga mii ra kia tatou, penei ka akamata tatou i te manako ngakau e kua akarukeia mai tatou, penei ka tamanako e kua topa aere mai to te Atua ra aroa no tatou. I te mea te o atura tatou ki taua au tupu anga ra, ka meitaki tatou kia akamanako matakite i te au tuatua akapumaana a te apotetoro ko Paulo tei tataia ia Roma pene 8 ra. Kua tataia taua au tuatua ki te au Kerititiano akatainuia e te vaerua ra. Inara, i te kaveinga te tau katoa ra ki te aronga o te au mamoe ke atu, tei akakiteia ra e tuatua tika ei au oa no te Atua, mei ia Aberahama rai i te tuatau i mua ake i te Kerititiano ra.—Roma 4:​20-22; Iakobo 2:​21-23.

10, 11. (a) Eaa te au akaapa anga a te au enemi i etai taime i te au tangata o te Atua ra? (e) Eaa ra i kore ei taua au akaapa anga ra e tamanata atu i te au Kerititiano?

¹⁰ E tatau ia Roma 8:​31-34. Kua ui a Paulo: “No tatou te Atua ra, ka tika iaai kia māro mai?” E tika, te maro maira Satani e tona ao kino ia tatou. Penei ka akaapa pikikaa mai te au enemi ia tatou, noatu rai i roto i te au akavaanga o te enua ra. Kua akaapaia etai au metua Kerititiano no te makitakitaanga i ta ratou tamariki no te koreanga e akatika kia ariki ratou i te au ravenga rapakau te aati ra i te ture a te Atua me kare no te koreanga e akatika ia ratou kia rave i te au oroa peikani ra. (Angaanga 15:​28, 29; 2 Korinetia 6:​14-16) Ko etai atu au Kerititiano tiratiratu kua akaapa pikikaaia no te meameaau anga no te kore anga ratou e ta i te au tangata i te tamaki anga me kare no te kore e o atu ki te au poritiki. (Ioane 17:16) Kua akatotoa etai aronga patoi i te au pikikaa akakino i roto i te nuti, te akaapa pikikaa anga i te Au Kite o Iehova ei akonoanga rave kino.

¹¹ Inara auraka e akangaropoina i te tuatau o te au apotetoro ra, kua tuatuaia: “I tenana pupu, kua akakinoia ïa e kare e ngai toe, kua kite matou.” (Angaanga 28:22) E puapinga tikai ainei te au akaapa anga pikikaa? Na te Atua i akakite i te au Kerititiano mou ra e tuatua tika, tei akatumuia ra ki runga i to ratou akarongo i te atinga o Karaiti. Eaa a Iehova ka kore ei e aroa atu i te aronga akamori iaia ra i muri ake i tana oronga anga kia ratou i te apinga okomaata rava tei rauka iaia—koia oki ko tana uaorai tamaiti akaperepere? (1 Ioane 4:10) I teianei kua akatuia mai a Karaiti mei te mate e kua akanooia ki te rima katau o te Atua, kia paruru tikai aia i te au Kerititiano ra. Koai ka tika kia akakore i ta Karaiti paruru anga no tana au pipi me kare ka autu i te akaaoanga i ta te Atua ra akavaanga akaperepere no tana aronga tiratiratu ra? Kare rava tetai!—Isaia 50:​8, 9; Ebera 4:​15, 16.

12, 13. (a) Eaa te au turanga ngata me kare pekapeka kare e akataka ke ia tatou mei te aroa o te Atua ra? (e) Eaa te akakoroanga a te Tiaporo i te akatupuanga i te au tu ngata no tatou? (nga) Eaa ra i autu takiri ei te au Kerititiano ra?

¹² E tatau ia Roma 8:​35-37. I te pae atu ia tatou nei, te vaira ainei tetai me kare tetai apinga te ka rauka kia akataka ke ia tatou mei te aroa o Iehova e tana Tamaiti, ko Iesu Karaiti? Penei ka taangaanga a Satani i tona au rima rave i te enua nei kia akatupu i te taitaia maata ki te au Kerititiano. I te anere mataiti i topa ake nei, e manganui to tatou au taeake Kerititiano e te au tuaine kua riro ei aronga takinga kinoia ma te ta ua i te au enua e manganui. I etai au ngai i teia tuatau, te aro atura to tatou au taeake i te pekapeka no te pae puapinga i te au ra takitai. Te kite ra tetai papaki i te mamae no te onge kai me kare no te ngere i te kakau. Eaa te akakoroanga a te Tiaporo i te akatupuanga i teianei au turanga ngata? Ko tetai tumu, no tana akakoroanga kia akaparuparu i te akamori anga mou no Iehova. Te anoano ra a Satani kia irinaki tatou e kua anu te aroa o te Atua. Inara, ko te tika ainei te reira?

¹³ Mei ia Paulo, tei taiku maira ia Salamo 44:22, kua apii tatou i te Tuatua tataia a te Atua ra. Te kite nei tatou e no te ingoa o te Atua ra i tupu ei teianei au mea kia tatou, ki tana “mamoe.” Te o maira te akatapu anga i te ingoa o te Atua ra e te akatika anga i tona tu ngateitei i te ao katoa e pini ua ake. No taua au maroanga maata ra i akatikai te Atua i te au timataanga, kare no te mea kua kore tona aroa no tatou. Noatu ra eaa te au turanga pekapeka ka tupu mai, te akapapuia maira kia tatou e ko to te Atua ra aroa no tona au tangata, kapiti  katoa ia tatou tataki tai, kare i tauiia. Tetai ua atu akara anga ngere anga te ka akamamae mai ia tatou ka riro ei autu anga me tamou marie tatou i to tatou tiratiratu. Te akamaroiroiia maira tatou e te akatinamouia ra na te akapapu anga i te aroa tamou o te Atua ra.

14. Eaa ra a Paulo i irinaki ei i te aroa o te Atua noatu te au tu ngata tei tamamae ra i te au Kerititiano?

¹⁴ E tatau ia Roma 8:​38, 39. Na teaa i akairinaki ia Paulo e kare e rauka i tetai apinga kia akataka ke i te au Kerititiano mei te aroa o te Atua ra? Kare e ekoko anga e na te au tupu anga kia Paulo uaorai iaia e rave ra i te angaanga orometua i akaketaketa i tona irinaki anga e kare te au tu ngata e akakore i to te Atua ra aroa no tatou. (2 Korinetia 11:​23-27; Philipi 4:13) Pera katoa oki, kua kite a Paulo i te akakoroanga mutu kore a Iehova e te au akonoanga i topa ma Tona au tangata. Ka re ainei te mate uaorai ki rungao i to te Atua ra aroa no te aronga tei tavini tiratiratu ra iaia? Kare rava ia! Taua aronga tiratiratu te ka mate ka ora ua atu i roto i to te Atua ra maaraanga apa kore, e nana e akatuakaou mai ia ratou a te tuatau tau ra.—Luka 20:​37, 38; 1 Korinetia 15:​22-26.

15, 16. E akakite mai i etai au apinga kare rava e akariro kia akamutu te Atua i te aroaanga i tona au tavini tiratiratu.

¹⁵ Noatu eaa te tumatetenga ta te oraanga o teia tuatau ka apai mai kia tatou—me ko tetai tumatetenga kino, te maki mate roa, me kare tetai tu taitaia i te pae o te puapinga—kare e apinga ka akapou i to te Atua ra aroa no tona au tangata. Te au angera ririnui, mei te angera akarongo kore tei riro maira e ko Satani, kare e mana kia tapu i to Iehova ra aroaanga i tona au tavini tiratiratu ra. (Iobu 2:3) Penei ka arai te au kavamani, ka tapeka, e ka akono tau kore i te au tavini o te Atua ra e ka tapa ia ratou ei “aronga ariki koreia.” (1 Korinetia 4:13) Taua makitakita tau kore na to te au pa enua ra penei ka taomi i te au tangata kia patoi mai ia tatou, inara kare te reira e uri ke i tei Ngateitei o te ao katoa e pini ua ake kia akaruke ia tatou.

¹⁶ Ei au Kerititiano, kare tatou e tau kia mataku i tetai o te au mea ta Paulo i karanga ra ko “te au mea e vai nei”​—te au tupu anga, te au turanga, e te au tu i roto i teianei akatereanga o te au mea nei​—kare katoa “te au mea e ka tupu” a te tuatau ki mua e akakore i to te Atua ra pirianga ki tona au tangata. Noatu rai e ka tamaki mai te au mana o te enua nei e to te rangi ra kia tatou, te vaira to te Atua aroa ei akatinamou ia tatou nei. Kare oki “te teitei, kare oki te akaaka” e akakore i to te Atua ra aroa, mei ta Paulo i akaketaketa maira. Ae, kare e mea te ka kika ia tatou ki raro, kare katoa tetai apinga e tamata kia akono i tetai mana maata atu ki runga ia tatou, ka rauka kia akataka ke ia tatou mei te aroa o te Atua ra; kare katoa oki tetai ua atu mea angaia maira e akakore i te pirianga o Tei Anga maira ma tona au tavini tiratiratu ra. Kare ua te aroa o te Atua e kore; e mutu kore te reira.—1 Korinetia 13:8.

E Akaperepere i to te Atua Aroa Takinga Meitaki e Tuatau ua Atu

17. (a) Eaa ra te raukaanga to te Atua ra aroa i ‘meitaki maata i tei te ora’? (e) Akapeea tatou i te akakite anga e te akaapinganui ra tatou i to te Atua ra aroa takinga meitaki?

¹⁷ Akapeea te puapinga maata to te Atua ra aroa kia koe? Te manako ngakau ra ainei koe mei ia Davida ra, tei tata e: “E meitaki maata oki tei to takinga-meitaki i tei te ora, ka akameitaki ei toku vaa ia koe. Ka pera rai au i te akameitaki ia koe i toku nei ora anga; ka apai au i oku puke rima i toou ra ingoa”? (Salamo 63:​3, 4) E tika ra, e apinga ainei tetai te ka orongaia mai i teianei ao e  meitaki atu i te rekarekaanga i to te Atua ra aroa e te oa anga tiratiratu? Ei akatauanga, e meitaki atu ainei te aruaru anga i tetai angaanga moni maata i te au o te manako e te mataora anga tei rauka mai i te pirianga vaitata ma te Atua ra? (Luka 12:15) Kua aro atura tetai papaki Kerititiano i te iki anga kia akaruke ia Iehova me kare kia aro atu i te mate. Kua tupu te reira ki te Au Kite o Iehova e manganui i te au puakapa tamamaeanga Nazi i te Tamaki II o te Ao. E tokoiti ua tei topa, kua iki to tatou au taeake Kerititiano ra kia vai atu ki roto i te aroa o te Atua ra, kua puareinga ua kia aro atu i te mate me umuumuia. Te aronga tei vai tiratiratu ra i tona aroa ka rauka kia irinaki i te raukaanga mei te Atua ra tetai tuatau mutu kore ki mua, ko tetai apinga te reira kare e rauka i teianei ao kia oronga mai no tatou. (Mareko 8:​34-36) Inara e maata atu te o maira i to te oraanga mutu kore anake.

18. Eaa ra i inangaro maataiai te oraanga mutu kore?

¹⁸ Noatu rai e kare e rauka kia ora mutu kore ua atu me kare a Iehova ra, e tauta kia tamanako ana eaa te tu o tetai oraanga roa e kare Tei Anga maira ia tatou nei. Ka riro ia ei apinga kore ua, kare e akakoroanga tikai. Kua oronga maira Iehova i te angaanga akamerengoanga ki tona au tangata kia rave i teianei tuatau openga. No reira ka rauka ia tatou kia irinaki e me oronga mai a Iehova, koia Tei Akakoro Maata ra i te oraanga mutu kore, ka ki te reira i te au apinga tau e te akaieie na tatou kia apii e kia rave oki. (Koheleta 3:11) E kimi i te ka rauka ia tatou i te au mareniamu a te tuatau ki mua, kare rava e rauka takiri ia tatou i te marama i “te oonu o te apinga nui o te pakari e te kite i te Atua.”​—Roma 11:33.

Te Anoano Maira te Metua ia Kotou

19. Eaa te akapapu anga openga ta Iesu Karaiti i oronga atu ki tana au pipi ra?

¹⁹ Ia Nisana 14, 33 T.N., i tona aiai openga ma tana 11apotetoro tiratiratu ra, e manganui te au apinga ta Iesu i tuatua kia akamaroiroi ia ratou no tei vai maira ki mua ia ratou. Kua noo tamou vaitata ratou kia Iesu i tona au timataanga, e kua manako ngakau ratou uaorai i tona aroa no ratou ra. (Luka 22:​28, 30; Ioane 1:16; 13:1) I reira kua akapapu atura Iesu kia ratou: “Te anoano maira oki te Metua ia kotou.” (Ioane 16:27) Mei teaa ra te tauturu anga a taua au tuatua ra i te au pipi kia kite i te au manako ngakau maru o to ratou Metua i te rangi ra no ratou!

20. Eaa taau e tamanako ra kia rave, e eaa taau ka rauka kia irinaki?

²⁰ E manganui te ora nei i teianei kua tavini tiratiratu ia Iehova no etai rau ngauru mataiti. Kare e ekokoanga, i mua ake i te openga o teianei akatereanga kino o te au mea nei, e manganui atu te au timataanga ta tatou ka aro atu. Auraka e tuku i taua au timataanga ra me kare te au pekapeka kia akariro kia ekoko koe i te aroa tiratiratu o te Atua ra noou. E mea ngata ra kia akaketaketa maata atu i teianei tika: te anoano maira Iehova ia koe. (Iakobo 5:11) E rave ua atu tatou tataki tai i ta tatou tuanga, kia tiratiratu i te raveanga i ta te Atua ra au akauenga. (Ioane 15:​8-10) E taangaanga tatou i te tuatau ravarai kia akapaapaa i tona ingoa. Ka tau kia akamaroiroi tatou i ta tatou akatika anga kia akapiri vaitata atu kia Iehova i te pure e te apiianga oki i tana Tuatua. Noatu eaa ta apopo ka apai mai, me rave tatou i te ka rauka ia tatou kia akamareka ia Iehova, ka vai tamou rai to tatou au, ma te irinaki anga ki katoa i tona aroa puapinga.—2 Petero 3:14.

Akapeea Koe me Pau?

• Kia tamou marie i to tatou tu tau i te pae vaerua e te manako ngakau oki, ko toai aroa ta tatou ka umuumu tikai?

• Eaa te au mea kare rava e akariro ia Iehova ra kia akamutu i te aroa atu i tona au tavini?

• Eaa ra te tupuanga o to Iehova ra aroa i ‘meitaki maata i tei te ora’?

[Au Uianga Apii]

 [Au Tutu i te kapi 13]

Me manako ngakau tatou e te taka ke ra tatou i to te Atua aroa, ka rauka ia tatou i te akatikatika i te au tumu

[Tutu i te kapi 15]

Kua kite a Paulo eaa aia i takinga kinoiai