Te Taviri ki Tetai Ao Mataora

“KO TE tangata ririnui roa atu tei vai ana​—kare ua i roto i teia nga mareniamu mari ra i roto i te tuatua enua o te tangata ra​—ko Iesu o Nazareta,” i na te Time makatini ei. Ia Iesu i te enua nei, kua kite atu te au tauatini tangata ngakau tika, kare ua i tona tu maata tikai, mari ra i tona manako anga i tetai atu. No reira, kare i te mea poitirere e kua inangaro ratou i te akariro iaia ei ariki. (Ioane 6:​10, 14, 15) Inara, mei tei akakiteia i roto i te atikara i mua ana, kua patoi a Iesu i te piri atu ki roto i te au poritiki.

KUA akanooia ta Iesu pau anga ki runga i nga tumu e toru: te manako akakite anga o tona Metua no te iki anga uaorai a te tangata, kapiti mai i te tutara anga tangata; to Iesu kite anga e te vaira te au mana ririnui kitea koreia te patoi ra i te au tauta anga meitaki a te tangata no te tutara anga; e ta te Atua akakoroanga no te akanoo i tetai kavamani i te rangi ra kia tutara ki rungao i te ao katoatoa. Ia tatou e makitoro vaitata ra i teia au tumu manako, ka kite tatou i te tumu i poka ei ta te au tangata tauta anga no te akariro i te ao ei ngai meitaki atu. Ka kite katoa tatou e akapeea e raukai te manuia anga.

Ka Rauka Ainei i te Au Tangata i te Akaaere ia Ratou Uaorai?

I te anga mai anga te Atua i te au tangata ra, kua oronga atu aia kia ratou i te mana ki rungao i te patireia manu. (Genese 1:26) Inara tei raro ake te tangata ravarai i te tu ngateitei a te Atua. Kia akapapu te tane mua e te vaine i to raua tu kauraro ki te Atua na te akaruke akarongo ua i te ua o tetai tumu rakau okotai, “te rakau e kite ei i te meitaki e te kino.” (Genese 2:17) Ma te maromaroa, kua akono kore a Adamu raua ko Eva i to raua anoano rangatira e kua akarongo kore i te Atua. Te rave anga i te ua araiia kare anake i te keia anga. Kua akatupu te reira i te meameaau anga i te tu ngateitei o te Atua. Te akakite ra tetai tataanga i raro ake no Genese 2:17 i roto i The New Jerusalem Bible e kua tuatua oki a Adamu raua ko Eva “i te tu takake katoa i te pae o te tu akono tau no te reira te patoi ra te au tangata i te akono atu i tona turanga ei  peretana anga ua . . . E tamaki anga oki te ara mua i to te Atua tu ngateitei.”

No te au maro anga pakari i o atura, kua akatika te Atua ia Adamu raua ko Eva e ta raua au uanga kia iki i to ratou uaorai tu oraanga, e kua akanoo ratou i ta ratou uaorai au turanga o te tika e te tarevake. (Salamo 147:​19, 20; Roma 2:14) Ko te aite anga, kua akamata te tamata anga a te tangata i te iki anga uaorai. Kua manuia ainei te reira? Ma te au tauatini mataiti i topa atura, ka rauka ia tatou i te tuatua, kare! Te akakite ra a Koheleta 8:9: “Te tutara ra tetai tangata ki rungao i tetai.” Te akapapu mai nei teia rekoti tangi ua o te tutara anga a te tangata i te tika anga o ta Ieremia 10:23 e: “Kua kite oki au, e Iehova e, e kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.” Kua akapapu mai te tuatua enua e kare e rauka i te au tangata i te tutara ma te manuia me kare Tei Anga ia ratou.

Kua akatika papu a Iesu. Kua rikarikaia e ia te takake anga mei te Atua. “E kare aku peu rave ua,” i nana ei. “Kare oki au i tukumoe i te rave i te mea e mareka mai ei [te Atua].” (Ioane 4:34; 8:​28, 29) No reira, ma te kore te mana mei te Atua kia rauka te taoonga teitei mei te au tangata ra, kare a Iesu i manako ana no te ariki i te reira. Inara, kare te aite anga o teia e te emiemi ra aia no te tauturu i tona taeake. Tei tuke ra, kua rave aia i tei rauka i tona mana i te tauturu i te au tangata kia kimi i te mataora maata roa atu i taua taime e a te tuatau ki mua. Kua oronga katoa mai aia i tona oraanga no te tangata ravarai. (Mataio 5:​3-11; 7:​24-27; Ioane 3:16) Inara kua kite a Iesu “e atianga to te au mea katoa nei,” kapiti mai i to te Atua tuatau no te akatutu mai i tona tu ngateitei ki rungao i te au tangata ravarai. (Koheleta 3:1; Mataio 24:​14, 21, 22, 36-39) Inara, ka akamaara ana, i Edene ra kua tuku au atu to tatou nga metua mua ki te anoano o tetai vaerua kino tei tuatua na roto i tetai ovi kitea uaia. Te taki mai nei teia ia tatou ki te rua o te tumu i kore ei a Iesu i piri atu ki roto i te au poritiki.

Te Tutara Muna o te Ao

Ko Satani, te akakite maira te Pipiria kia tatou, kua oronga atu kia Iesu “i te au basileia katoa o te ao nei, e to ratou kakā” no tetai akamori anga okotai. (Mataio 4:​8-10) Tera te aite anga, kua orongaia kia Iesu te tutara anga i te ao​—inara ki runga i te tika anga a te Tiaporo. Kare a Iesu i inga ana ki roto i teia timata anga. Inara, e timata anga ainei te reira? Ka rauka ainei ia Satani i te oronga i taua apinga mekameka? Ae, no te mea kua tapa a Iesu i te Tiaporo e ko te “ariki o teianei ao,” e kua akataka te apotetoro ko Paulo iaia e ko “te atua o teianei ao ra.”​—Ioane 14:30; 2 Korinetia 4:4; Ephesia 6:12.

Ae, kua kite a Iesu e kare te Tiaporo e manako mai ana i te au tangata. Kua akataka aia ia Satani  ei “ta tangata” e e “pikikaa aia, e e metua oki no te pikikaa.” (Ioane 8:44, The Amplified Bible) I te akaraanga, kare rava tetai ao te ‘vai ua nei rai i raro ake’ i taua vaerua kino e mataora tikai. (1 Ioane 5:19) Inara kare e vai mutu kore teia mana ki te Tiaporo. Kare e roa atu ka akaatea a Iesu, i teianei e vaerua ora ririnui, ia Satani e ka takore pu tikai i tana akamana anga.​—Ebera 2:14; Apokalupo 20:​1-3.

Kua kite katoa a Satani e te vaitata nei tona au tuatau ei tutara no teianei ao i te pou. No reira, te tauta pakari nei aia i te akapikikaa i te au tangata e tae ua atu e kare e rauka i te taui, mei tana i rave i mua ake i te Vaipuke o to Noa ra tuatau. (Genese 6:​1-5; Iuda 6) “E mate ra oki to te enua e to te tai,” i na Apokalupo 12:12 ei, “tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.” Te akaari maira te au totou Pipiria e te au tupu anga o te ao e te noo nei tatou vaitata ki te openga o teia “manga tuatau poto ua.” (2 Timoteo 3:​1-5) Te vaitata mai nei te tauturu!

Tetai Kavamani kia Apai Mai i te Mataora

Ko te toru o te tumu i kore ei a Iesu i piri atu ki roto i te au poritiki koia oki kua kite aia e a tetai tuatau akanooia ki mua, ka akanoo te Atua i tetai kavamani i te rangi ra te ka tutara ki rungao i te enua. Kua tapa te Pipiria i teia kavamani e ko te Patireia o te Atua, e ko te tumu tuatua maata ia o ta Iesu apiianga. (Luka 4:43; Apokalupo 11:15) Kua apii a Iesu i tana au pipi kia pure no taua Patireia kia tae mai, i raro anake ua i ta te reira tutara anga e tupu ei ‘to te Atua anoano i te enua nei, mei tei te ao katoa na.’ (Mataio 6:​9, 10) Penei ka manako koe, ‘Me ka tutara teia Patireia ki rungao i te ao katoatoa, eaa te ka tupu ki te au kavamani akanooia e te au tangata?’

Ka kitea te pau anga ia Daniela 2:44: “E i te au rā o taua au ariki ra [e tutara ra i te tuatau openga o teianei akatere anga], e akatupu ei te Atua no te rangi i tetai basileia, te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra [tei akanooia e te tangata], e ka vai rai te reira e tuatau ua atu.” Eaa ra to te Atua Patireia ka “akapueurikiriki” ei i te au tutara anga i te enua nei? No te mea te maro nei teia i te akatupu ua i te iki anga uaorai e tu te patoi ra i te Atua tei akamaataia e Satani i te kainga i Edene ra. I te pae mai i te patoi anga i tei meitaki no te au tangata ra, ko te aronga te tauta ra no te akatupu i taua tu te tuku ra ia ratou uaorai ki runga i tetai aerenga tuke atu ki Tei Anga ra. (Salamo 2:​6-12; Apokalupo 16:​14, 16) No reira, kia ui tatou kia tatou uaorai, ‘No te tutara ainei tatou a te Atua me kare ra?’

Ka Iki Koe i Taai Tu Ngateitei?

E raukai i te tauturu i te au tangata kia rave i te iki anga tau no runga i te tutara anga, kua akaue a Iesu i tana au pipi kia tutu aere i “te evangelia o te basileia nei, e kako rava ake te ao katoa nei; ei kite no te pa enua ravarai” i mua ake ka tae mai ei te openga o teianei akatereanga. (Mataio 24:14) Koai ma i teia tuatau te kiteia ra takapini i te ao no te tutuanga i te Patireia o te Atua? Ko te Au Kite o Iehova. Ko te tika, ko teia tianara, kua roa ana kua akono te kapi mua i te au tuatua “Akakiteanga i te Patireia o Iehova.” I teia tuatau, te tauturu nei etai ono mirioni Au Kite i roto i te tere atu i te 230 enua i te au tangata kia rauka te kite tika tikai i taua Patireia ra. *

Au Akameitakianga no te Aronga i Raro Ake i te Patireia

Kua rave ua a Iesu i te au mea i ta te Atua mataara. No reira, kare i iki i tetai aerenga takake e te tautaanga i te tauturu me kare i te akamako mai i te akatereanga o te au mea e vai nei na roto i te au angaanga poritiki, kua angaanga pakari aia no te akamaata i te au anoano o te Patireia o te Atua, te rapakau anga anake  ki te manamanata o teia ao. No tona tu tiratiratu kua tutakiia aia ma te terono mekameka i te rangi ra e ko te Ariki tikai o taua Patireia. Mei teaa te meitaki o taua tutaki anga no tona kauraro anga ki te Atua!​—Daniela 7:​13, 14.

Ko te au mirioni i teia tuatau te aru nei ia Iesu i te tukuanga i te Patireia o te Atua na mua e na te kauraroanga ki to te Atua anoano ka rekareka katoa i tetai apinga aroa meitaki ra​—te akameitaki anga no te riro anga mai ei aronga i te enua nei i raro ake i te Patireia o te Atua. (Mataio 6:33) I raro ake i ta te reira tutara anga aroa, ka akatuia mai ratou ki te oraanga apa kore, ma te manakonakoanga o te ora mutu kore. (Apokalupo 21:​3, 4) I na 1 Ioane 2:17 ei: “Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.” Ma Satani e tana aronga aru kua akaateaia e kua tauiia te enua ki roto i tetai parataito i te ao nei ma te kore te pa enua tukeke, te akatereanga okooko pikikaa, e te akonoanga pikikaa, mei teaa atura te maata o te rekareka ka vai i konei e tuatau ua atu!​—Salamo 37:29; 72:16.

Ae, ko te Patireia o te Atua te taviri tikai ki tetai ao mataora, e ko te tuatua akakiteanga te tau ra kia akatakaia e ei tuatua meitaki. Me kare koe i rave ake i te reira, me atoro akaou mai tetai o te Au Kite o Iehova i toou ngai, eaa i kore ei e ariki atu i teia tuatua meitaki ta ratou e apai maira kia koe?

[Tataanga Rikiriki i Raro]

[Au Tutu i te kapi 5]

Akapapu mai te tuatua enua e kare e rauka i te au tangata i te tutara ma te manuia me kore te Atua

[Tutu i te kapi 5]

No te mea te tutara nei aia i “teianei ao ra,” kua rauka ia Satani i te oronga kia Iesu “i te au basileia katoa o te ao nei”

[Au Tutu i te kapi 7]

Kua apii a Iesu i raro ake i te akapapaanga o te Patireia o te Atua, ka riro te ao ei ngai meitaki tikai