Au Uianga a te Aronga Tatau

Te tuatua a te Atua tei rekotiia ia Ieremia 7:16 ko te aite anga ainei e kare te au Kerititiano e pure no tetai ke tei akaateaia mei roto i te putuputuanga Kerititiano no te mea e tangata ara tataraara kore aia?

I muri ake i te akakiteanga i tana akava anga no Iuda akarongo kore ra, kua tuatua atura Iehova kia Ieremia: “E teianei, auraka koe e pure i teianei iti tangata, auraka koe e apai atu i tetai kapiki e tetai pure no ratou, auraka rai e pati mai kiaku nei; kare oki au e akarongo atu ia koe.”​—Ieremia 7:16.

Eaa ra a Iehova i kore ei e akatika ia Ieremia kia pure no to Iseraela ra? Te taka meitaki ra, no te mea kua aati akakoro ratou i tana Ture. Te vai akatuera ua e te akama kore, te ‘keia ra ratou, e ta ua i te tangata, e e akaturi, e e taputou pikikaa, e tutungi i te rakau kakara kia Baala, e e aru aere i te au atua ke.’ Tei tupu, kua akakite atura Iehova ki te ngati Iuda akarongo kore ra: “E ka tuaru atu au ia kotou i mua i toku aroaro nei, mei taku i tuaru i to kotou au taeake ravarai, te uanga katoatoa no Epheraima.” E tikai, kare e tau no Ieremia, me kare i tetai atu, kia pure kia Iehova kia taui i Tana akava anga.​—Ieremia 7:​9, 15.

Kia tau ki teia, kua tata te apotetoro ko Ioane i te pure tau ki te Atua. Te mea mua, kua akapapu aia i te au Kerititiano: “Kia pati ua atu tatou i te au mea ravarai i tau iaia ra, te akarongo maira aia ia tatou.” (1 Ioane 5:14) No reira, te pureanga no tetai ra, te na ko ra Ioane: “Kia kite tetai tangata i tona taeake i te rave anga i te ara mate kore, e pure aia, e na te Atua e oronga mai i te ora nona no tei rave i te ara mate kore ra. Te vai ra te ara mate rava: kare au i karanga e e pure te tangata i te reira.” (1 Ioane 5:16) Kua tuatua katoa a Iesu i te ara ‘kare e akakoreia,’ koia oki, te ara te akakino ra i te vaerua tapu.​—Mataio 12:​31, 32.

 Te aite anga o teianei e ko te aronga tei akaateaia mei te putuputuanga Kerititiano no te ara tataraara kore ra kua rave ana i te au ara “mate” e no reira kare e tau kia pureia atu? Kare ko teia tikai te tumu no te mea i etai au akatauanga no taua au ara ra kare ia i te au ara mate. Ko te tika, e ngata i te kite e me te pera ra ratou. Ko tetai akatauanga tikai ko te Ariki ko Manase o Iuda. Kua akatu aia i te au atarau ki te au atua pikikaa, i te oronga anga i tana uaorai tamaiti ei atinga, te rave purepure, e kua tuku i tetai itoro kotikotiia i roto i te iero o Iehova. Ko te tika, te karanga ra te Pipiria e ‘e maata te kino’ ta Manase e te iti tangata i rave “i ta te pa enua ravarai i pou ia Iehova i mua i te aroaro o te tamariki a Iseraela ra.” No teia pouroa, kua akautunga a Iehova ia Manase te tonoanga iaia na te tapeka angaia ei tuikaa ki Babulonia.​—2 Ariki 21:​1-9; 2 Paraleipomeno 33:​1-11.

E kino maata tikai ainei, te au ara a Manase, e tu te akatupu ra i te mate? I te akara anga kare, te karanga ra te papa anga no runga iaia e: “Kia tairoia ra aia ra, kua kimi aia i tona Atua ia Iehova ra, e kua taakaaka rava iaia uaorai ki mua i te aroaro o te Atua o tona ra ai metua, E kua pure oki aia iaia: e kua kiteia mai aia e ia, e kua akarongo maira aia i tana i pati, e kua akaoki mai aia iaia ki Ierusalema ki tona uaorai basileia. Kua kite pu tikai a Manase i reira e, ko Iehova te Atua.”​—2 Paraleipomeno 33:​12, 13.

No reira, kare tatou e viviki i te manako ua e kua apa tetai tangata i te ara te ka akatupu i te mate no te mea oki e kua akaateaia aia mei roto i te putuputuanga. Penei e ka roa te tuatau ka akaariia mai te tu tikai o te ngakau o taua tangata ra. Ko te tika, e maata te akakite angaia e ko tetai au akakoronga no te akaateaanga koia oki kia rako tangata mai te tangata ara ra e ko te manakonako anga kia tataraara e kia ariu mai.

I te mea e kare taua tangata i roto i te putuputuanga, tetai taui anga i roto i te ngakau e te tu ra ka kiteaia na mua e te aronga te piri vaitata ra kiaia, mei te tokorua akaipoipo me kare te au mema o te ngutuare. Ko te aronga te akara ra i taua au taui anga penei e ka manako e kare te tangata ara i rave ana i te ara te akatupu ra i te mate. Penei e ka akakeuia ratou kia pure e kia akamaroiroiia aia e te Tuatua akauruia a te Atua e ka rave tau a Iehova i te tangata ara ra te rotai ra ma Tona anoano.​—Salamo 44:21; Koheleta 12:14.

Penei e te rauka ra i etai i te akara i te akapapu anga i te irinaki anga e kua tataraara te tangata ara ra, kare paa teia e tau ki te putuputuanga o reira. Penei e ka poitirere ratou, ka manamanata, e ka apa me akarongo ana ratou e kua pure tetai tangata i te ngai tangata no tetai tei ara ra. No teia tumu nei, ko te aronga te manako akakeuia ra kia pure no te tangata ara ra e mea tau kia rave muna ua i te reira, i te akarukeanga i tetai ua atu tupu anga o te tumu ra ki roto i nga rima o te aronga pakari rave apainga i roto i te putuputuanga.

[Tutu i te kapi 31]

Kua akakoreia te au ara maata a Manase i tona taakaaka anga iaia uaorai ki mua i te aroaro o Iehova

[Akameitakianga no te Tataanga i te kapi 30]

Reproduced from Illustrierte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s